பிரஹஸ்பதியிடம் சோமன்

கீரை சாப்பிட்டு வெகு நாட்களாயின என்பது மனதுக்குள் குறையாக இருந்தது.  கடந்த ஜூன் முதல் நவராத்திரி வரை காலை -அதிகாலை- நடைப்பயிற்சி போய்க்கொண்டிருந்தேன்.  அதன்பிறகு நடைப்பயிற்சி சுத்தமாக நின்றுபோய் ஜனவரி வரை சும்மா இருந்துவிட்டேன்.  மறுபடி ஜனவரி 25 அன்று காலை உடற்பயிற்சியும் நடைப்பயிற்சியும் தொடங்கினேன்.

காலைவேளையில் அதிகபட்சம் 25 நிமிடங்களில்  நடையை முடித்துக் கொண்டிருந்தேன்,  மாலை வேளை தொடங்கியபோது ஆற, அமர சுற்றி சுமார் ஒன்றேகால் மணி நேரம் குறைந்தபட்சம் நடக்கிறேன்!

அதுமட்டுமல்ல, நான்கு இடங்களில் மாலை வேளைகளில் பசுபசுவென கீரை விற்பதைப் பார்த்தேன்.

நான் கீரை வாங்கும் ஆஸ்தானக் கடை.  கவரில் இருக்கும் காய்கள் பத்துப் பத்து ரூபாய்.

ஒவ்வொரு முறையும் எது அரைக்கீரை, எது முளைக்கீரை என்று கேட்டு கேட்டுதான் வாங்குவேன்.  அவர்கள் எப்படி சட்டென அடையாளம் கண்டுபிடிக்கிறார்களோ...

அங்கு மகிழ்ச்சியுடனும் ஆசையுடனும் வாங்கத் தொடங்கினேன்.  நடுவில் வாசலில் டெம்ப்போவில் வந்து என்னிடம் காய்கறி ஏமாற்றிக் கொண்டிருந்த - சே, விற்றுக் கொண்டிருந்த - காய்கறிக்காரர் 'இந்த சீசனில் கீரை வாங்காதீர்கள், நன்றாயிருக்காது' என்று பாடம் வேறு எடுத்தார்.  யாரிடம்?  இந்த தஞ்சாவூர்க்காரனிடம்!

தஞ்சாவூரில் கீரைத்தண்டு என்று கிடைக்கும்.  தண்டு நன்றாக வளர்ந்து, தடிமனாக இருக்கும்.  கீரை இலைகள் கம்மியாகவும் பெரிதாகவும் இருக்கும்.  அந்தத் தண்டுகளை நறுக்கி அம்மா சாம்பார் வைப்பார்.  நான் சென்னை வந்து இதை பார்த்ததில்லை.  அப்பாவுக்கு ரொம்பப் பிடிக்கும்.

அப்பா மார்க்கெட் சென்று காய்கறி வாங்கி வந்தால், அன்று வாங்கியதில் எந்தக் காய் மிக நன்றாக இருந்ததோ, ஜாலி மூடில் அதை ஸ்பெஷலைஸ் செய்ய இப்படி சொல்வார்...  "ஹேமா...  கத்தரிக்காய்னு கூப்பிடு..  'ஓவ்' னு கேட்கும்.  வெண்டைக்காய்னு கூப்பிடு..  ஓஓய்னு கேட்கும்" என்பார்.   அம்மாவும் அவரைக் குஷிப்படுத்த காய் பெயரைச் சொல்லிக் கூப்பிடுவார்.  அப்பா குரலை மாற்றி 'ஓவ்' என்பார்!  தஞ்சாவூரில் எல்லா காய்களும் அருமையாகக் கிடைக்கும்.  

இங்கு கீரைக்கதைக்கு வருகிறேன். 

ஒருநாள் முளைக்கீரை, ஒருநாள் அரைக்கீரை, மறுநாள் பசலைக்கீரை என ஒரு வாரம், அடுத்த வாரம் மணத்தக்காளி கீரை, வெந்தயக்கீரைக், பொன்னாங்கண்ணிக் கீரை என்று வாங்கினேன்.

