"திங்க"க்கிழமை : மணத்தக்காளி தண்ணீர் சாறு - மனோ சாமிநாதன் ரெஸிப்பி

 

*********************************************

மணத்தக்காளி தண்ணீர் சாறு

மனோ சாமிநாதன்

*********************************************

மணத்தக்காளி இலையை ‘ உணவே மருந்து ‘ என்ற லிஸ்ட்டில் முதல் வரிசையில் சேர்க்கலாம். அந்த அளவிற்கு இது உடலுக்கு நன்மைகளை கொண்டு வந்து சேர்க்கும். வாய்ப்புண், வயிற்றுப்புண்களுக்கு இந்த சாற்றினை அடிக்கடி குடித்து வர, புண்கள் சரியாகும். சமீபத்தில் சிறு நீரகப்பிரச்சினைகளுக்கும் இது நல்ல பலனைக் கொடுக்கும் என்று தெரிந்து கொண்டேன். இந்த இலை சிறிது கசப்புத்தன்மை உடையது என்பதால் இதை சமைக்கும்போது சின்ன வெங்காயம், பூண்டு என்று சேர்த்து சமைப்பார்கள். தஞ்சை வட்டத்தில் இந்த தண்ணீர் சாறு மிகவும் புகழ் பெற்றது. கழனித்தண்ணீரில் சமைப்பதால் இதை ‘ மணத்தக்காளி கழனி சாறு’ என்றும் சொல்வார்கள். இனி இதை சமைக்கும் விதம் பற்றி....

தேவை:

மணத்தக்காளி கீரை- 2 பெரிய கைப்பிடி

தக்காளி-1

சின்ன வெங்காயம்- ஒரு கைப்பிடி

பூண்டிதழ்கள்-8

அரிசி களைந்த நீர் [ கழனித்தண்ணீர் ]- 2 கப்

வெந்தயம்- அரை ஸ்பூன்

சீரகம்- அரை ஸ்பூன்

மஞ்சள் தூள்- அரை ஸ்பூன்

நல்லெண்ணெய்- 2 மேசைக்கரண்டி

தேங்காய்த்துருவல்- 2 மேசைக்கரண்டி

பெருஞ்சீரகம்- கால் ஸ்பூன்

தேவையான உப்பு

செய்முறை:

வாணலியை சூடு பண்ணி நல்லெண்ணெயை ஊற்றவும்.

வெந்தயம் போட்டு சிவந்ததும் சீரகம் சேர்க்கவும்.

சீரகம் பொரிய ஆரம்பித்ததும் சின்ன வெங்காயம், பூண்டு சேர்த்து வதக்கவும்.

பின் தக்காளியை மஞ்சள் தூளுடன் சேர்த்து குழைய வதக்கவும்.

இப்போது மணத்தக்காளி இலைகளை அரியாமல் அப்படியே சேர்த்து வதக்கவும்.

இப்போது கழனித்தண்ணீர், உப்பு ,  2 தம்ளர் நீர் சேர்த்து கொதிக்க விடவும்.

ஐந்து நிமிடம் கொதித்தால் போதும்.

இப்போது தேங்காய்த்துருவலை சோம்பு சேர்த்து கொரகொரப்பாக அரைத்துச் சேர்க்கவும்.

கழனி சாறு கொதிக்கத் தொடங்கும்போது இறக்கவும்.