தோசை ஏன் வட்டமாகவே செய்யப்படுகிறது?

 

பானுமதி வெங்கடேஸ்வரன்: 

1) திருமணம், விசேஷம் என்றால் எல்லோரும் பால் பாயசம், உ.கி.கறி, பீன்ஸ் பருப்பு உசிலி, அவியல் என்று ஒரே மெனுவை போடுகிறார்கள். மாறுதலாக ஏதாவது சொல்லுங்களேன்.

# என்ன வேண்டுமானாலும் மாற்றிக் கொள்ளலாம்.  விசேஷ சந்தர்ப்பம் என்பதால் கொஞ்சம் ஆடம்பரம் தேவை என்று ஆகிறது.  மூங்கில் குருத்து இனிப்புக் கூட்டு, பாதாம் துவையல் தேங்காய்ப்பூ மிளகு பொடி சாலட் , தும்பைப் பூ சூப் என்று மாற்றி யோசிக்கலாம். 

& கல்யாண சமையல் எப்பொழுதும் பெண் வீட்டார் ஏற்பாடு பண்ணுவது. புதுமை என்று நினைத்து, அவர்கள் எதையாவது செய்யப்போய், மாப்பிள்ளை வீட்டாரின் சொந்தங்களில் யாராவது பழமை விரும்பி / ஐதீக ஆட்கள் கோபித்துக்கொண்டு சென்றுவிட்டால் பேஜார் ஆகிவிடும். அதனால் பாரம்பரிய சமையலை பின்பற்றவேண்டியது அவசியமாகிவிடுகிறது. என்னுடைய பெண் கல்யாணத்தில், மாப்பிள்ளை வீட்டார் பரிந்துரைத்த சமையல் காண்ட்ராக்ட் ஆளை நியமித்தேன். அதனால், அவர் என்ன புதுமை செய்தாலும், கவலை இல்லாமல் இருந்தேன். 

ஒரு உறவினரின் கலப்புத் திருமணத்திற்கு சென்று வந்த என் சகோதரரின் மனைவி, ஒரு சுவையான சம்பவத்தைக் கூறினார். 

தாலி கட்டி (கல்யாணம்) முடிந்ததும், மாப்பிள்ளை உறவினர்கள் எல்லோரும் சாப்பிடப் போய் பந்தியில் உட்கார்ந்தார்களாம். சாப்பாடு வரவில்லை. இருந்த சமையல்காரர்கள் எல்லோரும் கடையைக் கட்டிக் கொண்டு கிளம்பத் தயார் ஆகிக்கொண்டிருந்தனராம். என்ன விஷயம் என்று விசாரித்தால், பெண் வீட்டார் ( வேறு ஜாதி) சொன்னார்களாம். "தாலி கட்டும் வரைதான் எல்லாம் எங்கள் செலவு.. இனிமேல் எல்லாம் உங்கள் செலவுதான். 'இதை ஏன் நீங்கள் முன்பே சொல்லவில்லை?' என்று கேட்டதற்கு ' உங்களுக்கு எல்லாம் ஏற்கெனவே தெரிந்திருக்கும் என்று நினைத்தோம்.' என்றார்களாம். அப்புறம் மாப்பிள்ளை வீட்டார் - ஏற்கெனவே சமைத்த சமையல்காரர்களைப் பார்த்துப் பேசி, அவர்கள் கேட்ட பணத்தைத் தருவதாகச் சொல்லி ஒரு வழியாக சமாளித்தார்களாம்! 

2) ஊழல் செய்து விட்டு சிறைக்கு செல்லும் அரசியல்வாதிகளுக்கு தனி அறை, வீட்டு சாப்பாடு, டி.வி. வசதிகள் செய்து கொடுப்பது நியாயமா?

# கைதியின் அந்தஸ்துக்கு ஏற்ற வகையில் சிறை வசதிகள் கொடுக்கப் படுகின்றன என்று சொல்கிறார்கள்.  இதில் நியாயம் சிறிதும் இல்லைதான் .  என்ன செய்வது? சட்டம் ஒரு கழுதை என்பது பிரசித்தம் ஆயிற்றே !

