"திங்க"க்கிழமை 180910: அரிசிப்பூரி - காமாட்சி அம்மா ரெஸிப்பி

அரிசிப்பூரி.  


வெகு சுலபமான அரிசிப்பூரி. கீதாரெங்கனின் அரிசி வடைக்கான பின்னூட்டத்தில் நான்  அரிசிப்பூரி தெரியுமா உங்களுக்கு என்று கேட்டிருந்தேன். அவர், மஹாராஷ்டிரியன் டிஷ்தானே... தெரியும் என்றார். 

ஒரு வேளை இது இவ்விட டிஷ்ஷாகக் கூட இருக்கலாமோ என்னவோ?

எனக்கு மும்பையில் யாரும் தெரிந்த சினேகிதர்கள் கிடையாது. உறவுகாரர்கள் வீட்டிற்கு  எப்பொழுதாவது போய் வருவதுடன் ஸரி.  இருக்கும் இடமோ சிறிய வயதுக்காரர்கள்.

அதனால் எதுவும் அவர்களிடமிருந்து தெரிந்து கொள்ள வாய்ப்பே இல்லை. இது எங்கள் ஊரில் ஸுமங்கலிப் பிரார்த்தனையின் போது செய்வார்கள்.  அவ்வளவு சமையல்களுடன் இந்தப் பூரியும் ருசிக்கும். கூட்டு,கறி,பச்சடி என்ற சட்ட சோபிதமான சமையலுடன் இதையும் கட்டாயம் செய்வார்கள். 

இப்போதும் வழக்கம் இருக்கிறது. காமாட்சிம்மா எதையாவது எழுதட்டும் என்று எனக்கு சற்று ஊக்கம் கொடுக்க ஸ்ரீராம் இதை முடிந்தால் எழுதுங்களேன் என்றார்.

சிறிய அளவு ஸாமான்களுடன் இதைச் செய்ய வந்துள்ளேன்.

அந்த நாட்களில் பொம்மைக் கல்யாணம் என்று பெண் குழந்தைகள் விளையாடுவதற்கு தின்பண்டங்கள் சிறிய அளவில் செய்து கொடுப்பார்கள். 

அந்த ஞாபகம் வந்தது. இவ்வளவு சிறிய அளவு ஸாமான்களில் மாதிரிக்குதானே?  இந்த மாவை, வரட்டு அரிசிமாவு என்று சொல்வார்கள். கல் ஏந்திரத்தில் அரிசியை அரைத்துச் செய்வார்கள். அரிசியின் இனிப்பு மாராமல் நன்றாகஇருக்கும்..

வேண்டிய ஸாமான்கள். ----

அரிசி மாவு ஒரு சிறிய டம்ளர்.
டம்ளர் படத்தில் எங்காவது இருக்கும். இப்போ மெஷினில் அரைத்த மாவுதான். ஆனால் நல்ல
அரிசியாக இருக்கட்டும்.
மெல்லியதாகத் துருவின தேங்காய்த் துருவல்---இரண்டு அல்லது மூன்று டேபில்ஸ்பூன்
அரைடீஸ்பூன் –சீரகம்
நெய்---ஒரு டீஸ்பூன்
ருசிக்கு –உப்பு
பூரியைப் பொரிக்க எண்ணெய்---வேண்டிய அளவு.

செய்முறை----

அடிகனமான பாத்திரத்தில் மாவை அளந்த டம்ளரினால் ஒண்ணேகால்ப்பங்கு
தண்ணீரைக் கொதிக்க வைத்து, தேங்காயையும்,ருசிக்கு சிறிதளவு உப்பும் சேர்க்கவும். மற்ற கூட்டு கறிவகைகளுடன் சாப்பிடுவதால் உப்பு குறைத்துப் போட்டு தேங்காய் மணத்துடன் இருக்கும். மார்க்கெட்டிங் ஸரியாகப் பண்ணுகிறேன் இல்லையா?

கொதிக்கும் தண்ணீரில் மாவைத் தூவிக் கிளறவும். தீயை மட்டுப் படுத்தவும். மாவு சேர்ந்து வேகும். தீயை அணைத்து விட்டு மூடி வைக்கவும். பாத்திரத்தின் சூட்டிலேயே மாவு பக்குவமாக வெந்து விடும்.

சற்று ஆறியவுடன் கிளறின மாவைச் சேர்த்துப் பிசைந்து,சீரகமும்,நெய்யும் சேர்த்து, வேறுபாத்திரத்தில் வைத்து மூடவும். இதற்கான படம் எடுக்கவில்லை என்று நினைக்கிறேன்.

மாவைத்திரட்டி ஒரே அளவிலான உருண்டைகளாகச் செய்து கொள்ளவும். சுமார் எட்டு அல்லது பத்து உருண்டைகள் வரலாம்.

கெட்டியான ஒரு பாலிதீன் ஷீட்டின் மேல், எண்ணெயைக் கையில் தொட்டுக்கொண்டு உருண்டைகளைப், பூரிகளாகக் கையினால் தட்டி, ,ஷேப் கொடுக்கவும்.

பூரி பொரித்தெடுப்பதுபோல, எண்ணெயைக் காயவைத்து,பூரியை லேசாக அழுத்தம் கொடுத்துப் பொரித்தெடுக்கவும்.

உப்பிக்கொண்டு கரகரப்பாகவும்,உள்ளே மிருதுவாகவும் பூரி வரும். இது மாதிரிக்காகச் செய்ததால்,கூட ஒரு வெங்காயச்சட்னி செய்தேன். கருப்பு டால், வேர்க்கடலை சட்னியும் கூட வைத்து ருசிபார்க்கக் கொடுத்துள்ளேன். ருசி பாருங்கள். சுடச்சுடதான் ருசி. ஆறினால் ருசியாக இருக்காது. இதே மாவை, உடன் காரம் சேர்த்து அரிசி ரொட்டி மாதிரியும் வாணலியில் மெல்லியதாகத் தட்டி எடுக்கலாம். வெங்காயம்,பச்சைமிளகாய் சேர்த்தும் அக்கி
ரொட்டி செய்யலாம்.

வெங்காய சட்னிக்கு ஒரு வெங்காயம்,தக்காளிபாதி, புளி சிறிது, இஞ்சி ,மிளகாய் யாவையையும் எண்ணெயில் வதக்கி உப்பு சேர்த்து கெட்டியாக மிக்ஸியில் அரைக்கச் சொன்னால், உதவி, பூண்டும் போட்டிருக்கான் . 

அதையும் விடாது போட்டிருக்கேன்.  இந்தத் துவையல் ஸம்பந்தம்
இல்லாமல் வருகிறது.அதையும் மனதில் வைத்துக் கொள்ளுங்கள். அவ்வளவுதான்.



 இது சட்னிக்கான வதக்கல்.