கணவர் / மனைவியோடு பார்த்த முதல் படம் எது?

 

சந்திரயான் நிலவை நெருங்கிக் கொண்டிருக்கும் காலம் என்பதால், நீங்கள் எல்லோரும் கேள்விகள் கூட கேட்காமல் டென்ஷன் ஆக இருக்கிறீர்கள் என்று நினைக்கிறேன். 

அதனால் நாங்க கேட்டுவிடுகிறோம். 

பதில் சொல்லுங்கள். 

1) மிகவும் இக்கட்டான சூழ்நிலையில் - எந்த உதவியும் கிடைக்காமல் திகைத்து நின்ற அனுபவம் உங்களுக்கு உண்டா? எங்கு? எப்போது? எந்த சூழ்நிலையில்? 

2) வீட்டில் எல்லோரும் விரும்பிச் சாப்பிடும் ஒரு விஷயம் நமக்கு மட்டும் பிடிக்காமல் இருக்கும். உங்களுக்கு அப்படி ஏதாவது உண்டா? அது எது?

3) பள்ளிக்கூடத்தில் படித்த காலத்தில், புத்தகங்களை பத்திரமாக வைத்துக்கொள்ள உங்கள் புத்தகங்களை பைண்ட் செய்து வைத்துக்கொள்வீர்களா? அல்லது அட்டை மட்டும் போடுவீர்களா? அல்லது அதுவும் கிடையாதா?  

4) படித்த காலத்தில், உங்கள் ஊரில் இருந்த எல்லா தியேட்டர்களிலும் சினிமா பார்த்திருக்கிறீர்களா? 

5) நீங்கள் உங்கள் கணவர் / மனைவியோடு பார்த்த முதல் சினிமா எது? எந்த ஊர்? எந்த தியேட்டர்? 

= = = = =

KGG பக்கம் : 

இன்றைய எனது பக்கம், மேலே கேட்கப்பட்டுள்ள கேள்விகளுக்கு என்னுடைய பதில்களாக அமைகிறது. 

1) பதினைந்து வருடங்களுக்கு முன்பு (என்று ஞாபகம்) நானும் என் மனைவியும், call taxi பிடித்து, நாரத கான சபா சென்றோம். சுதா ரகுநாதன் கச்சேரி என்று நினைக்கிறேன். போகும்போது மிக மிக சாதாரணமாக இருந்த வானிலை கச்சேரி முடிந்து வெளியில் வந்து பார்க்கும்போது பயங்கர மழை. கொட்டு கொட்டென்று கொட்டிக் கொண்டிருந்தது. பஸ் ஸ்டாண்ட் போய் நின்றால் வந்த பஸ் எதுவும் நிற்கவில்லை - எல்லாவற்றிலும் புளியடைத்த மாதிரி கூட்டம். டாக்ஸி எதுவும் நிற்கவில்லை. ஆட்டோ எல்லாம் ஆட்களோடு விர் விர்ரென்று சென்றன. கிட்டத் தட்ட முக்கால் மணி நேரம் செய்வதறியாமல் திகைத்து நின்றுகொண்டிருந்தோம். அதுதான் எனக்கு ரொம்ப நேரம் உதவி கிடைக்காமல் திகைத்து நின்ற சந்தர்ப்பம். தெருக்களில் எல்லாம் முழங்கால் ஆழம் தண்ணீர் நின்றது. எதிர் திசையில் வந்த ஒரு ஆட்டோ டிரைவர் எங்களைப் பார்த்து மனம் இரங்கி, அருகே அழைத்து எங்கே போகவேண்டும் என்று கேட்டார். ' நாங்கள் போகவேண்டியது குரோம்பேட்டை. ஆனால் நீங்கள் ஏதாவது ஒரு சபர்பன் ரயில்வே ஸ்டேஷனில் கொண்டு சேர்த்தீர்கள் என்றால் நல்லது' என்றேன். அவர், " சார் நான் மண்ணடி பக்கம் போகிறேன். உங்களை பார்க் ஸ்டேஷன் அருகே இறக்கி விடுகிறேன்" என்றார். ' அது போதும் என்று மழையில்  மிக மிக மெதுவாக ஊர்ந்து சென்று பார்க் ஸ்டேஷன் அருகே இறங்கிக்கொண்டோம். அந்த ஆட்டோ டிரைவரராகிய முஸ்லிம் பெரியவருக்கு மனமார வாழ்த்து சொல்லி, நூறு ரூபாய் கொடுத்தோம். 

