பிராக்டிகல் ஜோக் செய்வதுண்டா?

பானுமதி வெங்கடேஸ்வரன்: 

1. பிராக்டிகல் ஜோக் செய்வதுண்டா? அல்லது அதற்கு விக்டிம் ஆனதுண்டா?




 # பிராக்டிகல் ஜோக் என்று (முட்டாள் தனமாக) நினைத்து சில அசட்டுக் காரியங்கள் டீன் வயதில் செய்ததுண்டு. இதற்கு மேல் விளக்கம் அசாத்தியம்.  அதிர்ஷ்ட வசமாக விக்டிம் ஆனதில்லை.

& செய்தது உண்டு. விக்டிம் ஆனதும் உண்டு. விக்டிம் ஆகி, அசடு வழிந்த சந்தர்ப்பங்களை ஞாபகம் வைத்திருந்து, அதன் பின் அத்தகைய சந்தர்ப்பங்களில் சமயோசிதமாக தப்பித்ததும் உண்டு.  

2.  ஒரே சமையல் குறிப்பை இரண்டு பேர் எழுதி அனுப்பியிருந்தால் எங்கள் பிளாகில் இரண்டையுமே வெளியிடுவீர்களா? அல்லது முதலில் வரும் சமையல் குறிப்பைத்தான் வெளியிடுவீர்களா?

# மாற்றம் சற்றேனும் இருப்பின் இரண்டையுமே.

& ஓர் உதாரணம் சொல்கிறேன். 

சங்கீத சீசனில் காலையில் மியூசிக் அகடெமி(+காபி), மதியம் மயிலாப்பூர் ஃபைன் ஆர்ட்ஸ்(+சாப்பாடு) , மாலை ஏதேனும் ஒரு சபாவில் பிடித்த பாடகரின் (காசுக்) கச்சேரி என்று கேட்டிருக்கிறேன். 
சில நாட்களில், காலையில் என்னைத் துரத்த ஆரம்பித்த பூர்விகல்யாணி, மதியம் மற்றும் மாலைக் கச்சேரியில் கூடத் துரத்தும். 
இராகம் ஒன்றுதான்; ஆனால் பாடகர்களும், பக்கவாத்தியங்களும்,  பாடும் விதமும் வெவ்வேறு அல்லவா! நன்றாக இரசிப்பேன். 

அப்படித்தான் சமையல் குறிப்புகளும். ஒரே விஷயமாக இருந்தாலும், எழுதுபவரின் சமையல் குறிப்புகளில் சொல்லப்படும் அளவுகள், செய்முறை, எல்லாவற்றையும் விட அவற்றை அவர் சொல்லும் பாணி  எல்லாவற்றையும் பொருத்து அது மாறுபடும். என்னால் எல்லாவற்றையுமே இரசிக்க முடியும். நம் வாசகர்களும் அப்படித்தான் என்று நினைக்கிறேன். 

ஆகவே, ஒரே புளியோதரையை நம்ம எ பி கிச்சன் கில்லாடிகள் அவரவர் செய்யும் முறைப்படி, அவரவர்கள் பாணியில் எழுதி அனுப்பலாம். ஒரே சமையல் பக்குவம், தொடர்ந்து வாராவாரம் வெளியிடப்படாமல், கொஞ்ச வார இடைவெளி விட்டு வெளியாகும் விதத்தில், ஸ்ரீராம் அதை அமைத்துவிடுவார். 

3. வெள்ளி வீடியோவில் சினிமா பாடல்களை மட்டும்தான் பகிர்வீர்களா? லைட் கிளாசிகல் பாடல்களேயும் பகிரலாமே. 

# மே....

& சினிமாப் பாடல்கள் வெகுஜனங்களுக்குத் தெரிந்த விஷயம்.  அதை  வீடியோவுடன் சேர்த்து, அந்தப் பாடலைக் குறித்த சுவையான தகவல்களுடன் சேர்த்துப் போடுவதால், வாசகர்களுக்கு பாப் கார்ன் சாப்பிடுவது போல பார்த்து ரசிக்க முடியும். ஐந்து நிமிடப் பாடல். அதோடு ஓவர்! 
ஆனால், லைட் கிளாசிகல், கர்நாடக சங்கீதம் இதெல்லாம் பெரும்பான்மையான வாசகர்களை அவ்வளவாக ஈர்ப்பது இல்லை. (வாசகர்கள் அல்லது அவர்களின் உறவினர்கள் ஏதேனும் பாடி, அதை வீடியோ கிளிப் ஆக எங்களுக்கு அனுப்பினால், அதை வெளியிட நாங்கள் ரெடி )

4. விளையாட்டு வினையானது என்பார்களே, ஒரு விஷயம் எது வரை விளையாட்டாக இருக்கும்? எப்போது வினையாக மாறும்?

