நான் தரிசனம் செய்த கோவில்கள்: நெல்லைத்தமிழன் : வைரமுடி யாத்திரை 21

 

வைரமுடி யாத்திரை – மேல்கோட்டை – பகுதி 21

மதியம் சிறிது நேரம் ஓய்வெடுத்துவிட்டு, பஜார் பக்கம் போய்ப் பார்க்கலாம் என்று நினைத்து நடந்தேன். மறுநாள் காலையில் (அதாவது ராஜமுடி தரிசனம் முடிந்ததும்), கல்யாணி திருக்குளத்தில் குளித்துவிட்டு, பிறகு மேல்கோட்டையை விட்டு 7 மணிக்குக் கிளம்பிவிடுவோம். எல்லாமே பக்கத்தில்தான் என்பதால், திருக்குளத்துக்குப் போகும் வழியையும் பார்த்துக்கொள்வோம் என்று நினைத்துச் சென்றேன். (யாத்திரை நடத்துபவர், காலையில் 5 ½ மணிக்கு காபி சாப்பிட்டுவிட்டு குளத்துக்குச் சென்று குளித்துவிட்டு, 7 மணிக்குள் தயாராகி வெளியில் வந்துவிடுங்கள், பேருந்து கிளம்பும் என்று சொல்லிவிடுவார். வேக வேகமாக நாம் தயாராகவேண்டும்.)

ஊர் திருவிழாக் கோலம் பூண்டிருந்தது என்பதையும் காண முடிந்தது.

ஊரில் அலங்காரங்கள். மக்கள் கூட்டம் வரும் என்பதால் ஏகப்பட்ட காவலர்கள்.

கடைவீதி – திடீர்க்கடைகளுடன்.  இவ்வளவு இனிப்பு, காரம் சாப்பிட ஆட்கள் இருக்கா?

வித வித கார வகைகள் பெரிய பெரிய மைசூர்பாக்குகள், வித வித அல்வாக்கள், ஜிலேபிகள். எங்க தயாரிப்பாங்க, என்ன எண்ணெய்லாம் உபயோகிப்பாங்க, சுத்தமா இருக்குமா என்று யோசிக்க விடாமல் நிறங்கள் நம்மைக் கவர்ந்து இழுக்கும்.

மேல்கோட்டைப் பகுதிக்கே உரித்தான புளி வியாபாரம் (கிலோ 100-120)

காலம் மாற மாற, புதுப் புது கட்டிடங்கள் பழைய வரலாற்றை மறைக்க நினைக்கின்றன.

கல்யாணி திருக்குளம். மிகப் பெரியது. சுற்றிலும் மண்டபங்களோடு கூடியது

கல்யாணி திருக்குளத்தின் முழுப் பரிமாணமும் படங்களில் தெரிகிறதா?

திருக்குளச் சுற்றின் மண்டபத்திலுள்ள சிற்பங்கள் மிக அழகு. நிறைய சிற்பங்கள் இருந்தன. 

கல்யாணி திருக்குளத்திலிருந்து யோக நரசிம்மர் கோவில், மலைமீது. திருக்குளத்தின் மண்டபங்கள்.

மேல்கோட்டையில் பெயர் பெற்ற சுப்பண்ணா மெஸ். இங்கு சர்க்கரைப் பொங்கல் (வெல்லம் மற்றும் கல்கண்டு) நன்றாக இருக்கும் என்று சொல்வார்கள். மேல்கோட்டைக் காரர்கள், சர்க்கரைப் பொங்கலும் புளியோதரையும் இங்குதான் முதன் முதலில் செய்தார்கள்/கண்டுபிடித்தார்கள். பிறகுதான் மற்ற இடங்களுக்குப் பரவியது என்று சொல்கிறார்கள். கொப்பரைத் தேங்காய் நிறையப் போட்டு சர்க்கரைப் பொங்கல் செய்தால், இவர்கள்தாம் கண்டுபிடித்தது என்று ஆகிவிடுமா? எனக்கு பரவாயில்லாமல்தான் பிடித்தது. இதைவிட நான் நன்றாகப் பண்ணுவேன் என்று நினைத்தேன். 2 மேசைக்கரண்டி சைஸுக்கு 40 ரூபாய். ஆனால் மற்ற ஐட்டங்களை, தோசை, தட்டை இட்லி போன்றவற்றை சாதாரண விலையில்தான் விற்றார்கள். விழாக்காலம் என்று விலையை ஏற்றவில்லை. (தட்டை இட்லி 20 ரூபாய், மசால் தோசை 40 ரூபாய்)

எல்லோரும் வாங்குகிறார்களே என்று நானும் மேல்கோட்டையில் ஒரு கிலோ புளி வாங்கினேன். அங்கிருந்த கடையில் நல்ல 9x5 வேஷ்டியும் வாங்கிக்கொண்டேன்.

4 மணி வாக்கில் காசி அல்வாவும், போண்டாவும் காபியும் தந்தார்கள். இரவு 8 ½ மணிக்கு இரவு உணவு. அதன் பிறகு வைரமுடியுடன் வரும் செல்வப்பிள்ளை தரிசனத்துக்கு இடம் பிடித்துக் காத்திருக்க வேண்டியதுதான் என்று சொன்னார்கள்.

