எழுக வருக பொலிக

 ஒரு சம்பவம் எத்தனை பாடங்களை சொல்லும்?  எத்தனை நினைவுகளைக் கிளறி விடும்?

நடக்கும்போது தெரிவதில்லை, இது பின்னர் பல நாட்களுக்கு நினைக்கப்படும் என..நாமே உணர மாட்டோம்.  அந்த சமயத்தில் அந்தப் பிரச்னையை சமாளித்தால் போதும் என்று நினைப்போம்.

வரும் உலகக் கோப்பை ஆட்டத்தில் மேற்கிந்தியத்தீவு அணி விளையாடாது என்கிற செய்தி ரசிகர்களுக்கு அதிர்ச்சி கொடுத்தது.  அந்த அணி நெதர்லாண்ட்ஸிடம் தோற்றது ஒரு மகா அதிர்ச்சி.

முன்னர் இருந்த மேற்கிந்தியத்தீவு அணிகளை நினைத்துப் பார்க்கிறேன்.  லாயிட், காளிச்சரன், கிரீனிட்ஜ், ஹெயின்ஸ், லோகி, ரிச்சர்ட்ஸ், அம்ப்ரோஸ், வால்ஷ் , பீட்டர்சன், மார்ஷல், ஜோயல் கார்னர்...

சமீபத்தில் படித்த ஒரு சுவாரஸ்யமான சம்பவம்.

1988 ம் வருடம் மேற்கிந்தியத்தீவு அணிகளுடன் பரீட்சை விளையாட்டு - ஹிஹிஹி  டெஸ்ட் மேட்ச்சைச் சொல்றேன் - விளையாட பாகிஸ்தான் அணி பார்படோஸ் சென்ற சமயம்.

முதல் சோதனை விளையாட்டில் -  ஹிஹிஹி இப்பவும் டெஸ்ட் மேட்சைதான் சொல்றேன் - பத்து ஆண்டுகளுக்கும் மேலாக தோல்வி என்பதையே பார்த்திராத மேற்கிந்தியத் தீவுகள் அணியை பாகிஸ்தான் வென்று விடுகிறது.  காயம் பட்டிருந்ததால் அதில் சிங்கம் விளையாடவில்லை.  சிங்கம் என்றால் யார் தெரியும்தானே?  விவியன் ரிச்சர்ட்ஸ்.

அணியின் நிலையைப் பார்த்து இரண்டாம் டெஸ்ட்டில் அவர் விளையாட வந்து விடுகிறார்.  அந்த டெஸ்ட் டிரா ஆகிறது.  அந்த டெஸ்ட்டில் ஒரு சம்பவம்.

ரிச்சர்ட்ஸ் வந்ததும் அவரை அவுட் எடுக்க போராடுகிறார்கள் பாகிஸ்தான் பௌலர்கள்.  அது அவ்வளவு எளிதல்ல.  ரிச்சர்ட்ஸ் பற்றி தனியாக நாலைந்து போஸ்ட் போடலாம்.  அவ்வளவு ரசிக்க வைக்கும் ஆட்டக்காரர் அவர்.  (யாருங்க நீனா குப்தான்னுல்லாம் குரல் கொடுக்கறது...   தள்ளிப் போங்க...  )

ஒரு கட்டத்தில் ரிச்சர்ட்ஸுக்கு பந்து வீச வாசிம் அக்ரமை அழைக்கிறார் பாகிஸ்தான் கேப்டன் இம்ரான்.  அக்ரமுக்கு வயது அப்போது 21.  அப்போதுதான் உள்ளே நுழைந்திருந்த இளங்கன்று, இளம் புயல்.

பௌன்ஸர்களாக வீசி ரிச்சர்ட்ஸை நிறுத்தி வைக்கும் அக்ரம், ஸ்லெட்ஜ் எனப்படும் வார்த்தை விளையாட்டிலும் இறங்குகிறார்.  பந்து வீசிய பின் ரிச்சர்ட்ஸ் அருகில் சென்று எரிச்சலைத் தூண்டி விடக்கூடிய வார்த்தைகளை உதிர்க்கிறார்.

