'திங்க'க்கிழமை : ஆர்கானிக் பர்ஃபி - ஹேமா ரெஸிப்பி

தேவையான பொருட்கள் 

தோலுரித்து வறுத்த வேர்க்கடலை ஒரு கிண்ணம்.

வேர்க்கடலை எடுத்துக் கொண்ட கிண்ணத்தின் அளவில் பாதியளவு 

மீல்மேக்கர், ஓட்ஸ், அவல், பொட்டுக்கடலை, தேங்காய்த்துருவல் 

வெல்லம் தேவையான அளவு 

நெய் 

ஏலக்காய் 

வேர்க்கடலை, அவல், ஓட்ஸ், பொட்டுக்கடலை மீல்மேக்கர் எலலவற்றையும் தனித்தனியாக வறுத்து வைத்துக் கொள்ளளவும்.

தேங்காயை இரண்டு ஸ்பூன் நெய் விட்டு லேசாக வதக்கிக் கொள்ளவும்.

வறுத்த வேர்க்கடலையை முதலில் மிக்சியில் இட்டு "ஒண்ணும் பாதியுமா" நாலு சுற்று சுற்றிய பின் ஏலக்காய் உள்ளிட்ட மற்ற பொருட்களையும் ஒவ்வொன்றாய் சேர்த்து அரைத்து எடுத்துக் கொள்ளவும்.  ஒவ்வொன்றையும் தனித்தனியாய் அரைத்துக் கூட எடுத்து பின்னர் சேர்த்துக் கொள்ளலாம்.

அரைத்து எடுத்திருக்கும் பொடியின் அளவுக்கு சமமாக, அலலது அதற்கு முக்கால் பங்கு வெல்லம் - அவரவர் சுவைக்கேற்ப - எடுத்து வெல்லத்தின் அளவில் பாதி அளவு தண்ணீரில் கரைத்து பாகு காய்ச்சவும்.  

முற்றிய பாகுக்கு கொஞ்சம் முந்தைய பதத்தில் எடுக்கவேண்டும்.  வெல்லப்பாகை வடிகட்டி எடுத்துக்கொண்டு அதை மறுபடி அடுப்பில் வைத்து கிளறிக்கொண்டே வறுத்து பொடி செய்து வைத்திருக்கும் கலவையை அதில் சேர்த்து கிளறவும். துகையால் பதத்துக்கு வந்த உடன் ஏற்கெனவே நெய் கொட்டி பரப்பி வைத்திருக்கும் தட்டில் அதைக் கொட்டி வில்லை போடவும்.