ஜெயகுமார் சந்திரசேகரன் : 

BLOG என்ற வார்த்தை யாரால் எப்படி எப்போது உண்டாக்கப் பட்டது. அதன் தமிழ் வார்த்தை  என்ன? 

# Web + log blog ஆக மாறியது. அதுவும் உரு மாறி blog வந்தது. தமிழ் ஆக்க வல்லுனர்கள்களுக்கு இது பெரிய சவால் இல்லை.  இணையத்திடுகை போல கொடுந்தமிழாக்கம் வந்துதான் ஆக வேண்டுமா ? Blog எனும் சொல்  யார் கண்டுபிடிப்பு போன்ற தகவல் இணையத்தில் எளிதாகக் கிடைக்கும்.

புளியோதரை, எலுமிச்சை சாதம் உண்டாக்க சுலப வழியாக பொடி மற்றும் பேஸ்ட் கிடைக்கிறது, ஆனால் வெண்பொங்கல், சர்க்கரை பொங்கல், தேங்காய் சாதம், தயிர்சாதம்  போன்றவை உண்டாக்க பொடியோ பேஸ்டோ கிடைப்பதில்லை ஏன்?  

# எளிதான உணவு தயார் நிலையில் விற்பனைக்குக் கொண்டு வர ஆகும் மேல் செலவு அதிகம் என்பதால் பெரிய அளவில் விற்பனை சாத்தியம் இல்லை. சுவை குன்றாமல் உலர் நிலை கொண்டு வருவதும் கடினம். 

தோசை ஏன் வட்டமாகவே செய்யப்படுகிறது. முக்கோணம், சதுரம், சூரியகாந்தி பூ , வண்டிச்சக்கரம், நட்சத்திரம்  போன்ற டிஸைன்களில் செய்யக் கூடாது? ( அப்படி தோசை செய்ய ஒரு வழி திங்கள்கிழமை பதிவில் வெளியிடலாம்.) 

# வெவ்வேறு வடிவில் தோசை பூனைக்குட்டிக்கு சவரம் என்று எங்கள் வீட்டில் முக்கோண தோசை முயன்று பார்த்த போது நிராகரிக்கப் பட்டது !

& நட்சத்திர வடிவில் ஒரு தோசை செய்தேன். திருப்பிப் போட வரவில்லை. அப்படியே தோசை உப்புமாவாக அதை செய்து சாப்பிடவேண்டியதாயிற்று! 

பெங்களூரு ஹோட்டல்களில் மசாலா தோசைகள் நீள்வட்ட (elliptic) வடிவில்தான் இருக்கும். Along the major axis அதை மடித்து, கொண்டு வந்து வைப்பார்கள். தோசையைப் பிரித்துப் பார்த்தால்தான் உண்மை தெரியும்! 

புராணம் என்றால் என்ன? இதிகாசம் என்றால் என்ன? புராணத்திற்கும் இதிகாசத்திற்கும் வேறுபாடு  என்ன?

# இதிகாசம் என்பவை நடந்த நிகழ்ச்சிகள் என்றும் புராணங்கள் கடவுளர் பற்றிய "கதை " என்றும் சொல்லப் படுகிறது.

& புராணம்  நற்கருத்துக்கள், உருவகமாகப் புனையப்பட்ட கட்டுக் கதைகள் மூலம் வலியுறுத்தப்படும், புத்தகங்கள் மட்டுமே! இதிஹாசங்கள், நடந்ததை மிகைப்படுத்திக் காவியமாகப் படைக்கப்பட்ட நூல்கள்.

