ஞாயிறு 180923 : நேதாஜி இருக்கிறாரா?

 மொட்டுகள் ஏன் இன்னும் மலராமல் தயங்கிக் கிடக்கின்றன?  மேலே உள்ள செய்தியைப் படித்ததிலிருந்துதான் தயங்குகின்றனவாம்.  ஏனென்றால் இவற்றை ஸ்பீக்கர் பூ என்றும் சிலர் அழைப்பார்களாம்!

இது என்ன?  எனக்குத் தெரியாது..  ஆனால் எங்கள் ஆசிரியர் கேஜிஎஸ் சொல்லக்கூடும்.  ஏனென்றால் படமே எப்பவோ அவர் அனுப்பியதுதான்!

காக்கை வந்து அழைத்தபோது கையில் அப்பளம்தான் கிடைத்தது.  அதைப் போட்டதும் ஒரு கொத்தில் தூளான அப்பளத்தைச் சுவைக்கும் காக்கை..  வருடம் 2015!

அதே இரண்டாயிரத்துப் பதினைந்து.  அப்பா மதுரை தனியார் மருத்துவமனை ஒன்றில் அனுமதிக்கப்பட்டிருந்த நேரம்.  ஜன்னலில் நிறைய புறாக்கள் வந்து அமர்ந்தன.  செல்லை எடுத்துக் கொண்டு அறைக்கு வெளியே வந்து வெளிப்புற படிக்கருகே இருந்து படம் எடுத்தபோது அனைத்தும் பறந்துபோக, இரண்டு மட்டும் அங்கேயே அமர்ந்து எனக்குப் போஸ் கொடுத்தன!  

பொதுவாக புறாக்களைப் பார்க்கும்போதெல்லாம் எல்லோருக்கும் "கொஞ்சும் புறாவே..." பாடல் நினைவுக்கு வரும்.  முன்னர் எனக்கும் அப்படிதான்.  இப்போதெல்லாம் 'காதல் பரிசு' படப்பாடலான, படத்தில் இடம்பெறாத "புறாக்களே புறாக்களே..."  பாடல் சட்டென நினைவுக்கு வருகிறது!

மதுரைக்கு அப்போது செல்லும்போது ஒருமுறை இப்படியும் அதிருஷ்டம் வாய்த்தது.  வைகை ரயிலை இப்படி நான் பார்த்தது அது புறப்படுவதற்கு முன்தான்.  சென்னையிலிருந்து மதுரை வரை இப்படி இருந்தது முதலில் நன்றாகத்தான் இருந்தது...   பின்னர் போரடித்தது!

என் பாஸ் எப்போது மதுரை சென்றாலும் சாப்பிட ஆசைப்படும் ஒரு இடம்.  இதுவும் கங்க்வாலா என்று அழைக்கப்படும் ஒரு டெல்லிவாலா கடையும் பாஸுக்குப் பிடிக்கும்.  அதற்கு முக்கியமான காரணம் மறைந்த அவர் தந்தை அவருக்கு (திருமணத்துக்கு முன்) அங்கு அடிக்கடி அழைத்துச் சென்றிருப்பதுதான்.  சிலசமயங்களில் சுவை நரம்புகளைவிட நினைவு நரம்புகள் சுவை அதிகம் தருகின்றன இல்லை?

படத்தில் நேதாஜி இருக்கிறாரா?  கண்ணில் படுகிறாரா?   தூரத்திலிருந்து கூட்டத்தின் நடுவே ஒரு பரிதாப முயற்சி!

மருத்துவமனையிலிருந்து விடுபட்டு வீடு வந்த அப்பாவைப் பார்க்க வந்த எழுத்தாளர்கள் கர்ணன் அவர்களும், உஷாதீபன் அவர்களும்...

வைகைப்படியில் நின்று நீளமான வைகையை ஒரு க்ளிக்.  அப்போது புகைப்பட நிபுணர் ராமலக்ஷ்மியால் (போனால் போகிறது என்று)  'நன்றாயிருக்கிறது இந்த க்ளிக்' என்று சிறு பாராட்டு வாங்கிய படம்...

சிறு படகு போல இல்லை?  இடைவெளி இன்றி ஒட்டி நிற்கும் இரட்டையர்!?

குமுதம் பத்திரிகையில் வரும் கிசுகிசுக்கள் ரொம்பப் பிரபலம்.  60 களில் வந்த கிசுகிசுப் பக்கம்.  யார், என்ன என்று ஏதாவது கண்டு பிடிக்க முடிகிறதா?

2015 புத்தகக் கண்காட்சியில் என்னை சற்று நேரம் நிறுத்திய ஸ்டால்.  இளமை நினைவை மீட்டியது!  அப்போ ஒரு புத்தகம் ஐம்பது காசுகள்.  இப்போது?  100 ரூபாய்!  இரண்டு புத்தகங்கள் (மாயாவி) வாங்கி வந்து படித்தேன்.

சென்ற வார ஞாயிறு புகைப்படப் பகிர்வில் பானு அக்கா இந்த ஜோக்கை நினைவு கூர்ந்திருந்தார்கள்.  என் சேமிப்பிலேயே இருந்தது.