முளைக்கீரைதான் எப்போதும் வாங்குவது.  அதில் இரண்டு வகையாக மசியல் செய்வோம்.  ஒன்று பாசிப்பருப்பு போட்டு, இன்னொன்று துவரம்பருப்பு போட்டு என்று செய்வோம்.  பாஸ், து ப போடுவதை எங்கள் முறை என்பார்.  பா ப போட்டு செய்வது அவர்கள் முறையாம்.  இரண்டுமே நன்றாக இருக்கும்.  அரைக்கீரையை இப்போதுதான் நெடு நெடு நாட்களுக்குப் பிறகு வாங்கி, என்ன செய்வது என்று யோசித்து, மோர்க்கீரை செய்தோம்.  அவ்வளவாக பிடிக்கவில்லை. 

இன்று பசலைக்கீரை வாங்கலாம் என்று சென்ற அன்று ஆஸ்தான கீரைக்கார அம்மா இல்லாமல், (ஞாயிறு லீவாம்) இன்னொரு கடையில் வாங்கி வந்தேன்.  வாங்கி பையில் போட்டது முதலே மனதில் குறுகுறு என்றிருந்தது.  கீரை என்னவோ போல் இருந்ததாக தோன்றியது.  ரொம்ப தூரம் வந்த பிறகு மறுபடி கையில் எடுத்து திருப்பித் திருப்பிப் பார்த்தால், சிவப்புப் புள்ளிகளுடன் பூச்சி நிறைய அரித்திருந்ததது.

சரி, இதை தூக்கிப் போட்டு விடலாம் என்று நினைத்தபோது இரண்டு மாடுகள் ஓரமாக, ஓய்வாக உட்கார்ந்திருந்தன.  முதலில் வெள்ளை மாட்டிடம் சென்று இதை நீட்டியதும் அது அப்படி ஒன்று கண்ணெதிரே நீட்டப்பபடவே இல்லை என்பது போல, ஜென் துறவி போல உட்கார்ந்திருக்க, இரண்டாவது மாட்டிடம் கொடுத்ததும் வாங்கி கொண்டது.

வாயில் வாங்கிய கீரையை கீழே போட்டு பசு நிதானமாக சாப்பிடுவதை படம் எடுத்துக் கொள்வதை ஒரு ஸ்கூல் பையன் புதிருடன் / கிண்டலுடன் பார்த்துக் கொண்டிருந்தான்!  கவலை வேண்டாம்,  இப்போதும் தினசரி அந்த இடத்தில இந்த மாடுகளை பார்க்கிறேன்!

மறுநாள் திங்கட்கிழமை பசலைக்கீரை வாங்கி வெற்றியுடன் திரும்பினேன்.

பசலைக்கீரையை சின்ன வெங்காயம் தக்காளி, சாம்பார் பொடி போட்டு தேங்காய், பாசிப்பருப்பு  சிவப்பு மிளகாய் அரைத்து விடுவது.

வெந்தயக்கீரை அதுவரை நாங்கள் வாங்கியது மினி சைசில் சிறிய கட்டுகளாக இருக்கும்.  இவர் இந்த முறை தந்த வெ. கீ  முளைக்கீரை, மணத்தக்காலிக் கீரை சைசில் இருந்ததது.  தயக்கத்துடன் ஒருமுறைக்கு இருமுறை வெ.கீ தானா என்று கேட்டு வாங்கி வந்து சமைத்தோம்.  அதைப் போட்டு வழக்கம்போல சாம்பார் வைத்தோம்.  பறந்தோடி விட்டது.

மணத்தக்காளிக் கீரை போட்டு பாசிப்பருப்பு, தேங்காய் போட்டு கூட்டு, மசியல் போல செய்வோம்.  வாய்ப் புண்ணுக்கு நல்லது என்ற பெயரில் அதுவும் ஓடிவிடும்.

பெரும்பாலும் கீரைகளை சாப்பாட்டுடன் சாப்பிடுவதை விட நான் சாப்பாட்டுக்கு ஒன்றரை மணி நேரம் முன் தனியாக கப்பில் வைத்து சாப்பிட்டு விடுவேன்.