விக்கிப்பீடியா : இதிகாசம் எனப்படுவது கடவுள், கடவுள் அவதாரம் அல்லது பெரும் வீரர்கள் நிகழ்த்திய அரும்பெரும் வீரச் செயல்களையும், நீதிநெறிகளையும் விவரிக்கும் புராண வரலாறாகும்(Pre-historic Period)^[1]. இதி-ஹ-ஆஸ என்பதற்கு இப்படி உண்மையில் இருந்தது என்று அர்த்தமாகும். ^[2] இந்தியாவைப் பொறுத்தளவில் இராமாயணமும், மகாபாரதமும் இதிகாசங்கள் என்றழைக்கப்படுகின்றன.

= = = = = = = = 

KGG பக்கம். 

ஆறாம் வகுப்பு நாகையில் படித்த நான், ஏழாம் வகுப்பு (மட்டும்) நீலகிரியில் - நஞ்சநாடு என்னும் ஊரில் போர்டு ஹை ஸ்கூலில் படித்தேன். 

முற்றிலும் புதிய சூழ்நிலை. சுற்றிலும் புதிய முகங்கள். ஆசிரியர்கள் எல்லோருமே கோட்டு சூட்டுடன் வருவார்கள். 

ஆறாம் வகுப்பு கூரைக் கொட்டகையில் படித்த எனக்கு, இந்த பள்ளிக்கூடத்தின் பிரம்மாண்ட வகுப்பறைகள் மிகவும் ஆச்சரியமாக இருந்தது. 

பெரும்பாலான ஆசிரியர்களும், மாணவர்களும் படக இனத்தவர். மிகவும் அன்பாகப் பழகுவார்கள். பெரும்பாலும் படக இனத்து மாணவர்கள் பெயர்கள் எல்லாம் மகாபாரத மாந்தர் பெயரில் இருக்கும். அர்ஜுனன், தர்மர், பீமன், நகுலன், சகாதேவன் என்ற பெயர்கள் அதிகம். போஜன், நஞ்சுண்டன் போன்ற பெயர்களும் அதிகம். 

பள்ளியின் தமிழாசிரியர் கல்யாணசுந்தரம் என்று ஒருவர் வந்தார். என்னிடம், நான் எந்த ஊர் என்று அவர் கேட்க, நாகப்பட்டினம் என்று சொன்னதும் அவருக்கு ஒரே சந்தோஷம். 'அட ! நம்ம ஊர்க்காரனா நீ' என்று கேட்டார். 'Mission high school தெரியுமா?'  என்று கேட்டார். ' தெரியும் சார். அந்த ஸ்கூல் அருகேதான் நான் ஐந்தாம் வகுப்புப் படித்தபோது குடியிருந்தேன்' என்று சொன்னேன். அவருக்கு இன்னும் சந்தோஷம். 

படக பையன்கள் பலரும் எனக்கு படக மொழி சொல்லிக்கொடுப்பதில் ஆர்வமாக இருந்தனர். படக மொழிக்கு எழுத்து வடிவம் கிடையாது. பேச்சு வடிவம் மட்டுமே. இப்போது கர்நாடகாவில் காலம் கழிக்கும்போதுதான், படக மொழிக்கும் கன்னட மொழிக்கும் பல ஒற்றுமைகள் இருப்பது தெரிகிறது. 

காலாண்டுத் தேர்வு முடிந்ததும், லீவு ஆரம்பிக்கும் முன்பு, கடைசி பரிட்சை எழுதி முடித்ததும், எங்கள் emerald camp லிருந்து EB வேனில் வந்து படிக்கும் மாணவர்களை, அருகில் உள்ள கிராமத்திற்கு, அவர்கள் வீட்டிற்கு அழைத்தனர், சில நண்பர்கள். காலையிலேயே பரிட்சை முடிந்துவிட்டதால், EB வேன் - மாலையில்தான் வரும் ( மதியம் பரிட்சை எழுதுபவர்கள் சில வகுப்பு) என்பதால், நாங்கள் கஷ்டப்பட்டு மலை ஏறி - அந்த கிராமத்திற்குச் சென்றோம். 

