திங்க கிழமை 140217:: சேமியா பாத்.

சேமியா, 'பாத்' செய்யும்பொழுது பார்க்கலாம். அதாவது, சேமியா பாத் செய்து பார்க்கலாம். பிறகு சாப்பிடலாம்! 

ஒரு லிட்டர் பால் எடுத்துக்குங்க. 

    

பால் பொங்கும் வரைக் காய்ச்சுங்கள். 

பால் பொங்கும் பருவத்தில் அடுப்பை அணைத்து, பால் ஆறி ரூம் டெம்பரேச்சருக்கு ஐந்து டிகிரி மட்டுமே அதிகம் இருக்கின்ற நிலையில், அந்த வெது வெதுப்பான பாலில், பத்து கிராம் தயிர் இட்டு, ஒரு ஸ்பூனால் கலக்கி அப்படியே இருபத்துநான்கு மணி நேரம் அதை தொந்தரவு செய்யாமல் விட்டு விடவும். இப்போ ஒரு லிட்டர் புளித்த தயிர் தயார். 

           

அரை கிலோ சேமியாவை எடுத்துக் கொள்ளவும். ஒரு வாணலியில், நான்கு கரண்டி நெய் விட்டு, அதில் சேமியாவை ஒவ்வொரு பீசும் ஒரு சென்டிமீட்டர் அல்லது இரண்டு சென்டிமீட்டர் நீளம் இருக்கின்ற அளவில் நொறுக்கிப் போட்டு, பொன் வறுவலாக வறுத்துக் கொள்ளவும். 

பன்னிரண்டு முந்திரி பருப்புகள் எடுத்து, அதை வறுத்த சேமியாவுடன் சேர்த்து, ஒரு பாத்திரத்தில் போதிய அளவு தண்ணீர் விட்டு, சேமியாவையும் மு பருப்பையும் வேகவைத்து, பிறகு தண்ணீரை வடித்து விடவும். 

மீண்டும் பால், கால் லிட்டர் எடுத்துக் கொள்ளவும். நன்றாகக் காய்ச்சி, ஆற விடவும். ரூம் டெம்பெரேச்சருக்கு பால் வந்துவிடட்டும். 

ஏற்கெனவே செய்து வைத்த ஒரு லிட்டர் புளித்த தயிரில், இந்தக் கால் லிட்டர் பாலைக் கலந்து, சேமியாவையும் முந்திரிப் பருப்பையும் சேர்த்துக் கிளறி விடவும். 

சிறிதளவு பெருங்காயப் பொடி அல்லது கட்டிப் பெருங்காயத்தை ஐந்து மில்லி நீரில் கரைத்து அதை சேமியா தயிரில் சேர்க்கவும். 

ஒரு கன சென்டிமீட்டர் இஞ்சியை பொடிப்பொடியாக நறுக்கி சேமியா பாத்தில் சேர்க்கவும். 

                

இரண்டு கரண்டி நெய்யை வாணலியில் விட்டு, காய்ந்ததும் கடுகு, கடலைப்பருப்பு, ஒரு மிளகாய் வற்றல், பன்னிரண்டு கறிவேப்பிலை இலைகள் இவற்றைப் போட்டு, தாளித்து சேமியா பாத்தில் கொட்டி, கிளறி, மூடி வைக்கவும். 

               

இப்போ போயி, இரண்டு மணி நேரம், தொலைக்காட்சியில் மாமியார் கொடுமை, மருமகள் பொறுமை, நாத்தனார் பொறாமை, கள்ளக்காதல், பழிக்குப்பழி, வெட்டுக்குத்து இல்லாத நிகழ்ச்சிகள் ஏதேனும் இருந்தால் அவற்றைப் பார்த்து இரசித்துவிட்டு வாருங்கள். நிகழ்ச்சி முக்கியமில்லை, நேரம் முக்கியம்.

              

சேமியா பாத் நீங்கள் சாப்பிட ரெடி! 

          

திங்க கிழமை 140210 :: அப்பளக் கூட்டு!

                             
கட்சிகள் எல்லாம் தேர்தல் நேரத்தில் கூட்டு பற்றி யோசிக்க ஆரம்பிப்பார்கள். சிலர் தனியாகக் குழம்(ப்)பிக் கொண்டிருப்பார்கள்.

