கவர்ந்த பத்துப் பெண்கள்

பிடித்த பத்து பெண்கள்...

தொடர்பதிவுக்கு அழைத்த திவ்யா ஹரிக்கு நன்றி...

நிபந்தனைகள் :-உங்களின் சொந்தகாரர்களாக இருக்க கூடாது, 

வரிசை முக்கியம் இல்லை, 

ஒரே துறையில் பல பெண்மணிகள் நமக்கு பிடித்தவர்களாக இருக்கும், 

அல்லது வெவ்வேறு துறையில் பத்து நபர்கள்.

உறவுகளைச் சொல்லக் கூடாது என்ற நிபந்தனை கஷ்டமாக இருக்கிறது. இந்தியர்கள் எல்லோரும் உடன்பிறந்தவர்கள் என்று சொல்கிறோமே, அப்படிப் பார்த்தால் இந்தியர்கள் யாரைச் சொன்னாலும் உறவுதானே. (என்ன கொனஷ்டையான சிந்தனை..) எல்லோரும் முதலில் வணங்கும் தெய்வம் பற்றி சொல்லாமல் எப்படி? எனவே, 

முதலில், என்னுடைய "எல்லா" நண்பர்களுடைய நண்பனின் அம்மா. காரணம் தேவையா என்ன..முதலில்அறிந்த முழு முதல் தெய்வம்தான்.

இரண்டாவது, நான் அறிந்த, என்னுடன் பணி புரியும் பெண். (படம் எல்லாம் போட முடியாதுங்க..) சற்றே கோபமான, வாய்த் துடுக்கான பெண் என்றாலும், கவர்ந்தது தன்னுடைய சற்றே மன நிலை குறைந்த இரண்டாவது பெண்ணை வளர்ப்பதில் அவள் காட்டும் பொறுமையும், பாசமும், அக்கறையும். கொஞ்சம் கூட கோபம் வராமல் சொல்லிக் கொடுக்கும் குணம்.

அந்தக் குழந்தையிடம் இப்போது நல்ல முன்னேற்றம் தெரிகிறது.

மூன்றாவது, MSS குரல் மூலமாக இனிய பாடல்கள் அறிமுகமானாலும், பின்னர் கேட்டு இப்போதும் கேட்டால் உருகிக் கேட்க வைக்கும் N C வசந்தகோகிலம்.

நான்காவது, திரை இசையில் பல இனிய பாடல்கள் தந்த P. சுசீலா. விளக்கம் தேவை இல்லை..!

ஐந்தாவது, திறமையாக, எளிமையாக, இனிமையாக, புதுமையாக கதா காலட்சேபம் செய்யும் கிருஷ்ண ப்ரேமியின் மருமகள் விசாகா ஹரி.

ஆறாவது, ஸ்ரீரங்கம் எஸ்.ஆர் என்றும் ரங்க ராஜன் என்றும் அறியப் பட்டவருக்குத் தன் பெயரைத் தந்து மங்காப் புகழைத் தந்த அவர் மனைவி சுஜாதா. (படம் கிடைக்கவில்லை)

ஏழாவது, (அம்மா..இப்பவே கண்ணை கட்டுதே..) ஆச்சாரமான குடும்பத்தில் பிறந்து மேற்கத்திய இசையில் கலக்கிய (லதா மங்கேஷ்கர் பாராட்ட வரும் போது கண் கலங்கி, கை கூப்பி, தமிழில், "ஐயோ...என்ன பண்றது..." என்று மேடையில் உணர்ச்சி வசப்பட்ட ) உஷா உதூப்.

எட்டாவது, பொன்னியின் செல்வன் நந்தினி. (உறவுகள்தான் கூடாது என்று 

நிபந்தனை சொல்கிறது...கற்பனைப் பாத்திரம் கூடாது என்று சொல்லவில்லையே...!)

ஒன்பதாவது, பதிவுலகை கலக்கி வரும் பெண் பதிவர்கள் அனைவரும்...!

பத்தாவது, இந்த இடத்தை காலியாக விட விரும்புகிறேன்...எதிர்காலத்தில் இன்னும் விரும்பக் கூடியதாய் பெண்மணிகள் கிடைக்கலாம். அல்லது இதைப் படிப்பவர்கள் "இவரை விட்டு விட்டீர்களே.." என்று பின்னூட்டமிட நினைக்கும் நபரை அந்த இடத்தில் Fill Up செய்து விடலாம்.

Be Indian என்று இந்தியர்களாகப் பட்டியலிட்டு விட்டேன்...

வாழ நினைத்தால் வாழலாம் மாதிரி தொடர நினைப்பவர்கள் அனைவரும் தொடரலாம். யார் தொடர்ந்தாலும் 'எங்களை'ச் 'சுட்டி' சொல்லி விட்டுத் தொடர்ந்தால் சந்தோஷமடைவோம்...!