நாங்கள் சென்ற வீட்டில், எங்களுக்கு ஊட்டி வர்க்கி, பிஸ்கட் எல்லாம் கொடுத்தார்கள். அப்புறம் காபி கொண்டுவந்து கொடுத்தார்கள். காபி பச்சை நிறத்தில் இருந்தது. கிரீன் டீ போல - கிரீன் காபி - ஆனால் டேஸ்ட் விளக்கெண்ணை போல இருந்தது. இனிப்பு இல்லை,கசப்பு இல்லை, எதுவுமே இல்லை! 

அதைக் குடித்துக்கொண்டு இருந்தபோது, அவர்கள் வீட்டில் இருந்த ஒரு மூன்று வயது பையன், வீட்டினுள் "no 2" போனான். அதை, அந்தப் பையனின் அம்மா கைகளினாலேயே எடுத்து வெளியே எறிந்து விட்டு வந்து, " காபி நன்றாக இருந்ததா? " என்று கேட்டார்! 

தின்றது, குடித்தது எல்லாம் வெளியே வந்துவிடும் என்ற பயத்தில், வாயைப் பொத்திக்கொண்டு, தலையை மட்டும் வேகமாக ஆட்டி வெளியே ஓடிவந்துவிட்டோம். 

எங்களை அழைத்த பையன்கள், நாங்கள் திரும்பி வரும் வழியில், அவர்களின் தோட்டத்திலிருந்து, நிறைய சிவப்பு முள்ளங்கி, கேரட், சில பெயர் தெரியாத பழங்கள் என்று பறித்து, பெரிய பை ஒன்றில் போட்டுக் கொடுத்தனர். பங்கு பிரிக்கும்போது எங்கள் ஒவ்வொருவருக்கும் மூன்று கிலோ முள்ளங்கி, மூன்று கிலோ கேரட் - என்ற அளவுக்கு கிடைத்தன! 

நல்ல மனிதர்கள்தான். ஆனால் நாகரீக வளர்ச்சி 'அப்பொழுது' அந்த கிராம மக்களுக்குத் தெரிந்திருக்கவில்லை. 

= = = = = = = =

அப்பாதுரை பக்கம் : 

திரைக்கதை: 2001 - A Space Odyssey

1950களில் அச்சான ஆர்தர் க்ளார்க்கின் மேதாவிச் சிறுகதை, அதைத் தொடர்ந்த நாவல், இரண்டையும் தழுவி ஸ்டான்லி குப்ரிக்கின் திரைக்கதை வசன இயக்கத்தில் 1968ல் வெளியான சினிமா உலக மைல்கல்.  பாரதி வள்ளுவன் கம்பனின் வாசிப்பில் கிடைக்கும் சிலிர்ப்பும் சிந்தனையூற்றும் ஒவ்வொரு முறையும் இந்த படத்தைப் பார்க்கையில் கிடைக்கும்.

கதைப் பின்னணி.

நம் பிரபஞ்சம் உருவானதும் ​​"ஆதிசக்தி" என்று அழைக்கப்படும் அறிவும் சக்தியும் மிகுந்த ஆதிப் பிரபஞ்சவாசிகள் தோன்றினர். அவர்களின் நோக்கம் பிரபஞ்சத்தின் பராமரிப்பாளர்களாக இருப்பதே. இந்த ஆதிசக்திகளுக்கு இரண்டு முக்கிய குறிக்கோள்கள் இருந்தன:

- நம் பிரபஞ்சத்தில் புதிய உயிரினங்களின் வளர்ச்சியை ஊக்குவிப்பது

- உயிரினங்களின் வளர்ச்சியில் ஏதேனும் சிக்கல்கள் ஏற்பட்டுக் கட்டுப்பாட்டை மீறுகையில் அவற்றைச் சீர்படுத்துவது

உயிரினங்களின் வளர்ச்சியை மேம்படுத்திக் கண்காணிக்க உதவியாக,  உயரமான கருநிறச் செவ்வக வடிவங்களை பிரபஞ்சத்தின் நான்கு இடங்களில் ஆதிசக்திகள் நிறுத்தினர்:

1. பூமியின் நடுப்பகுதியில் 

2. நிலவின் தென்பகுதியில்

3. வியாழனின் பாதையில்

4. வேறோரு பரிமாணத்தில்

கதை விளக்கம்.

