மனக்குரல்

 ஒருமுறை புத்தகக் கண்காட்சி சென்றபோது ஆடியோ புக் என்று பார்த்து கவரப்பட்டேன்.  நல்லவேளை, விசாரித்தேனே தவிர எதுவும் வாங்கவில்லை.

வாங்கி வந்து ஒலிக்க விட்டிருந்தால் செட் ஆகியிருக்காது.  திருப்தி வந்திருக்காது!

என்னிடம் பாம்பே கண்ணன் வழங்கிய பொன்னியின் செல்வன் ஆடியோ டி வி டி இருக்கிறது.  திரு பாம்பே கண்ணன் நாகப்பட்டினத்துக்காரர்,  என் மாமாக்களுக்கு நண்பர் என்பதால் வாங்கினேன்.  அடிஷனல் அட்ராக்ஷன் சக பிளாக்கர் அனன்யா மகாதேவன் ஒரு கேரக்டருக்கு குரல் கொடுத்திருந்தார்.

இத்தனை வருடமாயிற்றே....  வாங்கினேனே தவிர இதுவரை ஒருமுறை கூட கேட்டதில்லை.  கேட்க ஆரம்பித்தால் மனம் ஒன்றவே இல்லை.

நாம் படிக்கும் நம் மனக்குரலோடு அது ஒத்து போகவில்லை!  இந்தக் காரணத்தாலேயே நான் யு டியூபில் வரும் கதை வாசிப்புகளைக் கூட கேட்பதில்லை.  அதென்ன நம் மனக்குரல்?  எனக்கும் சரியாய் சொல்லத் தெரியவில்லை.

ஒரு கதையையோ, செய்தியையோ 'கொஞ்சம் சத்தமாக படியுங்களேன்' என்று கேட்டால் சிலர் ஆறாம் வகுப்பு தமிழ் பாட மனப்பாடப் பகுதியைப்  படிப்பதுபோல படிப்பதைக் கேட்டிருக்கிறீர்களா?  இவர்கள் தங்கள் மனதுக்குள்ளும் இப்படிதான் வாசித்துக் கொள்வார்களா என்று தோன்றும்.

நான் எழுதியவற்றை மகனையோ, பாஸையோ படிக்கச் சொல்லுவேன்,  மனதுக்குள் படிப்பவர்களை வாய் விட்டு படிக்கச் சொன்னால் அவர்கள் படிக்கும் பாணியில் ஒரு..  ஒரு...  ஒரு...  'இது'வே இருக்காது!

அப்புறம் நான் படித்துக் காட்டுவேன்.  ஆனால் சமீபத்தில் ஒரு பெண், மகனின் தோழி அழகாக வாசித்தாள்.  நிறைவாய் இருந்தது.

அப்புறம்...  புத்தகங்களை வாசித்துக் கொண்டிருக்கும்போது ஒரு வினாடி உள்ளுக்குள் ஆழ்ந்து உங்கள் வாசிப்பை கவனித்திருக்கிறீர்களா?  படிக்கும் வார்த்தைகள் உங்கள் குரலிலா ஒலிக்கிறது?  இல்லை, உங்களைக் கவர்ந்த வேறு யார் குரலிலாவதா?  அந்த கதாபாத்திரங்களுக்குள் ஆழும்போது யாரை நினைவு கூர்கிறீர்கள்?  

படிக்கும் உங்கள் பாவங்கள் எழுத்தாளரைப் பொறுத்து மாறுமா?  இல்லை எப்போதும் உங்கள் பாணியிலேயே படிப்பீர்களா?

