"திங்க"க்கிழமை பதிவு – வாழைப்பூ பருப்புசிலி - நெல்லைத்தமிழன் ரெஸிப்பி

பருப்புசிலி என்பது பெரும்பாலும் விசேஷங்களுக்குச் செய்வார்கள்.

கொத்தவரை, வாழைப்பூ, பீன்ஸ் போன்ற காய்களை பருப்புசிலிக்கு உபயோகிப்பார்கள். புடலங்காய் கூட பருப்புசிலிக்கு ஒருவித சுவையைக் கொடுக்கும். நான் கொத்தவரை, பீன்ஸில் செய்துபார்த்திருக்கிறேன். இந்தத் தடவை அருமையான ஃப்ரெஷ் வாழைப்பூவை பழமுதிர்ச்சோலை காய்கறி கடையில் பார்த்தேன். என் மனைவியை பருப்புசிலி செய்யச் சொன்னேன். 

வாழைப்பூவில், கள்ளனை எடுக்கவேண்டும். இது ஒரு வேலை. சில வருஷங்களுக்கு முன்பு, திருவரங்கத்துக்குச் சென்றிருந்தபோது, அங்கு திருவானைக்கா கோவிலின் முன்பு, கள்ளனை எடுத்த வாழைப்பூவை விற்றுக்கொண்டிருந்தார்கள் (ஒன்று 10 ரூபாய்… சென்னைல புது வாழைப்பூவே 20 ரூபாய்னு நினைக்கறேன்). கோவிலுக்குப் போய்விட்டு வெளியே வரும்போது வாங்கிக்கொள்ளலாம் என்று நினைத்தேன். அதற்குள் தீர்ந்துபோய்விட்டது.

இந்த வாழைப்பூவைப் பற்றி நினைக்கும்போது என் சிறுவயது ஞாபகம் வருது. அப்போல்லாம் (கசின்ஸ் எல்லோரும் 5லிருந்து 10 வயசு) எல்லோரும் பெரியப்பா வீட்டிற்கு வருடாந்திர விடுமுறைக்குச் செல்வோம். 

இரவு பெரியப்பா, கையில் தயிர் சாதம் போட்டு, குழம்பு விடுவார். எங்களுக்கெல்லாம், வாழை மடல்தான் தட்டு மாதிரி உபயோகப்படும் (கையில் வாங்கும்போது கீழே சிந்தக்கூடாது என்று). வாழைப்பூ இல்லாத சமயத்தில், வாதா மர இலைதான் எங்களுக்கு ‘தட்டு’.  சாப்பாடு சாப்பிடுவதென்றால், வாழை இலை அல்லது தையல் இலை.   

நினைவு சிறு வயதிற்குச் செல்கிறது.  இப்போ செய்முறைக்கு வர்றேன்.

தேவையான பொருட்கள்

ஒரு வாழைப்பூ + நிறைய பொறுமை

¼ கப் கடலைப் பருப்பு

¾ கப் துவரம் பருப்பு

3-4 சிவப்பு மிளகாய்

தேவையான அளவு எண்ணெய், உப்பு, கடுகு, கருவேப்பிலை

செய்முறை

முதல்ல கடலைப் பருப்பு, துவரம் பருப்பு, மிளகாய், பெருங்காயம் இவற்றை ஊறவைத்துக்கொள்ளுங்க. ½  மணி நேரம் ஊறினாப் போறும்.

வாழைப்பூவை, கள்ளனை எடுத்துவிட்டு, சிறியதாக கட் பண்ணிக்கோங்க. 

அதனை மோர் ஜலத்தில் (butter milk) போட்டுக்கோங்க (இல்லைனாகறுத்துடும்)

இப்போ, ஊறின பருப்பை, உப்பு சேர்த்து, கர கர வென அரைத்துக்கோங்க. அவசியம்னா கொஞ்சம் தண்ணீர் விட்டால் போதும்.

இதை இட்லி தட்டில் வைத்து வேகவைத்துக்கோங்க.