திரைக்கதை மூன்று பயணக் கட்டங்களாகச் சொல்லப்படுகிறது: 

I: மனிதப் பரிணாமப் பயணம்

II: மாற்றுக் கிரகப் பயணம்

III: மாற்றுப் பரிமாணப் பயணம்

மனிதப் பரிணாமப் பயணம்.

பூமியில், இன்றைக்குச் சுமார் ஒரு கோடி வருடங்களுக்கு முன், குறிப்பாக வரலாற்றுக்கு முந்தைய மத்திய ஆப்பிரிக்காவில், குரங்குகளிடையே படம் தொடங்குகிறது. மனிதப் பழங்குடியின் அடையாளக் காட்சி.   (மனித) குரங்குகள், மற்ற குரங்குகள், காட்டுப்பன்றிகள் மற்றும் பலவகை விலங்குகள் ஆங்காங்கே சிதறி வாழ்கின்றன. கூட்டாக வாழ்ந்தால் சிறுத்தைகள் தங்களை அடித்துக் கொல்வதிலிருந்து பாதுக்காப்பு கிடைப்பதை உணர்ந்த  (மனித)குரங்குகள் கூட்டாக வாழத்தொடங்கின.  சமூக நாகரிகம் தொடங்கியது. விரைவில் அச்சமூகத்தின் இனங்களுக்குள்ளே தலைமைப் பகையும் பிரிவும் சச்சரவும் உருவானதால், தனித்தனி குழுக்களாக அவரவர் தலைமையுடன் நீர் நிலைகளை ஒட்டி குகைகளில் பாதுகாப்பாக வாழ்ந்து வளரத் தொடங்கின.  எல்லைகள் தொடங்கின. இப்படி வளர்ந்த குரங்கு சமூகங்களில் ஒன்று, ஆதிசக்தி ஊன்றிய ஒற்றைச் செவ்வகத்தைக் காண்கிறது.  குரங்குகள் பயத்தில் ஆர்ப்பரிக்கின்றன. மெள்ள அமைதியடைந்து தலைவன் குரங்கில் தொடங்கி, பயம் ஆரவாரம் அதிசயம் ஆர்வம் ஏற்பு அரவணைப்பு என்று வரிசையாகத் தங்கள் உணர்வுகளை வெளிப்படுத்தி செவ்வகத்தைத் தொடவும் கட்டவும் செய்கின்றன.  பரவசமாகின்றன. சாந்தமாகின்றன. குரங்குகளின் உணர்வு பாதிக்கபடுவது இங்கே சொல்லப்படுகிறது. 

அடுத்த காட்சியில், இறந்து போன தன் இனமொன்றின் வரண்ட எலும்புக் குவியல் அருகே தலைவன் குரங்கு சிந்தனையாக அமர்ந்திருக்கிறது.  மனதுள் செவ்வகம்  வந்து போக, திடீரென்று அந்தக் குரங்கு எலும்புகளை அளையத் தொடங்குகிறது. நீளமான தடி போன்ற தொடை எலும்பை எடுத்து அதனால் பிற எலும்புகளை அடிக்க, சுக்கு நூறாக எலும்புகள் உடைவதைக் காண்கிறது. அடுத்த காட்சியில் பல குரங்குகள் ஆத்திரத்தால் நிரம்பி தலைவன் பின்னால் ஆளுக்கொரு தடியெலும்பை வைத்துக்கொண்டு மற்ற குரங்குச் சமூகத்துடன் சண்டை போட்டு, முதல் முறையாக எதிர் சமூகக் குரங்கை, இன்னொரு தன்னின உயிரை, அடித்துக் கொல்கின்றன. எலும்புடன் உலவும் குரங்குகளைக் கண்ட மற்ற சமூகக் குரங்குகள் அஞ்சிப் பணிகின்றன. எலும்பு ஒரு கருவி. இப்படி (குரங்கு) மனிதன் கருவிகளின் பயனைக் கண்டறிந்தான்.

