இறைவன் சபையின் கலைஞர்கள்

 இன்று நமதுள்ளமே,

மன்னவனே மன்னவனே, ஆடியில பெருக்கெடுத்து, ஏரிக்கரையில் மேலே, தென்றலில் ஆடும், சந்தக் கவிகள் பாடிடும், ஆசைக்கிளியே அரைக்கிலோ புளியே என்று இந்தப் பாடல்கள் எல்லாம் ஆரபியில் இருந்தாலும் சட்டென மனதைக்கும் கவ்வும் பாடல் 'இன்று நமதுள்ளமே' பாடல்தான் முதலிடம் பெறும்.  அதிலும் 'மகிழ்ச்சிகள் துள்ளுமே' என்ற டியூனில் வரும் வரிகள்.

ஒரே ராகத்தில் பல பாடல்கள் வந்தாலும் அதில் ஏதோ ஒரு பாடல் மிகச் சரியாக அமைந்து எப்படியோ ஒரு விதத்தில் மனதில் பெரிய அளவில் இடம்பெற்று விடும்.  ஒவ்வொருவரின் ரசனையும் வேறுபடலாம்.  நான் என் ரசனையில் சொல்கிறேன்.

கல்யாணி ராகத்தை எடுத்துக் கொள்வோம்.

சிந்தனை செய் மனமே, என்னருமை காதலிக்கு , காற்றில் வரும் கீதமே, வந்தாள் மகாலட்சுமியே, ஜனனி ஜனனி, தேவன் தந்த வீணை, மலையோரம் மயிலே, அதிசய நடனமிடும் அபிநய, ராதா அழைக்கிறாள், ஆராரோ ஆராரோ, சிறு கூட்டுல... 

இவை எல்லாமே கல்யாணி ராகத்தில் அமைந்த சில பாடல்கள்.  கொடுத்துள்ள லிஸ்ட்டில் முதலிரண்டு பாடல்கள் தவிர மற்றவை அனைத்தும் இளையராஜா.

​இன்று கல்யாணி ராகத் தழுவலில் இருக்கும் இரண்டு பாடல்களை பகிர்கிறேன்.  இந்த கல்யாணி பேஸில் என்னை மிகவும் கவர்ந்த பாடல் 'தேவன் தந்த வீணை.'  SPB வெர்ஷன்.

ஏன் தழுவலில் என்று சொல்கிறேன் என்றால் சின்மயியின் அம்மா எழுதிய இளையராஜா பாடல்கள் அலசலை படித்தேன்.  இந்தப் பாடல் இந்த ராக பேஸ் என்று சொல்லலாம் என்றாலும் அப்படியே அதுதான் என்றும் நிறைய பாடல்களில் சொல்லி விட முடியாது என்கிறார்.  ஒவ்வொரு பாடல் அலசலுக்கும் அவர் அபப்டி சொல்கிறார் என்றாலும் அவர் சொன்னது ரசிகப்ரியா ராகத்தில் அமைந்த ஒரு பாடலைச் சொல்லி, பிரித்து மேய்ந்து,  அது வேறொரு ராகம் என்றும் சொல்லலாம் என்றார்.  வர்ஷரூபிணி என்று நினைவு.

இளையராஜாவின் பாடல்களில் பாடல்களுக்கிடையேயான இன்டர்லூட் பற்றி சொல்ல வேண்டும்.  இல்லை இல்லை கேட்க வேண்டும்.  ஒவ்வொரு வாத்யத்தையும் அவர் எப்படி உபயோகிக்கிறார் என்று கேட்க வேண்டும்.

கன்னடப்பாடலின் இரண்டு சரணங்களில் முதல் சரணத்தை தமிழின் முதல் பாடலில் போட்டிருக்கிறார்.  தமிழ்ப் பாடலில் இரண்டு உண்டு.  ஒன்று SPB ஜானகியம்மா.  இன்னொன்று ஜெயச்சந்திரன் ஜானகியம்மா.  கன்னடப்பாடலின் இரண்டாவது சரண வடிவத்தை தமிழ்ப் பாடலின் இரண்டாவது சரண வடிவத்தில் கொண்டு வருகிறார்.

SPB யே ஒரு தரம் சிலாகித்துச் சொல்லி இருப்பது..  'என் குரலுக்கு ஏதோ தானே பாடுவது போல அழகாய் அபிநயம் செய்வது மோகன்தான்....'

இந்தப் பாடலிலும் அது தெரியும்.

