"திங்க"க்கிழமை 180903 : மட்டர் பனீர் - சப்பாத்தி/பரோட்டா சைட் டிஷ் - நெல்லைத்தமிழன் ரெஸிப்பி

பஹ்ரைனுக்கு மார்ச் மாதத்தில் என் மனைவி வந்திருந்தபோது செய்த டிஷ் இது. எனக்கு ஹோட்டலில் நான், ரோட்டி வாங்கினால், எப்போதும் மட்டர் பனீர்தான் சைட் டிஷ் ஆகச் சொல்லுவேன். பொதுவா ஒன்று பிடித்துவிட்டால், நான் மற்றதை முயற்சிப்பதில்லை. சென்னைலகூட, சங்கீதாவில், மதியம், நான் + ஒரு சைட் டிஷ், 50-60 ரூபாய்க்கு உண்டு. அதில், மட்டர் மசாலா இல்லைனா, பனீர் மசாலா கொடுப்பார்கள். எனக்கு இரண்டில், மட்டர் மசாலா பிடித்துவிட்டது. 

இதுவரை சாப்பிட்ட மூன்று முறையும் அதே சைட் டிஷ்தான். எப்போவாவது, இரண்டாவது சைட் டிஷ் ஆர்டர் பண்ணணும்னா, கடாய் வெஜிடபிள்ஸ் சொல்லுவேன். கல்லூரிக் காலங்களில், மலாய் கோஃப்தா எனக்கு ரொம்பவும் பிடிக்கும். இப்போதெல்லாம் அதில் இஷ்டமில்லை.

நார்த் இண்டியன் சைட் டிஷ் செய்ய, முதலில் நம் சுவைக்கு ஏற்ற மசாலா (பிராண்ட்) வாங்கிக்கணும். எல்லோருக்கும் எல்லா மசாலாவும் பிடிக்காது. ஒரு பிராண்டிலும், எல்லா வகையான மசாலாக்களும் நல்லா இருக்கும்னு சொல்லமுடியாது. நான் டேஸ்ட் செய்து பார்ப்பதற்காக, பாத்ஷா என்ற பிராண்ட் மசாலா வாங்கியிருந்தேன். (அதுவும் சன்னா மசாலா). அதைவைத்துத்தான் மட்டர் பனீர் செய்தது.

தேவையான பொருட்கள்

தக்காளி 2

வெங்காயம் 3

பனீர் ½ பாக்கெட் (100 கிராம்)

பச்சைப் பட்டாணி 1 டம்ளர்

மஞ்சப்பொடி 1 தேக்கரண்டி

மிளகாய்ப் பொடி ¾ மேசைக்கரண்டி அல்லது தேவைப்படும் அளவு

மசாலா பொடி (சன்னா மசாலா) 1 மேசைக் கரண்டி

தேவையான அளவு உப்பு

இதில் கிரீம் போடலாம். நாங்கள்  உபயோகப்படுத்தவில்லை.

பச்சைப் பட்டாணிக்குப் பதில், நாங்கள், உறைந்த பட்டாணி பாக்கெட் உபயோகித்தோம். சுலபமாகக் கிடைக்கும். புதிய பட்டாணி எல்லாக்காலங்களிலும் வராது. காய்ந்த பட்டாணியை ஊறவைத்து உபயோகப்படுத்தினால் அந்த ருசி கிடைக்காது.

செய்முறை

உறைந்த பட்டாணியையும், பனீரையும் தேவையான அளவு எடுத்து தனித் தனித் தட்டில் வைத்துவிடவும். தேவை என்றால், பனீரின் சைஸைச் சிறிதாக்கிக்கொள்ளலாம்.

பொடி வகைகளை தனித் தட்டில் எடுத்துவைத்துவிடவும். இல்லைனா, கொதிக்கும்போது தேடணும், அவசர அவசரமாக எடுத்துப்போடணும்.

