சிறுகதை - ரயிலடி மிக்ஸர் -- துரை செல்வராஜூ

 ரயிலடி ஸ்வீட் ஸ்டால்

துரை செல்வராஜூ

*** *** *** *** *** *** ***

.

மிச்சர் கடை..

ரயிலடி மிக்ஸர் கடை..

ஐம்பது ஆண்டுகளுக்கு முன்பு  இருந்த பாரம்பரியக் கடை....

இப்போது அந்தக் கடை இல்லை..  கால வெள்ளத்திற்குள் அழுந்திப் போயிற்று..

அந்த பட்சணக் கடையில் இருந்து பரவும் நறுமணத்தைக் கடப்பது  என்பது - ரயிலில் வந்து இறங்குவோர்க்கும் ரயிலடி ரோட்டில் வருவோர்க்கும் போவோர்க்கும் அவ்வளவு எளிதல்ல..

கடை என்றதும் பூட்டு திறப்பு  என்று நினைப்பு வருவது இயற்கை.. ஆனால் -

காலையில் ஆறு மணிக்கு அடுப்பு பற்றவைத்து பட்சணங்களைப்  பார்த்துப் பார்த்து பக்குவம் செய்து எடுத்து பித்தளைத் தாம்பாளங்களில் அழகாக அடுக்கி வைத்துக் கொண்டு கவனமாக வரும் மிட்டாய் வண்டி.. 

அந்த காலத்தில் இந்த மாதிரி வண்டிகள்  மிகவும் பிரசித்தம்... சுற்றிலும் - நீலம் பச்சை ஆரஞ்சு நிறக் கண்ணாடிகள் பதிக்கப்பட்டு பக்கவாட்டில் திறப்புக் கதவுகளுடன் அலங்காரமாக இருக்கும்..

டிங்டிங்.. டிடிங்.. - என்ற வெங்கல மணி ஓசை கேட்டதுமே காதுகளில் தேனூறும்.. 

' ஆகா.. ராவ் மிச்சர் ஸ்டால் வந்தாச்சுடா!.. ' - என்று எல்லாரிடமும் உற்சாகம் தொற்றிக் கொள்ளும்..

ராவ் மிச்சர் ஸ்டால் எனும் வண்டியை கால்கள் தேயத் தேய - தெருத் தெருவாக தள்ளிக் கொண்டு  நடந்து விளக்கு வைக்கும் நேரத்தில் ரயிலடியில் போய் நிறுத்தும் அவரது பெயர் மாரியப்பன்.. 

அப்புறம் எதற்கு ராவ் மிச்சர் ஸ்டால்..  - என்று?.. குருநாதர்  விட்டல் ராவ் நினைவாக அந்தப் பெயர்..

மிச்சர் ஸ்டால் என்றாலும்  காசி அல்வா, சந்திர கலா, அசோகா, பன்னீர் ஜாங்கிரி, பூந்தி, பால்கோவா,  மைசூர்பா, அதிரசம், கோயில்பட்டி சீனி முறுக்கு, சீனி சேவு -  என்று  இனிப்பு வகைகள் இருக்கும்.. 

கார பட்சணங்களில் நெய்யில் மிளகுப் பொடியுடன் வறுத்த  முந்திரி, ஓமப்பொடி, காரச் சேவு, மணிக் காராபூந்தி,  அரிசி முறுக்கு, வெங்காய பக்கோடா, ஓலை பக்கோடா, மசாலா பருப்பு, மிக்ஸர் - என்று சகலமும் இருக்கும்..

இதில் கடைசியாய் இருக்கும் மிக்ஸர் தான் கார பட்சண விற்பனையில் முன்னே நிற்பது..

பத்து காசு தான் ஒரு பொட்டலம்... ஒரு தூக்கு - அதாவது கிலோ - என்றால் முப்பது ரூபாய் தான்..

ஒரு கைப்பிடி அள்ளி வாயில் போட்டுக் கொண்டால் கடலை எண்ணெய் வாசத்துடன்  ஓமப்பொடி எல்லாமும் மதுரமாய் கரையும்.. மிச்சமாய் இருக்கும் பூந்தி முத்துகளும் கரைந்த பின் அவலும் பொட்டுக் கடலையும் நெய் முந்திரியும் வாயினுள் ஊடாடும் போது - அடடா!..

கடைசியாக பொட்டலத்துக்குள் இருக்கும் முறுகிய கறிவேப்பிலைகள் - அது தனி ஆவர்த்தனம்..

ராத்திரி சாப்பாட்டு நேரத்துக்கு என்று மிச்சர், பக்கோடா வாங்குகின்ற எவரும் ராத்திரி சாப்பாட்டுடன் மிச்சர் பக்கோடாவை சாப்பிட்டதாக சரித்திரமே கிடையாது..

