ஒரு அராபிய இரவு...

 சாதாரணமாகவே எனக்கு நாலுகால் செல்லங்களைப் பிடிக்கும்.  நான் செல்லும் இடங்களில் உள்ள செல்லங்களைப் பார்க்கும்போது அவை என்ன செய்கின்றன என்று கவனிப்பது வழக்கம்.  அவற்றைத் தாண்டும்போது அன்பாக குரல் கொடுத்து விட்டு - விசாரித்து விட்டு - வருவேன். 

இந்த குரலே அவைகளுக்கு பழக்கமாகி சில சமயம் என்னைக் கண்டதுமே வாலை ஆட்டி வரவேற்கும் செல்லங்கள் உண்டு.    விரோத மனப்பான்மை இல்லாவிட்டாலும், வாலாட்டாமல் முறைப்பாகவே தாண்டிச் செல்லும் செல்லங்களும் உண்டு.  இவை சற்று முன் ஜாக்கிரதை முத்தண்ணாக்கள்..  

காலை நடைப் பயிற்சியின்போது சுமார் ஏழெட்டு தெருக்களைக் கடக்க வேண்டி இருக்கும்.  எங்கள் ஏரியாவில் செல்லங்கள் கொஞ்சம் ஜாஸ்தி.  (ஜாஸ்தி என்பது தமிழ் வார்த்தை இல்லை என்று நினைக்கிறேன்.  எந்த வார்த்தையிலிருந்து இந்த வார்த்தை உருவாகி இருக்கக்கூடும்?) 

ஜாஸ்தி என்றாலும் ஒரே இடத்தில் அவைகளை பார்க்க முடியாது.  எல்லை பிரித்துக் கொண்டுள்ளன.  தெருவுக்கு நான்கைந்து, இல்லை சமயங்களில் ஒன்றிரண்டு கூடவே இருக்கும்.  சற்றே நீண்ட தெரு ஆயின், நடுவில் ஒரு குறுக்குத் தெரு வந்து சேரும் அல்லவா அந்த இடத்தை எல்லையாக வைத்துக் கொண்டு இரண்டு குழுக்கள் இரண்டு பக்கமுமாய் காணப்படும்.

ஒருநாள் நடைப்பயிற்சியில் நான் பார்த்த காட்சி என்னை அசத்தியது.  அதுவரை யு டியூபில் மட்டுமே நான் கண்டிருந்த காட்சி.  இருங்கள்..  கற்பனையை கன்னாபின்னா என்று ஓடவிடாதீர்கள்.

எங்களுக்கு பால் போடுபவர் பெயர் கவாஸ்கர்.  (ஆனால் Kawaskar என்று K போட்டு தொடங்கும் பெயர்.  ஒருநாள் அவரை ஏன் அந்தப் பெயர் வைத்திருக்கிறீர்கள் என்று கேட்க வேண்டும்)  ஒரு சிலரைப் பார்த்ததும் நமக்குத் தோன்றும் அல்லவா..  இவர் பழகுவதற்கு எளியவர், இவர் கடுமையானவர் என்றெல்லாம்..  பெரும்பாலும் சரியாகவே கணிப்பேன்.  இவர் விஷயத்தில் அப்படி அல்ல! அவரை ஒரு முறைப்பாளராக நினைத்து கண்டுக்காமல் சென்று விடுவேன்.  இங்கு இருந்த பால் போடுபவர்களில் இரண்டு பேர்களிடம் கசப்பான அனுபவங்களை பெற்றபிறகு இவருக்கு மாறினேன்.  அப்போதுதான் தெரிந்தது, எளிமையான, இனிதான, வெள்ளந்தியான மனிதர் என்று.  வயதும் குறைவுதான்.

சில விஷயங்கள் கேள்விப்படும்போது நமக்கு மகிழ்ச்சியைத் தரும்.  அதுவும் நம் சம்பந்தப்பட்ட விஷயங்கள்! நான் அவரிடம் அறிமுகமாகி பால் வாங்குவதற்கு முன்னரே அவர் என்னைப்பற்றி அறிந்து வைத்திருக்கிறார் என்பது ஆச்சர்யம்தானே!  நான் அந்த ஏரியாவுக்கு புதுசு வேற!