வெங்காயத்தைத் தோலுரித்து, பெரிய துண்டுகளாகக் கட் செய்து, வாணலியில் சிறிது எண்ணெய் விட்டு வதக்கவும். ஓரளவு வதங்கியபிறகு, ஒரு தட்டில் கொட்டி ஆறவைக்கவும்.

தக்காளியைத் தோலுரிக்கலாம். நாங்கள் உரிக்கவில்லை. அதை கட் செய்து, மிக்சியில் அரைத்து தனி பாத்திரத்தில் எடுத்துவைக்கவும்.

இப்போ வெங்காயம் ஆறியிருக்கும். அதை மிக்சியில் போட்டு அரைத்து, விழுதை எடுத்துவைத்துக்கொள்ளவும்.

வாணலியில் எண்ணெய் அல்லது நெய் விட்டு, சூடானபின்பு, அதில் ஜீரகம் போட்டு வெடிக்கவிடணும்.

அதில், தக்காளி விழுதைச் சேர்த்து மிதமான சூட்டில் கொதிக்கவைக்கவும்.

பச்சை வாசனை முழுமையாகப் போனபிறகு, அதில் உப்பு, மஞ்சள் பொடி, மிளகாய்ப் பொடி சேர்த்து கொஞ்சம் சூடாக்கவும்.

அத்துடன் வெங்காய விழுது, பிறகு மசாலப்பொடியையும் சேர்த்துக் கலக்கவும். இந்த ஸ்டேஜில் உப்பு, காரம் சரியா இருக்கான்னு டேஸ்ட் பார்த்துக்கோங்க.

இப்போ பட்டாணியைச் சேர்த்து கொதிக்கவைக்கவும். உறையவைத்த பட்டாணி சுலபமா வெந்துவிடும். மற்ற பட்டாணியை உபயோகப்படுத்தினால், இன்னொரு பாத்திரத்தில் அதனை அரை/முக்கால் வேகவைத்து, அதனைச் சேர்க்கவும்.  இப்போ பட்டாணி வெந்துவிட்டதான்னு பார்த்துக்கோங்க. (பேஸ்ட் மாதிரி வேகக்கூடாது. முக்கால் வெந்தாலே போதும்)

பிறகு பனீர் துண்டுகளைச் சேர்த்து கொஞ்சம் கொதிக்கவைங்க.

பிறகு எல்லாவற்றையும் ஒரு தடவை கலந்து, அடுப்பை அணைத்துவிட்டு, வெட்டி வைத்த கொத்தமல்லித் தழையை அலங்காரத்துக்கும், வாசனைக்கும் சேர்க்கவும்.

அவ்ளவுதான் விஷயம். மட்டர் பனீர் ரெடி.

ஹோட்டல்ல உள்ளதுபோல் வரணும்னா, 5 முந்திரியை பாலில் அரைத்து பட்டாணி சேர்க்கும்போது சேர்த்துவிடலாம். இறக்கியபின்பு, கிரீம் சேர்க்கலாம். இது இரண்டும் ருசியை அதிகமாக்கும். அதைச் சாப்பிட்டுட்டு கூட ரெண்டு கிலோமீட்டர் நடக்கவேண்டாம் என்பதால், நாங்கள் சேர்க்கவில்லை.

இதுக்கு நான் அல்லது ரோட்டி ரொம்ப நல்லா இருக்கும். நாங்கள் சப்பாத்தி செய்தோம்.

நீங்களும் செய்துபார்த்துவிட்டுச் சொல்லுங்கள்.

பஹ்ரைனில் கிடைக்கும் ‘நான்’ (அரபிக் நான், ரோட்டி) பற்றி தனியே ஒரு ஞாயிற்றுக் கிழமைக்கு எழுதி அனுப்பறேன். (ஸ்லாட் இருக்க சான்ஸ் இருக்கு. இப்போதான் சிக்க்க்க்கிம்லேர்ந்து இறங்கிவந்து, தாராசுரம் வந்தாச்சே)

அன்புடன்

நெல்லைத்தமிழன்