"ஏய் கிழடு..  உள்ளே போ..  இனி உன்னால் எல்லாம் ஆடமுடியாது.." என்பது போன்ற வார்த்தைகளை எல்லாம் உதிர்க்கிறார்.

ரிச்சர்ட்ஸ் "அப்படி எல்லாம் பேசாதே...  தவறு" என்று எச்சரிக்கிறார்.  கேப்டன் இம்ரான் அக்ரமை ஊக்குவிக்கிறார்.  "நீ செய் ராஜா..  நானிருக்கேன்" என்கிறார்.

அக்ரமும் வார்த்தைத் தாக்குதல்களைத் தொடர, ஒருமுறை ரிச்சர்ட்ஸ் அணிந்திருந்த தொப்பி, வாசிம் வீசிய பந்து பட்டு பறக்கிறது.  இங்கு சொல்ல வேண்டிய விஷயம் என்ன என்றால் ரிச்சர்ட்ஸ் எந்த நாட்டு பௌலர்கள், எவ்வளவு அச்சுறுத்தும் வகையில் பந்து வீசினாலும் தலைக்கவசம் அணியும் வழக்கமில்லாதவர்.  தொப்பி கீழே விழுந்ததே பெரிய விஷயம்.

வாசிம் அடுத்த முறை வார்த்தைகளை விரயம் செய்தபின் அருகில் வந்த ரிச்சர்ட்ஸ் "உன்னை கிரௌண்டுக்கு வெளியே பார்த்துக் கொள்கிறேன்" என்று சொல்லி விட்டு விளையாடி இருக்கிறார்.

மாலை அன்றைய ஆட்டம் முடிந்து உடை மாற்றும் அறைக்கு அணிகள் சென்று விட, திடீரென வாசிம் அக்ரம் காதில் ஒரு குரல் கேட்டது..  "வாசிம்..  வெளியே வா... "  ஒருமுறை அல்ல, இருமுறை அல்ல பல முறை குரல் கேட்டதும் வாசிம் வெளியே பார்க்க, அங்கு ரிச்சர்ட்ஸ் பேண்ட்ஸ், சட்டை, பனியன் அணியாமல்,---  இருங்கள்...  இருங்கள்..   டிராயர் மட்டும் அணிந்து கையில் பேட்டுடன் நின்றிருக்கிறார்.

பதறிப்போன வாசிம் இம்ரானிடம் ஓடி, 'உதவுங்கள்... என்ன செய்வது?' என்று கேட்க, 'என்னைக் கேட்டால்? அது உன் பிரச்னை..  நீ பார்த்துக் கொள்' என்று கைகழுவி விட்டாராம்.

ரிச்சர்ட்ஸ் கூப்பிட்டுக் கொண்டே இருக்க, வாசிம் மெல்ல அடிமேல்அடி வைத்து வெளியே வந்தாராம்.

மெல்ல ரிச்சர்ட்ஸ் அருகே சென்றவர், இனி வரும் காலங்களில் இதுபோல கட்டாயம் நடக்காது என்று உறுதி கொடுத்தாராம். அதே போல அப்புறம் ரிச்சர்ட்ஸிடம் அவர் வார்த்தையாடவில்லை.  ரிச்சர்ட்ஸ் கொஞ்ச நேரம் வாசிமை உறுத்துப் பார்த்து விட்டு, "செயயாதே..  செய்தே...  கொன்னுடுவேன்" என்று சொல்லி விட்டு நகர்ந்தாராம்.  வேறு எவரிடமாவது அப்புறம் வாசிம் அக்ரம் இப்படி ஸ்லெட்ஜ் செய்தாரா என்றும் நினைவில்லை.  ஆனால் இது தனக்கு சரியான பாடம் என்று பல இடங்களில் சொல்லி இருக்கிறார் வாசிம்.