வைரமுடியும் ராஜமுடியும் ரொம்ப காலமாகவே இட்லி பானை போன்ற பாத்திரத்தில் பத்திரமாக வைக்கப்பட்டு லாக்கரில் இருக்கும். இந்த விழாவுக்காகவே பலத்த போலீஸ் காவலுடன் எடுத்து வருவார்கள்.  அது வந்ததும், அதனைப் பல்லக்கில் ஏற்றி ஊர்வலமாக் கொண்டுவருவார்கள். நாம் உள்ளிருக்கும் வைரமுடியையோ இல்லை ராஜமுடியையோ காண இயலாது. ஆனாலும் இந்த ஊர்வலம் (நால்வீதிகளில் வரும்) வந்தால், வங்கி லாக்கரிலிருந்து இரண்டும் வந்துவிட்டன என்று அர்த்தம்.  5 ½ மணி வாக்கில் இந்த ஊர்வலம் நடந்தது. 

வைரமுடி, வங்கி லாக்கரிலிருந்து குண்டு துளைக்காத வேனில் நிறைய போலீஸ் பாதுகாப்புடன் எடுத்துவரப்படும்.  பிறகு, மாவட்ட டி.எஸ்.பி மற்றும் சீனியர் அஃபீஷியல்கள் முன்னிலையில், கோவில் பொறுப்பு பட்டாச்சார்யார்களிடம் கொடுக்கப்பட்டு, கேமரா முன்னிலையில் அவர்களால், வைரம் போன்றவை எல்லாம் சரியாக இருக்கிறதா என்று ஆராயப்படும். அவர்கள் கையெழுத்து போட்டுக்கொடுத்த பிறகு, வைரமுடியும் ராஜமுடியும் பட்டாச்சார்யார் வசம் இருக்கும். அவர்கள் தக்க பாதுகாப்புடன் செல்வப்பிள்ளைக்கு அலங்காரம் செய்யும்போது உபயோகப்படுத்துவார்கள். கோவிலுக்கு நிறைய பாதுகாப்பு போடப்படும்.

திருவிழாவின் அங்கமாக நிறைய ஆட்டம்/வேடிக்கை காட்டும் கலைஞர்கள். 

தெருக்களில் கூட்டம் சேர ஆரம்பிக்கிறது. கிடைக்கின்ற இடத்தில் பாலிதீன் பாயை விரித்து அதில் அமர்ந்துகொள்கின்றனர். – 7 மணிக்கு

8 மணிக்கு ஆங்காங்கே விரிப்புகளை விரித்து படுக்க ஆரம்பிக்கிறார்கள். நள்ளிரவுதான் பெருமாள் ஊர்வலமாக வருவார்.

இரவு 9 மணிக்கு கூட்டம் அதிகமாகிறது. ஆங்காங்கே தரும் பிரசாதங்களைச் சாப்பிட்டுவிட்டு ஓய்வு எடுக்க ஆரம்பிக்கின்றனர். (வைரமுடி திருவிழா சமயத்தில் அன்னதானம் நிறைய இடங்களில் நடைபெறும். வரிசையில் நின்று உணவும் ஒரு இனிப்பும் வாங்கிக்கொள்வார்கள்.  இரவாகிவிட்டால் சில இடங்களில் தொன்னையில் சாம்பார் சாதம், தயிர் சாதம் தருவார்கள். வைரமுடி சேவையைக் காண வரும் மக்களுக்கு இது மிக உபயோகமாக இருக்கும்)

சில சமயங்களில் சுயநலமாக இடத்தைப் பிடித்துக்கொண்டு, மற்றவர்களை வரவிடாமல் செய்யவேண்டியிருக்கும். மனதுக்குக் கஷ்டமாகத்தான் இருக்கும். இரவு 10 மணி நிலைமை.

வைரமுடியுடன் சம்பத்குமாரர் ஊர்வலம் வரும் சமயத்தில் இவ்வளவு கூட்டம் தெருக்களில் இருக்கும். (கிட்டத்தட்ட நள்ளிரவு 12 மணிக்கு)

இரவு 8 மணிக்கே உணவு தயாராகிவிட்டது. இடத்தைப் பாதுகாத்துக்கொள்வதற்காக, batch batch ஆகச் சென்று இரவு உணவைச் சாப்பிட்டோம். கோவில் பிரசாதங்களோடு heavy உணவு. பிறகு அவரவர் இடங்களில் சென்று அமர்ந்துகொண்டோம்.

இரவு 9 ½ மணிக்கு புறப்பாடு ஆரம்பிக்கும். ஊர்வலம் மிக மிக மெதுவாக வரும். அதனால் செவ்வக வடிவ மாட வீதியில் இரண்டாவதில் இருந்த எங்கள் இடத்திற்கு வருவதற்கு நள்ளிரவு 12 மணிக்கு மேல் ஆகிவிடும். இடையில் கொஞ்சம் தூங்கினேன். 12 மணிக்கு எழுந்து வெளியில் தயாராக அமர்ந்தேன்.

வைரமுடி சேவை பற்றிய விவரங்கள் அடுத்த வாரத்தில்.

(தொடரும்)