லட்சுமணதாஸ் - நீ பாஸ் பாஸ் !

 

சென்ற வாரம் யாரும் எங்களைக் கேள்விகள் கேட்கவில்லை என்பதால், எங்கள் கேள்விகள் உங்களுக்கு : 

1) சமீபத்தில் நீங்கள் பார்த்த அரசியல் பிரமுகர் யார்? எங்கே, எப்போது? 

2) புளித்துப் போன தோசை மாவை எப்படிப் பயன்படுத்துவீர்கள்? 

3) சமீபத்தில் நீங்கள் மிகவும் ரசித்துப் படித்த - மற்ற பதிவர்களின் பதிவு எது?

= = = = = = =

KGG பக்கம் : 

லட்சுமணதாஸ். 

JTS பள்ளியில் மூன்று வருடங்களும் என்னுடன் படித்த பையன்களில் ஒருவன். விசித்திரமான சில பழக்கங்கள் கொண்டவன். 

நான் எப்பொழுதும் கழுத்துப் பகுதியில் கிளாஸ் விண்டோ இருக்கின்ற பேனாவை ( camlin என்று ஞாபகம்) பயன்படுத்துவேன். இங்க் இருப்பு என்ன என்று அவ்வப்போது கண்காணிக்க வசதியாக இருக்கும். தினமும் காலையில் இங்க் இருக்கிறதா என்று பார்த்து, குறைவாக இருந்தால் டாப் அப் செய்துகொண்டு பள்ளிக்குக் கிளம்புவேன். 

லட்சுமணதாஸ் கொண்டு வரும் பேனாவில் அப்படி எதுவும் கண்ணாடி ஜன்னல் கிடையாது. வகுப்பு நடந்துகொண்டு இருக்கும்போது அவனுடைய பேனா சரியாக எழுதவில்லை என்றால், உடனடியாக அதன் கழுத்தைத் திருகி (கையால் கழற்ற வரவில்லை என்றால், பல்லால் கடித்துத் திருகித் திறப்பான்) பிறகு, வலது கையில் பேனாவின் அடிப்பகுதியைப் பிடித்து அப்படியே தன் இடது உள்ளங்கையைக் குவித்து வைத்து  சாய்த்து, எவ்வளவு இங்க் இருக்கிறது என்று பார்த்துக்கொள்வான். பிறகு அப்படி ஊற்றிய இங்கை திரும்ப லாகவமாக பேனாவுக்குள் ஊற்றி இடது கையை தலையில் தடவிக்கொள்வான். இடது கை, தலை முடி, சட்டைப் பை - எல்லா இடங்களிலும் இங்க் கறையுடன் வினோதமாகக் காட்சி அளிப்பான். 

அவன் வகுப்பு ஆசிரியரிடம் மாலை நேரங்களில் டியூஷன் எடுத்து படித்து வந்ததால், வகுப்பு ஆசிரியரின் பெட் ஆனான். கிளாஸ் டெஸ்ட், காலாண்டு, அரையாண்டு பரிட்சைகளில், ஃபிசிக்ஸ் மற்றும் கெமிஸ்ட்ரி பாடங்களில் அவனுக்குத்தான் முதல் மதிப்பெண் எப்போதும் கிடைக்கும். இரண்டிலும் 80 க்கு மேலே மார்க் வாங்குவான் ( அல்லது ஆசிரியர் கொடுப்பார் ) ஆசிரியர் கொடுக்கும் நோட்ஸ் அப்படியே மனப்பாடம் செய்து வார்த்தை மாறாமல் எழுதி வைப்பான். மேலும் டியூஷன் மாணவன் என்பதால், என்னென்ன கேள்விகள் கேட்கப்படும் என்பதும் அவனுக்கு சூசகமாகத் தெரிவிக்கப்படும். அந்த ஆசிரியர் எப்போதும் எனக்கு 75% க்கு மேலே மதிப்பெண் போடமாட்டார். " சொந்தத்துல வண்டி ஓட்டறே - அதனால இதுக்கு மேலே உனக்கு மார்க் கிடைக்காது " என்பார். அதாவது - கேள்விகளுக்கு அவர் கொடுத்த நோட்ஸ் வார்த்தைகளை விட்டு நான் என் சொந்த வார்த்தைகளில் பதில் எழுதுவேன். அது அவருக்குப் பிடிக்காது. 

