நான் பயணம் செய்த இடங்கள் :: குருவாயூர் யானை கொட்டாரம் :: நெல்லைத்தமிழன்

 

நான் பயணம் செய்த இடங்கள்

நெல்லைத்தமிழன் 

(மார்ச்-2023) குருவாயூர் யானை கொட்டாரம் – பகுதி 2 / 3 

குருவாயூரிலிருக்கும் யானைக் கொட்டாரத்தில் இருக்கும் யானைகளைப் பார்த்துக்கொண்டிருந்தோம். அதன் தொடர்ச்சி இந்த வாரத்தில் 

யானைகள் பற்றிய டாகுமெண்டரி, திரைப்படங்களை நான் விரும்பிப் பார்ப்பேன். சமீபத்தில்கூட, யானைக்கூட்டத்தின் நகர்வை அதன் கூடவே பயணித்து எடுத்த டாகுமெண்டரியைப் பார்த்தேன்.

ஒரு காலத்தில் பல மில்லியன் யானைகள் ஆப்பிரிக்க கண்ட த்தில் வாழ்ந்துவந்தன. இப்போது அரை மில்லியன் யானைகளே அங்கு உள்ளன (அதைப் போன்றே அரை மில்லியன் அளவு இருந்த சிங்கங்கள், வெறும் 25,000 ஆகக் குறைந்துவிட்டனவாம்) யானைக்கூட்ட த்தின் தலைவி ஒரு வயது முதிர்ந்த பெண் யானை என்பது எல்லோருக்கும் தெரியும். அந்த த் தலைவிக்கு உதவி செய்ய சீனியர் யானைகள் உண்டு. பேச்சலர் ஆண் யானைக் கூட்டம் சிறிது ஒழுங்கீனமாக இருக்கும். பெண் யானைக்கூட்டம், அதிலும் குழந்தைகள் மற்றும் கர்ப்பமான யானைகளுடன் உடைய கூட்டம் ரொம்பவே ஒழுங்கைக் கடைபிடிக்கும். எப்போதும் யானைக்குட்டிகளை கூட்டத்தின் யானைகள் பார்த்துக்கொண்டிருக்கும். குட்டி யானைகளை நடுவில் வைத்து அவற்றைச் சுற்றி பாதுகாப்பு வளையம்போலவே மற்ற யானைகள் செல்லும். மனிதர்கள் அல்லது மற்றவர்களால் ஆபத்து என்று தோன்றும்போது யானை பிளிரி அல்லது சிறிது முன்னோக்கி வந்து, எங்கிட்ட மோதாதே என்று பயமுறுத்துமாம்.  யானையைக் கவனிப்பதற்காக (observors) செல்லும் ஆராய்ச்சியாளர்கள், இந்த மாதிரி சிறிய சிக்னல்களை அவதானித்து அந்த இட த்தைவிட்டு அகலுவார்கள் அல்லது பின்வாங்குவார்கள். அப்படி பின்வாங்கும்போதும் அவர்கள் கவனம் அந்த யானையினிட த்திலேயே இருக்கும். யானையின் வேகம் அளவிடற்கரியது. அதனால் சட் என்று அது இவர்கள் அருகில் வந்துவிடும். யானைக் கூட்டமும் காடுகளில், இயற்கையோடு ஒன்றியிருக்கும். சட் என்று யானை இருப்பதைக் கண்டுபிடிக்க இயலாது. கிளைகள், மரங்களின் அசைவுகள், இலைகளைப் பறிக்கும் சப்தம் இவற்றை வைத்துத்தான் முதலில் யானை இருப்பதைப் பார்க்கிறார்கள்.  தரையைச் சிறிது ஷூவினால் கிளறி, வெளிப்படும் மண் புழுதி எந்தப் பக்கம் பரவுகிறது என்பதை வைத்து, காற்றின் திசையைக் கணித்து, அதற்கு எதிர்ப்புறத்தில்தான் இவர்கள் செல்கிறார்கள். யானையின் கண் பார்வை சுமார். ஆனால் அது மனிதர்களைவிட நான்கு மடங்கு நுகர்வு சக்தி உள்ளது.

யானைக்குத் தினமும் 100 கிலோக்களுக்கு மேல் தீனி தேவை. அதைத் தவிர 40-60 லிட்டர் தண்ணீர். சென்ற வாரத்தில் திருவில்லிபுத்தூர் கோவிலுக்குச் சென்றிருந்தபோது நுழைவாயில் அருகில் யானையைக் கட்டிவைத்திருந்தார்கள். அது ஒன் பாத்ரூம் போக ஆரம்பித்தது. ஏதோ பெரிய குழாயைத் திறந்துவிட்டதுபோல, நின்ற பாடில்லை. 50 லிட்டர் தண்ணீர் குடித்தால் சும்மாவா?