2) எனக்கு ரவா உப்புமா பிடிக்காது. வீட்டில் உள்ள மீதி எல்லோருக்கும் பிடிக்கும். 

3) என்னுடைய புத்தகங்களுக்கு அண்ணன் அல்லது அக்கா அட்டை போட்டுக் கொடுத்துவிடுவார்கள். 

4) நான் படித்த ஊரில் இரண்டே இரண்டு தியேட்டர்கள்தான். இரண்டிலும் பல சினிமாக்கள் பார்த்துள்ளேன். 

5) மனைவியோடு சேர்ந்து முதலில் பார்த்த படம் : அமர் அக்பர் ஆண்டனி. ஊர் : கோயம்புத்தூர். தியேட்டர் பெயர் ஞாபகம் இல்லை. (சென்ட்ரல் ?) 

= = = = = = = =

அப்பாதுரை பக்கம் : 

உரித்தால் உரியும் வெங்காயம்

சர்வ லோகே ஆவ்ருத்ய திஷ்டதி என்று கீதையில் கண்ணனைப் பற்றி வருகிறது. வருகிறதாவது? கீதையே கண்ணன் சொன்னதாகத் தானே சொல்றாங்க? யார் சொல்றாங்கனு அடுத்த கேள்வியா அதுக்குள்ளே? விடுங்க. விஷயம் என்னான்னா அனைத்து உலகங்களிலும் வியாபித்திருக்கும் தன்மையவன் கண்ணன் என்ற பொருளில் வரும் கீதை வரிக்கு உதாரணமும் விளக்கமும் உண்டு.  உதாரணத்தை ஐம்பது வருடங்களுக்கு முன்னால என் பாட்டி கதையா சொன்னாங்க. அது மெய்ஞானம்னு மறந்துட்டேன். விளக்கத்தை  இப்ப ஆய்வுச் செய்தியா சமீபத்தில படிச்சேன். இது விஞ்ஞானம்னு அசந்துட்டேன்.

ஒரே நேரத்தில் பல இடங்களில் வியாபிக்க சாத்தியப்படும்னு இப்ப சொல்றாங்க.  எப்படினு பார்த்தா இதான் மேட்டரு. 

அந்த பெரிய வெங்காயத்தை எடுப்பா, உரிப்போம்.

ஒளியின் வேகம் பற்றித் தெரிஞ்சிட்டிருப்போம் (சென்னைல கரெண்ட் கட்டாவுறத பத்தி சொல்லலிங்க).  ஒளியின் வேகம் பற்றிய புரிதல்னாலதான் சூரியன் சந்திரன் அகில உலகம் அண்டம் கிரகம் காலம் எல்லாவற்றையும் அறியவும் அளக்கவும் முடியுது. அதுல கடைசியா சொன்னேன் பாருங்க காலம்.. அதுக்கு வருவோம். (காலம் பத்தி காளிதாசனும் கண்ணதாசனும் சொன்ன கவிதைகளை இன்னொரு காலத்துக்கு வச்சுக்குவோம்.) இப்ப விசயத்துக்கு. 

காலம் என்பது பல வகைகளில் நம் தினசரி வாழ்வின் அடிப்படையாகிறது. நேற்று இன்று போன்ற நாள் கணக்கு, காலை மாலை போன்ற பொழுதுக் கணக்கு, வயது, கடைக்கு ஆபீசுக்கு போய் வரும் நேரம், குழந்தை வாலிபம் வயோதிகம் போன்ற உடல் முதிர்ச்சிக் கணக்கு, பிறப்பு இறப்பு போன்ற ஆயுள் கணக்கு...  என்று நம் இயக்கம் எல்லாமே கால அடிப்படையில் தான் என்பது பிரமிக்க வைக்கிறது இல்லையா? அப்படிப்பட்ட இந்தக் காலத்தின் அடிப்படையோ ஒளியின் வேகம் என்றால் அந்த ஒளியின் வேகத்தை கொஞ்சம் அசைச்சுப் பார்த்தால் ஏதாவது புரியுமா என்று பார்க்கத் தோன்றுமா தோன்றாதா?  அட எனக்கில்லிங்க.. பட்ச்ச விஞ்ஞானிங்களுக்கு தோணுமானு கேட்டேன்.

