எல்லோரும் பதில் சொல்லுங்க ...

சென்ற வாரம், யாரும் எங்களை எந்தக் கேள்வியும் கேட்கவில்லை. 

அதனால், நாங்களே இங்கே உங்களை ஐந்து கேள்விகள் கேட்கிறோம்.

எல்லோரும் பதில் சொல்லுங்கள். 

1) உங்கள் வாழ்க்கையில், நீங்கள் பெரிதும் மதிக்கும் ஒரே ஒரு நபர் யார்? ஏன்? (ஒரே ஒரு நபரை மட்டும்தான் சொல்லலாம்)

2) முதல் கேள்விக்கு நீங்கள் சொல்லும் பதிலில் உள்ள அந்த நபர், அதாவது நீங்கள் பெரிதும் மதிக்கும் நபர், எங்கள் ப்ளாக் படிப்பவரா?

3)  மனிதர்களுக்கு இன்றியமையாத முக்கிய, அடிப்படை தேவைகள் : உண்ண உணவு, உடுக்க உடை, வசிக்க ஒரு வீடு. இவற்றிற்கு அடுத்தபடியாக ஒன்றைச் சொல்லவேண்டும் என்றால், எதைச் சொல்வீர்கள்? (ஒன்றை மட்டும்தான் சொல்லலாம்) 

4)  கோவில், குளம், ஆறு, கடல், மேகக்கூட்டம், யானை, இரயில், குழந்தை - இவற்றில் எதைக் கண்டால், உங்களுக்கு மனம் லேசாகி, காற்றில் பறப்பதுபோல இருக்கும். (ஏதேனும் ஒன்றை மட்டும்தான் குறிப்பிடலாம்) 

5)  உங்களுக்குப் பிடிக்காத ஒரு விஷயத்தை, உங்களுக்குப் பிடித்த நபர் ஒருவர் செய்கிறார் என்று வைத்துக்கொள்வோம். அந்த நிலையில், நீங்கள் .. 

அ) கண்டுக்காம விட்டுடுவீங்க ?

ஆ) இதெல்லாம் எனக்குப் பிடிக்காது என்று முகத்துக்கு நேரே சொல்வீர்கள்?

இ) குறிப்பால் உங்கள் எண்ணத்தை உணர்த்த முயற்சி செய்வீர்கள்?

=========================================

மின் நிலா பற்றி சென்ற புதன் பதிவிலும், ஞாயிறு பதிவிலும் கூறப்பட்டுள்ள சில கருத்துரைகளை ஆவணப்படுத்துவதற்காக இங்கே கொடுத்திருக்கிறேன். 

இவற்றில் சில கருத்துகளுக்கான எங்கள் விளக்கம் மின் நிலா 003 புத்தகத்தில் கொடுக்கப்பார்க்கிறோம். 

===================

திங்கள் முதல் சனி வரை என்னும்போது ஞாயிறன்றுப் பதிவு விடுபடுமே!

====

புதிய பக்கங்களை இணைக்கலாம்.

=====

புத்தகத் தோற்றம் கிடைக்க இங்கிருக்கிற பதிவுகளைத் தூக்கி அப்படியே அங்கே போடக்கூடாது. நிறைய எடிட்டிங் சமாச்சாரங்கள் தேவை.

திங்கள், செவ்வாய் போன்ற கிழமைப் பெயர்கள் பதிவுகளுக்கானவை. அதனால் புத்தகத்தில் அவற்றை எடுத்து விடுங்கள். ஒரு தலைப்பின் கீழ் வருகிற மேட்டர் என்ற தோற்றம் மட்டுமே கொடுக்க வேண்டும். பின்னூட்டம்?.. அறவே வேண்டாம். அதற்கு பதில் பத்திரிகை உள்ளடக்கம் பற்றி வாசகர் கருத்துச் சொல்ல வேண்டுமானால், 'ஆசிரியருக்கு..' என்று கடிதப் பகுதியைத் துவக்கலாம். பொறுக்கி எடுத்த மாதிரி பத்தே கடிதங்கள் போதும். அது ஆசிரியரின் தேர்வின்படி இருக்கலாம்.