எனக்கு ரிச்சர்ட்ஸை ரொம்ப ரொம்பப் பிடிக்கும்.  வாசிமையும் பிடிக்கும்.

இப்போ சில கேள்விகள்..

ரிச்சர்ட்ஸ் இப்படி ட்ரெஸ்ஸிங் ரூம் சென்று மிரட்டியது, சண்டைக்கு அழைத்தது சரியா?  அதற்கு முன்னால் வாசிம் செய்தது சரியா என்று கேட்டால், தவறு என்றாலும் நிறைய பௌலர்கள் செய்வதுதான்.  பாடிலைன் கேம்ஸே பார்த்தவர்கள் நாம்!

இம்ரான் கைவிட்டது சரியா?  கைவிடவில்லை, வாசிமுக்கு பாடம் சொல்லிக் கொடுத்தார்.  தன் பிரச்னைகளை தானே சமாளிக்கக் கற்றுக் கொடுத்தார் என்று சொல்வோர் உண்டு.

சட்டென சரண்டர் ஆனது வாசிமின் ராஜதந்திரமா, பயமா, நாகரீகமா?

சமீபத்தில் நடந்த கோலி, காம்பிர் சண்டை நினைவுக்கு வருகிறது.  கேவலமாக அடித்துக் கொண்டார்கள்.  இன்சமாம் ஒருமுறை பேட்டை எடுத்துக் கொண்டு ஒரு ரசிகரை அடிக்க, கேலரிக்குள் நுழைந்து, சேர்களில் ஏறி சென்றதும் நினைவுக்கு வருகிறது.

இந்த சம்பவம் சுவாரஸ்யமானதுதான்.  இதை விடுங்கள்.  மற்றவர்களை இப்படி அணுகுவது பற்றி உங்கள் அபிப்ராயம் என்ன?

இன்னொரு சுவாரஸ்யமான கிரிக்கெட் சம்பவமும் சொல்ல ஆசைப்படுகிறேன்....

=========================================================================================

1973இல் திண்டுக்கல் இடைத்தேர்தல் நடந்தபோது, பழ.நெடுமாறன் மதுரை மாவட்டத் தலைவராக இருந்தார். அந்த பகுதியில் சுந்தர ராஜன் சேர்வை என்று ஒருவர் இருந்தார். திண்டுக்கல் தேர்தலில் பிரச்சாரம் செய்வதற்கென்று பொறுப்பு ஒப்படைக்க பட்டவர்களில் நானும் ஒருவன். திண்டுக்கல் இடைத்தேர்தல் 1973 மே மாதம் 20ஆம் தேதி நடந்தது. அதற்கு ஏழு நாட்களுக்கு முன்பு, பாலமேட்டின் பக்கத்தில் அலங்காநல்லூரில் இருந்து 12 கிலோமீட்டர் தூரத்தில் மாணிக்கம்பட்டி என்ற ஊரில் தேர்தல் பிரச்சாரக் கூட்டம். நான் அலங்காநல்லூரில் ஒரு லாட்ஜில் தங்கி இருந்தேன். எனக்குத் தனியாக ஒரு கார் கொடுத்திருந்தார்கள். நான் சாயந்தரம் கிளம்பி ஏழு எட்டுக் கூட்டங்களில் பேசி விட்டு இரவு அலங்காநல்லூர் லாட்ஜுக்கு வந்து விடுவேன்.

மாணிக்கம்பட்டியில் ராத்திரி 11 மணிக்கு பொதுக் கூட்டத்தில் நான் பேசிக் கொண்டிருந்தேன். 40 - 50 பேர் கூட்டத்தில் அமர்ந்திருந்தார்கள். அப்போது திடீரென்று ஒரு அம்பாசிடர் கார் வந்து நின்றது. அந்தக் காரில் இருந்து காமராஜர் இறங்குவார் என்று நான் எதிர்பார்க்கவே இல்லை. காரில் இருந்து இறங்கி நேராக மேடையில் வந்து உட்கார்ந்தார்.