ந்யூடன் ஐன்ஸ்டைனிலிருந்து பல விஞ்ஞானிகள் சென்ற பல நூறு வருடங்களாக அசைத்துக் கொண்டிருக்கிற சமாசாரம் இது. சமீபத்தில் இந்த பரிமாண கட்டமைப்பு விதிகளை மாற்றினால் காலம் பரவிய இருப்பு ஒரே நேரத்தில் சாத்தியம்னு கண்டுகிறாங்க சில செர்ன் விஞ்ஞானிங்க. தமில்ல சொல்லணும்னா பச்ச கொய்ந்தேலந்து படுகெயம் வரைக்கும் நாம மாறினாலும் நமக்கு பிடிச்ச பருவத்துக்கு டக்குனு இட்டாற ஒரு டெக்குனிக்கு. ஒரே டயத்துல கொய்ந்தையா அம்மா மடில படுத்துட்டு நிம்மதியா இருக்கலாம், அப்பன் கிட்ட அடிவாங்கிட்டு ஓடுற பத்து வயசு காலிப்பயலா இருக்கலாம், பக்கத்து ஊட்டு பச்சக்கிளியோட இச்சக் பண்ற இருபத்திரண்டு வயசு தறுதல.. இப்படி வகைக்கு ஒண்ணாவும் ஒரே டயத்துல இருக்கலாம்.  இதான் மேட்டரு.

காலம் பரவிய இத்தகைய வியாபிப்பிற்கான அடிப்படை கணிதங்களை சமீபத்தில் சமர்பித்திருக்கிறார்கள் செர்ன் இயக்க விஞ்ஞானிகள். (செர்ன் இயக்கத்தின் கடவுள் அணு பற்றி நமக்கு ஏற்கனவே தெரியுமே). 

வெங்காயத்தை உரிச்சுக்கிட்டே வருவோம்.

மூன்று இடப்பரிமாணங்கள்: நீளம், அகலம், உயரம். ஒரு நேரம் அல்லது காலப் பரிமாணம். இவை தான் நமக்குத் தெரிந்த நான்கு பரிமாணங்கள்.  ஒளியின் வேகத்திலோ அல்லது வேகத்தை விட அதிகமாகவோ நாம் பயணிக்க முடிந்தால் காலத்தை நில்லென்று சொல்லும் மாயம் கைக்கு வரப்பெறுவோம்னு ஐன்ஸ்டைன் மேற்சொன்ன நான்கு பரிமாணங்களையும் புரட்டிப் போட்டு பலவிதமான கணக்கு போட்டு ரிலெடிவிடி தியரினு ஒரு மண்டைக்காய்ச்சலை நமக்கு குடுத்துட்டு போனாரு.  ஐன்ஸ்டைனுக்கு முன்னால இதை ஆர்யபட்டா சொன்னாருனா ஆருயா அந்த பட்டானு கேப்பாங்க.. விடுங்க. ஆனா இப்ப இந்த செர்ன் ஆசாமிங்க இன்னா சொல்றாங்கன்னா.. காலப் பரிமாணங்கள் மூன்று, இடப்பரிமாணம் ஒன்று என்று இந்தக் கணக்கை மாற்றிப்போட்டால் அஷ்டே! ஒரே நேரத்தில் (இடத்தில்) பல நேரங்களில் (இடங்களில்) வியாபிக்க முடியும்னு பக்கம் பக்கமா கணக்கு போட்டு நிரூபிச்சுட்டாங்க. QED. ஜுஜுபி.

மஸ்கு மாதிரி ஆளுங்களுக்கு இது ரஸ்கு தின்ற மாதிரி.  அவுரும் இன்னும் சில செல்வந்தர்களும் இந்தக் கணக்கை ஆளுக்கு பிலியன் செலவு பண்ணி நிஜவுலகுக்கு கொண்டுட்டு வந்துருவாங்க. எனக்கு ஒரு சந்தேகமுமில்லே.  மனுசன் நூறு வயசு வாழுறதுன்றது இப்ப சாதாரணமா போயிட்ட பிறகு பொழுது போக வேணாமா? 

