ஏணிமலை 5/5

 

முந்தைய பகுதிகள் சுட்டி : - பகுதி 1 - -  பகுதி 2 - - - பகுதி 3 - - - -பகுதி 4 

- - - - -

கதை எழுதி முடித்ததும், முனியின் உதவியாளருக்கு அமா ' கதை எழுதிமுடித்துவிட்டேன் ' என்று செய்தி அனுப்பினார். 

உதவியாளர் அனுப்பிய டாக்ஸியில் ஏறி, கோவை வந்து, கோவையிலிருந்து சென்னைக்கு வந்து சேர்ந்தார். 

= = = =

மறுநாளே, அவர் எழுதியிருந்த கதையை பிரிண்ட் எடுத்துக்கொண்டு, ஒரு கோப்பில் வைத்துக்கொண்டு உதவியாளர் சொன்னபடி, காலை பத்து மணிக்கு டைரக்டர் முனியின் அலுவலகத்திற்கு புறப்பட்டார். ஏதோ பேசுவதற்கு வந்த அவருடைய அம்மாவிடம், " அம்மா - எல்லாம் அப்புறம் பேசுவோம். இப்போ நான் அவசரமாக டைரக்டர் முனியைப் பார்த்து அவரிடம் நான் எழுதிய கதையைக் கொடுக்கவேண்டும்" என்று சொல்லி புறப்பட்டுவிட்டார்.  

அலுவலகத்தில், முனியும் அவருடன் பாபு என்ற ஒருவரும் இருந்தனர். 

அமா கொடுத்த கதையை வாங்கி, மேலோட்டமாக வாசிக்க ஆரம்பித்த முனி, சில நிமிடங்களில் அதை ஊன்றிப் படிக்க ஆரம்பித்தார். அவர் முகத்தில் ஆவல், சுவாரஸ்யம் எல்லாம் தென்பட்டன. ஒரு முறை படித்தவர், மீண்டும் மெதுவாக ஆரம்பம் முதல் கடைசி வரை அந்தக் கதையைப் படித்தார். 

பிறகு அவர் அமாவிடம், " சபாஷ் - சூப்பர் திகில் கதை. நான் முற்றிலும் எதிர்பார்க்காத சப்ஜெக்ட். எனக்குப் பிடித்திருக்கிறது. பாபு - சார் பெயருக்கு ஐம்பதாயிரம் ரூபாய் செக் தயார் செய். ஒப்பந்த பேப்பர் தயார் செய்து அவரிடம் கையெழுத்து வாங்கிக்கொள்" என்றார். 

( ** இதுல என்ன த்ரில் இருக்கு? ஏணிமலை கதையை படம் எடுத்தா படம் flop - ' என்றெல்லாம் கருத்துரை எழுத நினைப்பவர்கள் கவனத்திற்கு : 'ஏணிமலை' கதை போஜன், அமாவுக்கு சொன்ன கதை. ஆனால், அமா எழுதிய - 'அகிலா ? திகிலா ?' என்னும் கதை அதுவல்ல. முனி கேட்டதற்கிணங்கி அவர் எழுதியது இதுவரை எங்கும் வெளிவராத புதிய கதை. கையெழுத்திட்ட ஒப்பந்தத்தின்படி, படம் வெளிவந்து, ஹிட் ஆகும் வரை, அவர் அந்தக் கதை பற்றி எங்கும் எழுதக் கூடாது; பேசக் கூடாது. அடுத்த வருடம் முனியின் படம் வெளியாகும். " மூலக்கதை : அமானுஷ்யன் " என்று டைட்டில் விவரம் பார்த்தால், கைதட்டி, விசில் அடித்து படம் சூப்பர் ஹிட் ஆக உதவி செய்யுங்கள்! படம் அதே பெயரில் வெளியாகுமா அல்லது மாற்றப்படுமா என்பது தெரியாது. ) 

முனி அமாவிடம் கூறினார் : " இந்த ஐம்பதாயிரம் முன் பணம். படம் எடுத்து முடித்தவுடன் உங்களுக்கு இரண்டு  லட்ச ரூபாய் கொடுக்கிறோம். படம் வெளிவந்து, யாரும் கதைக்குச் சொந்தம் கொண்டாடி கேஸ் போடாமல் இருந்து, படம் ஹிட் ஆனால் உங்களுக்கு மேலும் ஐந்து லட்ச ரூபாய். சரிதானே? "

அமானுஷ்யனுக்கு பரம சந்தோஷம். முனியிடம், " மிகவும் நன்றி சார். உங்கள் உதவியாளர் மோகினியைக் கூப்பிடுங்கள். அவர்களுக்கும் நன்றி சொல்லவேண்டும்" என்றார். 