நாம் அப்பளக் கூட்டு பற்றி சற்றுச் சிந்திப்போம்!

அப்பளக் கூட்டு செய்ய என்னென்ன பொருட்கள் தேவை?
 

உருளைக்கிழங்கு நூறு கிராம்.

கடலைப்பருப்பு ஐம்பது கிராம்.

மஞ்சள் தூள் ஒரு சிட்டிகை.

மிளகாய் வற்றல் : மூன்று.

உளுத்தம்பருப்பு ஒரு டீஸ்பூன்.

மிளகு : பத்து.

கறிவேப்பிலை பன்னிரண்டு இலைகள்.

துருவிய தேங்காய் இரண்டு டீஸ்பூன் அளவு.

உளுந்து அப்பளம் : ஐந்து. / ஆறு.

தாளிப்பதற்கு கடுகு, உளுத்தம்பருப்பு, இரண்டு துண்டு மிளகாய் வற்றல்.

=================
செய்முறை:

# உருளைக்கிழங்கை வேகவைத்து, தோல் உரித்து, பொடிப்பொடியாய் நறுக்கி எடுத்துக் கொள்ளவும்.

# கால் லிட்டர் தண்ணீரில், கடலைப்பருப்பைப் போட்டு, மஞ்சள்தூள் ஒரு சிட்டிகை போட்டு, வேகவிடவும். கடலைப்பருப்பு வெந்ததும், நறுக்கிய உருளைக்கிழங்கு போட்டு, தேவையான உப்புப் போட்டுக் கிளறவும்.

# மிளகாய் வற்றல், உளுத்தம்பருப்பு, மிளகு, கறிவேப்பிலை ஆகியவற்றை, ஒரு வாணலியில் சிறிது நெய்யூற்றி, அதில் இவைகளை வறுத்து எடுத்துக்கொள்ளவும்.

# வறுத்து எடுத்தவைகளை, ஒரு மிக்சியில் நன்றாக அரைத்துக்கொள்ளவும்.

# அரைத்த இந்தக் கலவையை, ஐம்பது மில்லி தண்ணீரில் நன்கு கரைத்து, உருளைக்கிழங்கு + பருப்பு கூட்டில் இட்டு, நன்றாகக் கிளறவும்.
                   
# கூட்டு பக்குவத்திற்கு வந்ததும், அதில் தேங்காய்த் துருவலை இட்டுக் கிளறவும்.
             
# கூட்டு உள்ள அடுப்பை அணைத்துவிடலாம்.
   

# வாணலியில் நல்லெண்ணெய் விட்டு, சூடானதும், ஒவ்வொரு அப்பளத்தையும் எட்டு செக்டார் ஆகக் கிழித்து, எண்ணையில் தனித் தனியாகப் பொரிக்கவும்.
           

# ஒரு கரண்டியில் கொஞ்சம் நல்லெண்ணெய் எடுத்துக் கொண்டு, இரண்டு சிட்டிகை கடுகு போட்டு, கடுகு வெடித்தவுடன், அரை டீஸ்பூன் உளுத்தம்பருப்பு,  இரண்டு துண்டு மிளகாய் வற்றல் இட்டு, உளுத்தம்பருப்பு பொன்னிறம் வந்தவுடன் தாளிப்புப் பொருட்களை கூட்டில் போடவும்.
               
# பொரித்து வைத்திருக்கும் அப்பளத் துண்டுகளையும் கூட்டில் போட்டு, நன்கு கிளறவும்.
     

       
+ அப்பளக் கூட்டு தயார். 
                     

திங்க கிழமை 140127 :: சம்பந்திப் பொடி.

              

தலைப்பைப் பார்த்துவிட்டு, 'ஆஹா! இரக்கமில்லாமல் வரதட்சணை கேட்கின்ற சம்பந்திகளை உருக்கி எடுத்து, பொடிப் பொடியாக செய்வது எப்படி ' என்று சொல்லப்போகிறோம் என்று நினைக்காதீர்கள்! 