பொன்னாங்கண்ணிக் கீரை வாங்கும்போது தயக்கமாக இருந்தது.  காதில் கீதா பேசிக்கொண்டிருந்தார்,  நான் கீரைக்காரம்மாவிடம் தயங்கிப் பேசுவதைக் கேட்டு "ஸ்ரீராம்...  வாங்குங்க..  நன்றாய் இருக்கும்" என்று சிபாரிசு செய்தார்.

அதுவரை பொன்னாங்கண்ணிக் கீரை சமைத்ததே இல்லை என்பதால் தயக்கமாக இருந்தது.  அதுவேறு  புள்ளிங்கோ பையன் தலை போல ஒரு மாதிரி கலரில் இருந்தது!

எப்படி செலவாகப் போகிறதோ என்று இருந்தது.

அதைத் தயக்கத்துடன் வாங்கி வந்து இலையை மட்டும் சேகரித்து நறுக்கி - நான் கீரை நறுக்குவதில் ஸ்பெஷலிட்டாக்கும் - சின்ன வெங்காயம், தக்காளி ஒரு பல் பூண்டு சேர்த்து வாணலியில் இட்டு சுண்டல் போல வதக்கினோம்.  சுருண்டு கொஞ்சமாகி விட்ட கீரையை சுவைத்தால்...    அடடா...   இரண்டு கட்டு வாங்கி இருக்கலாம் என்று ஏக்கத்துடன் தோன்றியது.

ஒரு வாரத்துக்கு அளவாய்த்தான் கீரை சாப்பிட வேண்டுமாம்.  எனவே போதும் என்று இந்த அளவில் நிறுத்தி அடுத்த வாரம் மறுபடி கீரைக்கு வருகிறேன்!!

===============================================================================================

இரண்டு நாட்களுக்குமுன் நான் இணையத்தில் பார்த்த இந்த முதல் புதிரை எங்கள் குடும்ப க்ரூப்பில் பகிர்ந்தேன்.  உடனே KGY மாமா சட்சட்டென சில விடுகதைகளைப் பகிர்ந்தார்.  அதெல்லாம் அவர் சிறுவயது நினைவுகளான்,  இன்னமும் நினைவில் இருக்கிறது என்றார்.  அவை...  விடைகள் கடைசியில்... அதாவது ஒவ்வொரு கேள்வியின் 'இது என்ன?' என்பதைத் தொடர்ந்து கடைசியில்!

1) ஏழு ஏழு பதினாலு சோலை 

இது தச்சனோட வேலை

விடுவிச்சவங்களுக்கு நவரத்ன மாலை.

இது என்ன?​  பல்லாங்குழி 

2)   பட்டை நீக்கி 

பால் பட்டை நீக்கி 

முத்துப் பட்டை நீக்கி 

 முன்னே​ வராள் சீமாட்டி 

இது என்ன​?  வாழைப்பூ 

3)  ஒத்தைக் காலன் திம்மப்பன் 

 போவான் வருவான் திம்மப்பன்

இது என்ன?  கதவு

4)  ஓடுகிற குதிரைக்கு விலாவிலே பொத்தல் ?​  

இது என்ன?  பஸ் 

5)  குதிரை ஓட வால் தேயுது.

இது என்ன?  ஊசிநூல் தையல் 

6)  கை​யுண்டு கால் இல்லை நாராயணா 

கழுத்து உண்டு தலை இல்லை நாராயணா 

நெஞ்சுண்டு நினைவில்லை நாராயணா 

என் பேரை சொல்வாயோ நாராயணா​  - 

இது என்ன?  சட்டை.

7)  ஓடோடும் சங்கிலி உருண்டோடும் சங்கிலி பள்ளத்தை கண்டால் பதுங்கி ஓடும் சங்கிலி.​  

இது என்ன?  தண்ணீர் 

=======================================================================================

சிலிக்கான் ஷெல்ப் தளத்தில் RV பகிர்ந்த பதிவு...