அந்தப் புத்தகத்துக்கும் உங்கள் கண்களுக்குமிடையேயான அந்த இடைவெளியில் ஒரு விர்ச்சுவல் தோற்றத்தில் யவனராணி இதயச்சந்திரன் மடியில் தன் கடைசி சுவாசத்தை விடுகிறாளா?  குடகு மலையின் பண்ணை வீட்டில்  வஸந்த் கணேஷிடம் "சும்மா ஏமாத்தறார் பாஸ்...  அவரை ஈஸியா ஜெயிச்சுடலாம்" என்று எமோஷனலாக சொல்லி விட்டு செஸ் போர்டை விட்டு விலகுகிறானா?  அருகில் கணேஷ் வார் அண்ட் பீஸ் புத்தகத்தோடு அமர்ந்து புன்சிரிக்கிறானா?  குரலை மட்டும் கவனிக்கச் சொல்லவில்லை.  உருவங்களையும்!  உங்கள் மனத்திரையில் ரவிதாஸனோ, கணேஷோ, ரூபாலாவோ அரவிந்தனோ என்ன தோற்றத்தில் வருகிறார்கள் / தெரிகிறார்கள்?

படிப்பது இது மாதிரி காட்சிகளாக விரிவதுண்டா?

புத்தகத்தை மூடியும் காட்சியிலிருந்து மறையாமல் கண்களுக்குள் நின்று கவனத்தைக் கலைத்துக் கொண்டே இருப்பவர்கள் உங்களை பொறுத்தவரை யார் யார்?

=================================================================================================

ஏகாந்தமாய் 

திரு ஏகாந்தன் அவர்களிடமிருந்து சென்ற வாரம் வந்த மெயில்....

அன்புள்ள ஸ்ரீராம், எபி,

நிறுத்திக்கொள்கிறேன் என்று சொல்ல நேர்ந்ததற்கு முன்பே, தொடர் முடியப்போகிறது என்பதற்கான ஒரு ஹிண்ட் கொடுத்திருக்கலாம்தான். நினைத்தேன். பின்னர், இதென்ன ஒரு புகழ்த் தொடரா, இதை முடிக்க எதற்கு ஒரு முன்னறிவிப்பு, ஸ்ரீராமுக்குக் கடைசி கட்டுரையை அனுப்புகையில் சொல்லலாமே என்றும் தோன்றியதால், சும்மா இருந்துவிட்டேன்.

எபி-யில் நான் இதை எழுத ஆரம்பித்த கடந்த அக்டோபரிலிருந்து இதுநாள் வரை என்னுடைய ப்ளாகில் நான் என்ன எழுதியிருக்கிறேன் என்று திரும்பிப் பார்க்கிறேன். பெரிதாக ஒன்றும் வெட்டி முறிக்கவில்லை. ஆறுமாத காலத்தில் நாலே நாலு பதிவுகள். இடையிடையே கொஞ்சம் படிக்கலாம் என நினைத்து சில புத்தகங்கள் வாங்கினேன். இன்னும் வாசிக்க ஆரம்பிக்கக் கூட இல்லை. (ஜேகே-யின் Meditations மட்டும் இதில் விதிவிலக்கு.  கைக்கடக்கமாக அது இருந்ததும் காரணமாயிருக்கலாம்). சமீபத்திய மாதங்களில் சில திடீர்க் கவிதைகள் எழுதிய ஞாபகம். எங்கு போட்டு வைத்திருக்கிறேன் என்கிற நினைவும் இல்லை. கடந்த வருடம் லேப்டாப் க்ராஷ் ஆனதில், இன்னமும் வெளி உலகைப் பார்த்திராத என்னுடைய கவிதைத் தொகுப்பு (தமிழ், ஆங்கிலச் சிறுகவிதைகள் சுமார் 70) ஹார்ட்-டிஸ்கிலிருந்து மீட்டெடுக்கமுடியாதபடி காணாமற் போயிற்று. (எழுதும் ஆசையும் அத்தோடு கரைந்து காணாமற்போய்விட்டதோ?) நானே நிலையில்லாதவன். என் கவிதை மட்டும்  நிலைத்திருக்க வேண்டுமாக்கும்? க்ராஷ் ஆனதே சரி..