 # அடுத்தவர் ரசிக்கும் அல்லது பொறுத்துப் போகும் வரை விளையாட்டு. எரிச்சல் அதிருப்தி சினம் ஏற்படத் தொடங்கினால் வினை..

5. சுஜாதா இறந்ததும் அவரைப்போல அவர் பெயரில் நிறைய பேர்கள் எழுதுகிறார்கள் ஏன் லா.ச.ரா. போலவோ, அசோகமித்ரன் போலவோ, ஜெயகாந்தன் போலவோ யாரும் எழுதவில்லை?

# லா ச ரா பாணி தவிர மற்றவை போல  எழுதுவார்கள். நம் பார்வையில் படுவதில்லை. 

6. நாம் இப்போது ரொம்பவும் தொட்டாசுணுங்கி ஆகி விட்டோமோ? வாசந்தியின் ஆகாச வீடுகள் என்னும் கதையை அவர் 1976 அல்லது 1977ல் எழுதியிருக்க வேண்டும். அதில் ஒரு கிராமத்தின் அக்கிரகாரத்தை தோலுரித்திருப்பார்.  இப்போது அப்படி எழுதினால் பொங்கி விட மாட்டார்களா?

# அக்ரகாரத்தின் எந்த அம்சங்கள் "தோலுரிக்கப்" பட்டன என்று சொல்லுங்கள். பதில் தர முயற்சிப்போம்.


நெல்லைத்தமிழன்: 

ஆண்கள் பெரியவர்களை வணங்கும்போது அஷ்டாங்க நமஸ்காரமும், பெண்கள் வணங்கும்போது பஞ்சாங்க நமஸ்காரம் செய்யணும் என ஏன் விதித்திருக்காங்க?

# Forwarded to Brahmasri Sengalipuram Anantharama Dikshithar. 

& நமஸ்காரம் செய்யும் முறையை, இங்கே சென்று தெரிந்துகொள்ளுங்கள். 

மேலும், 'வெப்துனியா' தளத்தில் காணப்படும் விவரம் : 

" பெண்கள் பஞ்சாங்க நமஸ்காரம் மட்டுமே புரிய வேண்டும். அவர்கள் எப்பொழுதும் சாஷ்டாங்க நமஸ்காரம் புரியக்கூடாது. இந்து மத சாஸ்திரங்களின் படி, பெண்களின் கர்ப்பப்பை மற்றும் மார்பகங்கள் தரையில் படக் கூடாது. எனவே அவர்களுக்கு சாஷ்டாங்க நமஸ்காரம் புரிய அனுமதியில்லை.

பெண்களின் கருப்பையானது ஒரு உயிரைத் தாங்கும் உன்னத வேலையைச் செய்கின்றது. அவர்களின் மார்பகமானது குழந்தைக்கு பாலூட்டும் உயரிய வேலையைச் செய்கின்றது. எனவே, அவை இரண்டும் தரையில் படக்கூடாது."

  ('சாஷ்டாங்கம், அஷ்டாங்கம், பஞ்சாங்கம் எல்லாம் எனக்கு எதுக்கு? எனக்கு இது போதும்' என்கிறாரோ இவர்!  ) 

திருக்குறள் போன்ற நூல்களை தங்கள் இஷ்டத்துக்கு வலிந்து பொருள் கொள்வது சரியா?

$ 'ஊக்க மது கைவிடேல்' என்பது போல்தான். இதைப் படித்தவுடன் டாஸ்மாக்  க்யூவில் போய் நின்றுவிடுவீர்களா என்ன!

# இலக்கியங்கள் அந்த சுதந்திரத்தை வாசிப்பவர்களுக்குத் தருவனவே.

ரமா ஸ்ரீநிவாசன் :

1. நீங்கள் யாரையாவது மிகவும் நெருக்கமாகவும் மிகவும் புரிந்தவராகவும் நினைத்துப் பழகும்போது அவர் நிஜத்தில் மற்றவர்களிடம் உங்களை முதுகில் குத்துகிறார் என்று உணரும்போது உங்களது எதிர் செயல் எவ்வாறு இருக்கும்.

# அவர் முதுகில் குத்துகிறார் என்னும் தகவல் எனக்கு யார் மூலம் கிடைத்ததோ அவரைப்பற்றிய என் நம்பிக்கை கேள்விக்குரியது ஆகிவிடும்.

& நான் என்னுடைய திருமதியை, மிகவும் நெருக்கமானவராகவும், மிகவும் புரிந்தவராகவுமாகத்தான் திருமணம் நடந்த தினத்திலிருந்து பழகி வருகிறேன். அவர், அவ்வப்போது என்னை முதுகில் குத்துவதுண்டு. திகைக்காதீர்கள். நான்தான் அவரிடம் எனக்கு வாயுப்பிடிப்பு வரும்போதெல்லாம் முதுகில் குத்தச்சொல்லி, ஏப்பங்கள் பல விடுவேன்! 