"பிறகு அவரைப் பற்றி அங்கும் இங்குமாகத் தெரிந்த விஷயங்கள் வியப்பைத் தந்தன. டி.ஜே.எஸ். ஜார்ஜ் அவற்றை கோர்வையாகத் தொகுத்திருக்கிறார். MS: A Life in Music 2004-இல் வெளியாகி இருக்கிறது. ஜார்ஜ் பத்மபூஷன் விருது பெற்ற பத்திரிகையாளர். பல வாழ்க்கை வரலாறுகளை எழுதி இருக்கிறார்."

எம்எஸ் தேவதாசி குடும்பத்தில் பிறந்தவர். தாய் மதுரை ஷண்முகவடிவு. ஒரு அண்ணன், ஒரு தங்கை. எல்லாருக்கும் ஒரே அப்பாவா என்று தெரியவில்லை. எப்படி இருந்தாலும் யாரும் இவர்களைத் தன் பிள்ளைகளாக அங்கீகரிக்கவில்லை. எம்எஸ் எனபதே தாயின் பேரை வைத்துத்தான், மதுரை ஷண்முகவடிவு சுப்புலக்ஷ்மி என்பதின் சுருக்கம்தான். சிறு வயதிலேயே அவரது குரல் கவனிக்கப்பட்டிருக்கிறது. 10 வயதில் கச்சேரிகள் ஆரம்பம். 13 வயதில் முதல் கிராமஃபோன் இசைத்தட்டு. கும்பகோணம் மகாமகத்தில் அவர் பாடியது அவருக்கு கவனம் பெற்றுத் தந்திருக்கிறது.

சென்னையில் வசித்தபோது அவரை விகடனிலிருந்து பேட்டி காண சதாசிவம் வந்திருக்கிறார், சதாசிவம் முதல் பார்வையிலேயே விழுந்துவிட்டாராம். ஷண்முகவடிவு தன் குல வழக்கப்படி ராமநாதபுரம் ராஜா, நாட்டுக்கோட்டை செட்டியார் என்று பணக்கார புரவலர்களைத் தேடி இருக்கிறார். எம்எஸ்ஸுக்கு அத்தகைய வாழ்வில் விருப்பமில்லை. வீட்டை விட்டு வெளியேறி சதாசிவத்திடம் அடைக்கலம் புகுந்திருக்கிறார்.

சதாசிவம் திருமணமானவர். எம்எஸ்ஸை விட 14 வருஷம் பெரியவர். ஏற்கனவே 2 குழந்தைகள். 3-4 வருஷம் மணம் செய்து கொள்ளாமல் வாழ்ந்திருக்கிறார்கள். எம்எஸ் சதாசிவத்தின் முழுக் கட்டுப்பாட்டில்தான் இருந்திருக்கிறார். சதாசிவம் தன் வீட்டிலேயே எம்எஸ்ஸை குடிவைத்திருக்கிறார். முதல் மனைவிக்கு மன வருத்தமாம். ஆனால் அன்று இப்படிப்பட்ட உறவுகள் அபூர்வம் அல்லவே! எம்எஸ்ஸுக்கு சமூக அங்கீகாரம் தேவைப்பட்டிருக்கிறது, தேவதாசி வாழ்க்கைக்கு இது பரவாயில்லை என்று எண்ணி இருக்கிறார். சதாசிவம் ஏழை இல்லைதான், ஆனால் ஷண்முகவடிவு விரும்பிய அளவுக்கு பெரிய பணக்காரரும் அல்லர். அவர் தன் மகளை சதாசிவத்திடமிருந்து எப்படியாவது மீட்க வேண்டும் என்று முயற்சித்திருக்கிறார்.

சதாசிவம் சிறந்த விற்பனையாளர், திறமையாகத் திட்டமிடுபவர். விகடனில் விளம்பரங்கள் பெருகச் செய்திருக்கிறார். ஆனால் பிற்காலத்தில் எஸ்.எஸ். வாசனோடு மனக்கசப்பு. கல்கி கிருஷ்ணமூர்த்திக்கும். இரண்டு பேரும் இணைந்து கொண்டார்கள்.