சமையலுக்கு என்று கடலை எண்ணெய் மட்டுமே இருந்த அந்த காலத்தில் சன்னமாக ஓமப்பொடியை முதலில் பொரித்து விட்டு அவல், பொட்டுக் கடலை என்று ஒவ்வொன்றாகப் பொரித்தெடுத்துப் போடுவார்.. மணிமகுடம் மாதிரி முந்திரி கறிவேப்பிலையை நெய்யில்  போட்டு எடுக்கும்போது  தெரு முழுதும் மணக்கும்..

ஒரு நாளைக்கு பொட்டுக் கடலை, பூந்தி என்று மிக்சரில் இருந்தால் மறு நாளைக்கு பயறு, உலர் திராட்சை என்று இருக்கும்.. 

சேவு பகோடா வகையறாக்கள் சுருள் பொட்டலத்தில் இருக்க -

இனிப்பு வகைகளை வாழையிலையிலும் மந்தார இலையிலும் வைத்து - மாரியப்பன் மடித்துக் கொடுக்கும் அழகே அழகு.. 

எல்லாரும் மண்ணெண்ணெய் காடா விளக்கு எரித்த போது இவர் மட்டும் மெட்ராஸூக்குப் போய் ஜாம் பஜாரில் அலைந்து திரிந்து பெட்ரோமாக்ஸ் விளக்கு வாங்கிக் கொண்டு வந்து வண்டிக்குள் ஏற்றி வைத்திருந்தார்.. 

ராத்திரி நேரத்துச் சாலையில் இந்தப் பக்கம் அம்பது அடி அந்தப் பக்கம் அம்பது அடி ஜெகஜ்ஜோதியா இருக்கும்...

ராவ் மிச்சர் வண்டியால் -  சாயங்கால வடை வியாவாரம் விழுந்து விட்டதாக ரயிலடி டீக்கடைகளிடம் தனிப்பட்ட புகைச்சல்..

சம்பவமான அன்றைய சாயங்காலப் பொழுது.. எட்டாம் நம்பர் டவுன் பஸ் ரவுண்டாணாவைச் சுற்றிக் கொண்டு ரயிலடி வாசலில் நின்றது.. அதில் இருந்து அடித்துப் பிடித்துக் கொண்டு இறங்கியவர்கள் திருச்சிராப்பள்ளிக்குப் போகும் வண்டியைப் பிடிக்க ஸ்டேசனுக்குள் ஓடினார்கள்.. அந்த பாசஞ்சர் நாகூரில் இருந்து வருவது.. இன்றைக்கு இன்னும் வந்து சேரவில்லை.. அப்படியே வந்து விட்டாலும் மூன்றாவது பிளாட்பாரத்தில் ' சிவனே ' - என்று நிற்கும்.. திருச்சிராப் பள்ளியில் இருந்து மாயவரத்துக்குப் போகின்ற வண்டி ஒன்னாவது பிளாட்பாரத்துக்கு வந்து நின்று லைன் கிளியர் ஆனதுக்குப் பிறகு தான் - தஸ் புஸ் - என்று பெரிய சத்தத்துடன் கிளம்பும்..

திருச்சிராப்பள்ளி வண்டியும் இன்னும் வந்து சேரவில்லை.. 

திருச்சிராப்பள்ளி வண்டி வந்து விட்டால் அதிலிருந்து இறங்கும் உள்ளூர்க் காரர்களால் ஓரளவுக்கு ஏவாரம் ஓடும்..  அப்புறம் எட்டரைக்கு இன்னோரு பாசஞ்சர் வரும்.. அதுக்கு அப்புறம் சினிமா கொட்டாய் ல முதல் ஆட்டம் முடிஞ்சு வர்ற கூட்டம் தான்.. அத்தோடு மிச்சர் வண்டியும் நகர்ந்துடும்..

' ஊ ஊ... ஊவ்!... ' எஞ்சின் சத்தத்தினால் ரயிலடி வாசல் பரபரப்பானது.. 

திருச்சிராப்பள்ளி வண்டி வந்து விட்டது.. அந்தப் பக்கம் நாகூர் வண்டியும் ஸ்டேஷனுக்கு உள்ளே வந்து விட்டது.. ரெண்டு பாசஞ்சரும் பதினைஞ்சு நிமிசம் லேட்.. 

வண்டி மாடுகள் இன்னும் உறக்கம் கலையாது இருக்க வண்டிக்காரர்களிடம் இருந்து ஹை.. ஹை.. - என்ற சத்தம்..

ஜட்கா வண்டிகளில் பூட்டப்படிருந்த குதிரைகள் வடக்கு ராஜ வீதி பக்கமாகப் பாய்வதற்குத் துடியாய் இருந்தன..  

திபு திபு  - என ஜனங்கள்..  அக்கம் பக்கம் பார்த்தபடி அவரவர் பிரச்னைகளை  பேசிக் கொண்டு ஸ்டேசனில் இருந்து வந்தார்கள்.. 

ஆனாலும் அவர்களிடம் ஏதோ ஒரு பரபரப்பு.. என்ன என்று புரியவில்லை..

