ஞாயிறு 180930 : மலரே... ஓ.. மலரே... நீ என் மலரல்ல... நானும் வண்டல்ல...

சென்ற வாரம் மொட்டு படம் போட்ட உடன் வல்லிம்மா "மொட்டு படம் மட்டும் போட்டிருக்கிறீர்கள், மலர்ந்த படத்தையும் போட்டு விடுங்கள் ஸ்ரீராம்.."  என்று சொல்லி இருந்தார்.
  எனவே அதே இடத்தில் அடுத்த நாள் மலர்ந்திருந்த இந்தப் பூவைப் படம் எடுத்தேன்.  நான் எடுக்கும் படங்களில் ஏதாவது ஒரு படத்தை அல்லது சில படங்களை கூகிள் கொஞ்சம் மெருகூட்டிக் கொடுக்கும்.  அந்த வகையின் இந்த மலரை சற்றே அழகூட்டிக் கொடுத்தது.  ஆனாலும் நான் எடுத்ததே அழகாய்தான் இருந்ததாக்கும்... "ஒரு புஷ்பம் மலர்ந்தது...   அதன் இஷ்டம் தெரிந்தது...." 

அந்த மலரைப் படம் எடுக்கும்போது அருகே இருந்த மலரொன்று "ஏன், என்னைப் பார்த்தால் மலர் போலத் தெரியவில்லையா?" என்று சற்றே சினத்துடன் கேட்டது.   குப்பை மேடுகளில் மலர்வதால் இந்த மலர்களை யாரும் கண்டு கொள்வதில்லை என்பதால் அவை நிம்மதியுடன் தங்கள் ஆயுளை முடிக்கின்றன.  "மலரே...  ஓ..  மலரே...   நீ என் மலரல்ல...  நானும் வண்டல்ல..."

தோட்டம் வைத்திருக்கும் எல்லோரும் செடி, கொடி, மரங்களைப் பற்றி அறிந்தவர்களாய்த்தான் இருக்கிறார்கள்.  இந்த மரம் ஆண் மரமாம்.  பூக்குமாம்...  காய்க்காதாம்...   நண்பர் சொன்னார்.  

அக்டோபர் இரண்டாம் தேதி வருகிறது..   சினிமா விகடனில் காந்தியைப் பற்றி நிறைய போட்டிருக்கிறார்கள்.நாம் மட்டும் விடுவானேன்..   காந்தி ஜெயந்தியை முன்னிட்டு உடனே கிளம்பி கடற்கரைக்குச் சென்றேன்.  எடுத்தேன் இந்தப் புகைப்படத்தை.  வெளியிட்டு விட்டேன்.  இது நேற்று எடுத்த புகைப்படம்..  "புத்தன் இயேசு காந்தி பிறந்தது பூமியில் எதற்காக..?  தோழா ப்ளாக்கர் நமக்காக...!

ஒரு நண்பரின் இல்ல விழாவுக்காக ஜி ஆர் டி யில் வாங்கப் பட்ட பரிசுப்பொருள்.  வெள்ளி.  நான் வாங்கிய அன்று வெள்ளி விலை கிராம் ஒன்றுக்கு 40.36 பைசா.   இது இரண்டும் சேர்த்து பதினான்கு கிராம் இருந்தது.  கண்ணாடி மேசையின் கீழ் அடுக்கி வைக்கப் பட்டிருக்கும் வெள்ளித் தட்டுகள்.   "விளக்கேற்றி வைக்கிறேன்..  விடிய விடிய எரியட்டும்.."

தட்டுகள் படத்தில் விழாமல் முடிந்தவரை பார்த்து எடுக்கப்பட்ட புகைப்படம்.  புகைப்படம் எடுத்துக் கொள்ளுங்கள்.  கிஃப்ட் பேப்பர் சுற்றித் தந்து விடுகிறோம் என்று சொன்னார்கள்.  "விளக்கு வைப்போம்...  விளக்கு வைப்போம்..."

ஒரே நேரத்தில் இரண்டுக்கும் மேற்பட்ட கஸ்டமர்களுக்கு ஒரு பொம்மை பிடித்து விட்டால்...?  அதனால் வரிசையாய் ஒரே பொம்மைகள்..  ராமானுஜரும் கொலுவில்..  "பார்த்துச் சிரிக்குது பொம்மை..."

