வாழ்விலும் தாழ்விலும் விலகிடாத நேசம் வாலிபம் தென்றலாய் என்றும் இங்கு வீசும்

பயணம் இனிதானது.  பகல் பயணத்தைவிட இரவுப்பயணம் மிக இனிமையானது.  இரவின் அமைதியில் பயணம் செய்யும்போது இரவின் குளுமையும், மனதின் நினைவுகளும் கூடவே வருகின்றன.

பகலில் பரபரப்பாக பார்த்த அந்த சாலைகளை இரவின் அமைதியில் பார்த்திருக்கிறீர்களா?  அதை ரசிக்க ஒரு ஜென்மம் வேண்டும். .  பயணம் முடிகிறதே...  இரவு விடுகிறதே என்கிற ஏக்கம் மனதில் படரும்.

இதில் இரண்டு வகை இருக்கிறது.  சந்தோஷமான பயணம்.  துக்கத்துக்கான பயணம்..  

சந்தோஷத்துக்காக பயணத்திலேயே - இன்பமான பயணத்திலேயே ஒரு சுகமான துக்கம், ஒரு வகை உணர்வுகளின் கனம் மனதை வருட பயணிப்பது ஒரு ரகம்.

ஏதோ காரணத்தால் தவறாகப் போன உறவை மீட்டெடுக்க காதலர்கள் இருவருமே முயன்றாலும், ஏதோ ஒரு மௌன மாயத்திரை அவர்களைத் தடுக்கிறது.  தாற்காலிகம்தான்.  அது நீங்கி,  சேரும் அந்த சுகமான கணம் எப்போது வரும்?  

கூட வரும் நண்பர்களுக்கோ அது ஜாலியான பயணம்.  இவர்களின் உனர்வுகளின் கனம் புரியாமல் குஷியாக பாடிக் கொண்டு வருகிறான் நண்பன்.

​ஹிந்திப் பாடலின் தமிழ்ப் பொருளை ஓரளவுக்கு சுமாராக தமிழில் தர முயன்றிருக்கிறேன்.  அவசரமாக உணர்வுகளை மட்டும் கடத்துகிறேன்!  கவிதையாக மாற்ற நேரமில்லை.

1988 ம் வருடம் வெளியான 'தேஜாப்' படத்தின் பாடல்.  அணில் கபூர், மாதுரி நடித்த படம்.  இசை லக்ஷ்மிகாந்த் பியாரிலால் இரட்டையர்கள்..

காட்சியைப் பார்த்தீர்கள் என்றால் அந்த இரவு நேர சுகமான பயணத்தில் நீங்களும் கவரப்பட்டு விடுவீர்கள்.    அவர்களுடனேயே பயனபபிட ஆரம்பித்து விடுவீர்கள்.  அந்தக் காதலர்களின் ஊடலில் நீங்களும் கலந்து விடுவீர்கள்.  இரவு நேரத்துக்கு ஏற்ற லேசான துள்ளலுடன் கூடிய இனிமையான பாடல்.  ஷப்பிர் குமார், நிதின் முகேஷ், அல்கா யாக்னிக் குரலில்.

அல்ட்ரா வழங்கும் தரமான காணொளிகளை பகிர முடியவில்லை.  எனவே சுமாரான காணொளியினைப் பகிர்கிறேன்.

(​நாம் செல்லும்) இந்த இடமே தூங்குகிறது ​ வானம் தூங்குகிறது 

வீடுகள் யாவும் தூங்குகின்றன 

சாலையும் தூங்குகிறது 

இரவானதும்​ வீடிருப்பவர்கள் வீட்டுக்கு விரைகிறார்கள், தூங்குகிறார்கள் 

இரவு நேரத்தில் இலக்கில்லாமல் சுற்றும் நாம் 

சாலைகளில் தொலைந்து போகிறோம் 

இந்தத்தெருவா அந்தத் தெருவா 

இந்த ஊரா அந்த ஊரா 

எல்லா இடமும் தூங்கும்போது 

எங்குதான் செல்வது 

ஆம்.  எல்லா வீடுகளும் ஏன் சாலையுமே தூங்குகிறது 

நான் சொல்வதைக் கேளேன் - இல்லை  

நீயாவது​ பேசு 

இவளவு அருகிலிருக்கிறோம் 

மௌனம் சாதிக்காதே 

நாம்  அருகிலும் இருந்தாலும் (மனதளவில்) தூரத்திலும் இருக்கிறோம் 

தளையில்லாமல் இருந்தாலும் எதுவும் செய்ய முடியாமலும் இருக்கிறோம் 

காதல் ஏன் நம்மிடையே மறந்து போனது சமூகம்  

நம்மை பிரிப்பதில் எப்படி வென்றது 

என் வாழ்வின் ஒவ்வொரு கணமும் சோகத்தால் சூழப்பட்டுள்ளது 

வாழ்க்கை கண்ணெட்டும் தூரம்வரை இருள்தான் தெரிகிறது  

ஆம்.  எல்லா வீடுகளும் ஏன் சாலையுமே தூங்குகிறது 

இந்த இடம் தூங்குகிறது ​ வானம் தூங்குகிறது 

வீடுகள் யாவும் தூங்குகின்றன 

சாலையும் தூங்குகிறது

==========================================================================================

1985 ல் மோகன் இளவரசி, ரேவதி நடிப்பில் R. சுந்தரராஜன் இயக்கத்தில் வெளிவந்த படம் குங்குமச்சிமிழ்.  அற்புதமான பாடல் ஒன்றை இளையராஜா மோகனராகத்தில் இந்தப் படத்தில் வழங்கியுள்ளார்.  பாடலை எழுதி இருப்பவர் வாலி.

இதுவும் இரவு பாடல்தான்.  இங்கு இரவு தூங்குகிறது, நிலவு தூங்குகிறது..

நிலவு தூங்கும் நேரம் நினைவு தூங்கிடாது

இரவு தூங்கினாலும் உறவு தூங்கிடாது

இது ஒரு தொடர்கதை தினம் தினம் வளர்பிறை

நிலவு தூங்கும் நேரம்

நான்கு கண்ணில் இன்று ஒரு காட்சியானதே

வானம் காற்று பூமி இவை சாட்சியானதே

நானுனைப் பார்த்தது பூர்வ ஜென்ம பந்தம்

நீண்ட நாள் நினைவிலே வாழுமிந்த சொந்தம்

நான் இனி நீ  நீ இனி நான்

வாழ்வோம் வா கண்ணே   -  நிலவு தூங்கும் நேரம்

கீதை போலக் காதல் மிகப் புனிதமானது

கோதை நெஞ்சில் ஆடும் இந்தச் சிலுவை போன்றது

வாழ்விலும் தாழ்விலும் விலகிடாத நேசம்

வாலிபம் தென்றலாய் என்றும் இங்கு வீசும்

ஏன் மயக்கம்? ஏன் தயக்கம்? கண்ணா வா இங்கே

நிலவு தூங்கும் நேரம் நினைவு தூங்கிடாது

இரவு தூங்கினாலும் உறவு தூங்கிடாது

இது ஒரு தொடர்கதை தினம் தினம் வளர்பிறை

நிலவு தூங்கும் நேரம் நினைவு தூங்கிடாது