நாய்க்கொரு கவிதை...

 அண்ணன் மகனின் மகனுக்கு முடி இறக்க குலதெய்வம் கோவில் சென்று வந்தோம். 

மாமாவின் மறைவு உள்ளிட்ட காரணங்களால் தள்ளிப்போன வரலக்ஷ்மி விரதத்தை கடந்த வெள்ளி அன்று செய்தோம்.  சனிக்கிழமை விநாயகர் சதுர்த்தி.  அன்று மாலை ஏழரை மணிக்கு கிளம்பி எங்கள் குடும்பமும், அண்ணன் குடும்பமும் கும்பகோணம் சென்றோம்.

வரலக்ஷ்மி விரதம் அன்று ஆளுக்கு ஒரு கொழுக்கட்டையும், விநாயகர் சதுர்த்தி அன்று ஆளுக்கு ஐந்தைந்து கொழுக்கட்டையும் கிடைத்தது.  அதென்னவோ எனக்கு கொழுக்கட்டை எட்டாப்பொருளாகிப் போனதால் அபூர்வமாகி ஆசை அதிகம் ஆகிவிட்டது!!

இந்தமுறை இரண்டு நாட்களும் மாவு பதம் ஒழுங்காய் வந்தது ஒரு திருப்தி.  அழகாய் கிண்ணம் செய்து பூரணம் நிரப்பி உடையாமல் எடுக்க முடிந்தது.  சிறிய மாறுதல் முறையில் செய்ததால் சரியாக வந்ததது என்று பாஸ் சொன்னார்.

விநாயகர் சதுர்த்தி புனர் பூஜையை வேறுவழியின்றி சனிக்கிழமை மாலையே முடித்தோம்.  இரவு இரண்டு மணிக்கு சம்பந்தி வீடு சென்று தங்கி, அங்கிருந்து காலை குலதெய்வம் கோவில்.  ஒப்பிலியப்பன் கோவில் செல்ல வேண்டும் என்று நினைத்திருந்தது சில காரணங்களால் செல்ல முடியாமல் போனது.  பெருமாள் விருப்பம்.  குலதெய்வம் கோவிலுக்குச் சென்றுவிட்டு நேராக வீட்டுக்குத்தான் வரவேண்டும்.  வேறெங்கும், வேறு எந்தக் கோவிலும் செல்லக் கூடாது என்று சிலர் கூறினார்கள்.  நினைத்தாலும் செல்ல முடியாத சூழல்!

சம்பந்தி வீட்டருகே ரெட்ராயர் குளம்!  காலை 5 மணி.

குலதெய்வம் கோவில் கும்பகோணம்-திருவாரூர் சாலையில் குடவாசலில் இருந்து சேங்காலிபுரம் செல்லும் வழியில் சிறு ஊர்,  மழுவச்சேரி.

கோவிலை பிரதட்சணமாக சுற்றும்போது இதே பாதையில் என் தாத்தா பாட்டிகள் அவரவர் பிள்ளைகளுக்காக சுற்றி வந்திருப்பார்கள் என்று மனதில் எண்ணம் ஓடியது.  ஆரம்பத்தில் சிலாரூபம் மட்டும் இருந்திருக்கலாம்.  பின்னர் கருவறை உண்டாகி இருக்கலாம்.  நான் பார்த்தபோது அந்த கருவறை மட்டும்தான்.  இப்போது கோவில் வளர்ந்திருக்கிறது. அதே பாதையில் நானும் கால்வைத்து சுற்றி வருகிறேன் என்கிற எண்ணம் மனதில் ஒருவித உணர்வைத் தோற்றுவித்தது. 

விளையாட்டாய் ஆட்டோ ஓட்டுவது போல புகைப்படம் எடுக்கப்போய், குடந்தை ஆட்டோ நண்பர், ஓட்டவே ஓட்டலாம் தப்பில்லை என்று சொல்லி ஆட்டோவை 'ஆன்' செய்த உடனே ஆட்டோ பின்னாலேயே செல்ல, எல்லோரும் பதறினாலும் நான் பதறவில்லை.  

பிரேக் பிடிக்காத ஆட்டோவில் வேகமாக முன்னோக்கிச் சென்று விபத்துக்குள்ளானபோதே நான் பெரிதாக அலட்டிக் கொள்ளவில்லை! பின்னர் ஒரு வீடியோவும் போட்டோக்களும் எடுத்துக்கொண்டேன்..