சிறு மண்டபத்துக்குள் பெருமாள்.  பேப்பர் மெஷ் பொம்மையாம்.  மூவாயிரத்து ஐநூறு ரூபாயாம்.  முன்னதாகவே வந்து விட்ட பொம்மைக்கு கடையில் டுக்கப்பட்ட புகைப்படங்கள்.  "திருப்பதி மலை வாழும் வெங்கடேசா..."

இந்தப் படத்தை ஃபேஸ்புக்கில் பகிர்ந்தபோது வித்தியாசமான பிள்ளையார் என்று சொல்லி இருந்தேன்.  பானு அக்கா 'பிள்ளையார் படத்தையே காணோமே எப்படிச் சொல்வது' என்று கேட்டிருந்தார்.  'மொட்டைப்பிள்ளையார் கோவில்' என்று எங்கேயோ எதையோ காதில் வாங்கி கொண்டு இந்த மாடலில் பிள்ளையார் பொம்மை செய்து விட்டார்கள் போலும்...  "பிள்ளையார்பட்டி ஹீரோ நீதான்பா கணேசா நீ கருணை வச்சா நானும் ஹீரோப்பா..."

இந்தப் படத்தில் பள்ளி கொண்ட பெருமாள்(கள்) பிள்ளையார் மடியில் தலை வைத்துப் படுத்திருப்பது போல இல்லை?!!   ஆந்திரா வெங்கட்டாபுரம் பழமையான கோவிலில் சில கொள்ளைக்காரர்கள் மந்திரம் மூலம் புதையல் எடுக்க முயற்சிப்பது தெரியாமல் பெருமாள் விஷ்ராந்தியாகப் படுத்திருக்கிறார்.  அவர்கள் என்னடாவென்றால் போலீஸாருக்கு முன்னால் எலுமிச்சம் பழத்தைப் பறக்க வைத்து வித்தை காட்டுகிறார்கள்!    "மடி மீது தலைவைத்து வாங்கும்வரை தூங்கலாம்.."

இவர் எங்கள் காம்பௌண்ட் வீரர்.  வெளியில் போய்விட்டு வரும்போது வழியில் அமர்ந்திருக்கிறார்.  விஷமக்காரர்.   சட்டென நெஞ்சு வரை ஏறி நிற்பார்.  வால் ஆடிக்கொண்டு இருக்கும்.  அவரை ஆற்றுப்படுத்தி விட்டுதான் மேலே செல்ல முடியும்..  "நண்பனே...  எனது உயிர் நண்பனே..   நீண்ட நாள் உறவிது..   இன்றுபோல் என்றுமே தொடர்வது..."

நான் திட்டுவேன் என்பதால் கவனிக்காமல் அமர்ந்திருப்பது போல நடிக்கிறார்.  ஒரு குரல் கொடுத்தால் போதும்..   அல்லது நைஸாய் தாண்டிச் சென்றாலும் போதும் ஓடிவந்து விடுவார்...   "பழகும் வகையில் பழகிப் பார்த்தால் மிருகம் கூட நண்பனே..."

ஞாயிறு ஃபோட்டோ போடுவதால் பார்ப்பதை எல்லாம் ஃபோட்டோ எடுக்கத் தோன்றுகிறது. கடமை உணர்ச்சி.   இது மாமா பெண் காரில் இருந்த பொம்மை...   கார் செல்லும்போது அது தலையாட்டி தலையாட்டி 'என்னை ஃபோட்டோ எடேன்..' என்றது.   எடுத்து விட்டேன்!    "நீயும் பொம்மை..  நானும் பொம்மை..  நினைத்துப் பார்த்தால் எல்லாம் பொம்மை..."

அன்னையின் கண்களும் அன்னையின் புருவங்களுக்குக் கீழ் மூக்கின்முன் ஒரு பாபாவும்..    இவர் முகத்தைப் பாருங்கள்...  அப்புறம் கீழே உள்ள இன்னொரு பாபாவையும் பாருங்கள்.  இந்த பொம்மையின் மேலேதான் அவரும் பெரிய சைஸில் இருக்கிறார்.  "கண்களுக்கென்ன...   காவல் இல்லையோ..."

இந்த பாபாவிடம் கருணை சற்று குறைவதாக தோன்றியது எனக்கு!    அல்லது யாரோ பாபா வேடத்தில் இருப்பது போல..  இந்த பொம்மையைச் செய்தவர் குறை.    மனம் எங்கோ இருக்க, கைகள் வேலை செய்திருக்கும் போல...!  "கண்ணொரு பக்கம் நெஞ்சொரு பக்கம் சிலையோடு போராடுது..."