முதல் பாடலில் கிடாரின் ஒற்றை ஸ்ட்ரிங் ஒலியைத் தொடர்ந்து வரும் SPB குரலைக் கேளுங்கள்.  பல்லவி முடிந்ததும் ஒரு 'பாஸ்' விட்டு ஆரம்பிக்கும் இசை, அப்புறம் இரண்டாவது சரணம் முடிந்ததும் மறுபடியும் SPB யின் அருமையான இழையும் குரலில் ஆலாபனை.  தொடர்ந்து இசை. அலைபோல மேலே எழுந்து அருவி போல கீழ்நோக்கி பொழியும் இசை. ஒரு கண இடைவெளி. அப்புறம் SPB பாடலை தன் கைக்குள், குரலுக்குள் கொண்டு வருகிறார்.'எங்கிருந்தேன், இங்கு வந்தேன்.. இசையினிலே என்னை மறந்தேன்..'  

நாமும்தான்! 

'இறைவன் சபையில் கலைஞன் நான்..'  

ஆம்..  இவர்கள் எல்லோருமே இறைவன் சபையின் கலைஞர்கள்தான்...  தேடும் கைகள் தேடினால் அதில் ராகமின்றி போகுமோ....

ஆஆஆ…..ஆஆஆ….ஆ….ஆ….ஆ…..ஆ….ஆ….ஆ….
தேவன் தந்த வீணை
அதில் தேவி செய்த கானம்
தேவன் தந்த வீணை
அதில் தேவி செய்த கானம்
தேடும் கைகள் தேடினால்
அதில் ராகமின்றி போகுமோ
தேவன் தந்த வீணை
அதில் தேவி செய்த கானம்

தேவன் தந்த வீணை
வீணை வீணை
அதில் தேவி செய்த கானம்
கானம் கானம்

தேவன் தந்த வீணை
அதில் தேவி செய்த கானம்
தேவன் தந்த வீணை
அதில் தேவி செய்த கானம்
தேடும் கைகள் தேடினால்
அதில் ராகமின்றி போகுமோ
தேவன் தந்த வீணை
அதில் தேவி செய்த கானம்

மேகம் பாடும் பாடல் கேட்டேன்
நானும் பாடிப் பார்க்கிறேன்
மேகம் பாடும் பாடல் கேட்டேன்
நானும் பாடிப் பார்க்கிறேன்
மோகமோ…….ஓஓஓ…..
மோகமோ சோகமோ
இனியும் நெஞ்சம் தூங்குமோ
நாளும் நாளும் தேடுவேன்
தேவன் தந்த வீணை
அதில் தேவி செய்த கானம்

ஹ ஹ ஹ ஹ ஹ ஹ ஹ ஹ ஹ

வானம் எந்தன் மாளிகை
வையம் எந்தன் மேடையே
வானம் எந்தன் மாளிகை
வையம் எந்தன் மேடையே
வண்ணங்கள் நான் எண்ணும் எண்ணங்கள்
எங்கிருந்தோ இங்கு வந்தேன்
இசையினிலே எனை மறந்தேன்
இறைவன் சபையில் கலைஞன் நான்

 தேவன் தந்த வீணை
அதில் தேவி செய்த கானம்
தேவன் தந்த வீணை
அதில் தேவி செய்த கானம்
தேடும் கைகள் தேடினால்
அதில் ராகமின்றி போகுமோ
தேவன் தந்த வீணை
அதில் தேவி செய்த கானம்

தமிழின் இரண்டாவது பாடலையும் இணைத்திருக்கிறேன்.  SPB யின் ஆரம்ப ஆலாபனையை இதில் ஜானகி அம்மா எடுத்துக் கொள்கிறார்.  முதல் பாடல் பரவசத்தின் உச்சம் என்றால் இந்தப் பாடல் அமைதியோ அமைதி...  சாந்தம்!  எனக்கு ஜெயச்சந்திரனையும் ரொம்பப் பிடிக்கும்.  அவர் குரலின் இழைவும் இந்த பாடலின் ஸ்பெஷல்தான்.

கன்னடப்படம். கீதா. 1981.  இளையராஜா இசையாலேயே ஸூப்பர் ஹிட் ஆன படம்.  ஷங்கர் நாக், அக்ஷதா ராவ் நடித்த படம்.  படத்தின் பாடல் காட்சிகளை பார்க்கும்போது கதாநாயகியை பல இடங்களில் அழகில்லாமல் காட்டி இருப்பது போல எனக்குத் தோன்றியது.

தமிழ்ப் படம்  :  உன்னை நான் சந்தித்தேன்.  1984.  பாடல் கண்ணதாசன்.  

பாடல்கள் நன்றாய் இருக்கும் பட்சத்தில் நான் உடனே கேசெட் வாங்கி விடுவேன்.  மதுரை சுந்தரம் தியேட்டரில் நான் இந்தப் படம் பார்த்ததும் டவுன் ஹால் ரோட்டுக்கு ஓடி, மாதவராவிடம் வாங்கிய கேஸெட்டில் ஒருபக்கம் 'உன்னை நான் சந்தித்தேன்'.  மறுபக்கம் 'வைதேகி காத்திருந்தாள்'.  கேசெட் தேயத்தேய பாட்டு கேட்டேன் அப்போது!