திரும்பும் வழியில் வானம் காட்டிய காட்சி ஜாலங்களில் ஒன்று 

திரும்பும்போது கோவிலில் பிரசாதமாக புளியோதரை, பொங்கல், வடை, பஞ்சாமிர்தம் சாப்பிட்டதில் வேறெதுவும் சாப்பிடாததால் வடை பஜ்ஜி சாப்பிடலாம் என்று வழியில் டிரைவர் நிறுத்திய இடம் ஒரு கருப்பட்டி காஃபி கடை.  லேட்டஸ்ட் பேஷன் இந்தக் கடைகள்தான்!  அங்கு கண்றாவியான ஒரு டீயைத் தவிர வேறெதுவும் கிடைக்கவில்லை.  ஒரு மணி நேரம் ஆகும் என்றார்கள்.  டின்னருக்கு நிறுத்திய மனோஜ் பவனில் மோசமான அனுபவம்.  எங்கள் நேரம், அந்நேரம் நாங்கள் கேட்ட எதுவும் இல்லை.  அங்கு இருந்தவற்றுள் மகன்கள், மருமகள் சிலவற்றை விரும்பிச் சாப்பிட, நாங்கள் சாதா தோசையுடன் திருப்தியடைந்தோம்.

()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()(

நியூஸ் ரூம் 

பானுமதி வெங்கடேஸ்வரன் 

*  1997 ஆம் ஆண்டு நெதர்லாந்திலிருந்து நியூயார்க் சென்று கொண்டிருந்த கப்பல் ராட்சத அலைகளால் தாக்கப்பட்டதில் அந்த கப்பலில் இருந்த 'லெகோ'(Lego) என்னும் குழந்தைகள் விளையாடும் இணைக்கக்கூடிய துண்டுகள் இருந்த கண்டெய்னர் மூழ்கியது. ஆனால் இன்று வரை அந்த லெகோ துண்டுகள் ஐரோப்பாவின் கடற்கரைகளில் கிடைக்கிறதாம். - சுவாரஸ்யம்.

*  அளவில் பெரிய எரிகல் ஒன்று பூமியை நெருங்கி வருவதாக கூறியுள்ள இஸ்ரோ, அதனை உன்னிப்பாக கவனித்து வருகிறோம் என தெரிவித்துள்ளது. இந்த விண்கல் 2029ம் ஆண்டு ஏப்.,13ல் பூமிக்கு அருகில் வரும் என விஞ்ஞானிகள் தெரிவித்து உள்ளனர்.  2004ம் ஆண்டு அபோபிஸ் என்ற எரிகல் ஒன்றை விஞ்ஞானிகள் கண்டறிந்தனர். அப்போது, இந்த எரிகல் பூமிக்கு அருகில் வந்தது. இது இந்தியாவின் மிகப்பெரிய போர்க்கப்பலான ஐஎன்எஸ் விக்கிரமாதித்யா மற்றும் அகமதாபாத் கிரிக்கெட் மைதானத்தை விட பெரியது. 350 முதல் 450 மீ., விட்டம் கொண்டது இந்த விண்கல். 140 மீ., விட்டத்திற்கு மேல் உள்ள எந்த விண்கல்லும் ஆபத்தை ஏற்படுத்தும் என விஞ்ஞானிகள் கணிக்கின்றனர்.  எகிப்திய கடவுளான அபோபிசை நினைவு கூறும் வகையில் அவரது பெயர் இந்த விண்கல்லுக்கு சூட்டப்பட்டது. இது 2029ம் ஆண்டும், அதற்கு பிறகு 2036ம் ஆண்டும் பூமிக்கு அருகில் வரும் என விஞ்ஞானிகள் கணித்து உள்ளனர். அப்போது பூமிக்கு எந்த ஆபத்தையும் ஏற்படுத்தாது என விஞ்ஞானிகள் கூறியுள்ளனர். பூமியில் இருந்து 32 ஆயிரம் கி.மீ., உயரத்தில் இந்த எரிகல் கடந்து செல்லும் என எதிர்பார்க்கப்படுகிறது.

*  சண்டிகர்: நாற்பதாயிரம் பட்டதாரிகள், ஆறாயிரம் முதுகலை பட்டதாரிகள், 1.2 லட்சம் +2 முடித்தவர்கள் ஹரியானாவின் அரசு அலுவலகங்களில் துப்புரவு தொழிலாளியாக பணி புரிய விண்ணப்பித்திருக்கிறார்கள். மாத சம்பளம் ₹15,000/-- வறுமையின் நிறம் கருப்பு.