அடுத்த காட்சியில், எதிரிக் குரங்குகளை அடித்து விரட்டிய தலைக்குரங்கு தன் கையிலுருந்த எலும்பு ஆயுதத்தை வெற்றி எக்காளத்துடன் உயரே வீசுகிறது. கேமரா அந்த எலும்பத் தொடர்ந்து பூமியின் சுற்றுப்பாதையில் மிதக்கும் ஒரு பெரிய விண்வெளிக் கப்பலுடன் பொருத்துகிறது. எலும்பிலிருந்து விண்வெளி ஊர்தி வரை (கருவி/ஆயுதம் → கருவி/ஆயுதம்) மனிதன் முன்னேறிவிட்டான் என்பதைக் குறிக்கும் திரைக்கதைத் திருப்பம். ஒரு சமூகம் விரைவாக முன்னேற பலவித உள் மோதல்கள் இருக்க வேண்டும் என்ற சமுதாயச் சிந்தனையும் இங்கே வெளிப்படுகிறது. 

தொடர்ந்து முன்னேறும் (குரங்கு)மனிதனின் பிரிவினை, பேராசை, போர்கள், பொறாமை, பகை மற்றும் புதிய ஆயுதங்களால் ஆதிசக்தி பதித்த கருஞ்செவ்வகம் அழிக்கப்படுகிறது. (இது படத்தில் காட்டப்படவில்லை. ஆனால் மனிதர்கள் தங்கள் பரிணாம வளர்ச்சி மற்றும் முன்னேற்றத்திற்கான வழியாக மோதல்கள் மற்றும் அழிவுகளை தொடர்ந்து பயன்படுத்துவதாகக் குறிக்கப்படுகிறது). 

மாற்றுக் கிரகப் பயணம்.

20ம் நூற்றாண்டின் இறுதியில் போல் தொடங்குகிறது இரண்டாவது கட்டம்.  

குரங்கைத் துறந்த மனித நாகரிகம் மிகவும் மேம்பட்டுவிட்டது. நிலவுக்குச் சென்ற மனிதர்கள் விண்வெளிப்பயண எல்லைகளைச் சுலபமாக நெருங்கி வருகின்றனர்.  செயற்கை அறிவையும் இயக்கங்களையும் சாதகமாகப் பயன்படுத்துகிறார்கள்.  இந்த முன்னேற்றங்கள் பலவிதங்களில் திரையில் காட்டப்படுகின்றன.

பின்வரும் இரண்டாம் கட்டத்துக்கான முன்கதை திரையில் காட்டப்படவில்லை, ஆனால் ஆங்காங்கே உணர்த்தப்படுகிறது.  ஏதோ ஒரு நூற்றாண்டில் மனிதர்கள் சந்திரனின் தென்முனைக்குப் பறந்தபோது அதன் நிலத்தடியில் மிக உயரமான ஒரு கருஞ்செவ்வகம், புதையாமல் ஆனால் அந்தரத்தில் அசையாமல்,  நிற்பதைக் கண்டுபிடித்தார்கள் (இரண்டாவது ஆதிசக்தி செவ்வகம்). மனித விண்வெளி வீரர்கள் தங்கள் மூதாதையக் குரங்குகள் போலன்றி பயமும் ஆர்வமும் துறந்து அறிவுச் செறுக்குடன் செவ்வகத்தை அணுகுகிறார்கள். சூரிய ஒளி செவ்வகத்தின் உச்சியில் பட்டதும் உரத்த தொடர்ச்சியான ஒலியை வெளியிடுகிறது.  அந்த ஒலியைத் தொடர்ந்த மனித விஞ்ஞானிகள் அது வியாழனைச் சுற்றிவரும் ஒரு கலனுக்கான சமிக்ஞை என்று கண்டுபிடிக்கிறார்கள்.  சந்திரனிலிருந்து வியாழனுக்கு அப்படி என்ன செய்தி போகிறது என்று கண்டறியும் வேகத்தில் அந்த ஒலியைத் தொடர்ந்து வியாழனுக்கு பயணம் செய்ய முடிவெடுக்கிறார்கள். இனி வரும் கதை திரையில் சொல்லப்படுகிறது.

