ஜூனியர் டெக்னிகல் ஸ்கூல்

 

 பானுமதி வெங்கடேஸ்வரன் :

நவராத்திரியில் விஞ்சியிருப்பது 

பக்தியுணர்ச்சியா?

அழகுணர்ச்சியா?

சுவையுணர்ச்சியா?

# அழகு, சுவை, பக்தி என்ற வரிசை சரியாக இருக்கும். அழகுக்குத்தான் முதலிடம்.

& ஏதோ பட்டிமன்றத் தலைப்பு போல இருக்கு. 

வாசகர்கள் ஒவ்வொரு தலைப்பிலும் தங்களின் வாதங்களை இங்கே கருத்துரையாக பதியலாம். நடுவர் ஆங்காங்கே தன் கருத்துகளை வழங்குவார். 

கீதா சாம்பசிவம் : 

சின்ன வயசில் கடவுளைக் கும்பிடும்போது பெரியவங்க பயம் காட்டி பக்தியை வளர்த்தாங்களா? நீங்க பயந்திருக்கீங்களா?

# என்னைப் பொறுத்தவரை, யாரும் பயமுறுத்தி பக்தி உணர்வை வளர்க்க முயலவில்லை. கடவுள் என்றால் சர்வ வல்லமை கொண்ட உயர் சக்தி என்ற நம்பிக்கை வலுவாக மனத்துக்குள் இருந்தது.  எனவே கடவுளை பயம் ஏதும் இல்லாமல், ஒரு நம்பிக்கையுடன் வணங்குகிற மனப் போக்கு (கேட்டால் கிடைக்கும்)  இருந்தது. 

& அப்பா எனக்கு பல பக்தி கதைகள் சொல்லி வளர்த்தார். அவர் பூஜை செய்யும்போது நாள் தவறாமல் அவர் எதிரில் உட்கார்ந்து பார்த்துக்கொண்டிருப்பேன். சின்னச் சின்ன ஸ்லோகங்கள் சொல்லிக் கொடுத்தார். அவற்றை எல்லாம் இன்றும் நான் பூஜை செய்யும்போது சொல்கிறேன். பயம் காட்டி பக்தியை ஊட்டவில்லை. கடவுள் விஷயத்தில் நான் பயந்தது இல்லை. 

எல்லாம் அவன் செயல் என்பது தப்பித்தலா? அல்லது பக்தியின் எல்லையா?

# எல்லாம் கடவுள் செயல் என்பது நம் கையில் எதையோ மாற்றி அமைக்க இயலாத போது உண்டாகிற ஞானோதயம். அதில் பக்தி உணர்வைக் காண இயலாது.

& நம்மால் இயன்றதை செய்து முடித்துவிட்டு, பிறகு ' மீதி எல்லாம் அவன் செயல் என்று விட்டுவிட வேண்டும்' ஒன்றுமே செய்யாமல் எ அ செ என்று விடக்கூடாது. குரோம்பேட்டையில் எங்கள் குடும்ப டாக்டரின் அறையில், சுவற்றில் ஒரு படத்துடன் கூடிய வாசகம் : " I just dress the wounds; He only heals them." 

= = = = = = = = =

KGG பக்கம் : 

Junior Technical School (JTS) சேர்ந்ததும், முதல் நாள் முதல் வகுப்பு. முப்பது பேரும் ஆவலோடு காத்திருந்தோம். ராமமூர்த்தி என்ற ஆஜானுபாகுவான ஆசிரியர் வந்தார். ஆங்கிலத்தில் தன்னைப் பற்றி சிறிய அறிமுகம் செய்துகொண்டார். வகுப்பில் பாதி பேர்களுக்கு அவர் பேசியதில் சில வாக்கியங்கள் புரியவில்லை. 

பிறகு எங்கள் ஒவ்வொருவரையும், பெயர் என்ன, எந்த பள்ளிக்கூடத்தில் எட்டாம் கிளாஸ் படித்தோம், எந்த ஊர் என்ற விவரங்களை ஆங்கிலத்தில் சொல்லச் சொன்னார். 

அதன் பின் வருகைப் பதிவேடு எடுத்து ஒவ்வொரு பெயராக கூப்பிட்டார். 

ஒவ்வொரு மாணவனும் ஒவ்வொரு தினுசாக அட்டெண்டன்ஸ் குரல் கொடுத்தார்கள். 

ப்ரெசெண்ட் சார். 

ஆஜர் 

உள்ளேன் ஐயா 

எதுவும் சொல்லாமல் 'கை உயர்த்துதல்' போன்று பல வகை. 

ஆசிரியர் கடைசியில் புன்னகையுடன் சொன்னார்: "ஒவ்வொருவரும்  பெயர் அழைக்கப்பட்டவுடன் 'எஸ் சார்' என்று சொன்னால் போதும்." 