*  கணவரை டைவர்ஸ் செய்வதாக இன்ஸ்டாகிராமில் அறிவித்த துபாய் இளவரசி, 'டைவர்ஸ்' என்ற பெயரில் புதிய வாசனை திரவியத்தை அறிமுகம் செய்தார்.  சமீபத்தில், துபாய் இளவரசி மஹ்ரா, தன் கணவரை விவாகரத்து செய்வதாக இன்ஸ்டாகிராம் சமூக ஊடகத்தில் அதிரடியாக அறிவித்தார். அந்த பதிவில், 'அன்பிற்குரிய கணவரே, நீங்கள் பிறருடன் நேரம் செலவிட்டு வருவதால், நான் விவாகரத்தை அறிவிக்கிறேன். இப்படிக்கு உங்கள் முன்னாள் மனைவி' என குறிப்பிட்டு பரபரப்பை கிளப்பி இருந்தார்.  அதுமட்டுமின்றி சமூக வலைதளங்களில் இருவரும் சேர்ந்தாற்போல் பதிவிட்டிருந்த புகைப்படங்களையும் நீக்கினார். இளவரசி மஹ்ரா பொதுவெளியில் விவாகரத்தை அறிவித்தது துபாயில் பரபரப்பாக பேசப்பட்டது.  இந்நிலையில், தற்போது வாசனை திரவியம் ஒன்றை இளவரசி மஹ்ரா இன்ஸ்டாகிராமில் அறிமுகப்படுத்தி உள்ளார். அதற்கு 'DIVORCE' (விவாகரத்து) என பெயரிட்டுள்ளார். இந்த பெயர் தான் சமூகவலைதளத்தில் சுவாரஸ்யமான விவாதத்தை கிளப்பி உள்ளது. 

*  டில்லி: குரல் மூலம் UPI பரிவர்த்தனை அறிமுகம். இனி UPI மூலம் பண பரிவர்த்தனை செய்ய நினைக்கும் வாடிக்கையாளர்கள் தங்கள் தொலைபேசி எண்ணையோ, யு.பி. ஐ. எண்ணையோ தட்டச்சு செய்யத் தேவையில்லை. குரல் வழி ஆணை கொடுக்கலாம். 

*  ஏமனில் மரண தண்டனை விதிக்கப்பட்ட கேரளாவை சேர்ந்த நர்ஸ் நிமிஷா பிரியாவை மீட்பதற்கான முயற்சி தடைபட்டு உள்ளது. பேச்சுவார்த்தையில் ஈடுபடுவதற்கு, அதிக சம்பளத்தை வழக்கறிஞர் எதிர்பார்ப்பதே இதற்கு காரணம் ஆகும்.  தலால் அப்தோ மஹ்தி தரப்பினருடன் பேச்சுவார்த்தை நடத்த அப்துல்லா அமீர் என்ற வழக்கறிஞர், இந்தியா அரசு ஏற்பாடு செய்யப்பட்டது. இதற்காக ஜூலை 4ம் தேதி அவருக்கு 19,871அமெரிக்க டாலர் பணம் வெளியுறவு அமைச்சகம் மூலம் வழங்கப்பட்டது.  ஆனால், அவர், மேலும் 20 ஆயிரம் டாலர் பணம் கொடுத்தால் தான் பேச்சுவார்த்தையில் ஈடுபடுவேன் எனக்கூறியுள்ளார். இதனால், பேச்சுவார்த்தை நடப்பது தடைபட்டுள்ளது. 'கிரவுடு பண்டிங்' என்ற முறையில் வெளிநாடு வாழ் மலையாளிகளிடம் நிதி திரட்டித்தான், ஏற்கனவே பணம் வழங்கப்பட்டது. இப்போது மேலும் அதே அளவு பணத்தை எப்படி திரட்டுவது, யாரிடம் உதவி கோருவது என்று தெரியாமல், அவரது குடும்பத்தினர் திணறி வருகின்றனர்.

*  ஒவ்வொரு மூன்றாவது இந்தியனும் fatty lever பாதிப்பிற்கு ஆளாகின்றனராம். இதில் பெண்களின் சதவிகிதம் அதிகம்(38%). ஆண்கள் 33%.