கடந்த இரண்டு வருடங்களாகவே பயணங்கள் அடிக்கடி நிகழ்கின்றன. ஒரு சிறு பயணத்துக்குப் பின், இரண்டு நாட்கள் முன்புதான் கேரளாவின் திருச்சூரிலிருந்து திரும்பினேன். ஏன் அங்கு சென்றேன்? ஏதாவது காரியமாகத்தான் ஒரு இடத்திற்கு செல்லவேண்டுமா என்ன? கேரளாவிற்கு நான் போனது இதுவே முதல் தடவை. க்யூபா வரை சென்று திரும்பிய என்னை, தன்னிடம் அழைக்க கேரளத்திற்கு எத்தனை காலமாகியிருக்கிறது.. ஆங்காங்கே சில பல சந்திப்புகள், அனுபவங்கள். கிரிக்கெட் உலகிலும் சமீப காலமாக என்னென்னவோ நிகழ்ந்து கொண்டிருக்கின்றன. ஆர்வத்துடன் அவதானிக்கிறேன். சில மாதங்கள் முன் கிரிக்கெட் உலகக்கோப்பை மேட்ச் ஒன்றை டெல்லி மைதானத்தில் போய்ப் பார்த்தேன். சாதாரண மன நிலையில், சுடச்சுட எனது ப்ளாகில் ஏதாவது எழுதியிருக்க வேண்டும். எழுதினேனா? ம்ஹும்.. வேண்டாம் என்றது மனம்: ’சும்மா கிட தம்பி!’

இத்தகைய நிலையில்தான், ‘நிறுத்திக்கொள்கிறேன்’ என்றேன். தொடர் என்பதாக எல்லாம் வாரா வாரமென, ஒரு டைம்-ஃப்ரேமிற்குள் என்னை உட்படுத்திக்கொண்டு எழுதும் மனம் தற்போது இல்லை. பின்னர் எப்போதாவது (தொடர் என்று இல்லாது) ஏதாவது எபி-க்கு எழுதக்கூடுமோ? கூடலாம். இப்போது ஒன்றும் சொல்வதற்கில்லை.

பின்னூட்டங்களாக, கடந்த வியாழன், வெள்ளியில் வெளிப்பட்ட வாசக நண்பர்கள் சிலரின் ஆர்வம், எழுத்து நின்றதில் ஏற்பட்ட ஏமாற்றம் கண்டு சற்றே ஆச்சர்யப்படுகிறேன். அன்பு மகிழ்ச்சி தருகிறது. நன்றியும் சொல்லவைக்கிறது.

-- ஏகாந்தன் -

=================================================================================================

நான் முஸ்லீம், என் மனைவி பிராமணர்.. 3 முறை திருமணம் செய்துகொண்டது ஏன்? - ஜெயம் ரவியின் தந்தை சுவாரஸ்ய பேட்டி

ஜெயம் ரவியின் தந்தை மோகன் தனது மனைவி வரலட்சுமியுடனான காதல் திருமணம் குறித்து சமீபத்திய பேட்டியில் மனம்விட்டு பேசியுள்ளார்.

தமிழ் திரையுலகில் முன்னணி நடிகராக வலம் வந்து கொண்டிருப்பவர் ஜெயம் ரவி. சமீபத்தில் மணிரத்னம் இயக்கத்தில் வெளியாகி கோலிவுட்டில் சக்கை போடு போட்ட பொன்னியின் செல்வன் திரைப்படத்தில் ராஜராஜ சோழனாக நடித்து அசத்தியிருந்தார் ஜெயம் ரவி. அப்படத்தின் வெற்றிக்குப் பின் இறைவன், சைரன், அகிலன் போன்ற படங்களில் நடித்து வருகிறார்.

நடிகர் ஜெயம் ரவியின் தந்தை மோகன், இவரும் சினிமாவில் முன்னணி படத்தொகுப்பாளராகவும், தயாரிப்பாளராகவும் வலம் வந்தவர் ஆவார். சமீபத்தில் மோகன் - வரலட்சுமி தம்பதியின் ஐம்பதாவது திருமண நாளை அவரது மகன்களான ஜெயம் ரவி மற்றும் மோகன் ராஜா இருவரும் கோலாகலமாக கொண்டாடினர். அது குறித்த புகைப்படங்களும் வெளியாகி வைரலாகின.