பொடி விஷயங்களை, நாங்கள் சொல்வதை முதலில் சிறிய அளவில் செய்து பாருங்கள். நன்றாக இருந்தால், உங்களுக்குப் பிடித்தால், பிறகு பெரிய அளவில் செய்துகொள்ளலாம். 

பொருட்கள்:  

   

காம்பு அரிந்து, சுத்தம் செய்யப்பட்ட மிளகாய் வற்றல் கால் கிலோ. 

தனியா : ஐம்பது கிராம். 

தேங்காய் மூடி ஒன்று. (தேங்காயுடன்தான் - வெறும் மூடி வேண்டாம்) 

கறிவேப்பிலை : ஒரு பிடி  (சுமார் ஐம்பது இலைகள்!) 

 புளி: எலுமிச்சம் பழம் அளவுக்கு. 

உரித்த வெள்ளைப்பூண்டு: நூறு கிராம். 

உளுத்தம்பருப்பு ஐம்பது கிராம்.

கடுகு ஒரு டீஸ்பூன். 

பெருங்காயம் : பட்டாணி அளவு.

உப்பு தேவையான அளவு.

* மிளகாய், தனியா இரண்டையும் தனித் தனியே வறுத்து எடுத்துக் கொள்ளவும். 

* தேங்காயைத் துருவி, அதனோடு கறிவேப்பிலையைச் சேர்த்து, ஓர் இரும்புச் சட்டியில் இட்டு நன்றாக வறுத்துக் கொள்ளவும். பொன் நிறத்திற்குக் கொஞ்சம் அதிகமாகவே வறுத்துக்கொள்ளவும். 

* மிளகாய், தனியா, உப்பு எல்லாவற்றையும் மிக்சியில் இட்டு நன்றாக,அரைத்துக் கொள்ளவும். இந்தக் கலவையோடு, புளி, பூண்டு ஆகியவைகளையும் மிக்சியில் போட்டு நன்றாக அரைக்கவும். மிக்சியில் புளி, பூண்டு ஆகியவை நன்றாக அரைபட வேண்டும் என்றால், லேசாக அவைகளை இரும்பு சட்டியில் இட்டு, கொஞ்சமாக வறுத்துக்கொள்ளவும். 

* உளுத்தம்பருப்பு, கடுகு, பெருங்காயம் - இந்த மூன்றையும் தேங்காய் எண்ணையில் வறுத்து, மிக்சியில் உள்ள பொடியுடன் சேர்த்து அரைத்துக்கொள்ளவும். 

* பிறகு, இந்தக் கலவையுடன், ஏற்கெனவே வறுத்த தேங்காய்ப்பூ, கறிவேப்பிலைக் கலவையையும் சேர்த்து, மிக்சியில் நன்றாக அரைத்துக் கொள்ளவும். 

   

அவ்வளவுதான்! சம்பந்திப் பொடி தயார். இந்தப் பொடியை, சூடு ஆறியவுடன், கண்ணாடி பாட்டிலில் பாக் செய்து வைத்துக் கொள்ளலாம். (பொடியை கையால் தொடாமல், கரண்டி / ஸ்பூனால் மட்டுமே எடுக்கவேண்டும். கை பட்டால், பொடியின் ஆயுட்காலம் வெகுவாகக் குறைந்துவிடும்) கைபடாமல் தயாரித்தால், இந்தப் பொடியின் ஆயுட்காலம், செய்யப்பட்ட நாளிலிருந்து இருநூறு நாட்கள்.   

ஆமாம், இந்தப் பொடியை என்ன செய்யலாம்? 

# வடித்த சாதத்தோடு ஒரு ஸ்பூன் பொடியைக் கலந்து, நல்லெண்ணெய் / நெய் விட்டு, மோர்க்குழம்பு தொட்டுக்கொண்டு சாப்பிடலாம். 

     

* இட்லி / தோசைக்கு, மிளகாய்ப்பொடி போன்று, எண்ணையோடு சேர்த்துத் தொட்டுக்கொண்டு சாப்பிடலாம். 

* மோர்சாதத்திற்கு இந்தப் பொடியைத் தொட்டுக்கொண்டு சாப்பிடலாம். 