*  மதுரை மாவட்டம் உசிலம்பட்டி அருகே மலைப்பட்டி கிராமத்தில் பிள்ளையார் சதுர்த்தி விழாவுக்கு வைக்கப்பட்டிருந்த விநாயகர் சிலையின் கையில் வைத்திருந்த லட்டுவை ஏலம் விட்டதில் அந்த கிராமத்தைச் சேர்ந்த முறுக்கு வியாபாரி அதை 1,51,000 ரூபாய்க்கு ஏலம் எடுத்து கிராம மக்களை மகிழ்ச்சிக்கடலில் ஆழ்த்தி யுள்ளார்.  கிராம மக்கள் அவருக்கு ஒரு பவுன் தங்கக்காசும், 10 வேஷ்டி சட்டைகள், 5 சேலைகள் பரிசாக வழங்கப்படும் என்று அறிவித்தனர்.

*  பெங்களூரு: அமெரிக்கா செல்வதற்காக பொருள்கள் வாங்குவதற்காக சேலத்திலிருந்து பெங்களூரு வந்திருக்கிறார் 29 வயதான சபரீஷ் என்னும் தமிழ் நாட்டைச் சேர்ந்த இளைஞர். அவர் நண்பர்களோடு சென்ற கார் வேகமாக சென்றதில் கட்டுப்பாட்டை இழந்து, மோட்டார் பைக்கோடு நேருக்கு நேராக மோதி, யஷ்வந்த்பூர் பாலத்திலிருந்து கீழே விழுந்ததில் மரணமடைந்தார்.- சிதைந்த கனவு. 

*  ஜப்பானின் துயரம்: 2024 ஆம் ஆண்டில் மட்டும் ஜப்பானில் 40000 பேர்கள் வீட்டிலேயே இறந்த நிலையில் சடலமாக மீட்கப் பட்டிருக்கின்றனர். அதில் 4000 பேர் இறந்து ஒரு மாதத்திலும், 130 பேர் இறந்து ஒரு வருடத்திற்கு பிறகும் சடலமாக மீட்கப் பட்டிருக்கின்றனர். உலகிலேயே அதிக முதியவர்கள் கொண்ட நாடான ஜப்பானில் கவனிக்க ஆளில்லாமல் வீட்டிலேயே இறக்கும் முதியவர்களின் எண்ணிக்கை அதிகரித்துள்ளது.- மனதைப் பிழியும் சோகம். 

*  தெலங்கானாவில் 4 ஆண்டுகளுக்கு முன் திருமணம் நடந்து, ஓராண்டாக பிரிந்து வாழ்ந்த தம்பதிகளில், கணவர் சுனில் உடல்நலக்குறைவால் மரணம் அடைய, தகவல் அறிந்த மனைவி சடலம் வைக்கப்பட்டிருந்த ஆற்றங்கரைக்கு வந்து தன் மகனுக்கு சேரவேண்டிய சொத்தின் பங்கைக் கொடுத்தால்தான் தகனம் செய்ய விடுவேன் என்று போராடி, இரண்டு நாட்களில் கோரிக்கை ஏற்கப்பட்டதும், இரண்டு நாட்களாகக் காத்திருந்த சுனிலின் உடலுக்கு விடுதலை கிடைக்க,  மகனை தந்தையின் உடலை தகனம் செய்ய அனுமதித்துள்ளார்.

* உத்திரபிரதேசம், ராஜஸ்தான் உள்ளிட்ட வடமாநிலங்களில் தண்டவாளம் மீது சிமெண்ட் துண்டுகளை வைத்தும், சிலிண்டர், கம்பிகள் வைத்தும், டிராக்டரை குறுக்காக நிறுத்தியும் ரயிலைக் கவிழ்க்க தொடர்ந்து சதிகள் நடந்து வருவதை வெவ்வேறு செய்திகள் சொல்கின்றன.