முதல் வகுப்பு ஆங்கிலப் பாடம். பாடப் புத்தகம் ஸ்டோருக்கு அதுவரை  வரவில்லை. அதனால், அவர் ஆங்கிலம் பற்றி - அதை பேசுவது எவ்வளவு எளிதாக செய்யலாம் என்பது பற்றி  கதைகள் கூறினார். பட்லர் இங்கிலீஷ் பற்றி கதை சொன்னார். 

நாலு காலு சார்,

நடுவுல வாலு சார்,

மில்க் சார் 

அப் சார் 

டவுன் சார். 

அதாவது ஆங்கில துரையின் பணியாளர் பாலை பூனை குடித்துவிட்டது என்று சொன்னதைப் பற்றிய கதை. 

அடுத்த ஒரு மணி நேரம் தமிழ்ப் பாடம். உயர்நிலைப் பள்ளி ஒன்பதாம் வகுப்புப் புத்தகம்தான் எங்களுக்கும் என்று சொல்லி, முதல் பாடம் நடத்தப்பட்டது. 

அடுத்து கணக்கு. 

ஆசிரியர் வந்தார். சில கணக்குகள் ( எட்டாம் வகுப்பு பகுதி - ஆனால் ஆங்கிலத்தில். ) கணக்குகள் சில போர்டில் எழுதிக் காட்டி, சில கணக்குகள் எழுதிப் போட்டார். 

அதை நாங்கள் எங்கள் நோட்டில் எழுதிக்கொண்டவுடன், எங்களை அதை போடச் சொன்னார். 

ஏதேனும் சந்தேகம் இருந்தால் கேட்கச் சொன்னார். 

ஒரு பையன் மெதுவாக எழுந்து, " சார். எல்லாமே இங்கிலீஷ்லதான் சொல்லணும், எழுதணுமா? " என்று கேட்டான். 

ஆசிரியர் : " ஆமாம். அதைத்தான் இந்தப் பள்ளிக்கூடம் ஆரம்பிக்கும் போது வெளியிட்ட விளம்பரங்களில் தெளிவாக எழுதியிருந்தார்களே! தமிழ்ப் பாடம் தவிர மீதி எல்லா பாடங்களும் ஆங்கிலத்தில்தான்." 

அக்கம்பக்கத்து சிற்றூர் மற்றும் கிராமங்களிலிருந்து வந்து சேர்ந்திருந்த மாணவர்களுக்கு இந்த தகவல் மிகவும் அதிர்ச்சியாக இருந்தது. 

அடுத்த பீரியட் - General Engineering. 

குமரேசன் என்ற ஆசிரியர் வந்தார். வருகைப் பதிவேடு - பெயர்கள் படித்து வருகை பதிவு செய்யப்பட்டவுடன், போர்டில் " CARPENTRY" என்று எழுதினார். பிறகு, வகுப்பில் அங்கும் இங்கும் நடந்தவாறே " carpentry is the art of making furniture like table, chair, bench, etc. In making furniture, wood is selected and worked with appropriate tools like hand saw, chisel, planer, etc. and ... 

எல்லோரும் அவர் முகத்தையே பார்த்துக்கொண்டு அவர், இங்கும் அங்கும் நடந்துகொண்டிருந்தபோது கண்களை அவர் மீது வைத்து, முகத்தை இங்கும் அங்கும் திருப்பிப் பார்த்துக்கொண்டிருந்தோம். 

திடீரென்று சொல்லிக்கொண்டிருப்பதை நிறுத்திய அவர், எங்களைப் பார்த்து, " Are you not taking down what I am saying?  Take your notebook and write down what I am saying. "

பெரும்பாலான பையன்களுக்கு மயக்கமே வந்துவிட்டது. 

ஒரு பையன் கேட்டான் - " சார் போர்டுல எழுத மாட்டீங்களா? " 

இல்லை என்று தலை ஆட்டினார். 

" சார் அப்போ கொஞ்சம் மெதுவாக - டிக்டேசன் போல மெதுவா சொல்லுங்க. " 

அவர் சிரித்தபடி, " Since this is first class - I will dictate slowly. From next class you should learn to write to my speed. One more point is I won't talk in Tamil. " என்றார். 

( மீதி பிறகு) 

= = = = = = =

அப்பாதுரை இந்த மாதம் முழுவதும் வார இறுதி நாட்களில் பயணங்கள் போகவேண்டி இருப்பதால், இரண்டு மூன்று புதன்கிழமைகள் விடுப்பு கோரி விண்ணப்பம் அனுப்பியுள்ளார். 

இரண்டு மூன்று வாரங்களுக்கு வேறு வாசகர்கள் யாராவது கட்டுரை, கவிதை, விமரிசனங்கள் எழுதி அனுப்பலாம். புதன் வாசகர் பக்கத்திற்கு. 

= = = = = = =