சமீபத்தில் சென்றிருந்த ஒரு சஷ்டியப்த பூர்த்தி.  அதில் ஹோமத்துக்கு வளர்த்த அக்னியை படம் எடுத்தேன்.  படம் எடுத்தபின் பார்த்தால் அக்னியில் சில உருவங்கள் தெரிவது போல தோற்றம் காட்டும்,  அந்த சுவாரஸ்யத்துக்காக இந்தப் படங்கள்..   இந்தப் படத்தில் ஒரு முனிவர் உச்சியில் அமர்ந்திருப்பது போல எனக்குத் தோன்றியது.  "தீ...  தீ...  தித்திக்கும் தீ..."

இந்தப் படத்தில் ஏதோ பயங்கர உருவம் ஒன்று கண்ணில் படுவது போல...  "கண்ணில் கண்டதெல்லாம் காட்சியா?"

என்னதான் அலைபேசித் திரையில் கைவைத்து மலரை ஃபோகஸ் செய்தாலும் அது இலைக்குதான் முக்கியத்துவம் தருகிறது.  நான் அரசியல் பேசவில்லை.  ஆனாலும் மலரை ஓரளவு வெண்பஞ்சுக் குவியலாகக் காட்டுகிறதே... அது போதும் என்று விட்டுவிட்டேன்.    "பூவில் வண்டு கூடும்..  கண்டு கூடும்..  கண்கள் மூடும்..."

அழகிய ரோஜா மொட்டு.  பார்த்து நாளானதால் க்ளிக்கிவிட்டேன்.   ஒரு முன் அறிவிப்பு :  அடுத்து வரும் மலர் இந்த மொட்டில் மலர்ந்தது அல்ல!  "நேத்து பூக்காத ரோஜா மொட்டு...  பறிக்கக் கூடாது லேஸாத் தொட்டு..."

இந்த ரோஜாப்பூ மேலே படத்தில் காணப்படும் மொட்டில் மலர்ந்தது அல்ல என்று போர்ட் மாட்டி விடலாம்.  அந்த மொட்டுக்கு அருகில் இருந்த பூ..  "ரோஜா ஒன்று முத்தம் கேட்கும் நேரம்..." என்று பாடலாம்..     ஆனால் முத்தம் எல்லாம் வேண்டாம்.   வாயைக் கொண்டு போனால் முள் குத்தி விடும்!

ரோஜா என்றாலே அழகுதான் இல்லை?  அதுதான் வேறொரு கோணத்திலிருந்து மறுபடியும் அதே ரோஜா..  "ராஜாவின் ரோஜா...   கன்னம் ரெண்டும் மின்னும் வைரம் காதல் சின்னங்கள்..."

மேலே பார்த்த பெரிய நந்தியாவட்டையின் இளைய சகோதரி..  இவளுக்கு ஒரு வருத்தம் உண்டு.  இவளை பற்றி பாட பாடலே இல்லையாம்.  "உன்னைப் பற்றி பாட தமிழில் வார்த்தை போதவில்லை" என்று சமாதானப் படுத்தி வைத்திருக்கிறேன்!  சிறுமலர்.  "சின்னஞ்சிறுமலர்...  பனியினில் நனைந்து..."  இப்போ திருப்திதானே வெண்மலரே?

காலைச் சூரியனோ மாலைச் சூரியனோ..  அழகுதான்.   நண்பர் அப்பாதுரை கூட வாட்ஸாப் க்ரூப்பில் அலுக்காமல் இவ்வகைப் படங்கள் கொடுத்துக்கொண்டே இருக்கிறார்.  நமக்கும் பார்க்க அலுப்பதில்லை!  அதுமாதிரி இந்த காலைக் காட்சியை படம் எடுத்தேன்.  கண்கள் பார்க்கும் அழகை புகைப்படங்களால் முழுதாகக் காட்ட முடியாது.   நான் எடுத்த இந்தப் படத்தையும் கூகிளுக்கும் பிடித்துப்போய் ஸ்பெஷல் எஃபெக்ட் எல்லாம் கொடுத்து திருப்பித் தந்தது.  எனினும் நான் இங்கு நான் எடுத்த ஒரிஜினல் புகைப்படத்தையே தருகிறேன்!  "காலைத் தென்றல் பாடி வரும் ராகம்..  ஒரு ராகம்..."