*  எதிர் முனையில் பேசும் நபர், தன்னை சி.பி.ஐ., அதிகாரி என்பார். 'நீங்கள் டிஜிட்டல் முறையில் கைது செய்யப்பட்டு உள்ளீர்கள். சிறைக்கு செல்லாமல் இருக்க, இந்த வழக்கில் இருந்து தப்பிக்க, நாங்கள் தெரிவிக்கும் வங்கி கணக்கிற்கு பணம் அனுப்ப வேண்டும்' எனவும் கூறுவார். மொத்தத்தில், உளவியல் ரீதியாக மன உளைச்சலுக்கு ஆளாக்கி விடுவர்.  சில தினங்களுக்கு முன், 'வாட்ஸாப்' அழைப்பில், இன்ஸ்பெக்டர் போல பேசிய மர்ம நபர், தன் பெயரை வெளியிட விரும்பாத சென்னை உயர் நீதிமன்ற நீதிபதியிடம், 'கோடிக்கணக்கான ரூபாய் மதிப்புள்ள போதை பொருள் கடத்தலில் ஈடுபட்டுள்ளீர்கள். சட்ட விரோத செயலுக்கு உங்கள் மொபைல் போன் எண் பயன்படுத்தப்பட்டு உள்ளது. உங்கள் மீது, மஹாராஷ்டிரா மாநிலம் மும்பை புறநகர் அந்தேரி காவல் நிலையத்தில் வழக்குப் பதிவு செய்யப்பட்டுள்ளது' என, மிரட்டல் விடுத்துள்ளார்.

*  மும்பை பந்த்ராவை சேர்ந்தவர் வினாயக் கோல்வங்கர்,76, விஞ்ஞானியான இவர் பி.ஏ.ஆர்.சி., எனப்படும் பாபா அணு ஆராய்ச்சி மையத்தில் பணியாற்றி பணிநிறைவு பெற்றார். மும்பை நியூ எம்.ஐ.ஜி. காலனியில் குடும்பத்துடன் வசித்து வருகிறார். கடந்த செப். 5-ம் தேதி முதல் வீட்டை விட்டு வெளியே சென்றவர் வீடு திரும்பவில்லை என கூறப்படுகிறது.

* பெங்களூரு: ராஜஸ்தான்,கோட்டாவில் மாணவர்கள் தற்கொலை செய்து கொள்வதை குறித்து கேள்வி எழுப்பப் பட்ட பொழுது இன்ஃபோஸிஸ் நிறுவனர் நாராயணமூர்த்தி, "கோச்சிங் சென்டர் கலாசாரத்தை ஒழித்து, ஆசிரியர்களின் தரத்தை மேம்படுத்துங்கள்" என்றார்.  மேலும் "பள்ளிகளில் கற்பதை விட கோச்சிங் சென்டர்களில் சிறப்பாக கற்றுக் கொள்ள முடியும் என்று நினைப்பது தவறு. கோச்சிங் சென்டர்கள் சில நெறிமுறைகளை வலியுறுத்துகின்றன. அவற்றை பெற்றோர்களே வீட்டில் கொண்டுவர முடியும். ஓய்வு பெற்ற, திறமை மிகுந்த ஆசிரியர்களைக் கொண்டு கற்பிக்கும் முறைகளை தற்கால ஆசிரியர்களுக்கு பயிற்சி அளிப்பதன் மூலம் அவர்கள் திறனை மேம்படுத்தலாம்" என்றும் கூறியிருக்கிறார். 

*   இந்தியாவில் நிலவும் சில்லறை வாணிப (retail marketing) சட்டங்களினால் லாபம் ஈட்ட முடியவில்லை என்று இந்தியாவை விட்டு வெளியேறிய Carrefour என்னும் ஃபிரான்ஸ் நாட்டைச் சேர்ந்த நிறுவனம் துபாய் சேர்ந்த Apparal என்னும் நிறுவனத்தோடு இணைந்து மீண்டும் இந்தியாவிற்குள் நுழையப் போகிறது. 

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

சென்ற வருடம் பேஸ்புக்கில் பகிர்ந்தது....

நேற்று செப்டம்பர் பதினொன்றாம் தேதி. மகாகவி பாரதியார் நினைவு தினம். சிலபேர் இந்த தேதியிலும் தவறு இருக்கிறது என்று சொல்லி இருந்த ஞாபகம்.

ஒருவர் இறந்தபிறகு அவரைப்பற்றி தனக்குத் தோன்றியதை எல்லாம் மேடைகளில் மற்றும் பொதுவெளியில் எடுத்து விடுவது 'இந்நாளில் மட்டும் அல்ல எந்நாளும் உள்ளது'!

அசோகமித்திரன், சுஜாதா இவர்களை பற்றியெல்லாம் எல்லாம் தெரிந்தவர்கள் போல சொல்வது போலவே அப்போதும் இஷ்டத்துக்கு பேசி இருக்கிறார்கள், எழுதி இருக்கிறார்கள்.