 லட்சுமணதாஸ் சொன்ன இன்னொரு சுவாரஸ்ய தகவல் : 

அவன் எட்டாம் வகுப்புப் படித்த கோ எஜுகேஷன் பள்ளியில், மாணவர்களிடையே ஒவ்வொருவரை ஒவ்வொரு துறைக்கு மந்திரியாக தேர்ந்தெடுப்பார்களாம். அதாவது சுற்றுச் சூழல் / சுகாதார மந்திரி, தோட்டத்துறை மந்திரி, கல்வி மந்திரி, பாதுகாப்பு மந்திரி என்று பல மந்திரிகள். எல்லோரும் பள்ளிக்கூட வளாகத்திற்குள் இருக்கின்ற சிற்சில விஷயங்களுக்கு மந்திரிகள். 

உதாரணமாக  சுற்றுச் சூழல் மந்திரி பள்ளிக்கூட வளாகத்திற்குள் உள்ள சுகாதார பாதிப்புகளை சரி செய்ய தகுந்த ஆசிரியர் மூலம் ஆவன  செய்யவேண்டும். தோட்டத்துறை மந்திரி பள்ளி வளாகத்தினுள் உள்ள செடி கொடிகளைப் பாதுகாக்க, அவற்றுக்கு நீரூற்றுவது, களை அகற்றல் போன்ற பணிகளை கண்காணிக்க. 

ஒவ்வொரு சனிக்கிழமையும் மதியம் சட்டசபைக் கூட்டம் நடக்குமாம். சபாநாயகர், ஒரு ஆசிரியர். மந்திரிகள் எல்லோரும் மாணவ, மாணவிகள். மற்ற மாணவர்கள் எல்லோரும் சட்டசபை உறுப்பினர்கள். 

தோட்டத்துறை மந்திரி, எட்டாம் வகுப்பில் முதல் ரேங்க் வாங்கும் மாணவி. எப்போதும் இரண்டாவது ரேங்க் வாங்கும் பையன் என்ன செய்வானாம் - லட்சுமணதாசிடம், காதோடு காதாக, " நீ தோட்டத்துறை மந்திரியிடம், 'சென்ற புதன் கிழமை அன்று பள்ளி கிழக்குப்பக்கச் சுவர் மூன்றாவது வரிசையில் நான்காவது செடியான செவ்வந்திச் செடி ஒடிந்து விழுந்திருந்ததே அதை ஏன் தோட்டத்துறை மந்திரி கவனத்தில் கொண்டு சரி செய்ய முயற்சி எடுக்கவில்லை?' என்று கேள்" என்று சொல்லுவான். 

லட்சுமணதாஸ் அவ்வாறு கேட்டவுடன், தோ து மந்திரி உடனே, " அது வியாழக்கிழமைக் காலையில் பார்த்து, சரி செய்துவிட்டோம். ஒடிந்து விழுந்திருந்த செடிக்கு பக்கத்தில் ஒரு சிறிய குச்சி நட்டு, செடியை அதோடு சேர்த்து இழுத்துக் கட்டினோம். " என்று சாதுரியமாகச் சொல்லுவாளாம். உடனே கேள்வி கேட்கச் சொன்ன அந்த இரண்டாவது ரேங்க் மாணவன் எழுந்து, " நம் பள்ளித் தோட்டத்தின் கிழக்குப் பக்கச்சுவர் மூன்றாவது வரிசையில் செவ்வந்திச் செடிகளே கிடையாது. அந்த வரிசையில் எல்லாமே ரோஜா மற்றும் தும்பைச் செடிகள்தான். அங்கு எந்தச் செடியும் ஒடிந்து விழவில்லை. இப்படி இருக்க - மந்திரி ஏன் சட்டசபையில் பொய் சொல்கிறார்? எல்லா கேள்விகளுக்கும் இப்படித்தான் பொய்யான பதில்கள் சொல்கிறாரா ? " என்று கேட்பானாம். 

அந்த மந்திரி - மாணவி கிட்டத்தட்ட அழும் நிலைக்குச் செல்வதைப் பார்த்து திருப்தி அடைவானாம் அந்த இரண்டாம் ரேங்க் மாணவன்! 

