'திங்க'க்கிழமை : வெந்தய வெங்காய ரசம் - மனோ சாமிநாதன் ரெஸிப்பி

ரசம் இல்லாமல் நம் தமிழ்நாட்டில் எந்த விருந்துமில்லை. பல வகைகளில் ரசங்கள் பரிமளித்தாலும் ருசியில் ஒன்றுகொன்று போட்டி போடும்.. குவித்த கையில் ரசம் வாங்கி உறிஞ்சிக்குடித்தாலும் சரி, இலையில் ஓட ஓட விட்டு சோற்றுடன் அள்ளி சாப்பிட்டாலும் சரி, அதன் சுவைக்கு ஈடில்லை. சிலர் ரசம் கொதிக்குமுன் நுரை கட்டி வரும்போதே நிறுத்தி விடுவார்கள். சிலர் ஒரு கொதி நன்கு கொதித்ததும் தீயை அணைப்பார்கள். இன்னும் சிலர் சில நிமிடங்கள் ரசம் நன்றாகக் கொதித்த பிறகே அடுப்பை விட்டு இறக்குவார்கள். இப்படி தயாரிப்பு முறைகளும் வேறுபட்டாலும் ஒன்றுக்கொன்று சுவையில் அவை சளைத்தவையல்ல! மிளகு ரசம், சீரக ரசம், பருப்பு ரசம், முருங்கைக்காய் ரசம், முள்ளங்கி ரசம், புதினா ரசம், கொட்டு ரசம், மைசூர் ரசம், வாழைத்தண்டு ரசம், நண்டு ரசம், பூண்டு ரசம், தக்காளி ரசம், கொள்ளு ரசம், முடக்கத்தான் ரசம், உடுப்பி ரசம், என்று நீண்டு கொண்டே போகும் ரசங்களின் தொகுப்பில் இன்றைக்கு நான் சொல்லப்போவது வெந்தய வெங்காய் ரசம் பற்றி! என் சினேகிதியிடமிருந்து நான் கற்றது.

வெந்தய வெங்காய ரசம்:

தேவையான பொருள்கள்:

சின்ன வெங்காயம்- ஒரு கை

பூண்டு பற்கள்- 10,

பழுத்த தக்காளி-2

கறிவேப்பிலை- ஒரு கொத்து

பொடியாக அரிந்த கொத்தமல்லி- ஒரு கை

சிறு எலுமிச்சம்பழ அளவு புளி

மஞ்சள் தூள் –அரை ஸ்பூன்

தேவையான உப்பு

நல்லெண்ணெய்- 2 மேசைக்கரண்டி

தாளிக்க:

கடுகு- 1 ஸ்பூன்

வெந்தயம்-1 ஸ்பூன்

வற்றல் மிளகாய்-2

சீரகம்- 1 ஸ்பூன்

கட்டிப்பெருங்காயம்- ஒரு துண்டு

செய்முறை:

புளியை ஒரு தம்ளர் வென்னீரில் ஊறவைத்து பிறகு கோது இல்லாமல் கரைத்து வடிகட்டி வைத்துக்கொள்ளவும்.

வாணலியை அடுப்பில் வைத்து சூடாக்கவும்.

மிதமான சூட்டில் நல்லெண்ணெயை ஊற்றி அது சூடானதும் கடுகைப்போட்டு பொரிய விடவும்.

பிறகு வெந்தயமும் சீரகமும் பெருங்காயமும் போட்டு இலேசாக அவை பொரிந்ததும் சின்ன வெங்காயங்களை அப்படியே முழுதாக பூண்டு, கறிவேப்பிலையுடன் சேர்த்து வதக்கவும்.

தக்காளிப்பழங்களை மசித்து மஞ்சள் தூளுடன் சேர்த்து குழைய வதக்கவும்.

எண்ணெய் மேலே தெளிய ஆரம்பித்ததும் புளித்தண்ணீருடன் 5 தம்ளர் நீர் சேர்த்து கொதிக்க விடவும்.

தேவையான உப்பை சேர்க்கவும்.

3 நிமிடங்கள் கொதிக்க விடவும்.

அதன் பின் அடுப்பை அணைத்து கொத்தமல்லியைத்தூவி, மூடி வைக்கவும்.