1977 ல் குமுதத்தில் பாரதியார் நூற்றாண்டு விழா காரணமாக அவர் ஜாதகம், விவரம் பற்றிய குறிப்புகளுடன் 'நான் பாரதியாரை சந்தித்தால்' என்ற தொடர் ஆரம்பித்து, அதில் ஓரிரு விவாதத்துக்குரிய கருத்துகளும் இடம்பெற்றன. அறந்தை நாராயணன், குமரி அனந்தன் போன்றோர் சொன்னதை, அறந்தைக்கு பகீரதனும், குமரிக்கு ரகமியும் விளக்கம் கொடுத்தார்கள்.

தொடரில் வீரமணியும், கமலஹாசனும் கூட கதைத்திருந்தார்கள்.

தொடர்ந்து அதே குமுதம் இதழில் பாரதியாரின் பேத்தி லலிதா பாரதி வருத்தப்பட்டு எழுதி இருப்பது கீழே தருகிறேன்.

============================

மகாகவி பாரதியாரின் நூற்றாண்டு விழா பெருமைப்படும் விதத்தில் அரசினரால் தொடங்கப்பட்டது என்பது நாடறிந்த விஷயம். ஏராளமான அறிஞர்களும், பெரியவர்களும் தத்தம் அன்பு உரைகளை வழங்கிக் கொண்டிருக்கிறார்கள். மிக்க மகிழ்ச்சி. எனினும்... பாரதியாரின் பேத்தி - தங்கம்மாளின் புதல்வி என்ற உரிமையில் அன்பர்களுக்கு ஒரு வேண்டுகோள்.

பாரதியார் வறுமையில் வாடியது உண்மைதான் என்ற போதிலும் வறுமையை துச்சமென உதறியவர் அவர். "சாப்பிட்டால் பொரித்த அப்பளத்துடன் நல்ல சாப்பாடு... இல்லையெனில் பழமும் பாலுந்தான்," என்று என் பாட்டி செல்லம்மா பாரதி சொல்லக் கேட்டிருக்கிறேன்.

ஆனால் அவரது சொந்த வாழ்க்கையைப் பற்றி இன்று பேசுவோர் சற்று நாகரீகமாக இருக்க வேண்டுமென வேண்டுகிறேன்... கிழிசல் கோட்டு, எலி கடித்த மாதிரி பொத்தல்கள், அதை மறைக்க மனைவியினுடைய கருப்பு சேலை சாயப்பூச்சு என்றெல்லாம் வர்ணிக்கும் அளவுக்கு அவர் ஒருநாளும் இருந்ததில்லை.என்று என் பாட்டியார் கூறக் கேட்டிருக்கிறேன்.

என் தாயார் தங்கம்மாள் பாரதி உயிருடன் இருந்த காலத்தில் அவர் தெருவில் கீரைத்தண்டு விற்றார் என்று பத்திரிக்கையில் எழுதியிருந்ததையும் பாத்திருக்கிறேன்.

தன் பெண்ணுக்குத் தன் கைப்பட தாரை வார்த்துக் கல்யாணம் செய்து கொடுத்தவர் பாரதியார். அப்படியிருக்க, 'பாரதியார் தம் மகள் கல்யாணத்துக்கு வர மறுத்து விட்டார். நான்தான் கல்யாணத்திற்கு வேண்டிய வேஷ்டி புடைவைகளை கடனாகக் கொடுத்து உதவி, கல்யாணத்தை நடத்தி வைத்தேன்' என்று என் காதுபடவே அன்பர் ஒருவர் கூறினார்.

புதுவை அரசு நடத்திய பாரதி விழாவிலும் ஒரு செய்தி கேள்விப்பட்டேன். 'பாரதியார் என் மடிமீது படுத்து உயிரை விட்டார்' என்று ஒரு அன்பர் கூறியிருக்கிறார். இப்படிப்பட்ட உண்மைக்கு புறம்பான செய்திகளைக் கேட்கும்போது மனத்திற்கு மிகவும் வருத்தமாயிருக்கிறது. எல்லாம் அன்பின் மிகுதியால் சொல்லப்பட்ட வார்த்தைகள்தான் என்ற போதிலும் எங்கள் குடும்பத்தினரால் அதை சகித்துக் கொள்ள முடியவில்லை.