= = = = = =

அப்பாதுரை பக்கம் : 

வாயும் வயிறும்

வழக்கை விவரித்துக் கொண்டிருந்தார் வக்கீல் கோமோ.  திறந்த வாய் மூடாமல் கேட்டுக் கொண்டிருந்தார் நீதிபதி ஸிமோனா. அவர் அவ்வப்போது கொறித்துக் கொண்டிருந்த சாக்லேட் வெண்ணை தடவி வறுத்த பாதாம்பருப்பு ஒரு காரணம் என்றாலும், திறந்த வாய் மூடாமல் அவர் கேட்டதற்கு முக்கிய காரணம் வழக்கின் விவரங்கள் தாம்.

"யுவர் ஆனர், இதோ குற்றம் சாட்டப்ப்ட்டிருக்கும் இருவரும் கடந்த இருபத்து மூன்று ஆண்டுகளாக என் கட்சிக்காரர் வீட்டில் இருந்து கொண்டு வாடகை பணமும் கொடுக்காமல், அதற்கு இணையாக ஏதாவது வீட்டு வேலையோ அல்லது தோட்ட வேலையோ எதுவும் செய்யாமல் விதவிதமான சாப்பாடு வேறு தினம் வற்புறுத்தி உண்டு வயதான என் கட்சிக்காரருக்குத்  தொந்தரவு கொடுத்து வருகிறார்கள்".

"என்ன சாப்பாடு விதம் விதமாக?" என்று ஏதோ நினைவில் கேட்ட நீதிபதி சட்டென்று சுதாரித்தார்.   "ப்ரொஸீட்" என்பதற்கு பதிலாக  "ப்ரொசீதரெ" என்றார். அதற்கு இரண்டு காரணங்கள். முதலாவது இது இத்தாலியின் பாரி மாகாண நீதிமன்ற வழக்கு, இரண்டாவது அங்கே யாருக்குமே ஆங்கிலம் தெரியாது. வக்கீல் கோமோ தொடர்ந்தார்.  "நீதிபதி அவர்களே, இந்த இருவரையும் உடனே வீட்டிலிருந்து விரட்ட உத்தரவு கொடுத்து, இருபது வருட வாடகை, சாப்பாட்டுக்கான செலவு இரண்டையும் குறைந்தபட்ச அபராதமாக விதிக்குமாறு கேட்டுக்கொள்கிறேன்".

எதிர்தரப்பு வக்கீல் ஜியோவானியை பார்த்தார் ஸிமோனா. 

"கனம் நீதிபதி அவர்களே. என் கட்சிக்காரரான இருவரும் எந்தத் தவறும் செய்யவில்லை.  குற்றம் சாட்டப்பட்டிருக்கும் என் கட்சிக்காரர்கள் இருவரும் இருபத்து மூன்று வருடங்களாக எதிர்கட்சிக்காரர் வீட்டில் தங்கி உண்டு வாடகை தராமல் வாழ்ந்தது உண்மை.  ஆனால் அது அவர்கள் உரிமை. இருவரும் எதிர்கட்சிக்காரரின் பிள்ளைகள். பிரதி எதிர்பாராமல் பிள்ளைகளைப் பேணுவது பெற்றோர் கடமையென்று இத்தாலிய சட்டப்பிரிவில் திட்டமாகச் சொல்லியிருக்கிறது" என்றார். நாலைந்து சட்டப்பிரிவுகளை எடுத்து விட்டார். ஒரு பிஸ்காடியைக் கடித்து மென்றார். 

"நன்றாக இருக்கிறதா?" என்ற நீதிபதி மறுபடி சுதாரித்து வக்கீல் கோமோவைப் பார்த்தார். 

"யுவர் ஆனரே" என்றார் கோமோ.  "எதிர்தரப்பு வக்கீல் மொறுமொறு பிஸ்காடியை கடித்து மெல்லும் சுவாரசியத்தில் தன் கட்சிக்காரரின் வயதுகளைக் குறிப்பிட மறந்துவிட்டார்.  அவர்கள் இருவரும் என் கடசிக்காரரின் பிள்ளைகள் தான் ஆனால் ஒருவருக்கு வயது நாற்பத்து ஒன்று, மற்றவருக்கு வயது நாற்பத்தாறு.  இந்தியா போன்ற நாடுகளில் இவர்களை தடிக்கடாமாடுகள் என்று அழைக்கும் வழக்கம் உண்டு ஆனரே" என்றார்.  "முப்பது வயதுக்கு மேல் பிள்ளைகளைப் பராமரிக்க வேண்டியதில்லை என்று சட்டமே சொல்லியிருக்கிறது".