சதாசிவத்திடம் அப்போது இரண்டு சொத்துக்கள் இருந்திருக்கின்றன. திறமையான, பிரபலமான பத்திரிகையாளர்/எழுத்தாளர் கல்கி; இசை மேதை எம்எஸ். கல்கி பத்திரிகையை ஆரம்பிக்க வேண்டும் என்று விருப்பம். பணம் வேண்டும். எம்எஸ் இவரிடம் முழு சரணாகதி. கே. சுப்ரமணியம் இயக்கிய சேவாசதனம் திரைப்படத்தில் எம்எஸ்ஸை நடிக்க வைத்திருக்கிறார். அந்தத் திரைப்படத்தின்போது ஷண்முகவடிவு குடும்பத்தினர் எம்எஸ்ஸை கடத்தினார்களாம், சதாசிவமும் கே. சுப்ரமணியமும் அவரை மீட்டிருக்கிறார்கள். திரைப்படம் பெருவெற்றி. அதில் வந்த பணம்தான் கல்கி பத்திரிகைக்கு மூலதனமாம்.

எம்எஸ்ஸைப் பொறுத்த வரை ஒவ்வொரு சிறு விஷயத்தையும் சதாசிவம்தான் திட்டமிடுவாராம். என்ன பாட்டு, என்ன உடை, என்ன நகை என்பதெல்லாம் கூட சதாசிவத்தின் முடிவுதானாம். எம்எஸ் என்னும் brand-ஐ வலுப்படுத்த சதாசிவம் இடையறாது முயன்றிருக்கிறார். எம்எஸ் இசை உலகில் புகழடைகிறார். அன்று பெண்கள் கர்நாடக இசை உலகில் அங்கீகாரம் பெறுவது கொஞ்சம் கஷ்டம்தானாம். எம்எஸ்ஸில் குரல், ஸ்வர சுத்தம் அந்தத் தடைகளை உடைக்கிறது.

அடுத்தபடியாக சகுந்தலை திரைப்படம். சகுந்தலையின்போது ஜிஎன்பியால் எம்எஸ் ஈர்க்கப்பட்டிருக்கிறார். கத்தை கத்தையாக காதல் கடிதம் எழுதி இருக்கிறார். ஆனால் இன்னும் சதாசிவத்தின் பாதுகாப்பில்தான். சதாசிவம் அப்போதெல்லாம் தான் வீட்டை விட்டுப் போகும்போது எம்எஸ்ஸை வீட்டில் வைத்து வீட்டைப் பூட்டிவிட்டுத்தான் போவாராம்.

இதற்கிடையில் சதாசிவத்தின் முதல் மனைவி இறந்துவிட்டார். ராஜாஜி எம்எஸ்ஸுடன் திருமணம் இல்லாத உறவு தவறு என்று அழுத்தம் தந்திருக்கிறார். திருமணம் நடக்கிறது. எம்எஸ் ஐயராத்து மாமியாக மாற ஆரம்பிக்கிறார்.

அப்புறம் அடுத்த திரைப்படம், சாவித்ரி.

சென்னை மாகாணத்து கர்நாடக இசை மேதைகள் என்று அன்று ஒரு பத்து இருபது பேராவது இருந்திருப்பார்கள். ஆனால் வடக்கே யாருக்கும் இந்த மேதைகளைத் தெரியாது. சதாசிவம் எம்எஸ்ஸை அகில இந்தியப் புகழ் பெற வைக்க வேண்டும் என்று கனவு கண்டிருக்கிறார். அவரது திட்டம்தான் மீரா திரைப்படம். மீரா எம்எஸ்ஸை இசை சூப்பர்ஸ்டாராக மாற்றுகிறது. காந்தியும் நேருவும் காங்கிரஸ் தலைவர்களும் அவரது விசிறிகள் ஆகிறார்கள். ராஜாஜியின் உறவு இதற்கெல்லாம் பக்கபலமாக இருக்கிறது. மீரா எனக்கும் பிடித்த திரைப்படம், பார்க்கவில்லை என்றால் பாருங்கள் என்று பரிந்துரைக்கிறேன். மீரா பஜன்களைக் கேட்பதற்காகவே பார்க்கலாம்.

