பள்ளித் தேர்வில் காப்பியடித்ததுண்டா?

 

நெல்லைத்தமிழன்: 

பள்ளித் தேர்வில் காப்பியடித்ததுண்டா? திருட்டுத்தனம் செய்ததுண்டா? பிட் போன்று.

# அதற்கு அவசியமே நேர்ந்ததில்லை. சாதாரணமாக 50 முதல் 65 வரை எந்த பாடத்திலும் மார்க் வாங்கி விடுவது எனக்கு சாத்தியமாக இருந்தது. அந்த காலத்தில் 60 மார்க் வாங்கி பாஸ் செய்தால் அரசு வேலை நிச்சயம் என்கிற நிலை இருந்ததால் காப்பி அடிக்க தேவையோ, எண்ணமோ இல்லாமல் போயிற்று.

& ஐந்தாம் வகுப்பு, மற்றும் ஏழாம் வகுப்பு படித்தபோது, சும்மா 'கிக்'குக்காக காப்பி அடித்து, பிட் அடித்து? மாட்டாமல் தப்பியது உண்டு. 

ஐந்தாம் வகுப்புப் பரிட்சையின்போது - சமூக பாட பரிட்சை அன்று எல்லோரும் ராதாகிருஷ்ணன் என்ற பையனிடம் (பரிட்சை மேற்பார்வை பார்க்கும் ஆசிரியர் இல்லாத சமயத்தில்) கேள்விகளுக்கு பதில் கேட்டு, கேட்டு எழுதினார்கள். நான் அவனிடம், பரீட்சையில் கேட்கப்பட்டிருந்த ஒரு கேள்வியான, " நம்முடைய ஜனாதிபதியின் பெயர் என்ன? " என்பதற்கு பதில் கேட்டேன். அவன் " என்  பெயர்தான்" என்றான். நான் என்னுடைய விடைத்தாளில் " என் பெயர்தான்" என்று எழுதினேன். 

ஏழாம் வகுப்புப் படித்தபோது - ஆங்கிலப் பரீட்சையில் மாவீரன் அலெக்சாண்டர் பற்றிய கட்டுரை கேட்டிருந்தார்கள். பையன்கள் எல்லோரும் ஒரு தாளில் எழுதியிருந்த கட்டுரையை ஒவ்வொருவராக பார்த்துப் பார்த்து, பிட் அடித்து, அந்தத் தாள் என்னிடமும் வந்தது. படித்துப் பார்த்தால், அந்தத் தாளில் எக்கச்சக்கமாக spelling mistakes - முடிந்தவரை சில திருத்தங்கள் செய்து அதை அடுத்த மாணவனிடம் கொடுத்தேன். 

பார்க்கவேண்டிய நல்ல சீரியல்கள் ஓடிடி எந்தத் தளத்தில் என்ன சீரியல்கள், தொடர்பகுதிகள் என்று சொல்ல இயலுமா?

# சீரியல் பற்றி எனக்கு அதிகம் தெரியாது.  பார்ப்பதே இல்லை.  காமெடி படங்கள், முக்கியமாக, மலையாள காமெடி படங்கள் மட்டுமே பார்க்கப் பிடிக்கிற ரகத்தில் சேர்ந்து விட்டேன்.

& # சொன்னதை வழிமொழிகிறேன். தமிழ் காமெடி படங்கள் மட்டுமே எனக்குப் பிடித்தவை. 

பானுமதி வெங்கடேஸ்வரன் : 

& நீங்கள் அனுப்பிய இந்தப் படத்தில்தான் பார்த்தேன்! எங்கள் குடியிருப்பில் மரங்களுக்குப் பின்னால் மறைந்திருந்த நிலா என் பார்வைக்கு சிக்கவில்லை! 

சென்ற வார வாரிசு நடிக, நடிகையர் கேள்வியில் யாருமே நடிகவேளின் வாரிசுகளை குறிப்பிடாதது ஆச்சர்யமாக இருந்தது. அவர்களில்  யார் சோடை போயிருக்கிறார்கள்? துல்கர் சல்மானை எப்படி மறந்தார்கள்?

# M R ராதா நடிப்பு மிகவும் மிகை ரகத்தை சேர்ந்தது என்று நான் நினைக்கிறேன். அவரது வாரிசுகள் வெற்றி பெற்றவர்கள் என்பதை ஒப்புக் கொண்டுதான் ஆக வேண்டும்.

துல்கர் சல்மான் எல்லாம் எனக்குப் பரிச்சயம் இல்லாத நடிகர். என் கவனத்தில் வராதது வியப்பில்லை.

& அந்தப் பதிவு பற்றி facebook ல லிங்க் கொடுத்தபோது இருவர் பதில் சொல்லியிருந்தனர். 