ஒரு கிழமைக்கான பதிவில் துண்டு துண்டாக இருக்கிற மேட்டர்களை புத்தகத்தின் வெவ்வேறு பக்கங்களுக்கு மாற்றிக் கொள்ளலாம். திங்கள், செவ்வாய், புதன் கிழமைப் பதிவுகளைத் தவிர்த்து மற்ற கிழமைப் பதிவுகளில் இப்படிப் பிரித்துப் போடுவதற்கு வாய்ப்புகள் அதிகம்.

திங்கள், செவ்வாய் என்று இப்படி வரிசையாக புத்தகத்தில் வர வேண்டும் என்றில்லை.

கலந்து கட்டி ஒரு வாரப் பதிவுகளை மாற்றி மாற்றிப் போடுங்கள்.

கவிதைகள் முக்கியம். அதுவும் காலத்திற்கேற்பவான புதுக்கவிதைகள். ஸ்ரீராமின் கவிதைகளை உபயோகப்படுத்திக் கொள்ளலாம். எங்கள் பிளாக்கில் தனியே கவிதைகளுக்கான பக்கங்களைத் துவக்கலாம்.

கேள்வி--பதில் பகுதிக்கு ஒரு பெயர் கொடுங்கள். 'தேசிங்குராஜனைக் கேளுங்கள்' என்ற பெயரில் ஒரு பத்திரிகையில் தொடர்ந்து கேள்விகளுக்கான பதில்களை நான் எழுதிக் கொண்டிருந்தேன். அந்த மாதிரி ஒரு பெயர் கொடுங்கள்.

கணினி விஷயத்தில் இதெல்லாம் எப்படி சாத்தியப்படும் என்று எனக்குத் தெரியாது.

ஆசிரியர் குழுவின் பங்களிப்பு தான் முக்கியமாகிப் போகிறது.

மின் நிலா -- நிலாவுடன் பொருந்தாத பெயராக எனக்குத் தோன்றுகிறது. நிலா வேண்டாம் என்றால் அம்புலி என்று பெயர் கொடுத்துக் கொள்ளுங்களேன். இல்லையென்றால் உங்களுக்குப் பிடித்த ஏதாவது ஒரு பெயர்த் தேர்வு. யோசியுங்கள்.

மனசில் தோன்றியவைகளை வரிசை படுத்தியிருக்கிறேன். அவ்வளவு தான். ஒரு ஆலோசனை என்றளவில் எடுத்துக் கொண்டால் போதும். 'எங்கள் பிளாக்' ஒரு பத்திரிகை ரூபமெடுப்பது தான் முக்கியமாகிப் போகிறது. அதனால் உங்களால் சாத்தியப்பட்டவைகளைச் செய்யுங்கள். அவை புதுமையாக இருக்கட்டும். மற்றவர்கள் பார்த்து வியக்கிற மாதிரி இருக்கட்டும். வாழ்த்துக்கள்.

======

உங்களின் மின் நிலா முயற்சிக்கு வாழ்த்துக்கள் இந்தப் பதிவைப்படித்துவிட்டு அருமை பாராட்டுக்கள் என்று சொல்லி செல்வதில் எனக்கு உடன்பாடு இல்லை. ஒரு முயற்சி ஆரம்பிக்கும்போது அதைப் பாராட்டுவதோடு ஆக்கப் பூர்வமான எண்ணங்களைப் பகிர வேண்டும் அப்படிச் செய்ததில் ஜீவி ஒருவர் மட்டுமே அதற்காக அவருக்கு ஒரு பாராட்டு ஜீவி சார் சொன்ன சிறப்பான கருத்துக்கள் அனைத்தும் சரியாகவே இருக்கிறது

அவர் சொன்ன கருத்தோடு என் மனத்தில் தோன்றுவதையும் சொல்லுகிறேன். நீங்கள் இந்த புக்கை வெளியிடும் தளத்தில் இந்த புத்தகம் 2 மாதங்கள் மட்டுமே இருக்கும் அதன் பின் அதை டெலீட் செய்துவிடுகிறார்கள் நிரந்தரமாக இருக்க வேண்டும் என்றால் அதற்குக் கட்டண சேவையைப் பயன்படுத்த வேண்டும்.. அதற்குப் பதிலாக நாம் மைக்ரோ சாப்ட் வோர்டில் பதிந்து அதை பிடிஎஃப் ஃபார்மெட்டில் சேமித்து அதை கூகுல் டௌகுமெண்ட்ல் சேவ் செய்து அதை embedded இணைப்பாக எடுத்து நம் தளத்திலே பதிவு செய்தால் நிரந்தரமாக இருக்கும்..

