நான் தரிசனம் செய்த கோவில்கள்: நெல்லைத்தமிழன் : வைரமுடி யாத்திரை 19

 

வைரமுடி யாத்திரை – தொண்டனூர் – பகுதி 19

முந்தைய நாள் மேல்கோட்டை வந்த பிறகு இரு முறை செல்வநாராயணர் கோவிலுக்குச் சென்று மூலவரை தரிசனம் செய்தேன். மறுநாள் மதியத்திலிருந்து கூட்டம் வர ஆரம்பித்துவிடும். அதற்குப் பிறகு மூலவரை தரிசனம் செய்ய 2 மணி நேரங்களுக்கு மேல் ஆகிவிடும். அதனால் நான் அதிகாலையில் சீக்கிரம் எழுந்து, நேரே கோவிலுக்குச் சென்றேன். 5 ½ க்குத்தான் விஸ்வரூப தரிசனம் ஆரம்பித்த து. சீக்கிரமாகவே தரிசனம் செய்ய முடிந்தது. பிறகு காபிக்குச் சென்றேன். காபி முடிந்ததும், குளிப்பதற்குத் தேவையானவைகளை மாத்திரம் எடுத்துக்கொண்டு, பேருந்தில் தொண்டனூர் சென்றோம். 

மேல்கோட்டை என்று அழைக்கப்படும் திருநாராயணபுரத்தில், கோவில் 1 ஏக்கர் அளவில் இருக்கும். கோவிலுக்கு வலப்புறம், நான்கு மாட வீதிகள் அமைந்திருக்கின்றன. 150 மீட்டர், 300 மீட்டர் நீளங்களில் இருக்கும் செவ்வக வடிவம். இதற்கு வெளியே ஊர் நிறைய வளர்ச்சி பெற்றிருக்கிறது. இந்த நான்கு மாடவீதிகளில் ஒன்றில் ஒரு பள்ளியும் செயல்படுகிறது.  இந்த நான்கு மாடவீதிகளில்தான் வைரமுடி அணிந்து செல்வப்பிள்ளை சந்திரப் ப்ரபையில் பல்லாக்கில் ஊர்வலமாக வருவார். நான்கு வீதிகளிலும் வந்து பக்தர்களுக்குத் தரிசனம் கொடுத்துவிட்டு கோவிலுக்குத் திரும்ப கிட்த்தட்ட 5-6 மணி நேரம் ஆகிவிடும். அப்படியென்றால் எவ்வளவு மெதுவாக இந்த ஊர்வலம் நடக்கும் என்று கற்பனை செய்துகொள்ளுங்கள். இந்தச் சமயத்தில் (ஒரு நாள், அதாவது மாலை 4 மணியிலிருந்து மறுநாள் காலை 7 மணி வரை) அந்தச் சின்ன கிராமத்தில் லட்சக்கணக்கான மக்கள் வருவார்கள். நிறைய அன்னதானக் கூடங்களும் உண்டு. வீதிகளை அலங்கரிப்பது, தண்ணீர் தெளிப்பது, கோவிலில் பூக்களுடன் கூடிய அலங்காரம் என்று அந்த இடமே ஜெகஜ்ஜோதியாக இந்த ஒரு நாள் இருக்கும்.

வைரமுடி திருவிழாவிற்காக மாடவீதிகளில் சீரியல் விளக்குகள் பொருத்தியிருக்கிறார்கள். (காலை 4 ¼ )

கோவில் பூ அலங்காரத்துடன் வண்ண விளக்குகளினால் ஒளிமயமாக்கப்பட்டிருந்தது.

கோவில் வெளிமண்டபத்தில் இருக்கும் தூண்களில் உள்ள சிற்பங்கள். ஏற்கனவே மக்கள் இந்த மண்டபத்தில் நிறைய ஆரம்பித்துவிட்டார்கள்.

பூதனை சிற்பமும்,  அரங்கநாதனின் சிற்பமும்

லக்ஷ்மி நரசிம்ஹரும் காளிங்க நர்த்தனமும்

கல்கி அவதாரம்

முதல் சிற்பம் வெண்ணையைக் கையில் வைத்திருக்கும் கிருஷ்ணர். இரண்டாவது, கருடன்.

முதல் சிற்பம் லக்ஷ்மி நாராயணர். இரண்டாவது கல்கி அவதாரம் போல் தெரியவில்லை. குதிரை சரியாக வராததால் இருக்கும்.

இரண்டாவது சிற்பத்தில் காணப்படுவதுபோலத்தான் பெரும்பாலும் விஷ்ணு மூர்த்தங்கள் கர்நாடகா கோவில்களில் காணப்படுகின்றன (மளூர், பேளூர் போன்று பல கோவில்களிலும்)

விஷ்ணுவின் சிறிய திருவடியும் (ஹனுமான்), பெரிய திருவடியும் (கருடன்)

கோவில்களுக்குச் சென்றால் நான் விநாயகர் சிற்பங்கள் இருந்தால் படமெடுத்துவிடுவேன். அந்தக் கோவில் எந்தக் காலத்தைச் சேர்ந்தது என்றும் தெரிந்துகொள்வேன்.