காமராஜரை நான் கூட்டங்களில் பார்த்திருக்கிறேன். மாநாடுகளில் தலைவர்கள் எல்லாம் வருவதற்கு முன் பேசி இருக்கிறேன். அதன் பின் பெருந்தலைவர் வந்து அமர்வார். சற்று தூரத்தில் இருந்து பார்த்திருக்கிறேன். குமரி அனந்தன் அய்யாவோடு பல கூட்டங்களில் பேசி இருக்கிறேன்.

பெருந்தலைவர் நான் பேசும் கூட்டத்தில் அருகில் வந்து அமர்வார் என்று நான் நினைக்கவில்லை. அவர் வந்து அமர்ந்த உடன் அவரது ஆட்சிகால சாதனைகள் அனைத்தையும் தொகுத்து கவிதை நடையில் அழகாகப் பேசினேன். அவர் என்னைப் பாராட்டுவார் என்று நினைத்து ஆக்கிரோசமாகப் பேசினேன்.

என்னைப் பாதியில் நிறுத்தி விட்டு மைக்கை வாங்கி பேசினார். மைக் செட் சரியாக வேலை செய்யவில்லை. மைக் செட் காரரைத் திட்டி விட்டு, ஒரு வழியாகப் பேசி முடித்தார்.

பிறகு என்னை விசாரித்தார். எந்த ஊர் என்ன செய்கிறாய் என்று கேட்டார். அதன் பிறகு எப்படி போகப் போகிறாய் என்று கேட்டார். எனக்கு கார் இருக்கிறது என்றேன். "உன் கார் பின்னால் வரட்டும், நீ என்னுடன் வா!" என்று சொல்லி தன்னுடைய காரில் ஏற்றிக் கொண்டார். அப்படி ஒரு நல்ல வாய்ப்பு எனக்குக் கிடைக்கும் என்று நான் கனவிலும் நினைத்ததில்லை.

காரில் போகும் போது என்னைப்பற்றிக் கேட்டுக் கொண்டே வந்தார். அந்த இரவில் அவருடன் பயணித்த அந்த 20 நிமிட நேர பயணத்தில் என் வாழ்க்கை தலை கீழாக மாறியது.

அவர் என்னிடம் என்ன சொன்னார் தெரியுமா? "இப்போது என்ன சுதந்திரப்போராட்டமா நடக்கிறது?" என்று கேட்டார்."உன்னை மாதிரி வயதில் இருக்கும் பத்தாவது படிக்கிற ஒருத்தன், எல்லா வேலையையும் விட்டுவிட்டு, ராத்திரி பதினொரு மணிக்கு மீட்டிங் பேச வேண்டிய தேவை என்ன?" என்று கேட்டார்.

அதற்கு நான், "உங்களால் ஈர்க்கப்பட்டு தான் தேர்தல் வேலை செய்கிறேன். என் தந்தை உங்களைப்பற்றி உங்கள் நேர்மையைப் பற்றிச் சொல்லிச் சொல்லி என்னை வளர்த்தார்." என்றேன்.

உடனே அவர், "உனக்கெல்லாம் கார் கொடுத்துக் கெடுத்து விட்டார்கள்." என்றார். பிறகு, "நாங்கள் எல்லாம் பள்ளியில் படிக்காமல் சுதந்திரப் போராட்டத்தில் ஈடுபட்டோம். இப்போது சுதந்திரப் போராட்டமா நடக்கிறது? ஒரு இடைத்தேர்தல் தானே நடக்கிறது!" என்றார்.

பொதுவாக அந்த வயதில் நான் மேடையில் பேசினால் மாலை போட்டு, பொன்னாடை போர்த்தி, இவ்வளவு சின்னப்பையன் அருமையாகப் பேசுகிறானே என்று சந்தோஷப் படுவார்கள். ஆனால் அன்று என்னை பாராட்டாதது மட்டுமின்றி, திட்டிக் கொண்டே வந்தார்.

