​குற்ற உணர்வு

 இந்த பால்கார தம்பதிக்கு ஒரு குழந்தை.  தவழும் நிலை. நடைப்பயிற்சிக்கு செல்லும்போது இந்தக் குழந்தை ஒரு அபார்ட்மெண்ட் வாசலில் அமர்ந்து அழுது கொண்டிருந்தது.  குழந்தையை கீழே விட்டு விட்டு திருமதி பால்காரர் மாடி ஏறி பால் போடச் சென்றிருக்கிறார் என்று யூகிக்க முடிந்தது.

 அந்தத் தெருவில் வளரும் ஒரு நாய் எனக்கு முன்னே நடந்து கொண்டிருந்தது.  அதுவும் குழந்தையை கவனித்தது.  எனக்கு லேசான பயம், தொடங்கும் முன்னரே அணைந்து, அது ஆச்சர்யமாக மாறியது.  அழும் குழந்தையை கவனித்த நாய் உடம்பை ஒரு குலுக்கு குலுக்கி நடனம் போன்ற நடையுடன் குழந்தையிடம் சென்றது.  ஒரு குரல் கொடுத்து (குலைக்கவில்லை) குழந்தையின் முன்புறம் நின்று தன் உடம்பை முன்புறமாக வளைத்து நின்று நிமிர்ந்து விளையாட்டு காட்டியது.  குழந்தை அழுகையை நிறுத்தி, இதனைத் தொட முயன்ற போது சட்டென விலகி நின்று வாலாட்டியபடி மீண்டும் வேடிக்கையான ஒரு குரல் கொடுத்தது.  நான் செல்லில் கேமராவை உயிர்ப்பிப்பதற்குள் இத்தனையும் நடந்து விட சற்றே ஏமாற்றத்துடன், அப்போதுதான் இறங்கி வந்து கொண்டிருந்த குழந்தையின் அம்மாவிடம் நடந்ததைச் சொல்லி ஆச்சர்யப்பட்டு விட்டு நடையைத் தொடர்ந்தேன்.  அம்மா இறங்கி வந்து விட்டதைக் கண்ட அந்த நாய் சற்றே விலகி நின்று வாலாட்டியபடியே லேசான அழுகுரலில் ஏதோ பேசி விட்டு மெல்ல அகன்றது.

அடுத்த ஏரியா...  சே..  அடுத்த தெரு..

இதோ இந்த இரண்டில் கறுப்பை எனக்கு கொஞ்சம் அதிகமாகப் பிடித்தது. விளையாட்டுட்டுத்தனமாகவோ, சிறுபிள்ளைத்தனமாகவோ அந்த வெள்ளை இருந்த இடத்தில் இது ஒரு பெரிய மனிதத் தோரணையுடன் நடந்து கொள்வதை  கவனித்திருக்கிறேன்.  முதல் சில நாட்கள் தாண்டும்போது அதை கண்ணோடு பார்த்து இலேசாக கை நீட்டி அதற்குமட்டும் கேட்கும் குரலில் 'என்னடா..  என்ன பண்றே' போன்ற ஒற்றை வாக்கியங்களுடன் தாண்டிச் செல்வேன்.  அடுத்தடுத்த நாட்களில் நான் வருவதை தூரத்திலேயே பார்த்து, படுத்து, தலையை தரையில் வைத்தபடியே நான் இன்று பேசுகிறேனா என்று லேசாக புருவத்தை உயர்த்தி, காதுகளை கூர்மையாக்கி கவனிக்க ஆரம்பித்து, அடுத்த கட்டமாய் வாலை லேசாய் அசைத்து அக்நாலட்ஜ் செய்தது.  நானும் அடுத்த கட்டமாய் இரண்டு பிஸ்கட் போட,  தினமும் என் வருகையைப் பார்த்ததுமே  வாலாட்டியபடி எதிர்கொண்டு கூடவே நடந்து தெருமுனை வரை டிராப் செய்து போகும்.  இது என் கையிலிருந்தே பிஸ்கட்டை நேரடியாக வாங்கும் அளவு பழகியபோதும், அந்த இன்னொரு வெள்ளை சந்தேகப் பிராணியோ தூர நின்றே, பிஸ்கட்டை கீழே போடவைத்து, எடுத்துக் கொள்ளும்.  