காலையில் மேல்கோட்டை யோகநரசிம்மர் ஆலயத் தோற்றம். மேல்கோட்டையிலிருந்து 500 படிகள் மேலே ஏறிச் சென்றால் கோவிலை அடையலாம்.

20 கிமீ தூரத்தில் இருக்கும் தொண்டனூரை, 7 ¼ க்கு அடைந்தோம். குளிப்பதற்குத் தேவையான டிரெஸ் இருக்கும் பையை எடுத்துக்கொண்டு, சுமார் ½ கிமீ நடந்து சென்று ஏரியை அடைந்தோம்.

தொண்டனூரில், நான்கு இடங்கள் முக்கியமானவை. தொண்டனூர் ஏரி, அங்கிருந்து சிறிது தூரத்தில் அமைந்திருக்கும் யோக நரசிம்மர் ஆலயம். இது சிறிய கோவில். பக்த பிரகலாதனால் பிரதிஷ்டை செய்யப்பட்டது என்று நம்பப்படுகிறது. (5500 ஆண்டுகளுக்கு முன்னர்). இந்தக் கோவிலை அடைய 20 படிகள் ஏறவேண்டும். இது இராமானுஜரின் அபிமானத்தலம் என்று சொல்லப்படுகிறது.

இராமானுஜரின் சீடர் தொண்டனூர் நம்பி, இங்கு ஒரு ஏரியை அமைத்தார். அது பஞ்ச அப்ஸர தடாகம் என்று அழைக்கப்பட்டது. இந்தப் பகுதியைத் தலைமையிடமாகக் கொண்டு ஜைன அரசன் bபிட்ட தேவா ஆட்சி புரிந்துவந்தான். அவனுடைய மகள் நோய்வாய்ப்பட்டிருந்தாள் (மனநிலை சரியில்லாமல் இருந்தாள்). அரசனின் மகளின் நோயை யாராலும் குணப்படுத்த முடியவில்லை. தொண்டனூர் நம்பி, அரசனை இராமானுஜரிடம் அழைத்துவந்தார்.  இராமானுஜர், அரசனின் மகளை தொண்டனூர் ஏரியில் குளித்துவிட்டு, யோக நரசிம்மர் கோவிலுக்குச் செல்லச் சொன்னார். கோவிலில் அர்ச்சகர், நரசிம்மர் கரத்தில் இருந்த தண்டத்தை இளவரசியின் தலையில் வைத்ததும், இளவரசியின் மனநோய் முற்றிலும் குணமடைந்தது.

மிகவும் மனமகிழ்ந்த அரசன் bபிட்ட தேவா, இராமானுஜருக்கு தான் என்ன தரவேண்டும் எனக் கேட்டபோது, தான் வைணவத்தைப் பரப்பவே ஹொய்சாள நாட்டுக்கு வந்துள்ளதாகவும், அரசன் வைணவத்துக்கு மாறவேண்டும் என்றும் கேட்டுக்கொண்டார். அரசன், தன் மதக்குழுவினரின் விருப்பத்துக்கு மாறாக, வைணவத்தைத் தழுவி, விஷ்ணுவர்தன் என்று பெயர் மாற்றம் கொண்டார். தன்னுடன் இருந்த ஜைனர்களிடம், இராமானுஜர் அவதார புருஷர், ஆதிசேஷன் எவ்வாறு லக்ஷ்மண அவதாரம் எடுத்து இராமருடன் இருந்தாரோ அதுபோல கலியுகத்தில் ஆதிசேஷ அவதாரம் இராமானுஜர் என்று சொன்னார். ஆனாலும் அதனை ஏற்றுக்கொள்ளாமல், ஆயிரம் ஜைனர்களும் இராமானுஜருடன் வாதிட வந்தனர்.  (மதக்கருத்துக்களை). இராமானுஜர், யோக நரசிம்மரின் அருளை யாசித்து, சந்நிதிக்கு வெளியே, ஒரு திரையிட்டு, அதன் பின்னே அமர்ந்துகொண்டு, எதிரே இருந்த ஆயிரம் ஜைனர்களின் கேள்விகளுக்கும் ஒரே சமயத்தில் பதிலளித்தார். இராமானுஜர் அவதார புருஷர் என்று அறிந்துகொண்ட ஆயிரம் ஜைனர்களும், வைணவத்திற்கு மாறினர்.  (விஷ்ணு வர்தன் பிறகு பல கோவில்களை எழுப்பினான்)