இந்நிலையில் ஜெயம் ரவியின் தந்தை மோகன் தனது மனைவி வரலட்சுமியுடன் தனியார் யூடியூப் சேனலுக்கு பேட்டி ஒன்றை கொடுத்துள்ளார். அந்த பேட்டியில் தங்களது காதல் திருமணம் குறித்து மனம் திறந்து பேசிய மோகன், தான் முஸ்லீம் மதத்தை சேர்ந்தவர் என்றும், அவரது மனைவி ஒரு பிராமண வீட்டு பெண் என்றும் கூறினார். அது மட்டுமின்றி தனது உண்மையான பெயர் ஜின்னா என்றும் அந்த பேட்டியில் மோகன் தெரிவித்துள்ளார்.

நடிகர் தங்கவேல் வீட்டில் தான் சிறுவயதில் வளர்ந்ததாகவும், தங்கவேலுக்கு குழந்தைகள் இல்லாததன் காரணமாக அவர் தன்னை குழந்தையாக தத்தெடுத்து வளர்த்து வந்ததாகவும் மோகன் தெரிவித்துள்ளார். அப்போது அவர் தான் தனக்கு மோகன் என பெயர் வைத்ததாக கூறிய அவர், தங்கவேல் மூலம் தான் சினிமாவில் எடிட்டிங் கற்றுக்கொண்டதாக கூறி உள்ளார்.

அதுமட்டுமின்றி தனக்கும் தனது மனைவி வரலட்சுமிக்கு மூன்று முறை திருமணம் நடைபெற்ற சுவாரஸ்ய தகவலையும் அந்த பேட்டியில் தெரிவித்துள்ளார் மோகன். நாங்கள் மதம் விட்டு மதம் கல்யாணம் செய்துகொண்டதாக சொல்கிறார்கள் ஆனால் உண்மையில் நாங்கள் மனம்விட்டு தான் கல்யாணம் செய்து கொண்டோம் என்று இன்றளவும் குறையாத காதலுடன் மோகன் - வரலட்சுமி ஜோடி கொடுத்த பேட்டி தற்போது செம்ம வைரல் ஆகி வருகிறது.

நன்றி: ஏசியாநெட் நியூஸ்

===========================================================================================

இத்தனை பேர்களையா 

அடைத்து வைத்திருக்கிறது 

இத்தனூண்டு புத்தகம்?

அடுக்கடுக்காய் புறப்பட்டு 

வருகிறார்கள் 

அட்டையைப் பிரித்ததும்.

புத்தகத்தை மூடினாலும் 

உடனே புறப்பட்டுச் 

சென்று விடுவதில்லை இவர்கள்...

மனவெளியில் தங்கி 

கனவுலகில் ஆழ்த்தி 

அப்புறமாய் 

கதைக்குள் மறைகிறார்கள்.

தெருவெங்கும் இறைந்து 

கிடக்கின்றன 

எழுத்துகளும் வார்த்தைகளும்

இதோ அங்குமிங்கும் உங்களருகே 

அர்த்தம் புரியாமல் பல குரல்களில்  

காற்றில் சுற்றி வருகின்றன 

யார் யாரோ பேசிய  வார்த்தைகள் 

==================================================================================================

அந்த கணம்!...   அந்த நொடி....   ரசித்த படம்.

==================================================================================================

கி.வா.ஜ அவர்களின் சிலேடைச் சுவை

கி.வா.ஜகந்நாதன் ஒரு ஊருக்கு பேச்சாளராகச் சென்றார். அவருக்கு சிற்றுண்டி ஏற்பாடு செய்பவர், "தங்களுக்குப் பூரி பிடிக்குமா? என்று கேட்டார்.

அதற்கு இவர், 'ஜகந்நாதனுக்குப் பூரி பிடிக்காமல் இருக்குமா?' என்று சொல்ல, அருகிலிருந்த அனைவரும் அவரது சமயோசித பதிலைக் கேட்டுச் சிரித்தனர்.

கி வா ஜ உதிர்த்த முத்து

ஒரு கல்யாண வீட்டில் சாப்பிட்டு விட்டுக் கை கழுவ வந்தார், கி வா ஜ. ஒரு செம்பில் தண்ணீர் எடுத்து அவர் கை கழுவத் தந்தார், ஒரு அன்பர்.