"உன்னைப் போன்றவர்களை தவறாக வழி நடத்தி விட்டோமோ என்று கவலைப் படுகிறேன்." என்று சொல்லிக் கொண்டே வந்தவர் என் முக வாட்டத்தைக் கவனித்தோ என்னவோ, திடீரென்று, "உனக்குப் பொது வாழ்க்கையில் அக்கறை இருக்கிறதா?" என்று கேட்டார். அதற்கு நான்,"ஆமாங்க அய்யா!" என்றேன். "அப்படியென்றால் ஒன்று செய். இந்த மாதிரி வேலைகளையெல்லாம் விட்டு விட்டு, நல்லா படிச்சி ஐஏஎஸ் எழுது. ஒரு கலெக்டர் ஆகிவிடு!" என்றார். அதன்பிறகு அவர் எப்படி ஐஏஎஸ் அதிகாரிகளுடன் கலந்து ஆலோசித்து முடிவெடுப்பார் என்பதை விளக்கினார்.

அப்போது நான் அரைக்கால் சட்டை போட்டிருந்த பையன். என்னைப் பார்த்து முதன்முதலாக ஐஏஎஸ் என்ற வார்த்தையை என் காதுகளில் உச்சரித்த ஒரே மனிதர் அவர்தான். இன்று வரை யோசித்து, யோசித்துப் பார்க்கிறேன். அவரைப் பற்றிப் பேசும்போது என் கண்களில் நீர் வந்து விடக் கூடாதே என்று கட்டுப்பாடாகப் பேச முயற்சி செய்வேன்.

இன்று வரை நான் யோசித்து யோசித்துப் பார்ப்பதுண்டு. அவர் ஏன் அப்படி என்னிடம் சொன்னார்! அவர் என்னைப் பாராட்டவில்லை. நன்றாகப் பேசினேன் என்று சொல்லவில்லை. நான் பேச வந்ததற்காகக் கண்டித்தார்.

ஒரு சின்னஞ்சிறுவனிடம் ஐஏஎஸ் எழுதச் சொன்னார். அதன் பின் நான் வளர்ந்து, படித்து, முதல்முயற்சியிலேயே ஐஏஎஸ் தேர்ச்சி பெற்றேன். அதுவும் பி.ஏ.தமிழ், எம்.ஏ.தமிழ் என்று தமிழ் இலக்கியம் படித்து ஐஏஎஸ் எழுதிய முதல் மாணவன் என்ற வரலாற்றைப் படைக்கக் காரணமாக இருந்தவர் பெருந்தலைவர் காமராஜர். அவரது ஒற்றைச் சொல் தான் என்னை ஐஏஎஸ் அதிகாரி ஆக்கிற்று.

அலங்காநல்லூரில் நான் தங்கி இருந்த லாட்ஜின் முன்னால் ஒரு கால்வாய் மீது சின்ன பாலம் உண்டு. அந்த பாலத்தின் அருகில் கார் நின்றது. "இங்கிருந்து நான் போய் விடுகிறேன் அய்யா!" என்றேன். என்னுடைய கார் பின்னால் வருகிறதா என்று சற்று நேரம் காத்திருந்து, கார் வருவதை உறுதி செய்து கொண்டு, அதன் பிறகு புறப்பட்டுச் சென்றார்.

அவர் கார் சென்ற பின்பும், அந்த பிரமிப்பில் இருந்து மீளாதவனாக சற்று நேரம் நின்றிருந்தேன். என்னையே நம்ப முடியவில்லை.

காரில் வரும்போது திண்டுக்கல் தேர்தல் முடிவு எப்படி இருக்கும் என்று கூட என்னிடம் சொல்லி விட்டார். ஆனால் அதை நான் யாரிடமும் சொல்லவில்லை. அவருடனான எனது அந்த சந்திப்பு இன்று வரை என் வாழ்க்கையை வழி நடத்திக் கொண்டிருக்கிறது.