அல்லது சில தளங்கள் இருக்கின்றன அதன் மூலம் இப்படி புத்தகமாக வடிவமைக்கலாம் இது பற்றி முழு விபரத்தை சுரேஷ் என்ற பதிவாளரிடம் கேட்டு அறிந்து கொள்ளலாம் அவர் கையெழுத்து பத்திரிக்கை மாதிரி இணையத்தில் எழுதி வெளியிடுகிறார்

அடுத்தாக தற்போதைய பதிவையே எடுத்து வெளியிடுவதற்குப் பதிலாக உங்களின் ஆரம்பக்கால பதிவுகளிலிருந்து ஒரு கதை சமையல் குறிப்பு கட்டுரைகள் இப்படி 2 வாரத்தில் வெளிவந்ததிலிருந்து சிறந்தவைகளை எடுத்து புக் செய்யலாம் இப்படிச் செய்யச் சொல்லக் காரணம் இப்போது பதிவைப் படிக்க ஆரம்பித்தவர்கள் உங்களின் ஆரம்பக் கால பதிவுகள் அனைத்தையும் படித்து இருக்கமாட்டார்கள் அப்படிச் செய்யாமல் இப்போது உள்ள கரெண்ட் பதிவுகளைப் போட்டால் இப்போதுதான் அதைப் படித்தோம் என்று கடந்து சென்றுவிடுவார்கள்...அதன் உங்கள் முயற்சி வீணாகிவிடும்

இப்படி பழைய பதிவுகளை எடுத்து இதழ் தயாரிக்கும் போது உங்கள் குழுவில் உள்ளவர்கள் இது வரை வெளி வராத துணுக்குகள் கட்டுரைகள் நகைச்சுவைகளை ஆங்காங்கே சேர்க்கும் போது அந்த இதழ் புது பொழிவுடனும் ஏற்கனவே பழைய பதிவுகளை படித்தவர்கள் கூட இந்த இதழில் வேறு என்ன புதிய செய்திகள் வந்து இருக்கும் என்று ஆவலோடு மீண்டும் அதைப் பார்க்க ஆரம்பிப்பார்கள் அது உங்கள் முயற்சிக்கு உற்சாகம் மூட்டும்

இப்படி பழைய பதிவுகளில் போடும் போது அதற்கு வந்த சிறப்பான பின்னூட்டங்களையும் சில வற்றை தேர்ந்தெடுத்து அதையும் அவர்கள் பெயருடன் போடுவது நல்லது காரணம் அதைப் பார்க்கும் அந்த கருத்தை இட்டவர்களுக்குச் சந்தோஷம் கொடுக்கும் உதாரணமாகச் சமையல் குறிப்பி வரும் திங்கள் பதிவைப் பகிரும் போது அந்த குறிப்பைப் படித்துவிட்டு சிலர் இப்படிச் செய்தால் இன்னும் சுவையாக இருக்கும் என்று தரும் டிப்ஸ் மற்றவர்களுக்கும் பயன்படும் அது போல உள்ள பின்னூட்டங்களையும் இந்த இதழில் பதியலாம்.

===========

(பதிவுகளை அன்றே) படிக்க முடியாத போது சேர்த்து படித்துக் கொள்ள வசதிதான்.

நன்றி.

=========

வார புத்தகம் சிறந்த முயர்ச்சி. புத்தகத்தை epub ஃபார்மேட்டில் freetamilebooks தளம் செய்வது போல பதிவேற்றிநால் திரைவாசிப்பான் மென்பொருள் கொண்டு வாசிக்கும் எம் போன்ற மாற்றுத்திறனாளிகளுக்கும் உபையோகமாக இருக்கும்.

