"திங்க" க்கிழமை : கறிவேப்பிலை சாதம் - துரை செல்வராஜூ ரெஸிப்பி

கறிவேப்பிலை சாதம் 

ஃஃஃ ஃஃஃ ஃஃஃ

நமது மரபுகளின்படி வடித்தெடுத்த சோற்றை மீண்டும் அக்னியில் இட்டு பக்குவம் செய்வது (பொரிப்பதோ வறுப்பதோ) கூடாது..

எனவே Fried rice  என்பது எல்லாம்  ' உடான்ஸ் ', 

' உல்ட்டா டான்ஸ் ' மரபுக்கு ஆகாதவை என்று உணர்ந்து கொள்க..

கறிவேப்பிலை பொடி அரைப்பதற்கு தேவையானவை :-

கறிவேப்பிலை 20 இணுக்கு

உளுத்தம் பருப்பு 100 கி

மிளகு ஒரு தேக்

கல் உப்பு சிறிதளவு

கறிவேப்பிலையைக் கழுவி நல்ல வெயிலில் சிறிது நேரம் காய வைத்து பின் நிழலில்  உலர்த்திக் கொள்ளவும்... 

இரும்பு வாணலி ஒன்றை மிதமான சூட்டில் வைத்து அதில் கறிவேப்பிலை

உளுத்தம் பருப்பு மிளகு, கல் உப்பு இவற்றை தனித்தனியாக வறுத்துக் கொள்ளவும்.. 

சூடு ஆறியதும் அனைத்தையும் மிக்ஸியில் இட்டு பொடியாக அரைத்துக் கொள்ளவும்.. 

இது கறிவேப்பிலைப் பொடி தயாரிப்பில் ஒரு முறை... 

துவரம் பருப்பு, பச்சைப்பயறு இவற்றைக் கொண்டும் இதே செய்முறையில் பொடி அரைத்துக் கொள்ளலாம்..

ஐந்து பேருக்கு என்ற அளவில்

பொன்னி அரிசியில் பொலபொல என்று வடித்த சாதத்தில் கடுகு உளுத்தம் பருப்பு கறிவேப்பிலை இவற்றை நெய்யில் தாளித்துப் போடவும்.. 

இத்துடன் நாம் அரைத்துள்ள 

கறிவேப்பிலைப் பொடியை தேவைக்கு ஏற்ப சேர்த்து மேலும் சிறிது நெய் விட்டு

 நன்றாகக் கிளறிக் கொண்டால் ஆரோக்கியமான கறிவேப்பிலை சாதம்...

நிலக்கடலை அல்லது

முந்திரிப் பருப்பு உலர் திராட்சையை வறுத்துப் போட்டுக் கொள்வது கூடுதல் சிறப்பு..

நம்முடைய நலம்

நம்முடைய கையில்..