அட இன்னாபா இது.. இவ்ளோ பெரிய வெங்காயம் கைல இருந்துச்சு.. உரிச்சிக்கிட்டிருந்தேன்..?

பாட்டி சொன்ன கதைக்கு வருகிறேன். ப்ருந்தாவனத்தில் கண்ணன் வளர்ந்த காலம்.  ஆண் பெண் சிறியவர் முதியவர் ஆடு மாடு பறவை என்று கண்ணனை அறியாத உயிரில்லை. கண்ணன் அறியாத 

உயிருமில்லை.  தினம் இதைப் பார்த்த பிரம்மாவுக்கு ஒரு நாள் மிகப்பொறாமை.  கண்ணனின் அன்புக்குப் பாத்திரமான பல நூறு உயிர்களை அவரவர் வீடு அதனதன் இடங்களில் தன் மாயையினால் மறைத்து விட்டு தானும் காணாமல் போய் விடுகிறார்.  பிரம்ம நேரக் கணக்குப்படி சாப்பிட்டு தூங்கி மெள்ள ஆடி அசைந்து  வந்து பிருந்தாவனத்தில் பார்த்தால்.. தான் மறைத்து வைத்த உயிர்கள் எல்லாம் கண்ணனோடு விளையாடிக்கொண்டும் சண்டை போட்டுக்கொண்டும்..  தன் ஞானக் கண்களால் பார்த்தார்.  தான் மறைத்த அத்தனை உயிர்களும் மறைந்த நிலையிலேயே இருந்தன. ஆனால் கண் எதிரே கண்ணனுடன் அதே உயிர்கள் அதே உடலுடன்.. இதெப்படி சாத்தியம்?  பிரம்மாவுக்கு குழப்பம். கண்ணனிடம் சரணடைந்து விளக்கம் கேட்கிறார். கண்ணன் சொன்ன விளக்கம் இங்கே முக்கியமில்லை (அதை அழகாகச் சொல்ல அக்கா கீதா சாம்பசிவம் இருக்காங்க இல்லே?). கண்ணன் பிரம்மனுக்கு அதோ பார்னு கைகாட்டுனது தான் இங்கே முக்கியம். பிரம்மன் பார்த்த திசையில் பிரம்மனைப் போலவே நூறு பிரம்மன்கள்! 

(மறுபடியும் கீசா சரண்).

பின்னொரு காலத்தில் :-) கீதையில் கண்ணன் தன்னைக் காலன் என்று சொல்கிறான். என்ன பொருள்? அண்டங்கள் உலகங்கள் எல்லாம் கால அடிப்படையில் இயங்குவதை இங்கே கவனிப்போம். (இதுக்கும் இப்ப செர்ன் ஆசாமிங்க விளக்கம் கொடுத்துட்டாங்கனு தோணுது).

அவ்ளோ தானா? எங்கேப்பா வெங்காயம்? 

வால்: 

பாட்டி சொன்ன கதையை விட்டு இப்ப படிச்ச கதைக்கு வந்தா செர்ன் விஞ்ஞானிகள் அதையே மாத்திப் போட்டு சொல்லியிருக்காபல தோணுது. இடப் பரிமாணங்கள் இந்த உலகுக்கு, காலப் பரிமாணங்கள் பரந்த உலகப் பயணத்திற்கு என்று கணக்கு போட்டு நிரூபிச்சிருக்காங்க.  அதை வைத்து இணையுலகப் பயணங்கள் (ஒளி வேகப் பயணம்) தொடங்க மஸ்காதி மகானுபவர்கள் முயற்சியைத் தொடங்கிவிட... கண்ணன் காலத்தில் இணையுலகம் சர்வ சாதாரணமாக இருந்ததோ என்ற பக்திக்கப்பாற்பட்ட ஐயம் ஏற்படுகிறதே?  

குட்டிவால்:

இங்கே என் எண்ணங்களுக்குத் துணையானவை: kmit மாணவர்களின் சுவாரசியமான ப்லாக் kmitre, sciencealert இணைய தளம், மற்றும் பகவத்கீதை கோனார் நோட்ஸ்.

= = = = = =