இதற்கிடையேயும் -

" வெண்ணாற்றங்

கரை மாமணிக் கோயிலுக்குப் போகணும்.. எவ்வளவு கேட்கிறாய்?.. "

"  மூனு மைல்  தூரம் வாயில்லா ஜீவன் ஓடணும்.. ரெண்டு ரூபாய் கொடுங்க சாமீ!.. "

"ரெண்டு ரூபாயா.. ஜாஸ்தியா.. ன்னா இருக்கு?.. "

" சீரங்கத்துல இருந்து எங்க ஊருக்கு வர்றீங்க.. பெருமாள் புண்ணியம் எல்லோருக்கும் ஆகட்டுமே!.. நாலணா குறைச்சுக்கங்க சாமி...  வண்டிலே ஏறி உட்காரும்மா குழந்தே!.. " - என்று அன்பின் பேரங்கள்

நடந்து கொண்டிருந்தன..

மெல்ல சிரித்துக் கொண்டார் மாரியப்பன்..  ஒரு சிலர் மட்டும் அல்வா, மிச்சர் காராசேவு, பக்கோடா - என்று வாங்கிக் கொண்டு நகர்ந்தனர்..

" என்ன மாரியப்பன்!.. "

" வாங்க சார்.. என்ன இன்னிக்கு லேட்?.. திருஸ்னாப்பள்ளி ல இருந்தா வர்றீங்க?.. " - என்றபடி முக்காலியை விட்டு எழுந்த மாரியப்பன் மிக்ஸர் பொட்டலம் ஒன்றை எடுத்து நீட்டினார்..

மப்டியில் வந்திருப்பவர் ஏட்டையா.. இங்கே ரயிலடி ரவுண்டானா பீட் ல நிக்கிறவர்..

அருகில் வந்த ஏட்டையா - "  இது இருக்கட்டும்..  இன்னைக்கு கொஞ்சம் சீக்கிரம் நடையைக் கட்டிடுங்க... " - என்றார்  மெல்லிய குரலில்..

" ஏன் சார்.. என்ன விஷயம்?.. " 

" வடக்கேயிருந்து வந்திருக்கற சேதி ஒன்னும் சரியில்லை..  நெலமை ரொம்ப சிக்கலா இருக்கு.. ஏதாவது ஒன்னு ஆயிடுச்சி.. ன்னா பிரச்சினை கிளம்பிடும்.. ன்னு டிபார்ட்மெண்ட் அலர்ட்டா இருக்கு.. "

" அப்படியா!.. "

" யார் கிட்டயும் எதுவும் பேசிக்காம வீட்டப் பார்க்க புறப்படுங்க.. நான் வர்றேன்.. உஷார்!.. " - என்ற ஏட்டையா -

" ரெண்டு நாளைக்கு ஏவாரம் ஒன்னும் வச்சிக்க வேணாம்.. " - என்று கூடுதல் சேதியும் சொல்லி விட்டு நகர்ந்தார்..

' நல்ல மனுசனத் தொட்டு சேதிய ரகசியமா சொல்லிட்டு போறார்.. '

செய்தி கேட்ட  தனக்குள் முணுமுணுத்துக் கொண்ட மாரியப்பன் முக்காலியை எடுத்து வண்டியின் கீழ் வைத்துக் கொண்டு மிக்ஸர் ஸ்டாலை நகர்த்தினார்..

அடுத்த நாளே, பெரிய சோகம். ரயிலடியில் கலவரம்.. 

" சிறு ஏவாரிகள் டீக்கடைகள்  பழக்கடைகளுக்கு பலத்த சேதமாம்.. ரகளை செய்தவர்கள் யாரும் பிடிபட வில்லையாம்.. " -  பொதுமக்கள் பேசிக் கொண்டார்கள்..

ரயில் வண்டியின் மேல் ஏறிக் கொண்டும் ஜன்னல் கம்பிகளில் தொங்கிக் கொண்டும் சென்றதால் .... என்று, ஆகாச வாணி  சொல்லிக் கொண்டு இருக்க - காலைச் செய்திகளுடன் வெளியாகிய மாலைப் பத்திரிக்கை எல்லாமே விற்றுப் போயிருந்தது..

ஒரு வாரத்துக்குப் பிறகு நிலைமை சீரானது.. ஆனாலும் ரயிலடி பக்கம் போவதற்கு மனசு இல்லை - மாரியப்பனுக்கு ..

வழக்கம் போல புறப்பட்டு பஸ்டாண்டு பக்கம் கொஞ்ச நேரம்  பிள்ளையார் கோயில் பக்கம் கொஞ்ச நேரம்  என்று நின்று விட்டு ராத்திரி எட்டரை மணி வாக்கில் மிக்சர் வண்டியுடன் வீட்டுக்குத் திரும்பிய மாரியப்பன் அதன் பிறகு ரயிலடி பக்கம் போகவே இல்லை...

ஃஃஃ