ஆர்.பாலகிருஷ்ணன் ஐ.ஏ.எஸ்

இணையத்தில் இருந்து எடுத்தது  நன்றி R கந்தசாமி சார்...

==============================================================================================

சென்னையில் பார்த்த தனியார் பேருந்தில் எழுதி இருந்த வாசகம்..

கோராவில் பார்த்து, படித்து ரசித்த ஒரு ஜோக்...

=======================================================================================================

இணையத்தில் படித்த ஒரு பழைய பாடல்  பாசுரம் முதல் வரியே என்னை ஈர்த்து, இதை எழுத வைத்தது...

வருக வருக வருக 

தண்மேகங்கள் வானில் மிதந்து 

தாய் தன் குழந்தைக்கு அமுதூட்ட 

விரைவது போல கடுகி வந்து 

இனியும் வறட்சியில்லை, வறுமை இல்லை என 

தருக தருக தருக 

பசித்த குழந்தைக்கு பாலாய் 

பசித்த வயிற்றுக்கு சோறாய்

வறண்ட நிலங்கள் ஈரமாய் நனைய 

பொழிக பொழிக பொழிக 

மனம் குழைய மண் குழைய 

மரம் செடிகொடி வளர்ந்து தழைத்து 

பாங்குடனே பசுமைக்காடாய் பூமி மாற 

வறண்டுபோன நிலத்தில் வாழ்ந்து 

மறந்துபோன மனிதம் மறுபடி மனதில் 

உருக உருக உருக 

வெப்பத்தால் வெறுப்பால் நிரம்பிய மனங்கள் 

தட்பத்தால் மண் இளகியது போல 

மனமும் இளக காருண்யம் பெருக 

தண்மையாலும் நன்மையாலும் உலகம் முழுவதும் 

பொலிக பொலிக பொலிக 

அறம் தழைக்க நல்லெண்ணம் வேண்டும் 

மரம் வைத்தால் நல்மழை கூடும் 

வளங்களால் நாட்டைச் செழிக்க வைக்க 

உள்ளங்களை உண்மையால் நிறைத்து 

ஏ இளைய சமுதாயமே 

இனிவரும் காலம் நம் காலம் 

மண்ணைக்காப்போம் மணலைக் காப்போம் 

மழைநீரை சேமிப்போம் 

நா நிலம் முழுவதும் நம் ஒரு வீடாய் நினைப்போம் 

சண்டை மறுப்போம் சமாதானமாய் வாழ்வோம் 

ஜாதியின்றி மதமின்றி மாச்சர்யங்களின்றி 

எழுக எழுக எழுக 

வருக வருக வருக 

பொலிக பொலிக பொலிக 

============================================================================================

நியூஸ் ரூம் 

பானுமதி வெங்கடேஸ்வரன் 

இந்தியாவிலேயே புலிகள் எண்ணிக்கையில் மத்திய பிரதேசம் முதலிடம் வகிப்பதில் அம்மாநில முதல்வர் சிவராஜ் சிங் சவுகான் பெருமிதம் 

காரைக்குடியில் கலைஞர் நூற்றாண்டு விழா கொண்டாட்டத்தின்‌ இறுதியில் அம்மன் பாடலை ஒலிபரப்பிய பொழுது அருள் வந்து ஆடிய பெண்கள்; அவர்களுக்கு கற்பூர ஆரத்தி எடுத்து கும்பிட்ட நிகழ்ச்சி ஒருங்கிணைப்பாளர்கள் - நல்ல திராவிட மாடல்தான்!

இனி சவுதி அரேபியாவோடு நம் நாட்டு கரன்சியிலேயே வியாபாரம் செய்யலாம்.

சமூக வலைத்தளத்தில் ஏற்பட்ட பழக்கம் காதலாக மாறியதை அடுத்து 18 வயது காதலனை தேடி 21 வயது சீனப் பெண் பாகிஸ்தான் சென்றுள்ளார்- கௌதம் மேனன் படங்கள் நிறைய பார்ப்பாரோ?

