நான் தரிசனம் செய்த கோவில்கள்: நெல்லைத்தமிழன் : வைரமுடி யாத்திரை 18

 

 வைரமுடி யாத்திரை – மேல்கோட்டை – யோகநரசிம்மர் ஆலயம் – பகுதி 18

மாலை காபிக்குப் பிறகு, ஒரு ஆட்டோவில் 10 பேர் வீதம் (ஷேர் ஆட்டோ போன்றது) எங்கள் அனைவரையும் யோக நரசிம்மர் கோவிலுக்குச் சென்றுவிட்டு வரச் சொன்னார்கள். நரசிம்மர் கோவில் குன்றின் மீது இருக்கிறது. கீழே கல்யாணி புஷ்கரணி இருக்கிறது. அங்கிருந்து கோவிலுக்குச் செல்ல 400 படிகளுக்கு மேல் உண்டு. அதற்குப் பதிலாக ஆட்டோ, பாதி வழி வரை செல்கிறது. அங்கிருந்து 150-200 படிகள்தான் ஏறவேண்டும். ஒவ்வொரு படியும் கொஞ்சம் அதிக உயரமாக இருக்கிறது. ஆட்டோவில் ஒருவருக்கு 50 ரூபாய் (போக வர). அவங்களுக்கும் இதுதான் சீசன்.

ஆட்டோவில் சென்று பாதி வழியில் இறங்கிக்கொண்டோம். அங்கிருந்து சமவெளியில் 50 அடிகள் நடந்தபிறகு, படிகள் பாதை வருகிறது. அதில் மெதுவாக ஏறி கோவிலை அடைந்தோம். வழியில் நிறைய வானரங்கள். கொஞ்சம் ஜாக்கிரதையாகவே ஏறிச் சென்றோம்.

யோகநரசிம்மர் ஆலயத்திலிருந்து 150-200 படிகள் கீழே மலையில் அமைந்துள்ள நீர்நிலை. இதிலிருந்துதான் யோகநரசிம்மர் ஆலயத்துக்கு திருமஞ்சனம் போன்றவற்றிர்க்கு நீர் எடுத்துச் செல்கின்றனர்.

யோக நரசிம்மர் ஆலயம் கடல் மட்ட த்திலிருந்து 1800 மீட்டர் உயரத்தில் இருக்கிறது. ஹொய்சாள அரசர்கள் காலத்தில் எழுப்பப்பட்ட கோவில்.  

நாங்கள் ஏற ஆரம்பித்த இடத்திலிருந்து கீழ் நோக்கிய படம். ரொம்ப கீழே கல்யாணி புஷ்கரணி

படிகளில் ஏறவேண்டியதுதான். அதோ தெரிகிறது ஆலயத்தின் கோபுரம்.

நாங்க ஒரு குடும்பமாக்கும். இங்க என்ன பார்வை… கோயிலுக்குப் போகும் வழியைப் பாரு.

பெரிய படிகள். ஏறித்தான் ஆகணும். நாங்கள் ஏறுவது மலையில் என்பதைக் காண்பிக்கும் மரம்.

மலையில் (கோவில் அருகில் பாறையில்) இருந்த சிற்பங்கள்

கோவில் கோபுர நுழைவாயில். உள்ளும் படிகளில் ஏறி உள்சுற்றை அடையவேண்டும்

வாங்க வாங்க…கோவிலுக்குள் நுழையுங்க

கருவறைக்குச் செல்லும் வழியில் யோக நரசிம்மர் சிற்பம், சுவற்றில்

மேல்கோட்டை யோக நரசிம்மர் (இணையம்)

மேல்கோட்டை யோக நரசிம்ஹர்

தரிசனம் முடித்துவிட்டு, மலை மீதிருந்து கீழே சமவெளியின் காட்சி

மலை மீதிருந்து கீழே ஊர் பக்கக் காட்சி.  கீழே தெரிவது கல்யாணி புஷ்கரணி

வந்த வழியே மெதுவாக இறங்கவேண்டியதுதான்

சுனையை அடைந்துவிட்டோம். மற்றவர்களுக்கும் காத்திருந்து எங்கள் ஆட்டோவின் 10 பேரும் வந்தபிறகு கிளம்பி,  கீழே நாங்கள் தங்கியிருந்த இடத்தை 6 ½ க்கு அடைந்தோம்.

அப்போது, செல்வப்பிள்ளை உற்சவரும் இராமானுஜர் உற்சவரும் வீதி உலாவில் எதிரெதிரே பல்லக்கில் வந்தனர்.  நாங்கள் செலுவநாராயணர் கோவிலுக்குச் சென்றிருந்தபோது இராமானுஜர் மூலவரைத்தான் சேவித்தோம். உற்சவர் புறப்பாட்டுக்காகத் தயாராகிக்கொண்டிருந்தார்.  வீதியில் சம்பத்குமாரரையும் இராமானுஜரையும் தரிசனம் செய்தது மகிழ்ச்சியைத் தந்தது. 

அன்றிரவு வீதிகளில் ஊர்வலமாக வந்த செல்வப்பிள்ளை, அவர் எதிரே இராமானுஜர்.  இந்த விக்ரஹம், அவர் மேல்கோட்டையை விட்டு நீங்கும்போது செய்யப்பட்டு அவரால் அளிக்கப்பட்டது.

இரவு 8 ½ மணிக்கு கோஸ் கரேமது, கத்தரி கூட்டு, குடமிளகாய் சாம்பார், ரசம், அப்பளாம் மற்றும் கடைலமா பாயசம்.  இரவு கோவில் செல்வதானால் சென்றுவிட்டு, மறுநாள் காலை 6 மணிக்கு காபிக்குப் பிறகு தொண்டனூர் சென்று அங்குதான் குளிக்கப்போகிறோம் என்று சொன்னார்கள். அதற்கான மாற்று உடை எடுத்துக்கொள்ளும்படியும், திரும்ப 12 மணிக்கு வந்துதான் உணவு என்று சொன்னார்கள்.  சாப்பிட்டு முடிக்கும்போதே 9 ¼ ஆகிவிட்டது. அதனால் நேரே தங்குமிடத்துக்கு வந்துவிட்டோம்.  மறுநாள் எடுத்துக்கொள்ள வேண்டியவைகளை ஒரு பையில் எடுத்துவைத்துப் பிறகு தூங்கிவிட்டேன்.

( தொடரும்)