என் பையன் அவர் கடையில் (அதே ஏரியாவில் ஒரு கடையும் வைத்திருக்கிறார்) ஏதோ பொருள் வாங்கச் சென்று ஜி பே வேலை செய்யாத நிலையில், "அங்கிள்..  இங்கதான் வீடு..  இதோ கொண்டு வந்து விடுகிறேன்.." என்று சொல்லி இடம் சொல்ல, "அட..  நம்ம ஸ்ரீராம் ஸார் வீடு..  அதைச் சொல்ல வேண்டாமா நீங்க?" என்று பையனை ஆச்சரியப்படுத்தி, அவன் மூலம் என்னையும் ஆச்சர்யப்படுத்தியவர் அவர்.  "அவரோட பேசி இருக்கியாப்பா நீ" என்று கேட்ட மகனிடம் இல்லையென்று தலையாட்டினேன்.  ஆனால் அவர் எப்படி அறிந்திருப்பார் என்று ஓரளவு புரிந்தது.  

என் ஆஸ்தான ஆட்டோக்காரர் அந்த ஏரியாவில் பிரபலம்.  அந்த ஏரியா முன்னாள் தலைவர் இறந்தபோது அவர் உடலை மருத்துவமனையில் இருந்து சீக்கிரம் வாங்க உதவி இருந்தேன்.   சாதாரணமாகவே என் ஆ ஆ என்னை பற்றி பார்ப்பவர்களிடம் எல்லாம் உயர்வு நவிற்சியில் அறிமுகப்படுத்திக் கொண்டிருப்பார்.

எதையோ சொல்ல வந்து எதையோ சொல்கிறேன் என்று உங்களுக்குத் தோன்றலாம்.  அப்படியே எனக்கும் பழகி விட்டது.  ஆனால் ஒரு விஷயத்தைச் சொல்லும்போது மொட்டையாக சொல்லாமல் பின்னணியோடு சொன்னால் நன்றாய் இருக்கும் என்று பட்டது.  அதுதான்....

சொல்ல வந்ததை விட்டுட்டு 'ஜவ்'..வா இழுக்கறியே...  

இதே சோலியா வச்சுக்காதப்பா... அடுத்த வாரமாவது முடிச்சுடுவியா செல்லம்...

==============================================================================================================================

முன்னாள் முதல்வர் கருணாநிதி மரணப்படுக்கையில் இருந்தபோது எழுதியது.  தினமும் ஒரு செய்தி..  சுற்றி நின்று 'முடிந்து போய்விட்டாரா' என்று பார்(கா)த்திருந்த உறவுகளும் நண்பர்களும்..'அண்ணன் எப்போ சாவான்..  திண்ணை எப்போ காலியாகும்' உணர்வும் அதில் இருந்தது என்று தோன்றியது அப்போது.  அதையே கடைசி பாராவுக்கு முதல் பாராவில் சொல்லி இருந்தேன்.  அவர் மறைந்த பின்னும் ஒன்று எழுதி இருந்தேன்.  முதலில் பேஸ்புக்கிலும், அவர் மறைந்தததும் ஆகஸ்ட் எட்டாம் தேதி எங்கள் தளத்திலும் வெளியிடப்பட்டது மீள் பதிவாய்...

எழுதத் துடிக்கும்

விரல்களின் துடிப்பு

எனக்கு மட்டும்தான் தெரிகிறது.

எழுத்து என்று நின்றுபோனதோ

அன்று கொஞ்சம் இறந்துபோனேன்.

படித்த புத்தகங்களும்

படைத்த புத்தகங்களும்

படிக்கக் காத்திருக்கும்

புத்தகங்களுடன்

சுற்றி நின்று

பார்த்துக் கொண்டிருக்கின்றன.

படிப்பு என்று நின்று போனதோ

அன்று கொஞ்சம்

இறந்துபோனேன்.

எதிரில் இருப்பவரிடம்

எண்ணங்களை வார்த்தையாக்கிப்

பேச முடியாமல்

மூச்சுத் திணறுகிறது.

குரல் என்று நின்றுபோனதோ

அன்று கொஞ்சம்

இறந்துபோனேன்.

விரும்பியோ விரும்பாமலோ

நேசிப்பவர்கள் கூட

என் மரணத்துக்காகக்

காத்திருக்கிறார்கள்

கண்ணீருடனும்

கதை வசனங்களுடனும்.