" என் உதவியாளர் மோகினியா? அப்படி யாரும் கிடையாதே! என்னுடைய இரண்டு உதவியாளர்களும் ஆண்கள் !! டேய் பாபு - என்னடா இது?"

பாபு : " சார் நீங்க இவருக்குக் கொடுத்த நம்பர் நம்ப மோகன் நம்பர். அவன்தான் இப்படி போக்கிரித்தனம் ஏதாவது அடிக்கடி செய்வான். மோகினி என்ற பெயரில் இவருக்கு செய்திகள் அனுப்பியிருப்பான் " 

முனி : " மோகியைக் கூப்பிடு "

பாபு சென்று மோகனை அழைத்து வந்தான். 

முனி : " டேய் மோகீ - என்னடா இதெல்லாம்? "

மோகன்: " சும்மாதான் பாஸ். அமானுஷ்யன் என்பவர் அமானுஷ்யக் கதை எழுதப்போகிறார் என்று நீங்க சொன்னதும், அவருக்கு அவர் சொன்ன ஹோட்டலில் மோகினி என்ற பெயரில் ரூம் புக் செய்தேன். திகில் கதை எழுத அவருக்கு ஒரு கிக் ஸ்டார்ட் கொடுத்தேன் பாஸ்."

எல்லோரும் சிரித்தனர். 

= = = = 

மோகினி விஷயத்தில் ஏமாற்றம் ஒருபக்கம் இருந்தாலும், பணம் கிடைத்த சந்தோஷத்துடன் வீடு திரும்பினார், எழுத்தாளர் அமா. 

அவருடைய அம்மா, " இப்போ நேரம் இருக்குதாடா? நான் சொல்ல வந்ததை சொல்லலாமா ? "

அமா : " சொல்லும்மா. என்ன விஷயம்? "

அம்மா : " உன் கல்யாணத்திற்கு பெண் வேண்டும் என்று விளம்பரம் கொடுத்திருந்தோமே. நீ சொல்லாமல் கொள்ளாமல் திடுதிப்பென்று கிளம்பி, கதை எழுதப் போய்விட்டாய். நீ கிளம்பிப் போன மறுநாளே  நம்ம வீட்டு விலாசத்திற்கு ஒரு பெண்ணின் ஜாதகம், போட்டோவுடன் வந்தது. ஜாதகத்தை உன் அப்பா நம்ப குடும்ப ஜோஸ்யரிடம் காட்டி, உன் ஜாதகத்தையும் கொடுத்து, பொருத்தம் பார்க்கச் சொன்னார். பிரமாதமாக பொருந்துகிறது என்று ஜோஸ்யர் சொல்லிவிட்டார். பெண்ணும் நல்லா அழகா இருக்கா. நீ பார்த்து பிடிச்சுருக்கா என்று சொல்லு. அவர்களோடு மேற்கொண்டு பேசலாம் " 

அமா ஆவலோடு அந்தக் கவரை வாங்கி, அதில் இருந்த பெண்ணின் புகைப் படத்தைப் பார்த்தவர் அதிர்ச்சியடைந்தார். 

ஹோட்டல் வெண்ணிலாவில் அவர் கனவில் தோன்றி தன்னைக் கல்யாணம் செய்துகொள்ளும்படி கேட்ட அதே பெண்! 

அமா: " பெண்ணின் பெயர் என்ன அம்மா ? " 

அம்மா : " மோகினி "

(முற்றும்) 

=======  =========   ========= 

எங்கள் 

பின் குறிப்பு 1 :

ஆமாம் - கதை முடிந்துவிட்டதே! எழுதியவர்(கள்) யார்? 

எழுதியவர்(கள்),  இந்தப் பதிவின், 'கருத்துரை(கள்)' பகுதியில், கடைசி கருத்துரையாக தங்கள் கருத்துரையை இடுகிறேன் என்று உறுதியளித்துள்ளார்கள். பொறுத்திருந்து பார்ப்போம். 

 

===== ====== ======  =======   

பின் குறிப்பு 2 : 

'கதை முழுமை பெற்றதைப் போலத் தெரியவில்லையே,  இந்தக் கதையின் தொடர்ச்சி / அல்லது இறுதிப் பகுதியை தாங்கள் எழுதலாமா என்று கேட்கும் வாசகர்களுக்கு : " தாராளமாக எழுதலாம். எழுதி எங்களுக்கு அனுப்பவும் " 

= = = = = =