2. சிறு வயதிலிருந்த வீடு, விளையாடிய விளையாட்டுத் திடல், நடந்து சென்ற தார் சாலை யாவுமே அவ்வயதில் மிகவும் பெரியதாகவும் மிகவும் நீளமாகவும் தெரியும். அதே இடத்தை இப்போது வயது முதிர்ந்த பின் போய் பார்த்தால், எல்லாம் நம் கண்ணுக்கு சாதாரண அளவாகவும், சாதாரண தூரமாகவும் காணப் படும். இது ஏன்?

# இது இயல்பான ஒன்று தான். சின்னவயதில் கமர்கட்டு கடலை மிட்டாய் போன்றவை  நம்மைக் கவர்ந்த மாதிரி பிற்காலத்தில் இருப்பதில்லை. Bird's eye view மாதிரி ant's eye view. 

$ ஆம், உண்மையே. சிறு வயதில், நாகையில் வீட்டிலிருந்து கிளம்பி பள்ளிக்கூடம் வரை நடந்து செல்வது மிகவும் அதிக தூரமாகத் தோன்றியது. அதே போல் வீட்டிலிருந்து பாண்டியன் டாக்கீஸ் போவதும். பல வருடங்கள் கழித்து அங்கே சென்றபோது, 'அட! இந்த இடங்கள் எல்லாமே இவ்வளவு பக்கத்திலா இருந்தன!' என்று ஆச்சரியப்பட்டேன். 

3. எனக்கு ஒருவரைப் பிடிக்காமல் போய் விட்டால், அது வருடக்கணக்கானாலும் அவரை அண்ட மாட்டேன், அண்ட விடவும் மாட்டேன். என் வாழ்க்கையில் இது போல் ஓரிருவர் இருக்கின்றார்கள். என்ன என்றே சொல்ல முடியாத ஒரு சங்கடமான உணர்ச்சி மனதிற்குள் ஓடும். இது ஏன்?

# முதலில் ஒருவரைப் " பிடிக்காமல் போவது " ஏன் என்பதைத்தான் ஆராயவேண்டும். உரிய காரணங்கள் இருக்குமானால் அவரிடமிருந்து ஒட்டாமல் தள்ளி இருப்பது அறிவடைமைதான். 

சங்கடங்களைத் துடைத்தெறிவதுதான் சரியான செயல்பாடு. மாறாக அதை மறக்காமல் மீண்டும் மீண்டும் அசைபோடுவதன் காரணமாக அவை தீனி போட்டு வளர்க்கப் படுகின்றன. இதைப் புரிந்து கொண்டால் பல வகையான வலிகள் மறைந்துவிடும். 
நடந்த நிகழ்ச்சி என்ற பதிவு மட்டும் இருந்து அது நம் உணர்ச்சிகளை மீண்டும் மீண்டும் உயிர்ப்பிக்காதிருந்தால் இந்த வகை மனச் சங்கடங்கள் முளைக்காதிருக்கும். 

4. பிள்ளைகள் வளர வளர அவர்களுக்கு நல்லது கெட்டவைகளை பிரித்து பாகுபாடு காட்டி வளர்ப்பது ஒரு பெற்றோரின் அடிப்படை கடமையாகும்.  ஆயின், சில விஷயங்களை கற்றுக் கொடுப்பதே பெற்றோர்களுக்கு ஓர் போராட்டமாக இருக்கும். ஆண் பெண் விஷயங்கள், மற்ற நடவடிக்கை சரியில்லாத ஆண்கள் / பெண்கள் பற்றி நம் பிள்ளைகளை உஷார் செய்வது ஆகியவை சமயத்தில் பகீரதப் பிரயத்தினமாக இருக்கும். இதற்கு ஏதாவது சுலபமான வழி இருக்கின்றதா?

 # சுலபமான வழி இல்லை என்பது உண்மை. சில விஷயங்கள் பெற்றோர் சொல்லி பிள்ளைகள் உணர வேண்டிய கட்டாயம் இல்லை என்பது என் எண்ணம். விலங்குகள் இனப்பெருக்கம், பெற்றோர் வழிகாட்டி நிகழ்வதில்லை. ஆனால் அபாயங்கள், அபாயம் விளைவிக்கும் கவர்ச்சிகள்,  ஈர்ப்பினால் எழும் பிரச்சினைகள் அசம்பாவிதங்கள் ஆகியவை குறித்து கட்டாயம் பெற்றோர் பிள்ளைகளுக்குச் சொல்லியாக வேண்டும் என்னும் நிலைமை அண்மைக் காலத்தில் ஏற்பட்டிருக்கிறது.