அதைப்போல இசை வாரிசுகளின் எம்.எஸ்.ஸின் பேத்திகள் ஐஸ்வர்யா, சௌந்தர்யா வை யாராவது குறிப்பிடுவார்கள் என்று நினைத்தேன்.

# MS did not have any child.

தற்கால இளைஞர்களில் சிலர் DINK(Double Income No Kids) என்னும் கொள்கையையும், இன்னும் சிலர் Double N, Double K(NNKK - No Kitchen, No Kids) என்னும் பாலிஸியையும் பின்பற்றுகிறார்களாமே? இதைப்பற்றி என்ன நினைக்கிறீர்கள்?

# இன்றைய நிலையில் இரட்டை வருமானம் விரும்பப்படுவதற்கான நியாயங்கள் நிறையவே இருக்கின்றன.  ஆனால்  பிள்ளைகள் வேண்டவே வேண்டாம் என்று இருப்பவர் அரிது.  இப்போது வேண்டாம், ஒன்று போதும், வீடு அல்லது கார், அல்லது இரண்டுமே வாங்கினபின் யோசிக்கலாம் என்று எண்ணுபவர்கள்தாம் அதிகம் . 

மக்கள் தொகை என்னவோ பெருகிக்கொண்டேதான் இருக்கிறது.  சொந்தமாக பிள்ளைகள் இல்லாவிட்டால் என்ன, இரண்டு குழந்தைகளை சுவீகாரம் எடுத்து வளர்ப்போம் என்கிற மனப்பான்மை பெருகினால் நல்லதுதான்.  சில மதக் கோட்பாடுகளில் தத்து எடுத்து வளர்ப்பது அனுமதிக்கப் படுவதில்லை என்கிறார்கள். அவர்களுக்கு வேண்டுமானால் இது பெரிய பிரச்சினையாக இருக்கலாம். 

அடிப்படையில் மக்கள் அன்பு, நீதி , நேர்மை சார்ந்த வாழ்க்கை முறையை விரும்பி ஏற்றால் இதெல்லாம் மிக அற்பமான பிரச்சினையாகிவிடும்.

= = = = = = = =

KGG பக்கம் : 

ஆறாம் வகுப்பு சேரந்தவுடன், முதல் நாள், முதல் வகுப்பு. எங்கள் வகுப்பின் ஆசிரியர் வைத்யநாதய்யர், மாணவர்களுக்கு அறிவுரைகள் சொல்லிக்கொண்டிருந்தார். " நீங்கள் எல்லோரும் ஆரம்பப் பள்ளி படிப்பு முடித்து, பெரிய கிளாஸ் வந்துவிட்டீர்கள். இங்கே வந்த பிறகு, அடிக்கிறான் சார், கிள்ளறான் சார் என்றெல்லாம் .. " 

அப்போது ஒரு மாணவன், பக்கத்து மாணவனைக் காட்டி பெரிய குரலில் " சார் - அடிக்கிறான் சார் " என்று கத்தினான்! 

ஆசிரியருக்கு அடக்கமுடியாமல் சிரிப்பு வந்துவிட்டது. 

*** *** *** 

ஆறாம் வகுப்பில் பல மறக்கமுடியாத சம்பவங்கள், மற்றும் மாணவர்கள்! 

வாரத்தில் ஒருநாள், craft பீரியட் உண்டு. க்ராஃப்ட் ஆசிரியர் சம்பந்தம், 'எல்லா மாணவர்களும் ஆளுக்கொரு தக்ளி வாங்கவேண்டும் - ஒவ்வொரு வகுப்புக்கும் ஒரு முழு பஞ்சுப் பட்டை கொண்டுவந்து, வகுப்பில் நூல் நூற்கவேண்டும்' என்று முதல் வகுப்பிலேயே கண்டிப்பாகச் சொல்லிவிட்டார். நாகை காதி கடையில், எனக்காக ஒரு தக்ளி வாங்கினோம்.  

எங்கள் வீட்டில் நூல் நூற்கும் இராட்டை இரண்டு இருந்தன. அம்மா, அக்கா, அண்ணன் எல்லோருமே அதில் ஓய்வு நேரங்களில் நூல் நூற்பது வழக்கம். நானும் நூல் நூற்கக் கற்றுக்கொண்டேன். நாங்கள் நூற்ற நூல்களை சிட்டம் போட்டு, எடுத்துக்கொண்டுபோய் நாகை காதி கடையில் கொடுத்து அதற்குரிய பணம் வாங்கி வருவது என்னுடைய வேலை. அப்படி வாங்கிவரும்போது அடுத்து நூல் நூற்பதற்கு பஞ்சுக் கட்டு  ஒன்று அல்லது இரண்டு  வாங்கி வருவேன். 

