வெள்ளி வீடியோ 180928 : குளிர் விடும் கண்கள் அன்பைப் பொழிகின்ற மேகம்.. மலர்களின் வண்ணம் கொண்டு சிரிக்கின்ற தேகம்

படம் வெளிவந்த ஆண்டு 1975.  உறவு சொல்ல ஒருவன்.  விஜயபாஸ்கர் இசையில் இனிய பாடல்கள் நிறைந்த படம்.  எல்லாப் பாடல்களுமே இனிமை.  


இந்தப் படத்தை தஞ்சாவூர் ஹவுசிங் யூனிட் மாதாந்திர பட வரிசையில் திறந்தவெளித் திரையரங்கில் பார்த்தேன்.  

'பனிமலர் நீரில் ஆடும் அழகை', 'கேளு பாப்பா ஆசையின் கதையை' போன்ற நல்ல பாடல்கள் உண்டு.  தென்னகத்து ஹேமமாலினி பத்மப்ரியாவும் படத்தில் உண்டு.  அவர் பேராசைதான் படத்தின் கதை.

இந்தப் பாடல் கே ஜெ யேசுதாஸ் குரலில் அமைந்துள்ள இனிமையான பாடல்.  மிக இனிமையான பாடல்.

பாடலை எழுதியவர் கண்ணதாசனாயிருக்கக் கூடும்.  இல்லையென்றால் பஞ்சு அருணாச்சலம்.  வரிகள் அமைப்பிலிருந்து கண்ணதாசனாயிருக்கவே வாய்ப்பு அதிகம்.

இந்தப் படம் கன்னட மாங்கல்ய பாக்யா என்கிற படத்தின் தமிழ்த் தழுவல்.    ஆனால் வேறு டியூன்.  இசையமைப்பாளர் வேறு அல்லவா?  இந்தப் பாடல் கன்னடத்தில் ராஜன் நாகேந்திரா இசையில் எஸ் பி பி பாடி இருக்கிறார்.  இந்தக் கன்னடப் பாடல் ஆகாஷ் வாணி வரலாற்றில் ஒரு அதிகமுறை கேட்கப்பட்டு சாதனை படைத்த பாடலாம்.  அந்தப் பாடலையும் கேட்டேன்.  என்னதான் நான் எஸ் பி பி ரசிகனாய் இருந்தாலும் இந்தப் பாடல்தான் அதிக இனிமை.

மோகனப் புன்னகை ஊர்வலமே 

மன்மத லீலையின் நாடகமே 

மோகனப் புன்னகை ஊர்வலமே 

மன்மத லீலையின் நாடகமே   

குளிர் விடும் கண்கள் அன்பைப் பொழிகின்ற மேகம் 

மலர்களின் வண்ணம் கொண்டு சிரிக்கின்ற தேகம் 

..............  இன்பம் யாவும் தணிக்கின்ற எண்ணம் வேண்டும் 

தழுவாத அங்கம் தொட்டு உறவாடவா   

இனிக்கின்ற கொவ்வை செவ்வாய் அழைக்கின்ற ராகம் 

துடிக்கின்ற கன்னம் ரெண்டும் சொல்லட்டும் பாடம் 

மழை முகில் கூந்தல் கண்டேன் 

மதி முகம் தோன்றக் கண்டேன் 

மனதிலே மஞ்சம் கண்டேன் உறவாடவா  

ஒரு புறம் உன்னைக் கண்டால் கோபுர கலசம் 

மறுபுறம் பார்க்கும் போது மேனகைத் தோற்றம் 

நடையினில் அன்னம் கண்டேன் 

இடையினில் மின்னல் கண்டேன் 

அசைவினில் தென்றல் கண்டேன் உறவாடவா