பாரதியார் இறந்த பின்தான் நான் பிறந்தேன் என்றாலும், என் பாட்டியாரால் முழுக்க முழுக்க வளர்க்கப்பட்டவள் நான். "பாரதியார் ஒரு அலங்கார பிரியர். இறப்பதற்குச் சில நிமிடங்கள் முன்பு கூட தான் அணிந்திருந்த அல்பகா கோட்டையும், தலைப்பாகையையும் சரி செய்து கொண்டார். நல்ல ஆடைகளை அணிவதில் அவருக்கு விருப்பம் மட்டுமல்ல, அதை அணிவதிலும் மிகுந்த கவனமும் செலுத்துவார்" என்றெல்லாம் என் பாட்டியார் கூறக் கேட்டிருக்கிறேன். எனவே, பாரதி அன்பர்கள் எது சொன்னாலும் சரி, எழுதினாலும் சரி, அவரது சொந்த வாழ்க்கையைப் பற்றிக் குறிப்பிடும்போது அவரது குடும்பத்தினரும் உயிருடன் இருக்கிறார்கள் என்பதை நினைவில் வைத்துக் கொண்டு எழுதும்படி கேட்டுக்கொள்கிறேன். 'பசியின் கொடுமை காரணமாக பாரதியார் ரோட்டில் கிடந்த எச்சிலையைப் பொறுக்கிக் கொண்டிருந்தார்' என்றளவிற்கு கூட நாளை யாரும் சொல்லி விடுவார்களோ என்று பயமாயிருக்கிறது.

00000000000000000000000000000000000000000000000000000000000000000000000000000000000000000000000000000000

நாய்க்கொரு கவிதை...

நான்கடிக்கு நான்கடி 

கூண்டுக்குள் 

குறுகிப் படுத்திருக்கிறது 

நாலுகால் செல்லம் 

அப்படித்தான் அழைக்கிறார்கள் 

அதை 

அடைத்து வைத்து 

அவ்வப்போது 

நான்கடியில் ஓரடியை 

அடைத்திருக்கும் 

கிண்ணியில் சோறு வைத்து விட்டு 

செல்லம் என்றுதான்  

அழைக்கிறார்கள் அதை 

ச்சுச்சு, கக்கா போகும் 

விடுதலை நிமிடங்களுக்காய் 

கம்பியில் முகத்தை வைத்து பார்த்தபடி 

காத்திருக்கிறது 

திறந்து அழைத்ததும் 

வாலாட்டியபடி வந்து விட்டு 

வாலாட்டியபடி 'கழித்து'விட்டு 

வாலாட்டியபடி 

அனைவரையும் ஒரு சுற்று சுற்றி 

முகர்ந்து விட்டு 

வாலாட்டியபடியே உள்ளே 

அதுவே அடைந்து கொள்கிறது 

விடுதலையை அது 

மறந்து விட்டதா, விரும்பவில்லையா 

தெரியாது 

என்னவென்று கேட்டேன் 

வள்வள் என்றே 

பதிலாய்ச் சொன்னது...

மூச்சா போகும்போது 

நானும் ஒரு நாய் 

பார்த்தேன்.

உணவுக்காய் 

முடுக்கெங்கும் முகர்ந்தபடி 

எலும்பும் தோலுமாய் 

எதிரே வந்தது.

என் கழுத்துக் கயிற்றை 

ஏளனமாக அது பார்த்தது 

அதன் இளைத்த வயிற்றை 

பகடியாய் பதிலுக்கு  

நானும் பார்த்தேன்.

உள்ளே இழுத்து வரப்படுகையில் 

என்னுள்ளே ஒரு கேள்வி 

சுதந்திரமாய் பட்டினி, கல்லடி 

சிறைச்சாலையில் 

கொஞ்சல்களுடன் சோறு 

எது பெரிது? 

ஆமாம், எது பெரிது?

குழம்பித்தான் போனேன் 

நானும் 

செல்லம் 

தொடர்ந்து 'வள்'ளியது...

என் நிலை தேவலாம் 

எதிர்வீட்டில் 

ஒரு பொமெரேனியன் 

கூண்டு கூட இல்லாமல் 

வெளியேயே கட்டப்பட்டு 

வெய்யிலிலும் மழையிலும் 

அவதிப்படுகிறானாம்..

என்நிலை சொல்ல 

ஒருமுறை 

ஓங்கி குரல் கொடுத்த போது 

உன் நிலை தேவலாம் என்று 

தன்னிலை சொல்லி 

எதிர்க்குரல் கொடுத்தான்.

அந்த அழுகுரலில் 

அடங்கிப்போனேன் 

நானும்.