* பயணம் செல்பவர்களுக்கு, ஹோட்டலில் இட்லிக்குத் தருகின்ற மூவர்ண சட்டினிகள் பிடிக்கவில்லை என்றால், இதை கையோடு எடுத்துச் சென்று, தொட்டுக்கொண்டு சாப்பிடலாம். 

                

திங்க கிழமை 140120 :: தோட்லி!

தேவையான பொருட்கள்: 

வெண் புழுங்கல் அரிசி : மூன்று கப்.

முழு வெள்ளை உளுந்து : ஒரு கப். 

வெந்தயம் : இரண்டு தேநீர்க்கரண்டி அளவு.

தேவைக்கேற்ப பொடி உப்பு. 

மைக்ரோ வேவ் ஓவன் (சிலர் அவன் என்று சொல்வார்கள்) 

பவர் சப்ளை: தேவையான அளவு, தேவையான நேரத்தில்! 

ஹார்லிக்ஸ் வாங்கிய பொழுது இலவசமாகக் கிடைத்த கண்ணாடி பவுல்.     

முதல் நாள் மதியம் பன்னிரண்டு மணிக்கு, ஒரு கப் உளுந்து, மூன்று கப் வெண் புழுங்கல் அரிசி ஆகியவைகளை நல்ல தண்ணீரில் ஊறவைக்கவும். அரிசி ஊறும்பொழுது, அதனுடன் இரண்டு தேக்கரண்டி வெந்தயம் போட்டு அதையும் சேர்த்து ஊறவைக்கலாம். 

மாலை நான்கு மணிக்கு, ஊறிய உளுந்தை மிக்சியிலோ / வெட் கிரைண்டரிலோ நைசாக அரைக்கவும். 

ஊறிய அரிசி & வெந்தயத்தையும் நன்கு அரைத்து எடுத்துக் கொள்ளவும். 

இரண்டு மாவையும் கலக்கி, தேவையான அளவு உப்பு சேர்க்கவும். 

உப்பு சேர்த்த மாவை மீண்டும் கலக்கி, ஒரு பாத்திரத்தில் வைத்து மூடி விடவேண்டும். 

மறுநாள் காலையில் தான் நாம் செய்ய வேண்டிய தோட்லி. 

கண்ணாடி பவுலில் பாதி அளவுக்கு மாவை ஊற்றவும். எச்சரிக்கை: முக்கால் அளவு / முழு அளவு எல்லாம் மாவு ஊற்றாதீர்கள். வெப்பத்தினால் பொருட்கள் விரிவடையும் என்கிற அறிவியல் விதியை நினைவில் வைத்துக் கொள்ளுங்கள். கண்ணாடி பவுல் கெட்டியான, காற்றுக் குமிழிகள் இல்லாத கண்ணாடியாக இருக்கவேண்டும். 

    

மாவு ஊற்றப்பட்ட கண்ணாடி பவுலை, மைக்ரோ வேவ் சுழல் கண்ணாடித் தட்டின்   மேலே வைத்து, ஓவனை மூடி, பிறகு 'ஆன்' செய்யவும். 

     

ஒன்றரை நிமிட நேரம் செட்டிங் போதும். 

மாவுக் கிண்ணம் சுழலும் பொழுதே, கண்ணாடிக் கதவின் மூலமாகப் பார்த்தால், மாவு உப்பி வருவதும், மேற்புறத்தில் சிறிய காற்றுக் கொப்புளங்கள் வருவதும் தெரியும். 

     

ஒன்றரை நிமிட நேரம் போதவில்லை என்றால், மேலும் அரை நிமிடம் ஓவனை ஓட்டவும். 

அவ்வளவுதான்! தோட்லி தயார்! 

தோசை சைசில் ஊற்றி, எண்ணை இல்லாமல் / ஆவி இல்லாமல் இட்லி வார்ப்பது போல் செய்யப் படுகின்ற இந்த சிற்றுண்டிக்கு தோட்லி என்று பெயர் கொடுத்துள்ளேன். 

தோட்லியை, சற்று ஆறியவுடன், கிண்ணத்திலிருந்து அப்படியே ஸ்பூனால் எடுத்து சாப்பிடலாம்.