மூச்சு நின்று உடல் இயக்கம்

நிற்பதுதான் மரணமாம்...

இனிதானா இறப்பு? [ஜூலை 27, 2018]

என்னதான் சொன்னாலும் அந்த நேரத்தில்

ஒரு தாக்கம் வந்துடுதுய்யா...

=============================================================================================

சற்றே நீளமாக இருந்தாலும் 'சுவைத்து'ப் படிக்கலாம். Face Book ல் Kongu Foods என்கிற பக்கத்திலிருந்து எடுத்தது. விட்டுப்போன அக்கடை ஒன்றின் பெயரை நானும் அங்கு கமெண்ட்டில் குறிப்பிட்டிருந்தேன்.

“சைவத்தை இழந்த மதுரை”

சாப்பாடுன்னா மதுரை தான்யா! அதை அடிச்சிக்க தமிழ்நாட்டில் ஒரு ஊரே இல்லன்னு பல பேர் சொல்லுவாங்க! அது வெள்ளையா இருக்கவன் பொய் சொல்ல மாட்டான் என்பதை நம்பினா மாதிரி! விதவிதமான அசைவ உணவுகளுக்கும் புரோட்டா கடைகளுக்கும் தள்ளுவண்டி & நடைபாதை இட்லி கடைகளுக்கும் மதுரை இன்றும் புகழ் பெற்ற ஊரு தான்! கறி தோசை, நண்டு ஆம்லெட்..

அயிரைமீன் குழம்பு, வெங்காயக் குடல், விரால்மீன் ரோஸ்ட்னு வித விதமா அசைவத்தில் பட்டையை கிளப்பும் மதுரையில் இப்போ சைவ உணவுகளுக்கு ஏன் அந்தளவு முக்கியத்துவம் தரவில்லை! சைவத்தில் அந்தளவு வெரைட்டி இல்லியா? இல்ல மக்கள் எல்லாம் அசைவத்துக்கு மாறி ட்டாங்களா? அதெல்லாம் ஒன்றுமில்லை வித விதமான சைவ உணவுகளிலும் ஒருகாலத்தில் மதுரை தான் டாப்!

உண்மையில் சமணம் ஒழித்து சைவம் தழைத்த மாமதுரையில் இன்று சைவத்திற்கு பஞ்சம் ஏற்பட்டுள்ளது! ஆம் புகழ் பெற்ற நல்ல சைவ ஓட்டல்கள் எதுவுமே தற்போது மதுரையில் இல்லை என்பது தான் கசப்பான உண்மை. ஒரு காலத்தில் திண்டுக்கல் ரோடு என்று அழைக்கப்படும் நேதாஜி ரோட்டில் மாடர்ன் ரெஸ்டாரெண்டில் இருந்து எழும் சாம்பாரின் மணமே சாம்பிராணி போட்டது போல..

அத்தெருவெங்கும் மணக்கும்! அதிகாலையில் ஃபில்டர் காபியின் மணம் அங்கு பகல் டியூட்டியிலிருக்கும். மாடர்ன் ரெஸ்டாரெண்ட் என்றாலே பலருக்கு இன்றும் நினைவில் ருசிப்பது மதுரை மல்லி போன்ற ஆவி பறக்கும் மென் பஞ்சு இட்லிகளும் அதற்குத் தரும் பருப்பு சாம்பாரும், தாளிப்பு மணக்கும் தேங்காய் சட்னியும், வெங்காயச் சட்னியும், முறுகலான நெய் ரோஸ்ட்டும் ஆனியன்..

ரவா தோசையும், சூடான பூரியும், வெண்ணை போன்ற கிழங்கு மசாலாவும் பொன்னார் மேனியன் போல உளுந்தை அரக்கிசைத்த உளுந்து வடையும், நெய் மணக்கும் வெண் பொங்கலும் அடடா! அதிகாலையில் மீனாட்சியம்மனை தரிசிக்க நிற்கும் அதே கூட்டம் தரிசனம் முடிந்து மாடர்ன் ரெஸ்டாரெண்ட் வாசலில் வந்து விதவிதமான சைவ உணவுகளை தரிசிக்க நிற்கும்!