**********************************

இந்தக் கவிதை எழுதுவதற்கு மூலகாரணமாக இருந்த  க்ரூட்டை மகன் படம் பிடித்துக் கொடுத்தான்.  கீழே..

************************************************************************************************************************

ஜெயலலிதாவின் வாரிசு போல ஒரு முகம் ரீல்ஸ் பார்க்கும்போது தென்படுகிறது....  நிறைய ஜாடை ஒற்றுமைகள்...  பெயர் 'வசந்த்தி'யாம்!

$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$

படித்ததில் பகிர்வது....

ஒருசமயம் இரவு நேரத்தில் நான் தஞ்சாவூர் பஸ் ஸ்டாண்டில் நின்று கொண்டிருந்தேன். அப்போது அங்கே எதேச்சையாக தனது நண்பர்களுடன் வந்திருந்த பிரகாஷ் என்னைப் பார்த்து விட்டார். ”என்ன இங்கே?” என்று கேட்டார். ஊருக்குப் போகிறேன் என்று சொன்னேன். அவ்வளவுதான். ‘நாம் சந்திக்காமல் எப்படிப் போவது?’ என்று சொன்னவர், தன் நண்பர்களை விட்டு அருகே உள்ள ஒரு லாட்ஜில் ரூம் போடச் சொல்லி, மூன்று நாள் வரைக்கும் அங்கேயே தங்க வைத்தார். அந்த மூன்று நாளும் அவரும் வீட்டுக்குப் போகவில்லை. அங்கே இன்னொரு எழுத்தாள நண்பரையும் சந்தித்தேன். அவர் கிராமத்தில் விவசாயம் செய்து கொண்டிருந்தார் - பெயர் நினைவில்லை - பல விஷயங்கள் குறித்துப் பேசிக் கொண்டிருந்தோம். ஏன் சொல்கிறேன் என்றால் பிரகாஷிற்கு என் மேல் அவ்வளவு ஈடுபாடு.

பிரகாஷ் நாவல்கள், சிறுகதைகள் என்று நிறைய எழுதியிருக்கிறார். ஆனால் அவர் ஒரு எழுத்தாளன் என்று தன்னை காட்டிக் கொண்டது கிடையாது. அவ்வப்போது நாடோடிக் கதைகள் என்று தாமரையில் எழுதியிருப்பது தெரியும். மற்றபடி அவர் தன்னை எழுத்தாளராக அடையாளப்படுத்திக் கொண்டதில்லை. மேலும் அவருக்கு தெலுங்கு தெரியும், மலையாளம் தெரியும். இந்தியா முழுவதும் சுற்றியிருக்கிறார். லாரி ஓட்டுவதற்கான ஹெவி டிரைவிங் லைசென்ஸூம் அவர் வைத்திருந்தார். அவருடைய தாய் ஒரு ஐயங்கார். தந்தை தேவர். பிரகாஷின் பாட்டி ஒரு பெரிய டாக்டர். இதெல்லாம் எதுவுமே எனக்குத் தெரியாது. அவரது பேச்சு மட்டுமே தெரியும். ஆனால் அவர் நிறைந்த படிப்பாளி. பெங்காளி, ஹிந்தி உட்பட பல மொழிகளில் சிறந்த, ஆழ்ந்த வாசிப்பு அனுபவம் உடையவர். பல புத்தகங்களைச் சேகரித்து வைத்திருந்தார். நல்ல ஞாபக சக்தி உடையவர். எனக்காக ஒரு பத்திரிகையே அவர் ஆரம்பித்து நடத்தினார். “வெங்கட்சாமிநாதன் எழுதுகிறார்” என்பதைச் சுருக்கி ‘வெசாஎ’ என்ற தலைப்பில் ஒரு புதிய பத்திரிகையை ஆரம்பித்து நடத்தினார். அதில் முழுக்க முழுக்க நான்தான் எழுதினேன். வேறு யாரும் கிடையாது. அவர் ஒன்றும் பெரிய பணக்காரர் இல்லை. ஆனாலும் பிடிவாதமாக நடத்தினார். இரண்டு இதழ் வந்தது. மூன்றாவது இதழ் வரும்போது அவர் இல்லை.

- வெங்கட்சாமிநாதன்

நன்றி: சொல்வனம்

@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@

பொக்கிஷம்  :- 

நான்கும் ,ஆறும் படிக்க முடிகிறதா, சொல்லுங்கள்.