க்ராஃப்ட் பீரியட் இருக்கின்ற நாட்களில், அந்தப் பஞ்சுக் கட்டிலிருந்து ஒரு பஞ்சுப் பட்டை எடுத்து, புத்தகத்தின் நடுவில் வைத்துக்கொண்டு செல்வேன். 

வகுப்பில் பத்துப் பதினைந்து பேராவது பஞ்சுப் பட்டை, எடுத்து வருவார்கள். சிலர் வகுப்புக்கு தக்ளி மட்டும் எடுத்து வருவார்கள். பஞ்சு கொண்டு வராத மாணவர்கள், ஒரு யுக்தி செய்வார்கள். பஞ்சு கொண்டு வருகின்ற மானவர்களிடமிருந்து பாதி பஞ்சு பட்டையை பிய்த்து எடுத்து, அதை முழு பஞ்சு பட்டை போல நீட்டிக்கொள்வார்கள். பார்ப்பதற்கு முழு பஞ்சுப் பட்டை போல இருந்தாலும் அது தொய்ந்து போய் காட்சி அளிக்கும். 

இன்னும் சில மாணவர்கள் ஒரு சூப்பர் ஐடியா கடைபிடிப்பார்கள். பஞ்சுப் பட்டை ஓர் அங்குல நீளத்திற்கு கடன் வாங்கி, அதன்மீது ஒரு பேப்பர் சுற்றி, 'அது முழு பஞ்சுப் பட்டை, விரல் பட்டு அது அழுக்காகாமல் இருப்பதற்காக பேப்பர் சுற்றி வைத்துள்ளேன்' என்று ரீல் விடுவார்கள். 

க்ராஃப்ட் வகுப்புக்கு வருகின்ற சம்பந்தம் சார், வந்த பத்து நிமிடங்களுக்குள் மாணவர்கள் கொண்டு வந்துள்ள தக்ளி மற்றும் பஞ்சுப் பட்டை ஆகியவற்றை அவசரமாக இன்ஸ்பெக்ஷன் செய்துவிட்டு - பிறகு அக்கம்பக்கத்து ஆசிரியர்களுடன் அரட்டைக் கச்சேரி செய்யப் போய்விடுவார். 

வகுப்பில் ஆசிரியர் இருக்கும்வரை அமைதியாக, பூனை போல இருந்த வால் பையன்கள், ஆசிரியர் அகன்றதும் க்ராஃப்ட் வகுப்பை கிஷ்கிந்தாபுரி ஆக்கி ஆட்டம் போடுவார்கள். 

ஒருவன் அங்கே இருக்கும் பெரிய குடைராட்டினம் போன்ற மர சுற்றுருளையின் ( கைத்தறிக்கு நூல் சுற்றி வைக்கும் உருளை) மீது ஏறி நிற்பான், இரண்டு பேர் அதைச் சுற்றி விடுவார்கள். 

சண்முகம் என்ற நண்பன், தன்னுடைய பஞ்சுப் பட்டையை நீளமாக இழுத்து, அதை தொங்கு மீசை போல மூக்குக்குக் கீழே இடுக்கிக் கொண்டு, ஆசிரியரின் நாற்காலியில் மன்னர் போல உட்கார்ந்து, " கஜ மார்த்தாண்டே !" என்று வீராவேசமாக முழக்கமிடுவான். எல்லோரும் ரசித்துச் சிரிப்போம். 

 எவ்வளவு சந்தோஷமான, கவலை இல்லாத நாட்கள்! 

= = = == = 

அப்பாதுரை பக்கம் : 

(ஒரு வித்தியாசத்துக்கு எண்ண ஓட்டத்திலிருந்து... ) 

லாட்டரி

தொண்ணூறுகளில் என் நண்பனாக இருந்தான் ஷான். என்னை விட பத்து வயது மூத்தவன். தொடர்பு விட்டுப் போனாலும் அவனை அடிக்கடி நினைப்பதுண்டு. 

ஷானுக்கு ஒரு அதீத பழக்கம் இருந்தது. மாத சம்பளத்தில் 10% சதவிகிதம் தவறாமல் லாட்டரி சீட்டில் செலவழிப்பான். பாஸ்டனில் இருந்து பக்கத்து மாநில நகரங்களுக்குச் சென்று அங்கங்கே வாரா வாரம் லாட்டரி சீட்டு வாங்குவான்.  கிட்டத்தட்ட ஆறு வருடங்களுக்குப் பின் ஜாக்பாட் ஜெயித்தான். நாலு கோடி டாலரோ என்னவோ.  மறுநாள் ஆபீஸ் வந்து வேலையைத் துறந்தான். எங்கள் மேனேஜர் முகத்தில் துப்பினான். எனக்கு ஒரு பெரிய கேக் வாங்கித் தந்தான். வெளியேறினான். அப்புறம் அவனை நான் பார்க்கவில்லை.  போன வாரம் காலமானான் என்று வாட்சப் குழுவில் செய்தியாகப் பார்த்தேன். 