========

மின் நிலா 2 இதழ் பற்றி :

மின் நிலா தொகுப்புப் புத்தகம் நன்றாக இருக்கிறது. அந்த இலைகளோடு கூடிய படம்? அடுக்கு மல்லிப் பூ மாதிரியும் இருக்கு, பாரி ஜாதம் மாதிரியும் இருக்கு. படத்தைப் பெரிசு பண்ணியும் பார்த்தேன். இது ஞாயிற்றுக்கிழமைப் பதில் வந்த படமா? நினைவில் இல்லை. மற்றபடி ஒவ்வொரு பதிவுக்கும் தேர்ந்தெடுத்த கருத்துகளைச் சேர்த்திருக்கிறீர்கள். அரட்டையும் பரவாயில்லை. அவரவர் பெயரோடு வந்திருக்கலாம் என்றாலும் எழுதி இருக்கும் விஷயத்தை வைத்து யார் எழுதினது என்பது புரிகிறது. மஞ்சள் முகப்பு/அட்டை(?) நன்றாக இருக்கிறது. சென்ற வாரம் பார்க்கவில்லை, மறந்துட்டேன். அதான் இன்னிக்கு உடனே பார்த்துக் கருத்தும் சொல்லிவிட்டேன். லே அவுட் நன்றாக உள்ளது. இதிலே உள்ளடக்கம், தலையங்கம் மாதிரிக் கருத்துகள்னு போட்டால் ஓர் மின் இதழுக்கான முழுப் பதிப்பாக ஆகி விடும்.

=============

மின் நிலாவும் அழகான அட்டைப் படங்களுடன் நன்றாக உள்ளது. ஒவ்வொரு நாளும் விடுபட்ட பகுதிகளை அனைவரும் படிக்க உதவும் என்பதோடு, புதுமையாகவும் இருக்கிறது. முதல் பகுதியில் அரட்டையில் ஆசிரியர்களின் கருத்துக்கள் ஒவ்வொன்றும் சிந்தனைக்கு விருந்து. ரசித்தேன். மின் நிலாவுக்கு வாழ்த்துகள். பகிர்வுக்கு மிக்க நன்றி.

===============

இப்போதான் மின்நிலா மின்னூலைப் பார்த்தேன், விரைந்து படித்தேன்.

1. அரட்டை - நல்ல பகுதி. வெறும்ன எ.பி. இடுகைகளைக் கோர்ப்பதற்குப் பதிலாக.

2. கவர்ந்த பின்னூட்டங்கள் அல்லது முக்கிய பின்னூட்டங்கள் - இதைத் தவிர்க்கலாம். இல்லாவிடில், யார் எழுதியது என்று சொல்லாமல் பின்னூட்டங்களை மட்டும் போடலாம் (கண்டண்ட் உள்ளவை மட்டும்). இல்லைனா, சிலர் பெயர் மட்டும் வருவது அவ்வளவாக நன்றாக இருக்காது என்று தோன்றுகிறது.

3. மின்னூலின் முதல் படமும் (மலர்), சில இடுகைகளுக்கு முன் இருக்கும் படமும் கவரவில்லை. இதற்கு நீங்க தேர்ந்தெடுத்து படங்கள் சேர்க்கலாம். அல்லது வாசகர்களிடமிருந்தே படங்கள் வரவைத்து அதனைப் போடலாம் (காபிரைட்டைத் தவிர்க்க. எப்போ உங்களுக்கு போரடிக்குது என்று தோன்றுகிறதோ அப்போ இருக்கவே இருக்கு அனுஷ்கா, பாவனா, தமன்னா போன்றவர்கள்)

4. ஒரு இடுகைக்கும் அடுத்த இடுகைக்கும் இடையில் ஒரு ப்ரேக் (Clear marking) இருக்கணும்.

பொதுவா இடாலிக் ஃபாண்ட் உபயோகிக்க வேண்டாம். படிப்பது கஷ்டம்.

போகப்போக, இது நல்ல புத்தக வடிவம் பெறும். வாழ்த்துகள்.

=============

=============================================