சாதாரணமாக நீரில்தான் குவளை இருக்கும் !! இங்கே குவளையில் நீர் !!

கி. வா. ஜ அவர்கள் ஒரு கூட்டத்தில் இம்மை - மறுமை என்ற தலைப்பில் பேச அழைக்கப்பட்டிருந்தார். அவர் உரையாற்ற ஆரம்பித்ததும் மைக் கோளாறாகி விட்டது.

அதை அகற்றி விட்டு வேறு மைக் வைத்தார்கள். அதுவும் கொஞ்ச நேரத்தில் சரியாகச் செயல்படவில்லை.

கி.வா.ஜ உடனே *“இம்மைக்கும் சரியில்லை, அம்மைக்கும் சரியில்லை"* என பேசவிருந்த தலைப்பிற்கு ஏற்றவாறு சிலேடையில் சொல்ல, அனைவரும் ரசித்தனர்.

_________

ஒரு குழந்தைக்கு, அதன் அம்மா உப்புமா ஊட்டிக் கொண்டிருந்தார். எதனாலோ அந்தப் பழைய உப்புமா குழந்தைக்குப் பிடிக்கவில்லை.

அருகில் இருந்தார் கி.வா.ஜ.

'உப்புமாவைத் தின்ன' முடியலையோ! உப்புமா ஏன் தொண்டையைக் குத்துகிறதா'' எனக் குழந்தையைக் கோபித்துக் கொண்டார், அந்தப் பெண்மணி.

கி.வா.ஜ. அந்தப் பழைய உப்புமாவை வாங்கி வாயில் போட்டுக் கொண்டு பார்த்தார்.

பிறகு, ''ஆமாம். இந்த உப்புமா தொண்டையைக் குத்தத்தான் செய்யும்'' என்றார்.

ஏன் என்று அந்த அம்மா கேட்டார்,

*'ஊசி இருக்கிறது'* என்று கூறிச் சிரித்தார் கி.வா.ஜ.!

__________

கி வா ஜ ஒருமுறை தொடர்ச்சியாக விழாக்களில் கலந்து கொண்டதால் இருமல் மற்றும் தொண்டை புண்ணால் அவதிப் பட்டார். அதற்காக விழாக்குழுவினர் அவருக்கு cough syrup ஒன்றை கொடுத்து சாப்பிடச் சொன்னார்கள்.

கி வா ஜ அவர்கள் இதைத்தானா கற்றோருக்கு சென்ற இடமெல்லாம் "சிறப்பு" என்கிறார்கள் என்று கேட்டார்.

======================================================================================

வசியம் அவசியமா, அனாவசியமா?!!

===========================================================================================

ஃபேஸ்புக்கில் கிடைத்த சுவாரஸ்யம்.

=======================================================================================

நியூஸ் ரூம் 

- பானுமதி வெங்கடேஸ்வரன் - 

- பெங்களூரு ரூரல்,தேவனஹள்ளி அருகே அவதி என்னும் கிராமத்தில் போலீஸ் பயிற்சி மையம் உள்ளது. அங்கு பயிற்சியின் பொழுது போலீஸ்காரர்கள் தவறுதலாக சுடும் தோட்டாக்கள் அருகிலிருக்கும் நீலேரி கிராம மக்களின் கார்களையும், வீடுகளையும் பதம் பார்த்து விடுகின்றனவாம். இதனால் பீதியடைந்த நீலேரி மக்கள் தங்கள் ஊருக்குள் விழுந்த தோட்டாக்களோடு போராட்டம் நடத்தியதில் அங்கு விசாரணை நடத்திய பெங்களூரு ரூரல் எஸ்.பி.,போலீஸ் துப்பாக்கி சுடும் பயிற்சியை தற்காலிகமாக நிறுத்தி வைக்க உத்தரவிட்டுள்ளார். - பயிற்சியளிக்கும் இடத்தை மாற்றினால் போதாதா?

- சென்னை இரண்டாம் கட்ட மெட்ரோ ரயில் ஏ.ஐ. தொழில் நுட்பத்தில் ஓட்டுனர் இல்லாமல் மெட்ரோ ரயில்களை இயக்கத் திட்டம்.