"எந்த சட்டம்?" என்றார் நீதிபதி.

"நம்ம இத்தாலிய சட்டம் தான் ஆனரே.. குடும்ப உரிமைப் பாதுகாப்பு சட்டப் பிரிவுகள் 17, 18..."

"எனக்குத் தெரியும்.. உங்களுக்கு தெரியுமானு சோதிச்சுப் பார்த்தேன் சும்மா" என்ற நீதிபதி ஸிமோனா, ஒரு சாக்லெட்டை நாசூக்காக வாயில் அடக்கினார்.  "என்ன ஜியோவானி? உங்கள் கட்சிக்காரர்கள் அத்துமீறி தங்கியிருப்பது உண்மையென்று ஒப்புக் கொள்கிறார்களா?" என்றார்.

"இல்லை. பிள்ளைகளுக்குத் தேவையான காலம் வரை பெற்றோர் பராமரிப்பு தரவேண்டும் என்று இத்தாலிய குடும்ப உரிமைச் சட்டம் பிரிவு 16ல் தெளிவாகச் சொல்லியிருக்கிறது யுவர் ஆனரே. என் கட்சிக்காரர்கள் தங்களுக்கு பெற்றோர் பராமரிப்பு இன்னும் சில காலம் தேவை என்று நம்புகிறார்கள்.  இந்த சட்டப்பிரிவு பற்றி எதிர்கட்சி வக்கீல் படிக்கவில்லை போல யுவர் ஆனர்".

நீதிபதி ஸிமோனா வாயில் விரலை வைத்தபடி வக்கீல் கோமோவைப் பார்த்தார். 

வக்கீல் கோமோ, "உண்மை தான் யுவர் ஆனரே.  ஆனால் சட்டப்பிரிவு 16ல் தொடங்கும் குடும்ப உரிமையை 17, 18, 19 பிரிவுகள் வரம்பு மற்றும் உதாரணங்களோடு ஆண் பெண் பிள்ளைகள் இருவருக்குமான உரிமைகளை விளக்குகின்றன ஆனரே" என்றார். "குடும்ப உரிமை சட்டப் பிரிவுகள் 16, 17, 18, 19" எல்லாம் சேர்த்து எடுத்துக் கொள்ளவேண்டும் யுவர் ஆனர்".

"19ல் என்ன போட்டிருக்கிறது?" என்றார் ஜியோவானி.

"சுபம்"னு போட்டிருக்கு என்றார் கோமோ.

சிரித்தார் ஸிமோனா. எடுத்தார் சுத்தியலை. போட்டார் மேஜையில் ஒரு போடு. "இரண்டு பிள்ளைகளும் வெட்கமில்லாமல் பெற்றோர் வீட்டில் காலம் காலமாக உட்கார்ந்தது போதாதென்று வீட்டு வேலை செய்யாமல் வாடகை தராமல் விதவிதமான சாப்பாடு கேட்டு வாங்கிச் சாப்பிட்டுத் தொந்தரவு கொடுத்ததை வன்மையாகக் கண்டிக்கிறேன். பத்து வருட அபராதமாக வருடத்துக்கு தலா பத்தாயிரம் லிரா விதிக்கிறேன். அபராதத்துடன் அடுத்த ஐந்து வருடங்களுக்கு தலா ஆறு மாதம் பெற்றோர் வீட்டுத் தோட்ட வேலை செய்யுமாறு உத்தரவிடுகிறேன்" என்றார் நீதிபதி ஸிமோனா.

"என் கட்சிக்காரர்கள் உங்கள் தீர்ப்பை அப்பீல் செய்வார்கள் யுவர் ஆனர்" என்றார் ஜியோவானி.  அவர் கட்சிக்காரர் இருவரும் துடித்துக் குதித்தனர். "ஆமாம் சித்த்த்தீ.. விடமாட்டோம்.. உன் அக்காவுக்கு சாதகமா தீர்ப்பு சொல்லிட்டல்ல? விட மாட்டோம்".

"டேய்.. சித்தி கித்தியெல்லாம் கோர்ட்டுக்கு வெளில" என்றபடி அகன்றார் நீதிபதி ஸிமோனா.

= = = = = = =