ஆனால் போதிய இடைவெளி விட்டு வாலாட்டியபடி கூட வருவதில் குறைச்சல் ஒன்றும் இல்லை!

அடுத்த தெருவில்தான் நீண்ட தெருவில் இரண்டு பாகமாய்ப் பிரித்து இந்தியா பாகிஸ்தான் போல இரண்டு குழுக்களாய் செல்லங்கள்.  நான் போகும்போதெல்லாம் இரண்டும் எதிரெதிர் திசையில் சிறு குழுவாய் நின்று நின்று காரசாரமான பேச்சுவார்த்தை நடத்திக் கொண்டிருக்கும்.  நான் பார்த்த வரை உடன்பாடு ஏற்படவில்லை என்றே நினைக்கிறேன்.  பேச்சுவார்த்தையில் 'இவ்வளவு கண்டிஷனும், இவ்வளவு முறைப்பும் தேவையா என்பது போல இரண்டு சமாதான செல்லங்கள் குறைப்பில் பங்குகொள்ளாமல் இங்குமங்கும் முனகியபடி ஓடிக்கொண்டிருக்கும்.  தினசரி காட்சியாய் இது இருந்ததால் உடன்பாடு எட்டப்படவில்லை என்றே நினைக்கத்தோன்றியது!  என்ன எல்லைத் தகராறோ....  ஏற்பதில் சிரமமாய் என்ன கண்டிஷன்களோ...!

இந்த இரண்டு டீமிலும் சேராத ஒரு தனி ஜீவன்..  தனிமையிலே இனிமை!

இதில் ஒரு குழுவில் இருக்கும் செல்லங்களுடன்  முதல் சிலநாள் பேசியபின் ஓரிரு நாட்கள் பிஸ்கட் போட்டிருக்கிறேன். அந்த நன்றியில், பாசத்தில் ஒரு வெள்ளைச் செல்லம் என்னுடன் கூடவே ஓடி வந்தது ஒரு நாள்.  

எல்லை தாண்டியதும் அதற்கு ஆபத்து ஆரம்பமானது.  ஒரொரு தெருவிலும் இருக்கும் அந்தந்த ஏரியா செல்லங்கள் இதைத் துரத்த, வாலை இரு கால்களுக்கிடையே இடுக்கிக் கொண்டு உயிரைக் கையில் பிடித்துக் கொண்டு அந்த எல்லையைத் தாண்டும் இந்த செல்லம்.  சில சமயம் எனக்கு முன்னால், சில சமயம் எனக்கு பின்னால் நிகழும் இந்தச் சம்பவம்.  அப்படியாவது கடிவாங்கிக் கொண்டு என்னுடன் வந்து விட்டதே என்று நான் நினைத்த நேரம் எங்கள் தெரு முனையுடன் விடைபெற்றுக் கொண்டது. 

என்னால்தானே இது இத்தனை கடிகள் வாங்கியது என்கிற குற்ற உணர்வு மனதுக்குள்!  பத்திரமாக அதன் இடத்துக்கு மீண்டிருக்குமா என்ற கவலை மறுநாள் அதை அதன் வழக்கமான இடத்தில் பார்க்கும் வரை இருந்தது.  முந்தைய நாள் அனுபவத்தால் மறுநாள் அது கூட வராது என்றுதான் நினைத்தேன்.  ஆனால் அது அடுத்தடுத்த நாளும் தொடர்ந்தது.  சில நாட்களில் பிற ஏரியாக்களில் அதற்கான எதிர்ப்பும் குறைந்து போனது.  நான்தான் நெகிழ்வு காரணமாக அவ்வப்போது எக்ஸ்டரா பிஸ்கட் வாங்கிப் போடுவதும் வழக்கமானது!