நாடு முழுவதும் 2019-2021 ஆண்டுகளில் 10 லட்சத்துக்கும் மேற்பட்ட பெண்கள் காணாமல் போய் உள்ளனர் என தேசிய குற்ற ஆவண காப்பக தகவலின் தெரிவிக்கப்பட்டுள்ளது - அதிர்ச்சி!

சாதாரணமாக ரூபாய் நோட்டுகள் அச்சடிக்கப்படும் பொழுது எண்கள் வரிசையாக இருக்கும். அதே நேரத்தில் அந்த ரூபாய் நோட்டுகள் அச்சிடுவதில் ஏதாவது தவறு இருந்தால் எண்களுக்கு முன்பு ஒரு நட்சத்திர குறி அச்சிடப்படும் இப்படி நட்சத்திர குறியிடப்பட்ட ரூபாய் நோட்டுகள் செல்லாது என்றும், அவை கள்ள நோட்டுக்கள் என்றும் ஒரு தவறான நம்பிக்கை மக்களுக்கு இருந்தது. அவை செல்லும் என்ற ரிசர்வ் பேங்க் அறிவித்துள்ளது.

சென்னை அருகே போலீஸை தாக்கிய ரவுடிகள் என்கவுண்டரில் சுட்டுக்கொலை.

தங்கள் எட்டு மாத குழந்தையை இரண்டு லட்சத்துக்கு விற்ற பெற்றோரை கோல்கத்தா காவல்துறை கைது செய்தது.  விற்க காரணம்?  வறுமை, சாப்பிட வழி இல்லாமல்...  அதெல்லாம் இல்லை.  ரீல்ஸ் போடவேண்டுமாம், அதுவும் ஆப்பிள் போனில் போட வேண்டுமாம்...

ஒடிசாவில் ஒரு நம்பிக்கை.  முதல் பயணியாக பெண்ணை பஸ்ஸில் ஏற்றுவதில்லை கண்டக்டர், டிரைவர்கள்.  அப்படி ஏற்றினால் விபத்து நடக்குமாம், அல்லது டிக்கெட் விற்பனை மோசமாக இருக்குமாம்!  போராட்டம் நடக்கிறது!  கனிமொழியின் கனிவான கவனத்திற்கு...

கொரோனா காலத்தில் மருந்துப்பொருட்கள், உபகரணங்கள் என்னென்ன எவ்வளவு வாங்கினீர்கள், ரசீது எங்கே என்று தகவல் அறியும் உரிமை சட்டத்தில் கேட்ட மத்திய பிரதேசக்காரருக்கு 40,000 பக்கங்களில் பதில் கொடுத்து வியக்க அல்லது அதிர வைத்துள்ளது சம்பந்தப்பட்ட துறை!

இறந்து விட்டதாகக் கருதிய தாயுடன் 35 வருடங்களுக்குப் பின் அழுகையுடன் தாடியும், டர்பனுமாக சேர்ந்த மகன்.

வடநாட்டில் தக்காளி விற்று கோடீஸ்வரர் ஆன கதை போல திருப்பூரில் ஒரே நாளில் ஒன்றரை லட்சத்துக்கு தக்காளி (மட்டும்) விற்ற திருப்பூர் விவசாயி.  அடுத்தடுத்த நாட்களில் இரண்டு லட்சம்,, மூன்று லட்சம் என்று சம்பாதித்த விவசாயிகள் பற்றிய செய்திகள் வந்த வண்ணம் இருக்கின்றன...!

இன்னொரு தக்காளி செய்தி... தக்காளி வண்டியை கடத்தி லட்சங்களுக்கு விற்ற தமிழக தம்பதியை பெங்களுருவில் கைது செய்தார்களாம்...  வெட்கம்!

========================================================================================

பொக்கிஷம் : -

ஆ....