மதுரைக்காரங்க விவரமானவங்க...

சுமார் ஐந்து வருடங்களுக்கு முன் திருக்கடையூர் சென்றபோது எடுத்த புகைப்படம்.  என்னுடைய நிக்கான் கேமிராவில் எடுத்தது.  ராமலக்ஷ்மி அப்போது ஒரு போட்டி வைத்திருந்தார்.  ஃப்ளிக்கர் டாட்காமில் என்று நினைவு.  அங்கு இந்தப் படத்தைப் பகிர்ந்திருந்தேன்.  ஒரு காலத்தில் இந்த வீடு எவ்வளவு சந்தோஷங்களையும், சங்கடங்களையும் சந்தித்திருக்கும்?  இப்போது?    ஓய்வுபெற்று,  நாட்களை எண்ணிக்கொண்டிருக்கும் நிலையில்..    அப்போது பல எண்ணங்களை தோற்றுவித்த படம்.    பயந்து பயந்து அருகிலிருப்போர் ஏதாவது சொல்வார்களோ என்று பயந்து டக்டக்கென படம் எடுத்துவிடுவேன்!

அப்போது எடுத்த திருக்கடையூர் கோபுரம்.  நாங்கள் அங்கு சென்று சேர்ந்த நேரம் மாலை ஆகிவிட்டது.  அப்போது எடுத்த படம்.  சுகுமாருக்கு சஷ்டியப்த பூர்த்தி என்று அப்போது சென்றோம்.  (சுகுமார் யார் என்று கேட்பவர்களை பசித்த புலி தின்னாதிருக்கட்டும்!) 

இது நான் எடுத்த படம் அல்ல!!!!  இப்படத்தின் மூக்குப் பகுதியை மூன்று நிமிடங்கள் உற்றுப் பார்த்து எதிர் சுவரைப் பார்த்தால் ஒரு உருவம் தெரியும்.  அநேகமாக நீங்கள் எல்லோரும் இந்தப் படத்தைப் பார்த்திருப்பீர்கள், வைத்திருப்பீர்கள்!

'தூறல்கள்' புத்தகத்தின் அட்டைப்படத்துக்காக எடுக்கப்பட்ட புகைப்படங்களில் இரண்டு...   'தூறல்கள்' அட்டையில் இந்தப் படத்தை நீங்கள் வேறு பின்னணியில் பார்த்திருக்கலாம்!

தாத்தா அவனிடம் போஸ் எப்படிக் கொடுக்கவேண்டும் என்று குறிப்புகள் கொடுத்ததும் சிரிக்க ஆரம்பித்துவிட்டான் இந்த (அப்போதைய) பொடியன்.

செடியில் ஒட்ட வைத்தது போல பூக்கள்!  வித்தியாசமாய் இருந்ததால் கிளையை உடைத்து எடுத்துக்கொண்டு வந்து எடுத்த படம்!  நான்கைந்து வருடங்கள் முன்பு எடுத்தது.

அவ்வப்போது எங்கள் காம்பௌண்டில் இது மாதிரி செல்லங்கள் பிறக்கும்.  கொஞ்ச நாட்களில் சிலவற்றை வாண்டுகள் தூக்கிப் போவதால் மறையும்.  சில உடல்நலமில்லாமல் போதிய பாதுகாப்பு, போஷாக்கு இல்லாததால் மறையும்! 

இந்தச் செல்லங்களுக்குப் பின்னால் ஒரு பொந்து போலத் தெரிகிறதா?  அந்தப் பொந்திலிருந்து ஒரு சுப்புக்குட்டி (நன்றி கீதா அக்கா!) வெளியே வந்து தலைக்காட்டி, அது எங்கள் கண்ணில் பட,  அதை அங்கிருந்து குச்சி கொண்டு விரட்டினோம்!  (இதெல்லாமும் பழைய கதைகள்தான்...  இந்தக் குழுவிலிருந்து ஒரு செல்லம் சென்ற வாரப் படங்களில் இடம்பெற்றது நினைவிலிருக்கும்)

இதோ...  இந்த சுப்பு குட்டிதான்!  சுவரில் ஏறி ஓட முயன்று வழுக்கி மண்ணில் என் காலடியிலேயே விழுந்து ஓடியதை வீடியோ எடுத்து ஃபேஸ்புக்கில் அப்போது பகிர்ந்திருந்தேன்!

புதரில் சில சிறுமலர்கள்!  (இப்படி எல்லாம் புதர் இருந்தால் ஏன் சுப்புக்குட்டி வராது?!!)

மேலே கண்ட செல்லங்கள் பாசத்துடன் ஓய்வெடுத்துக் கொண்டிருந்த காட்சி!

அப்போது புதிதாய் வாங்கியிருந்த இந்த HTC அலைபேசியில்தான் மேற்கண்ட புகைப்படங்கள் எடுக்கப்பட்டன!

2014 இல் நானும் என் மாமா ஒருவரும் மதுரை சென்றிருந்தோம்.  அப்பா செயலற்று படுக்கையில் இருந்த நேரம்.  அவரைப் பார்த்துக்கொள்ள ஒருவரை நியமித்திருந்தோம்.  எனினும் அவர் அடை கேட்டார் என்று சென்னையிலிலிருந்த பாஸிடம் ஃபோன் மூலம் டிப்ஸ் பெற்று அடைமாவு அரைத்து அடை வார்த்தேன்.  'உதவி'  மதியமே சென்று விடுவார்.

அவர் (பாஸ்) உதவியின்றியே என் சொந்த முயற்சியில் அதற்குத் துணையாக சட்னியும் அரைத்து.....!    அப்பா அரை அடை   சாப்பிட்டார்.  அவர் அப்போது எடுத்துக்கொண்டிருந்த உணவு அளவுக்கு அதுவே அதிகம்....

நான்  சொல்லவில்லை?   மதுரைக்காரங்க விவரமானவங்க...   ஒரு அரிசியில் மூன்று பெயர்களாம்...   யார் யார் எழுதி வாங்கிக் கொண்டார்களோ!  மதுரைக் கடைத்தெரு.