- மத்திய அரசின் ஒருங்கிணைந்த சமக்ர சிக்க்ஷா கல்வி திட்டத்தின் கீழ் தொடக்க,நடுநிலை பள்ளி மாணவர்களுக்கு டிஜிடல் வழி கல்வி அறிமுகம் செய்யப்படவுள்ளது. இதன்படி ஐந்தாம் வகுப்பு வரையிலான மாணவர்களுக்கு அனிமேஷன் வகை வீடியோக்களை பாடல்களாக நடத்துவதற்கு தொடக்க கல்வி இயக்குனரகம் உத்தரவிட்டுள்ளது.

- நியூ ஆரிஜன் என்னும் விண்வெளி நிறுவனம் நியூ ஷெப்பர்ட் 25(NS 25) என்னும் திட்டத்தின் கீழ் ஆறு பேர்களை விண்வெளிக்கு சுற்றுலா அனுப்ப தேர்ந்தெடுத்துள்ளது. அவர்களுள் விஜயவாடாவில் பிறந்து வளர்ந்து அமெரிக்காவில் விமானியாக பணியாற்றும் கோபிசந்த் என்னும் இளைஞரும் அடக்கம். இதன் மூலம் சுற்றுலா பயணியாக விண்வெளிக்கு பறக்கப் போகும் முதல் இந்தியர் என்னும் பெருமையை அடைகிறார்.

- மும்பை வொர்லி பகுதியில் வீட்டு வாசலில் மற்ற குழந்தைகளோடு விளையாடிக் கொணிடிருந்த 12 வயது மன வளர்ச்சி குன்றிய சிறுவனைக் காணாமல் பெற்றோர்கள் தேடியிருக்கிறார்கள். அதே நேரத்தில் கொலாபா ரீகல் தியேட்டர் அருகே மனவளர்ச்சி குன்றிய சிறுவன் திரிந்து கொண்டிருப்பதாக செய்தி வந்து போலீஸார் அவனை மீட்டிருக்கிறார்கள். அந்த சிறுவன் கழுத்தில் அணிந்திருந்த செயினில் QR கோடி இருப்பதை பார்த்த போலீஸ் அதிகாரி தன் செல்ஃபோனில் ஸ்கேன் செய்ய, அதில் அவனுடைய பெற்றோர்களின் டெலிஃபோன் நம்பர்கள் இருந்திருக்கின்றன. அதை தொடர்பு கொண்டு, சிறுவன் பற்றிய செய்திகளை கேட்டறிந்து, பெற்றோர்களிடம் ஒப்படைத்திருக்கிறார்கள். தொழில்நுட்பத்தின் உதவியால் தொலைந்து போன சிறுவன் அரை மணி நேரத்தில் மீட்கப்பட்டிருக்கிறான். 

===============================================================================================

பொக்கிஷம்  :-     அரு ராமநாதன் நடத்திய 'காதல்' புத்தகத் தொகுப்பிலிருந்து இந்த வார பொக்கிஷம்....

திருப்பதி வரை போகவேண்டாம் பாருங்கள்.....

ஜோக்தான்....   புன்னகையுங்கள்...

என் எஸ் கிருஷ்ணன் பற்றி காதல் பத்திரிகையில் அவர் மனைவி டி ஏ மதுரம் சொல்லி இருப்பது....

வாரிசு!

பின்னாட்களில் ஸ்ரீராம் இப்படி எங்கள் பிளாக்கில் பகிரும்போது சந்தேகபப்டுவார்கள் என்று தெரிந்துதான் மேலே நகைச்சுவை என்று தலைப்பே கொடுத்திருக்கிறார்கள்...!

இதைத் தழுவி சில ஜோக்ஸ் பின்னாட்களில் வந்தன.  திறமையான தழுவல்கள்!

இதைத் தழுவியும், உல்ட்டா செய்தும் சில ஜோக்ஸ் பின்னாட்களில் வந்தன..நினைவிருக்கிறதா?

வழி வழி வந்த வழி!