யானைகளின் மஸ்த் எனப்படும் பருவ காலத்தையும், அந்தச் சமயத்தில் அவற்றின் aggressive nature மற்றும் அதன் பேறுகாலம் போன்றவற்றையும் படிக்கப் படிக்க வெகு இண்டெரெஸ்டிங் ஆக இருந்தது. (படம் இணையத்திலிருந்து). யானைக் கொட்டாரத்திலும், இந்த யானை ‘மஸ்த்’ காலத்தில் இருக்கிறது, அருகில் செல்லவேண்டாம் என்று எழுதிய பலகையைப் பார்த்தேன். (ஆனால் அருகில் யானையைத்தான் காணோம்)

யானையைப் பார்த்துக்கொண்டிருந்தால் நேரம் போனதே தெரியாது. நானும் நிறைய படங்களை எடுத்தேன்.  குட்டிகளோடு கூடிய யானையை நான் பார்க்கவில்லை. ஒருவேளை அவை பார்வையாளர்கள் அணுக முடியாத இடத்தில் இருந்திருக்கலாம்.

ஒரே உணவை எவ்வளவுதான் சாப்பிடும் இந்த யானைகள்? போரடித்துவிடாதோ? ஒரு வாழைத்தார் குறைந்தபட்சம் 150 ரூபாய் இருக்கும். எவ்வளவுதான் வாங்கிப்போடுவார்கள்?

லத்திகள் குவிந்திருந்தாலும் அந்த அந்த இடங்கள் சுத்தமாகத்தான் இருந்தன. சில யானைகள் அளவுக்கு மீறி குண்டாக இருந்ததுபோலத் தோன்றியது. பெரிய யானையின் முதுகில் ஏறி சவாரி செய்ய பயமாக இருக்காதோ? கொஞ்சம் அசைந்தாலும் பொத்தென்று விழுந்துவிடுவோம் என்று தோன்றாதோ?

நின்றிருந்த யானையை, மாவுத்தர்கள், ஏதோ சொல்லி, படுக்கச் சொல்கிறார்கள். அந்த யானையும் அதைக் கேட்டுப் படுத்தது. அந்தப் படங்களைத்தான் கீழே பார்க்கிறீர்கள். படுத்த பிறகு அதன் மீதிருந்த தூசி, புழுதியைச் சுத்தம் செய்தனர். பிறகு எழுந்துகொள் என்று சொன்னதும், மெதுவாகக் கொஞ்சம் கஷ்டப்பட்டுத்தான் எழுந்தது.

யானையின் கூடவே இருப்பதால் மாவுத்தர்களுக்கு யானையின் mood பற்றித் தெரிந்திருக்கும். அதனால்தான் தைரியமாக அதன் அருகில் இருக்கின்றனர். அவர்களது அன்புடன் கூடிய பராமரிப்பு யானைக்கும் புரிந்திருக்கும் அல்லவா?

உங்களுக்குத் தெரியுமா? யானையின் தும்பிக்கை மிகவும் வலுவானது. ஏதோ ஐந்து ரூபாய் கொடுத்து ஆசீர்வாதம் என்று கோவில் யானையிடம் வாங்கிக்கொள்கிறோம். வழுக்கைத் தலையரிடமோ இல்லை குழந்தைகளிடமோ அது வலுவான ஆசீர்வாதம் வைத்தால் மண்டை பிளந்துவிடும். இது மிகவும் ஆபத்தானது. 

ஒரு யானைக்கு பைப் வழியாக தண்ணீரை தும்பிக்கையில் மாவுத்தன் பாய்ச்சினார். தும்பிக்கை நிறைந்ததும், அது தன் வாயில் விட்டுத் தண்ணீரைக் குடித்தது. ஐந்து லிட்டருக்கு மேல் தண்ணீரை ஒரு நேரத்தில் யானை தும்பிக்கையில் உறிஞ்சிக் குடிக்குமாம். அந்தக் காணொளிகள்லாம் எடுத்தேன்

பார்க்க பக்கத்துல இருந்து எடுத்த மாதிரிதான் இருக்கிறது. ஆனாலும் நல்ல இடைவெளி உண்டு. அதுவும்தவிர யானையைப் பக்கத்தில் இருக்கும் தூணில் இரும்புச் சங்கிலியால் பிணைத்திருந்தனர். சுத்தம் செய்யப்பட்டுக்கொண்டிருந்த யானையின் அருகில்போய், தொட்டுப் பார்த்தேன், படங்கள் எடுத்துக்கொண்டேன்.  (மவனே… படுத்திருக்கும்போது என்னைத் தொட்டுப் பார்க்கிறயே. எழுந்து வந்தால்…என்று மனதுக்குள் பேசியிருக்குமோ?). பொதுவாக பாகன்களைத் தவிர, பிறர், தன்னைத் தொடுவதை யானைகள் விரும்புவதில்லை என்று படித்திருக்கிறேன்.

புன்னத்தூர் - யானைக் கொட்டாரம் - காணொளி : 

 

அன்று நிறைய யானைகளைக் குளிப்பாட்டி சுத்தம் செய்துகொண்டிருந்தனர். சுத்தம் செய்வது என்றால், உடலை மாத்திரமல்ல, தந்தம், பாதங்கள் அதைச் சுற்றியுள்ள நகங்கள் போன்ற பகுதி என்று எல்லாவற்றையும்தான். மறுநாள் மாலை நடக்கப்போகும் யானையோட்டத்துக்காக. அதை அடுத்த வாரம் சுருக்கமாகப் பார்க்கலாம்.

= = = = =