வெள்ளி வீடியோ 180309 : எங்கிருந்த போதிலும் நீ வந்துவிடு தேவி...

   இன்றைக்கு இருபத்தாறு ஆண்டுகளுக்கு முன்னால் வந்த படம்!  

   மதர்லேண்ட் பிக்சர்ஸ், கோவைத்தம்பி படம் என்றால் பாடல்கள் நன்றாய் இருக்கும் என்ற எண்ணம் இருந்தது அப்போது.  இதுவும் அவர்கள் படம்தான்.  

   இந்தப் படத்தில் இந்த ஒரு பாடல் சிறப்பு.  பார்த்திபனுக்கு சோகம் செட் ஆகாது என்பதும் என் எண்ணம்.  ஆனாலும் சோகரசத்தில் இழையும் எஸ் பி பி குரலில் இனிமையான ஒரு பாடல்.  

   பாடல் வரிகளையும் ரசிக்கலாம்.   பாடல் வாலி என்று நினைக்கிறேன்.  

   இந்தப் படத்தின் பாடல்களை வாலி, கங்கை அமரன், நா காமராசன், மு மேத்தா, பிறைசூடன், முத்துலிங்கம் ஆகியோர் எழுதியதாய் இருக்கிறதே தவிர, எந்தப் பாடலை யார் எழுதியது என்கிற விவரம் இல்லை.  இந்தப் பாடலில் வரும் பெண்குரல் மின்மினி.  காட்சி இல்லாத கானம்தான்.  தைரியமாக பாடலை ரசிக்கலாம்!  "எங்கிருந்த போதிலும் நீ வந்துவிடு தேவி.." என்று எஸ் பி பி பாடும்போது எங்கிருந்தாவது அந்தக் காதலி எதிரில் வந்துவிட மாட்டாளா என்று நமக்கே தோன்றும்.

பால் நெலவு சூரியன்போல் சுட்டதென்ன நியாயம்

பச்சக்கிளி தோளக்கொத்தி வந்ததிந்த காயம்

ஓடிவந்த வைகை நதி காஞ்சதென்ன மாயம்

கூட வழி இல்லையென்றே ஆனது பெண் பாவம்

ஒரு மாலைச் சந்திரன் மலரைத் தேடுது மலையடிவாரத்திலே

இள மானைக் கண்டிட கானம் பாடுது மன்மத ராகத்திலே

குளிர் வீசும் மாசியிலே ஒரு ஆசை மேகமடி

அது பேசும் பாஷையிலே ஒரு காதல் விரகமடி

ஒரு தேகம் வெந்தது மோகத் தீயினிலே 

வெண்ணிலவில் தேடுகிறேன் கன்னிமுகம் காணோம்

புன்னகையும் நானிழந்தேன் என் மனதில் சோகம்

சித்திரத்தைப் பார்க்க வந்தேன் கற்குவியல் கண்டேன்

தென்மலையைப் போலிருந்தேன் தென்னிலங்கையானேன்

செல்லக் குயில் கூவ மெல்ல வரும் நேரம்

சொல்லில் வரும் சோகம் கங்கை நதியாகும்

எங்கிருந்த போதிலும் நீ வந்துவிடு தேவி

நித்திரையில் பூவெடுத்தேன் நெஞ்சில் ஒரு காயம்

காயம் கொண்ட போதினிலும் பூவில் எந்தன் மோகம்

தெற்குக் கடல் ஆழத்திலே முத்தெடுக்கப் போனேன்

மூச்சடங்கிப் போனதடி முத்தை இன்னும் காணேன்

உந்தன் முகம் தேடி உள்ளம் அலை பாயும்

தென்றலின்றிப் போனால் தேகம் அனலாகும்

எங்கிருந்த போதிலும் நீ வந்துவிடு தேவி