சதாசிவத்துக்கும் அவருக்கும் இடையில் இருந்த பந்தம் perfect match of the opposites. சதாசிவம் எம்எஸ்ஸின் வாழ்க்கையின் ஒவ்வொரு அம்சத்தையும் தன் கட்டில் வைத்திருந்தார். எம்எஸ் அப்படி கட்டுண்டிருப்பதில் இருக்கும் பாதுகாப்பைத்தான் விரும்பினார். சதாசிவம் எம்எஸ்ஸின் மானேஜராக, அவரது பிம்பத்தை கட்டமைப்பவராக, அவரது வழிகாட்டியாக இருந்தார். எம்எஸ் தனக்கு வேறு கவலை இல்லாமல் பாட்டுப் பாடும் நிலை வேண்டும் என்றே விரும்பினார். ஆனால் எம்எஸ் தனக்கென்று சிந்திக்கத் தெரியாத அடிமை அல்லர். அப்படி இருந்திருந்தால் அவர் தன் தாயை மீறி சதாசிவத்திடம் அடைக்கலம் ஆகி இருக்க மாட்டார். ஜிஎன்பியோடு உறவு வைத்துக் கொள்ளாமல் சதாசிவத்திடம் அவர் தொடர்ந்தது அவர் எத்தனை துல்லியமாக கணக்கு போட்டார் என்பதைத்தான் காட்டுகிறது.

தான் பிறந்த ஜாதிச் சூழலைத் தாண்டி சமூக அங்கீகாரத்தை, எந்த விதப் புற உலகக் கவலைகளும் இன்றி இசையில் மூழ்கி இருக்கக் கூடிய சூழலை விரும்பிய பெண்; பாதுகாப்புக்காக தனது காதலையும் துறக்கத் தயாராக இருந்த பெண். பெரும் கனவுகளைக் கண்டு அவற்றை நிறைவேற்றக் கூடிய ஒரு திறமையான ஒருங்கிணைப்பாளர். இருவரின் made for each other பந்தத்தை இந்தப் புத்தகம் அழகாக விவரிக்கிறது. படியுங்கள் என்று பரிந்துரைக்கிறேன்.

============================================================================ 

 - வேலுார்: வேலுார் அருகே 1,000 ஆண்டு பழமையான கோவில் சுவரை இடித்து, புதையல் தேடிய கும்பல் பற்றி புகார் அளிக்கப்பட்டு உள்ளது.

- 72 கோடி ரூபாய் சொத்தை நடிகர் சஞ்சய் தத்துக்கு எழுதி வைத்த 62 வயது ரசிகை.  உண்மை உணர்ந்து சஞ்சய்தத் தனக்கு அந்த சொத்து வேண்டாம் என்று சொல்லி இருக்கிறார்.

- தரைமட்டமானது சென்னை அடையாளங்களில் ஒன்றான உதயம் தியேட்டர் 

-  சுனிதா வில்லியம்ஸ் மற்றும் அமெரிக்காவை சேர்ந்த புட்ச் விலோர் ஆகிய இருவரும்அடுத்த ஆண்டு மார்ச் மாதத்தின் பிற்பாதியில் தான்  பூமிக்கு திரும்புவார்கள் என தெரிவிக்கப்பட்டுள்ளது. மார்ச் 12-ம் தேதி ஸ்பேஸ் எக்ஸ் டிராகன் பூமில் இருந்து புறப்படுகிறது. அந்த டிராகன் விண்கலன் மூலம் மார்ச் 19-ம் தேதி அன்று அங்கிருந்து அவர் புறப்படுவார் என எதிர்பார்க்கப்படுகிறது.

- போபால்: 'மனைவி வேறு ஆணுடன் உடலுறவு இல்லாமல் காதலில் இருப்பது, கள்ளக்காதல் என்று கூற முடியாது' என உத்தரவிட்டுள்ள மத்திய பிரதேச உயர் நீதிமன்றம், 'வேறொரு ஆணுடன் மனைவி கள்ளக்காதலில் ஈடுபட்டுள்ளார் என கூறி, பராமரிப்பு தொகையை தர, கணவர் மறுக்க முடியாது' என, உத்தரவிட்டு உள்ளது.