பன்னிரண்டு ஆண்டுகள் திருநாராயணபுரத்தில் இருந்து பிறகு ஸ்ரீரங்கம் திரும்ப யத்தனித்தபோது, மேல்கோட்டையில் இருந்த பக்தர்கள் அவரைப் பிரியமாட்டாமல் இருக்க, இராமானுஜருடைய விக்ரஹம் ஒன்று செய்யப்பட்டு, அதை ஆரத் தழுவி தன் நினைவாக வைத்துக்கொள்ளச் சொன்னார் இராமானுஜர். (இது நடந்த து மேல்கோட்டையில்). அதுபோல தொண்டனூர் மக்களும் அவரைப் பிரியவொட்டாமல் இருக்க, இராமானுஜர், தன் சூக்ஷ்ம ரூபமான ஆதிசேஷ ரூபத்தை, யோக நரசிம்மர் ஆலயத்தில் பிரதிஷ்டை செய்தாராம். அந்தச் சந்நிதி இப்போதும் யோகநரசிம்மர் ஆலயத்தில் இருக்கிறது. அங்கேயே இராமானுஜர் உபயோகித்த பூக்கூடையும் இருக்கிறது.

மேல்கோட்டையில் செலுவநாராயணர் கோவிலில் உள்ள இராமானுஜர் உற்சவ விக்ரஹம், இராமானுஜரின் இளமையை நினைவுபடுத்தும் விதத்தில் இருக்கும். அதை அபிமான விக்ரஹம் என்கின்றனர். ஸ்ரீபெரும்புதூரில் உள்ள இராமானுஜர் விக்ரஹம் ஸ்தூல ரூபம் என்றும் (அதன் கதை பின்பு), ஸ்ரீரங்கத்தில் இருக்கும் இராமானுஜர் திருவுருவம் சரீரம் என்றும், தொண்டனூரில் இருக்கும் சேஷ ரூபம் சூக்ஷ்ம ரூபம் என்றும் குறிப்பிடப்படுகிறது. இராமானுஜரால் நிர்மாணிக்கப்பட்ட சேஷ ரூபம், வைகானச ஆகமம் கொண்டு பிரதிஷ்டை செய்யப்பட்டது என்று சொல்கிறார்கள்.

இந்த யோக நரசிம்மர் கோவிலில் வேண்டிக்கொண்டு, வேண்டுதல் நிறைவேறியதும் நன்றி தெரிவிக்கும் விதமாக, நரசிம்மருக்கு 10X6 வேஷ்டியும், இராமானுஜருக்கு காவி நிற வஸ்திரமும் சமர்ப்பிக்கிறார்கள்.  

தொண்டனூர் ஏரி, தொண்டனூர்

தொண்டனூர் ஏரி மிகப் பிரம்மாண்டமான ஏரி. அங்கு குளித்துவிட்டு, மலைப்பாதை வழியாக யோக நரசிம்மர் கோவிலுக்குச் சென்றோம்.

தொண்டனூர் ஏரி

மிகப் பெரிய ஏரி இது. இராமானுஜரால் ஏற்படுத்தப்பட்டது.

ஏரியிலிருந்து பாசனத்திற்கு வெளியேறும் நீர்

இந்த இடத்தின் முக்கியத்துவம் கருதி, இங்கு அமைக்கப்பட்டிருக்கும் இராமானுஜர் சிலை. 

யோக நரசிம்மர் ஆலயம், தொண்டனூர்

தொண்டனூர் யோக நரசிம்மர் கோவிலுக்கு ஏறுவதற்கான படிகள். இது வைரமுடி சேவை சமயம் என்பதால், நிறைய பக்தர்கள் லாரியில் தொண்டனூருக்கும் வந்துவிட்டுச் செல்வார்கள். பக்தர்கள் குழுவாக வந்து ஆங்காங்கு தங்கி, குளித்து, உணவு தயாரித்துச் சாப்பிட்டு, கோவில்களை தரிசனம் செய்துவிட்டு பிறகு மேல்கோட்டைக்கு வருவார்கள். அருகில் அப்படி ஒரு குழு உணவு தயாரித்துக் கொண்டிருந்தபோது எடுத்த படம்.

தொண்டனூர் யோக நரசிம்மர் ஆலயம். 

குன்றுப் பகுதியில் அமைந்திருக்கும் ஆலயம். விமான தரிசனம்.

யோக நரசிம்மர் சன்னிதி மற்றும் இராமானுஜர் சன்னிதி

(இணையத்திலிருந்து… தொண்டனூர் யோக நரசிம்மர் மூலவர். பிரகலாதனால் பிரதிஷ்டை செய்யப்பட்டவர்)

தொண்டனூர் இராமானுஜர், சேஷ ரூபம் (சூக்ஷ்ம ரூபம்). இராமானுஜரால் பிரதிஷ்டை செய்யப்பட்டது – இணையம். 

இராமானுஜர் உபயோகித்த பூக்கூடை. அந்தச் சந்நிதியிலேயே இருக்கிறது.

தொண்டனூர் யோக நரசிம்மர் ஆலயத்தில் தரிசனம் முடிந்த பிறகு எங்கு சென்றோம் என்பதை வரும் வாரத்தில் பார்க்கலாம்.

(தொடரும்)