அந்த சமயத்துல, வாழைப்பூவில் உள்ள நீரை எடுத்துவிட்டு, கொஞ்சம் நல்ல தண்ணீர் ஊற்றி, ஒரு பாத்திரத்தில் கொதிக்கவிடுங்க. பூ நல்லா வேகணும். வெந்த பிறகு, தண்ணீரை வடிகட்டி, வெந்த வாழைப்பூவை மட்டும் ஒரு பாத்திரத்தில் போட்டுக்கோங்க. இதோட கொஞ்சம் உப்பு சேர்த்து குலுக்கிக்கொள்ளுங்கள். (ஏற்கனவே பருப்புக்கும் உப்பு சேர்த்திருக்கோம். அதனால ரொம்ப உப்பு சேர்த்துடாதீங்க)

வெந்த பருப்பு இட்லிக்களை எடுத்து, உதிர்த்தாலே உதிர்ந்துவிடும். அப்படி இல்லாதபட்சத்தில், சிறிது சிறிதாக கட் பண்ணிக்கோங்க.

வாணலியில் எண்ணெய் ஊற்றிக் காய்ந்தபிறகு, கடுகு, கருவேப்பிலை திருவமாறவும் (தாளிக்கவும்). அத்துடன் உதிரான பருப்பைச் சேர்த்து கொஞ்சம் கிளறவும். அதோட வெந்த வாழைப்பூவையும் சேர்த்துப் பிரட்டவும்.

இப்போ வாழைப்பூ பருப்புசிலி ரெடி.

வாழைப்பூவைச் சேர்ப்பதற்கு முன்பு, நிறைய எண்ணெய் விட்டு பருப்பை முறுகலா வதக்கலாம். சிலருக்கு பருப்பு முறுகலா இருந்தால் பிடிக்கும். எனக்கு எண்ணெய் பிடிக்காது என்பதால், முறுகவிடவில்லை.

நிறைய ஸ்டெப்ஸ் இருக்கறமாதிரி தோணும். ஆனால் செய்வது சுலபம்தான்.

அன்றைக்கு நான்தான் வாழைப்பூ பருப்புசிலி செய்தேன்.  சில நாட்கள் கழித்து என் மனைவி, கொத்தவரை பருப்புசிலி செய்தாள். அவள் என்னைவிட நன்றாகச் செய்திருந்தாள் என்று தோன்றியது. (கொஞ்சம் சாஃப்டா இருந்தது).

வாழைப்பூ இரத்தத்தின் சர்க்கரை அளவைக் கட்டுப்படுத்தும். கணையத்தை வலிமையாக்கும். பெண்களுக்கு வாழைப்பூ சாப்பிடுவது நல்ல உடல் நலத்தைத் தரும். இரத்த அழுத்தத்துக்கும் நல்லது. உடல் சூடு குறையவும் வாழைப்பூவை உண்ணலாம்.

வாழைப்பூ அடை, வாழைப்பூ வடையிலெல்லாம் சேரும் அளவைவிட, வாழைப்பூ பருப்புசிலியில் அதிக அளவு வாழைப்பூ நம் உடலுக்குச் சேரும். வெறும் வாழைப்பூ பொரியலும் நல்லா இருக்கும், ஆனா பசங்க அந்தத் துவர்ப்பினால் விரும்பிச் சாப்பிட மாட்டார்கள்.

ஒருத்தர் சொன்னார், வாழைப்பூவை மரத்திலிருந்து பறித்த இரண்டு நாட்களுக்குள் உபயோகப்படுத்தணுமாம். இல்லைனா, அதன் மருத்துவ குணம் குறைந்துவிடுமாம். அதுக்கு எங்க போறது?

நீங்களும் இந்தப் பருப்புசிலியைச் செய்துபாருங்கள்.

Note: தையல் இலையும், வாதா மர இலையும் கூகுளாரிடமிருந்து சுட்டது. அவருக்கு நன்றி.

அன்புடன்

நெல்லைத்தமிழன்