 - ஹூப்பள்ளி: ஹூப்பள்ளியில், 50 வயது நபர், 18 வயது இளம் பெண்ணுடன் ஓடினார். மகளை கண்டுபிடித்து தரும்படி போலீசில் பெற்றோர் புகார் அளித்துள்ளனர்.

- புதுடில்லி: இந்தியாவில் வேலைவாய்ப்புகளில் மனிதர்களுக்கு பதிலாக ஏ.ஐ., பூர்த்தி செய்து விடும் என்ற அச்ச உணர்வு இளைஞர்களிடையே எழுந்துள்ளதாக கருத்துக்கணிப்பில் தெரிய வந்துள்ளது.

- பீஜிங்: ஆற்றில் விழுந்தவரை காப்பாற்றிய பைலாங் என்ற குதிரைக்கு, சீன அரசு சார்பில் ஆற்றின் கரையில் சிலை அமைக்க முடிவு செய்யப்பட்டுள்ளது.

- புதுடில்லி: 'இவ்வளவு பெரிய கூட்டத்தை பார்த்தது இல்லை' என டில்லி ரயில் நிலையத்தில் ஏற்பட்ட விபத்து குறித்து நேரில் பார்த்தவர்கள் தெரிவித்தனர்.

- ஜெயலலிதாவின் ரூ.2,000 கோடி நகை, சொத்து ; விற்றால் தமிழக அரசுக்கு மிக பெரிய லாபம். பெங்களூரு; தமிழக முன்னாள் முதல்வர் ஜெயலலிதாவுக்கு சொந்தமான, 2,000 கோடி ரூபாய் மதிப்பிலான நகைகள் மற்றும் சொத்து ஆவணங்களை, தமிழக அரசிடம் கர்நாடகா அரசு ஒப்படைத்து உள்ளது.

- நீட்' தேர்வு விண்ணப்பப் பதிவின் போது அடிக்கடி, 'எரர்' ஏற்படுவதால், ஆசிரியர்களே தடுமாறும் நிலையில், அரசு பள்ளி மாணவ - மாணவியர் நிலை பரிதாபமாக உள்ளது.

- சென்னை: 'தமிழகத்தில், இன்ப்ளுயன்ஸா தொற்று அதிகரித்து வருவதால், குழந்தைகள், முதியோர், இணை நோயாளிகள், கர்ப்பிணியர் உள்ளிட்டோர் தடுப்பூசி போட்டுக் கொள்ள வேண்டும்' என, பொது சுகாதாரத்துறை அறிவுறுத்தி உள்ளது.

- ஜான்சி: மனைவியை அடித்துக் கொன்று தற்கொலை என நாடகமாடிய தந்தையை, 5 வயது மகள் ஓவியம் வரைந்து காட்டிக் கொடுத்தார். கணவரை கைது செய்த போலீசார், விசாரணை நடத்தி வருகின்றனர்.

- வாஷிங்டன்: அமெரிக்க அரசின் கருவூலத்தில் இருந்து, 409 லட்சம் கோடி ரூபாய் செலவிடப்பட்டுள்ளது. ஆனால் எதற்காக செலவானது என்ற கணக்கு காட்டப்படவில்லை என்பது தற்போது தெரியவந்துள்ளது.

- மும்பை : தவறான நோக்கத்துடன் தொடப்படுவதை சரியாக புரிந்து கொண்ட சிறுமிக்கு பாராட்டு தெரிவித்துள்ள மும்பை உயர் நீதிமன்றம், அச்சிறுமியிடம் தவறாக நடந்து கொண்ட ராணுவ அதிகாரிக்கு ஐந்து ஆண்டு சிறை தண்டனையை உறுதி செய்தது.

- கோல்கட்டா: கோல்கட்டாவில், 7 மாத குழந்தையை கடத்தி பாலியல் வன்கொடுமை செய்து கொலை செய்ய முயன்ற வழக்கில், குற்றவாளிக்கு துாக்கு தண்டனை விதித்து கோல்கட்டா போக்சோ நீதிமன்றம் உத்தரவிட்டது.