சில நாட்களாக முதல் தெருவில் கண்ட கருப்பு, மற்றும் வெள்ளை செல்லங்கள் கண்ணில் படவில்லை.  அது பள்ளி கொள்ளும் இடத்தில் கோணலாக சற்றே எதிரெதிராக இரண்டு கட்டிடங்கள் எழும்பிக் கொண்டிருந்தன. பொறுத்துப் பொறுத்துப் பார்த்து அந்தத் தெருவில் இருந்த வடநாட்டு வேலைக்காரரை விசாரித்தேன்.  அவர் மர்மமான புன்னகையுடன் கட்டிடம் கட்டும் இடத்தைக் காட்டினார். ஏதோ சொன்னார்.  அரைகுறையாகப் புரிந்து கொண்டதை நான் நம்ப விரும்பவில்லை.

===================================================================================================

வெங்கட் இந்த வகை ஐஸ்க்ரீம் தயாரிப்பு பற்றி அவர் தளத்தில் சொல்லி இருந்தார்.  தென்னாட்டில் இருக்கிறதா என்று தெரியவில்லை என்றும் சொல்லி இருந்தார்.  அங்கேயே சொல்லி இருந்தேன், சென்னையில் நான் பார்த்தேன் என்று!  இது ஜூன் 2022 ல் ஒரு கல்யாண நிகழ்வில்...

=============================================================================================

பழைய அலுவலக நண்பர்..  தினமும் காலை அவர் பணிக்கு வரும்போது அவர் பின்னாலேயே ஒரு காக்கைக் கூட்டம் பறந்து வரும்.  அவர் வண்டியை நிறுத்தியதும் அவர் எதிரே அசெம்பிள் ஆகிவிடும்.  அவர் அவைகளுக்கு உண்பதற்கு தினமும் ஏதேனும் கொண்டு வருவார்.  கூடவே வந்து இழைந்துகொண்டு "எனக்கு கிடையாதா" என்று கொன்ஹும் நாலு கால் செல்லங்களுக்கும் உண்டு!  அப்போதெல்லாம் நான் தினசரி காலை ரசிக்கும் காட்சி.

பழைய படம்தான்.  இணையத்தில் நான் ரசித்த படம் ஒன்று.  தலைமுறைகளை வரிசையாக கையில் ஏந்தியபடி..

========================================================================================================

ஜீவி ஸார் கீழே உள்ள இந்தப் படத்தை சென்ற வாரமே வியாழனில் பகிரக் கோரியிருந்தார்.  எனக்கும் வாட்ஸாப்பில் வந்திருந்ததுதான்.

====================================================================================================

 

 

                                   நியூஸ் ரூம் 

                                            பானுமதி வெங்கடேஸ்வரன் 

 

நாடு முழுவதும் 10,000 இ-பஸ்கள் இயக்க அரசு நிதி.

மின்சார கொசு விரட்டி உருகி நான்கு குழந்தைகள் பரிதாப மரணம்.

காதலிப்பதாக கூறி மோசம் செய்ததாக 72 வயது ஆண்மகன் மீது, 63 வயது பெண்மணி போலீசில் புகார். இந்த கேஸை எப்படி அணுகுவது என்று போலீஸ் குழப்பம்.

அ.தி.மு.க மாநாட்டிற்குச் சென்ற அ.தி.மு.க. கட்சி உறுப்பினர்கள் டோலில் பணம் கட்ட மறுத்ததால், அவர்களைத் தொடர்ந்து வந்த சரக்கு லாரிகள் மற்றும் இதர வாகன ஓட்டுனர்களும் டோல் கட்டணம் செலுத்த மறுத்ததால் பலகோடி ரூபாய் நஷ்டம்.- மோசமான முன்னுதாரணம்!

முதல்முறை செயின் பறிப்பில் ஈடுபட்ட வாலிபர் அது வெற்றிகரமாக நடந்ததால் கோவிலில் மொட்டை அடித்து வேண்டுதலை நிறைவேற்றிய பிறகு கோவிலிலிருந்து திரும்பும் பொழுது போலீஸிடம் மாட்டிக்கொண்டார்.

ஜி.எஸ்.டி. செலுத்துவோர்க்கு பரிசு, செப்.1 முதல் நான்கு மாநிலங்களில் அறிமுகம்.
பிரதமர் மோடிக்கு முப்பது ஆண்டுகளாக ராக்கி கட்டி வரும் பாகிஸ்தானிய பெண் டில்லி வருகை.  

 

-------------------------------------------------------------------------------------------------------------------------------------------------- 

பொக்கிஷம் :

================================================================================================================