& குழந்தைகளை நண்பர்களோடு பழகவிட்டாலே போதும். நண்ப, நண்பிகளிடமிருந்து பல விஷயங்களைக் கற்றுக்கொள்வார்கள். நேற்று வெளியான 'தலைமுறை இடைவெளி' கதை படித்தீர்கள் அல்லவா !

5. நம் வீட்டுப் பெரியவர்கள் என்றாலும் அவர்கள் நமக்கோ நம் பிள்ளைகளுக்கோ பிடிக்காத விஷயத்தை செய்யும்போது, மனம் புண் படாமல் அவர்கள் செய்வது தவறு என்பதை எவ்வாறு சுட்டிக் காட்டி புரிய வைப்பது?

# தவறு செய்யும் போது சற்றுக் கடுமை காட்ட வேண்டிய நிர்ப்பந்தம் ஏற்படுவது தவிர்க்க முடியாதது. புண்படுத்துவதல்ல நோக்கம் எச்சரிக்கை செய்வது என்பதை விளக்கமாகச் சொல்ல வேண்டும்.

& பெரியவர்கள் நமக்கோ / நம் பிள்ளைகளுக்கோ பிடிக்காத விஷயத்தை செய்யும்போது, அந்த சூழ்நிலையை மிகவும் ஜாக்கிரதையாகக் கையாளவேண்டும்.
1) குழந்தைகள் இருக்கும் இடத்திலேயே  அல்லது அவர்கள் எதிரிலேயே பெரியவர்களிடம் நம் அதிருப்தியை வெளிக்காட்டக்கூடாது. 
2) குழந்தைகள் வெளியே சென்றிருக்கும் நேரத்தில், பெரியவர்கள் மனம் புண்படாத வகையில், அவர்களிடம், நடந்தது என்ன, அது ஏன் நமக்குப் பிடிக்கவில்லை அல்லது ஏற்புடையது இல்லை என்பதை தெளிவாக எடுத்துச் சொல்லவேண்டும். 

துரை செல்வராஜூ: 

பக்தி என்பது எது?
ஆன்மீகம் என்பது என்ன?

# பக்தி என்பது இறைவன் பார்த்துக் கொள்வான் என்று முழுதும் நம்பி கவலை சற்றும் இல்லாமல் நிச்சிந்தையாக (சிந்தா என்றால் வடமொழியில் கவலை) இருப்பது.

ஆன்மீகம் என்பது புறப்பொருள் துய்ப்பு என்பதன் நிலையாமையை உணர்ந்து மனச்சோர்வு அல்லது கலக்கம் முற்றிலும் இல்லாமல் இருப்பது.


இது என் பார்வை. அதாரிட்டி எல்லாம் கேட்டால் கிடைக்காது.

=========

நிலா மேடை 

மின்நிலா 004 (சுட்டி) பற்றிய கருத்துகள் நிறைய வந்துகொண்டிருக்கின்றன. எல்லோருக்கும் நன்றி. 

மின்நிலா என்ற பெயரில் புதிதாக ஒரு facebook குழுவும் ஆரம்பித்துள்ளோம். Facebook + எங்கள் ப்ளாக், நம்ம ஏரியா, மின்நிலா வாசகர்கள் அந்தக் குழுமத்திலும் விருப்பப்பட்டால் இணைந்து கொள்ளலாம். 

இது>>  மின்நிலா facebook குழுவின் சுட்டி. (Facebook உறுப்பினர்கள் இதில் சேரலாம்) 

முகநூல் குழுவில் உள்ள சௌகரியம் என்ன என்றால், அதில் கோப்புகளைப் பகிர்ந்துகொள்ள ஒரு வசதி உள்ளது. அதன் மூலமாக, நீங்கள் மின்நிலா முதல் இதழிலிருந்து எல்லா இதழ்களையும் காணலாம், பதிவிறக்கம் செய்துகொண்டு அவற்றை உங்கள் நண்பர்களுக்கும் அனுப்பலாம்.

நான் ஒரு கத்துக்குட்டியாக இருப்பதால், மாற்றங்களை ஒவ்வொன்றாக, நிதானமாக செய்துகொண்டிருப்பேன். இப்போதான் சில சில டெக்னிக்குகளைக் கற்று வருகிறேன். 

அடுத்தடுத்த லெவலுக்கு நம் வலைப்பூவைக் கொண்டு செல்லும் முயற்சியில் நாங்கள் ஈடுபட்டுள்ளோம். 

உங்கள் ஆதரவைத் தொடர்ந்து கொடுத்து, எங்களை ஊக்குவிக்க வேண்டுகிறோம். 

நன்றி. 

===========

மீண்டும் அடுத்த வாரம் சந்திப்போம்!

===========