- கொடைக்கானல் : திண்டுக்கல் மாவட்டம் கொடைக்கானலில் தடை செய்யப்பட்ட இயந்திர பயன்பாடு அதிகமாக உள்ளது. பல இடங்களில் பாறைகள் தகர்க்கப்படுவதால் நிலச்சரிவு அபாயம் ஏற்பட்டுள்ளது.  உடந்தையாக செயல்படும் வருவாய்த்துறை அதிகாரிகள்.

-  புதுடில்லி, 'மஹா கும்பமேளா நடக்கும் திரிவேணி சங்கமத்தில் உள்ள நீர் மாசடைந்துள்ளதால், குளிப்பதற்கு உகந்ததாக இல்லை' என, மத்திய மாசு கட்டுப்பாட்டு வாரியம் தெரிவித்துள்ளது.

- ஆஸ்திரேலியாவில் கரை ஒதுங்கிய 150 திமிங்கலங்கள்; கருணை கொலை செய்ய முடிவு.  தாஸ்மானியா தீவின் கடற்கரையோர பகுதியில் கரை ஒதுங்கிய 150 திமிங்கலங்களில் 90 திமிங்கலங்களே இன்று உயிருடன் உள்ளன.

- ரூ.5 ஆயிரத்திற்காக... பாகிஸ்தான் இளம்பெண்ணிடம் இந்திய கடற்படை ரகசியங்களை கசிய விட்ட 2 பேர் கைது.  

-  இது குறித்து துபாய் விமான நிலையங்களின் முனைய சேவைக்கான அதிகாரி அகமது அப்துல் பகி கூறுகையில், "வாலிபர் பயம் காரணமாக கடந்த 5 ஆண்டுகளாக சொந்த ஊருக்கு திரும்பாமல் இருந்துள்ளார். அவருக்கு ஏரோபோபியா எனப்படும் பய நோய் இருப்பது தெரிய வந்தது. அவரிடம் இருக்கும் பயத்தை போக்கும் வகையில் தேவையான ஆலோசனை மற்றும வழிகாட்டுதல் வழங்கப்பட்டது. இதைத்தொடர்ந்து அவர் விமானத்தில் சொந்த ஊருக்கு செல்ல சம்மதம் தெரிவித்தார். பின்னர் விமான பயணத்துக்கான டிக்கெட் முன்பதிவு செய்யப்பட்டு சொந்த ஊருக்கு பத்திரமாக அனுப்பி வைக்கப்பட்டார்" என்று அவர் கூறினார்.

- பெங்களூருவில் தனது மாமியாரை கொலை செய்ய மருத்துவரிடம் பெண் ஒருவர் மாத்திரை கேட்டுள்ளார். மருத்துவர் போலீசில் புகார் அளிக்க, சம்மந்தப்பட்ட பெண் மீது போலீசார் வழக்கு பதிவு செய்துள்ளனர்.

============================================================================================

அந்தக் கண்கள்...

ஈரானில் வயதான ஒருவருக்கு திருமணம் செய்து வைக்கப்பட்ட சிறுமி மீட்கப்பட்டபோது....  

===========================================================================================

காதலிக்காகக் 

காத்திருக்கும் நேரம் 

கடன்காரன் வருகிறான் 

கடன்காரனைக் கண்டு 

ஓடுகையில் 

காதலி எதிர்ப்படுகிறாள்.

இப்போதெல்லாம் 

காதலியைக் கண்டால் 

கடன்காரனும் 

கடன்காரனைக் கண்டால் 

காதலியும் 

நினைவுக்கு வருகிறார்கள்!

=========================================================================================

ஆங்காங்கே பார்த்து, படித்து, ரசித்தது....

===============================================================================================

================================================================================================

=========================================================================================

==========================================================================================

===================================================================================================

இரட்டையரை மணந்த இரட்டையர்.

===========================================================================================3

வாங்க...  பொக்கிஷம் தேவையா என்ன!  பானு அக்கா என்னை மறுபடி பார்க்க விரும்பினாராமே...