வரலாற்றுப் பாடத்தில் இன்றும் உங்களுக்கு நினைவில் உள்ளவை எவை?

 

சென்ற வாரம் யாரும் எங்களைக் கேள்விகள் கேட்காததால், நாங்கள் கேட்கிறோம் உங்களை : 

1) கீழ்க்கண்டவற்றுள் உங்களுக்கு மிகவும் பிடித்த சட்னி எது? ஏன்? 

a ) பொட்டுக்கடலை, தேங்காய் சட்னி 

b ) புதினா கார சட்னி 

c ) வேர்க்கடலை சட்னி ( எனக்குப் பிடிக்காது) 

d ) சிவப்புச் சட்னி (தக்காளி / மிளகாய்?) 

e ) வேறு ஏதாவது ..இருந்தால்  குறிப்பிடவும் .. 

2) உங்களுக்குத் தெரிந்த நல்லவர், ரொம்ப நல்லவர், ரொம்ப ரொம்ப நல்லவர் யார் யார்?  

3) சமீபத்தில் ஞாபக மறதியால் நீங்கள் சங்கடப்பட்ட சம்பவம் எது? 

4) பள்ளிக்கூட நாட்களில் நீங்கள் படித்த வரலாறு பாடத்தில் இன்றும் உங்களுக்கு ஞாபகம் இருக்கும் பக்கங்கள் என்ன? ( நான் படித்த காலத்தில் எனக்குப் பிடிக்காத பாடம் வரலாறு பாடம் மட்டுமே. 'இதை எல்லாம் தெரிந்துகொண்டு யாருக்கு என்ன லாபம்' என்று நினைத்துக்கொள்வேன். மொகலாய மன்னர்கள் வரிசையை ஞாபகம் வைத்துக்கொள்ள B H A J S A A என்று நெட்டுரு செய்து வைத்துக்கொண்டு பரிட்சை எழுதிய நாட்கள் நினைவில் உள்ளது. குப்தர்கள் காலத்தை ஏன் பொற்காலம் என்கிறோம் - என்ற கேள்வியும் ஞாபகம் உள்ளது) 

= = = = = = = =

KGG பக்கம் : 

JTS படித்த காலத்தில்தான் தமிழகத்தில் காங்கிரஸ் ஆட்சி முடிந்து தி மு க ஆட்சி வந்தது. அந்த காலகட்டத்தில் எனக்கு பதின்ம வயது நடந்துகொண்டிருந்ததால் அரசியலில் பெரிய ஆர்வம் எதுவும் கிடையாது. ஆனாலும் காமராஜர் தோற்றது மனதுக்கு வருத்தமாக இருந்தது. நாகையில் இருந்த நாட்களில் எனக்கு வோட்டுப் போடும் வயது வரவில்லை என்பதால் தேர்தல் காலத்தில் நடக்கும் அமளிகளை ஒரு பார்வையாளனாக மட்டும் பார்த்து ரசித்தது உண்டு. 

அந்தக் காலத்தில் - அப்பாவும் அம்மாவும் தீவிர காங்கிரஸ் ஆதரவாளர்கள். அவர்களுடைய வோட்டு எப்பொழுதும் ஏர் பூட்டிய இரட்டைக் காளை சின்னத்திற்குத்தான். 

1967 தேர்தலுக்கு முன்பு, எங்கள் வீட்டில் நாங்கள் வாங்கிய பத்திரிக்கைகளில் வருகின்ற அரசியல் கட்டுரைகளை - முக்கியமாக காங்கிரஸ் ஆதரவு கட்டுரைகளை - யாராவது ஒருவர் படிக்க, மற்றவர்கள் அவர் படிப்பதை கேட்டு விவாதங்கள் நடத்துவார்கள். 

பள்ளிக்கூடத்திற்கு லீவு விடுவார்கள் என்பதற்காக JTS படித்த காலத்தில், பாலிடெக்னிக் மாணவர்களுடன் சேர்ந்து, இந்தி எதிர்ப்புப் போராட்டம் என்ற பெயரில் - ஒருநாள் ' இந்தி ஒழிக' கோஷம் போட்டு ஊர்வலமாக சென்று, ஸ்கூலுக்கு பத்துநாட்கள் லீவு விட்டுவிட்டார்கள் என்று தெரிந்ததும் சந்தோஷமாக வீடு திரும்பினோம்! 

எனக்குத் தெரிந்த வரையில், அண்ணாதுரை ஆட்சிக் காலம் நன்றாகத்தான் இருந்தது. ஆட்சிக்கு வருவதற்கு முன்பு எப்படியோ இருந்தவர், ஆட்சிக்கு வந்தபின் பொறுப்பு உணர்ந்து நன்றாக செயல்படத் தொடங்கினார். எவ்வளவோ நல்ல விஷயங்களை அமல் படுத்த திட்டங்கள் பல தொடங்கினார். ஆட்சிக்கு வந்த இரண்டே வருடங்களில் அவர் இறந்துபோனது தமிழ்நாட்டின் துரதிர்ஷ்டம் - என்றுதான் எனக்குத் தோன்றுகிறது. 

எங்கள் Blog பதிவுகளில் அரசியல் மற்றும் மத சம்பந்தமான எதிர்மறை கருத்துகள் இடம்பெறக் கூடாது என்பது எங்கள் கொள்கை என்பதால் இதற்கு மேல் இங்கே அரசியல் எழுதவில்லை. 

= = = = = = =