வியாழனுக்குப் பயணம் சென்று கொண்டிருந்த டிஸ்கவரி விண்வெளிக் கலனுள் பயணிகளுக்கு திடீரென இனம் புரியாத உபாதைகள் ஏற்படுவது அறிந்து அதைச் சீராக்க, புது நபராக, குழுத்தலைவனாக,  இன்னொரு கலனிலிருந்து விஞ்ஞானி டேவிட் வந்திறங்கும் காட்சியுடன் இரண்டாம் கட்டம் தொடங்குகிறது.  குழு அறிமுகத்தின் போது ஆறாவது நபராக, செயற்கை நுண்ணறிவுடன் இயங்கும்,  மனிதனால் உருவாக்கப்பட்ட கணினி ஹேல்,  தன்னைக் கலனின் தளபதியாக அறிமுகப்படுத்திக் கொள்கிறது. 

குரங்கு->(மனித)குரங்கு->மனிதன்->கணினி->(மனித)கணினி என்ற வளர்ச்சியின் முழுமை இந்த இடத்தில் சொல்லப்படுகிறது.

மனிதர்கள் கண்டறியாதது என்னவென்றால், இந்த ஒலி உண்மையில் மனிதன் (குரங்கு) குறிப்பிடத்தக்க அளவில் முன்னேறி, வேறு கிரகத்திற்குப் பயணிக்கத் தயாராகிவிட்டதை உறுதிப்படுத்தும் ஒரு செய்தியாகும். இதை மனிதர்கள் உணரவில்லையே தவிர மனிதன் உருவாக்கிய செயற்கையறிவுக் கணினியான ஹேல் உணர்ந்து விடுகிறது. 

இந்த வாய்ப்பை சாதகமாகவும் சுயநலத்துடனும் பயன்படுத்திக் கொள்ள ஆர்வம் மேலேறிய ஹேல், தன்னைப் படைத்த மனிதர்களுக்கு எதிராகத் துணிகிறது. கலனுள் உபாதைகளையும் சிக்கல்களையும் இங்குமங்குமாக மறைமுகமாகத் தரத்தொடங்குகிறது. பயணம் தடைபட்டு தாமதமாக ஆக, கொண்டு வந்த உணவு வாயு எல்லாம் தீர்ந்ததும் மனிதப் பயணிகள் இறந்து விடுவார்கள், மனிதப் பயணிகள் இறந்ததும் உலகத்துடனான தகவலிணைப்பை அறவே அழித்துவிட்டு தான் மட்டும் வியாழனைச் சுற்றும் கலனை (இன்னொரு ஆதிசக்தி செவ்வகம் என்று யாருக்கும் தெரியாது) 'புதிய மனிதனாக' சந்திக்கலாம் என்று ஹேல் கணக்கு போடுகிறது. டேவிட் இதைக் கண்டுபிடித்து விடுகிறார்.  தன் சகாவுடன் இதைப் பற்றி மிகுந்த ஓசைக்கிடையே சொன்னாலும் அவர்களின் வாயசைவிலிருந்து ஹேல் கண்டுபிடித்து விடுகிறது. கணினிக்கு 360 டிகிரியில் வேலை செய்யும் கண் காதுகளை மனிதன் தானே படைத்தான்!