வாட்சாப்பு வம்பாப்பு ஆச்சே? ஷானைப் பற்றி நிறைய விவரங்கள் வரத்தொடங்கின. லாட்டரி பணம் எல்லாம் செலவாகி ரிடையரான காலத்தில் பாஸ்டன் துறைமுகம் பக்கம் கத்தோலிக்க ஏழைகள் அடைக்கல விடுதியில் சர்ச் பெஞ்ச் துடைத்து காலம் தள்ளினானாம்.  வருத்தமாக இருந்தது.

கொஞ்சம் கூகிலில் சாரித்துப் பார்த்தேன். அமெரிக்காவில் பிரதானமான இரண்டு லாட்டரி நிறுவனங்களுக்கு வருடத்துக்கு நூறு பிலியனுக்கு மேல் வருமானமாம்.  சென்ற 30 வருடங்களில் லாட்டரியில் கோடி டாலருக்கு மேல் வென்றவர்களில் 36% சதவிகித பேர் மொத்தத்தையும் ஐந்து வருடங்களுக்குள் தொலைத்து ஓட்டாண்டியானார்களாம்.  

நான் கண்ட சில விவரங்கள் சுவாரசியமானவை:

 - லாட்டரி வென்றவர்கள் வீட்டு வாசலில் தூக்கு போட்டு சாவோம் என்று அச்சுறுத்தி பணம் பறிப்பதற்கு ஒரு சங்கமே இருக்கிறதாம்.  சங்கத்துல் உறுப்பினராக பத்தே டாலர் கட்டணம். உங்கள் மாநிலத்தில் லாட்டரி வென்றவர்கள் முகவரியை சங்கத்தில் வாங்கிக்கொள்ளலாம். தூக்கு போடும் அச்சுறுத்தலுக்கு அரை நாள் இலவச பயிற்சி முடிந்ததும் உங்கள் வசதிப்படி லாட்டரி வென்றவர்களை அச்சுறுத்தலாம்.  போலீசில் மாட்டாமல் சம்பாதித்த பணத்தில் முப்பது சதவிகிதம் சங்கத்துக்குத் தர வேண்டும். அம்புட்டுதான்.  போலிசில் மாட்டினால் சங்கம் பாதி ஜாமின் பணம் கட்டும்.  இது எப்படி இருக்கு!  இவர்களின்  பிடுங்கலுக்கு அஞ்சி லாட்டரி வென்றவர்கள் ஆயிரம் டாலருக்கு மேல் பணம் கொடுப்பார்களாம்!

 - இதே போல் கொலை மிரட்டல், கடத்தல் மிரட்டல், யேசு அவதாரம் என்று பணம் பறிக்க பல முறைகள் உள்ளனவாம். லாட்டரி வென்றவர்களிடமிருந்து பணம் பறிப்பதே ஒரு தொழில் போல இருக்கிறது.

பெயர் தெரிந்த உலக நாடுகள் அனைத்திலும் லாட்டரி நடக்கிறது. சில நாடுகளில் அரசாங்கமே லாட்டரி நடத்துகிறது. ஆசியாவில் ஜப்பானுக்கு அடுத்தபடி இந்தியாவில் லாட்டரிப் பித்து அதிகமாம். ஜப்பானில் லாட்டரி வாங்க ஆளிருக்கிறார்களா என்ன?

தமிழ்நாட்டில் லாட்டரி இருந்த நினைவிருக்கிறது. என் வீட்டில் மாதா மாதம் ஒரு சீட்டு வாங்கி வருவார் என் அப்பா.  பரிசே விழாது. "பரிசு விழலே, சீட்டு எதுக்கு வாங்கறிங்கப்பா"னு கேட்டா உதை விழும். 

இப்போ தமிழ் நாட்டில் லாட்டரி சீட்டு மறுபடி அரசாங்கமே எடுத்து நடத்தும் வாய்ப்பு இருக்கிறது என்று சொல்கிறார்கள். அமெரிக்க பவர்பால் லாட்டரி நிறுவனத்துடன் பேச்சு வார்த்தை நடத்த தமிழக அரசிலிருந்து ஒரு குழு டல்லஸ் வந்திருக்கிறது. லாட்டரி என்பது அரசுக்கு ஒரு வருமானம் என்பதால் இது சாத்தியம் என்று படுகிறது.  விடியல் அரசாங்கம் வாரி வழங்கும் சலுகைகளுக்குப் பணம் வேண்டுமே?

= = = = =