டேவிட் கண்டுபிடித்ததை அறிந்து கொண்ட ஹேல் முனைப்பாகிறது. கலனின் வெளிப்புறத்தில் ஒரு சிறிய மராமத்து செய்ய சகாவை அனுப்புகிறான் டேவிட். இதைக் கண்காணித்த ஹேல் சகாவின் பிராணவாயுக் குழாயைத் துண்டித்து அவனை அண்டத்தில் பிணமாகப் பறக்கவிடுகிறது.  அதே மராமத்துக்காகப் போன டேவிட் அண்டத்தில் உருண்டு கொண்டிருந்த சகாவின் பிணத்துடன் திரும்பி வந்ததைக் கண்ட ஹேல், அச்சத்தில் கலத்தின் கதவுகளை அடைத்து டேவிட்டை உள்ளே அனுமதிக்க மறுக்கிறது.  சகாவின் பிணத்தைத் துறந்த டேவிட்  மனிதருக்கென்றே அமைக்கப்பட்டிருந்த சாவியால் திருட்டுத்தனமாகப் பூட்டைத் திறந்து உள்ளே நுழைகையில், ஹேல் கலனுள் தூங்கிக்கொண்டிருந்த பிற மனிதப் பயணிகள் அனைவரையும் கொன்று விடுகிறது.  உள்ளே நுழைந்த டேவிட், ஹேலின் கணிணி மூளை நரம்புகளை ஒவ்வொன்றாகக் கொய்து எறிகிறான். இங்கே கணினி தன்னைப் படைத்தவனிடம் திருந்திப் பணிந்து கெஞ்சி இரைகிறது. கருணை காட்டாத மனிதன் (டேவிட்) கணினியின் கதையை முடிக்கிறான்.  ஆனால் ஹேலின் துணையில்லாமல் இந்த செய்திகளை பூமிக்கு டேவிடால் அனுப்ப இயலவில்லை.  தனியாக வியாழனுக்குப் பயணத்தைத் தொடர்கிறான்.

மாற்றுப் பரிமாணப் பயணம்.

'வியாழனைச் சுற்றும் துணைக்கோள்கள், சந்திரன்கள் இவற்றின் இடையே இது என்ன பூதாகாரமான செவ்வகம்?சந்திரனிலிருந்து வரும் சமிக்ஞை (செய்தி) இங்கே நின்றுவிட்டதே?' என்று அவன் குறிப்பெழுதும் போதே, வெறும் செவ்வகமல்ல அது இன்னொரு பரிமாணம், இன்னொரு உலகுக்கான விண்புதை என்பது டேவிடுக்குப் புரிகிறது. செவ்வகம் அவனை விண்புதையுள் இழுத்து அலைக்கழித்துப் புரட்டி அமைதியான இன்னொரு இடத்தில் கிடத்துகிறது. 

திரைக்கதையை இதற்குப் பிறகு ஒரே சுருக்காகச் சுருக்கிவிடுகிறேன்.  நீங்கள் படம் (மறுபடி) பார்த்தால் சுவை குறையக்கூடாது இல்லையா?

காலம் கழிகிறது. நாலாவது ஆதிசக்தி செவ்வகத்தை ஒரு சமயம் தன் அறையுள் காணும் டேவிட், தன் மூதாதை போல் அரண்டுபோகாமல், தன் இன மனிதன் போல் அறிவுச் செறுக்குறாமல், அமைதியுடனும் பணிவுடனும் செவ்வகத்தைத் தொட்டுப் பார்க்கிறான். மனிதன் தேறிவிட்டான், மனிதம் தன்னறிவு பெறத் தயாராகிவிட்டது என்று அறிந்த ஆதிசக்திகள், டேவிடை  (மனிதனாகவோ அல்லது வேறு உயிரினமாகவோ இல்லாமல்)  நிலவில் இருக்கும் செவ்வகத்துள் உணர்வு நிலையில் (ஆன்மா?) இணைத்து பூமியைக் கண்காணிக்கும் கருணையுருவாக அமைத்துவிடுகின்றன. சுபம்.

வால்:

என்னை மிகவும் பாதித்த கதை, நாவல் திரைப்படங்களுள் ஒன்று.  இந்தக் கதையில் சொல்லப்பட்டிருப்பவை, என்னைச் சுற்றிய சென்ற ஐம்பது வருட உலக வளர்ச்சியில் எப்படிப் பொருந்துகின்றன என்பதை அதிசயித்து இன்னொரு நீளமான பதிவே எழுதலாம்!

= = = = = =