மாடர்ன் ரெஸ்டாரெண்ட் கூட்டத்தை விரும்பாதவர்கள் மேலமாசி வீதி உடுப்பி ஓட்டலுக்கு படை எடுப்பார்கள். அதிகாலையிலேயே நெய் ஒழுக, வறுத்த முந்திரிகள், திராட்சைகள் தூவி கண்ணைப் பறிக்கும் ப்ளோரசெண்ட் ஆரஞ்சு நிறத்தில் தரும் கேசரி இருக்கிறதே, அதுவே பாண்டிய மன்னர்களுக்கு கேசரி என்ற பெயர் வந்ததற்கு காரணம் என்றால் சட்டென நம்பிவிடலாம்!

ஒரு ப்ளேட் கேசரி ஒரு வெள்ளையப்பம், ஒரு ஃபில்டர் காபி இது மூன்றை மட்டுமே காலையில் உண்டு உயிர் வாழ்ந்த ஜீவன்கள் இன்றும் மதுரையில் தங்கள் உடலின் சர்க்கரை அளவை சரி பார்த்துக் கொண்டு நினைவில் அதை ருசித்து வாழ்ந்து கொண்டிருக்கின்றன! உடுப்பியின் சாம்பார் லேசாக இனிக்கும்! சாம்பாரைக் கொண்டே கடையின் பெயரைச் சொல்லுமளவுக்கு..

அந்த காலத்தில் மாடர்னும், உடுப்பியும் செட் தோசைகளாக இயங்கி வந்தன! எம்ஜிஆர் சிவாஜி ரசிகர்கள் போல இதற்கும் தனித்தனி ரசிகர்கள் இருந்தனர்.! மீனாட்சி அம்மன் கோவிலுக்கு அருகில் கோபு அய்யங்கார் கடை டெண்டுல்கர் இந்திய அணியில் ஆடிய போது உடன் இருந்த ஷேவாக் போல அதிரடி காட்டியது! கோபு அய்யங்காரின் நெய் மினுக்கும் ரோஸ்ட், ஜீரா போளி..

வெள்ளையப்பம், மிளகாய் சட்னி வகைகள் தனித்துவம் மிக்கவை. இந்த உணவுகளின் மீது ஆசை வந்துவிடக்கூடாது என்பதற்காகவே இந்தக் கடைக்கு முதுகு காட்டி கோவிலில் அம்மன் வீற்றிருப்பதாக ஐதீகம் என்றால் நம்பிவிடலாம். பட்டணம் பக்கோடா, காரக்கறி கிழங்கு, மிளகு சேவு, சீரணி, தவள வடை, இனிப்பு அப்பம், முட்டாசு, நெய் இட்லி சாம்பார், போண்டா..

இப்படி மதுரையின் புகழ் சொல்லும் சைவ ஓட்டல்களும் அந்த மெனுக்களும் உணவுகளும் ஏராளம்! சிற்றன்னங்கள் எனப்படும் தக்காளி, லெமன், புளியோதரை, வெண் பொங்கல், மல்லி சாதம் போன்ற சாத வகைகளுக்கு என்றே சவுராஷ்டிரா நண்பர்கள் வசிக்கும் மஹால், அலங்கார் தியேட்டர், தினமணி டாக்கீஸ் பகுதிகளில் பல பொங்கல் கடைகள் துவங்கி அதில் சில..

இன்றும் தங்களது உணவுச் சேவையை ஆற்றி வருகின்றன. இத்தனை உணவு களேபரங்களுக்கு நடுவில் 1950களில் சத்தமே இல்லாமல் மேலகோபுரத் தெருவில் மதுரை நாக்குகளை சமோசா, கச்சோரி, வித விதமான சப்பாத்தி சப்ஜி, மசாலா டீ என வடநாட்டு உணவுகளைக் கொடுத்து தன் வசப்படுத்தி இருந்தது மதுரை மண்ணுக்கு துளியும் சம்மந்தம் இல்லாத டெல்லி வாலா ஸ்வீட்ஸ்!

பின்னாளில் இதே மாடர்ன் ரெஸ்டாரண்ட்டுக்கும், உடுப்பி ஓட்டலுக்கும் நடுவில் வந்து கம்பீரமாக வந்து அமர்ந்த ‘ஆரியபவன் உணவகத்தின் தாய்வீடு தான் டெல்லி வாலா! ஆரியபவன் மதுரையில் துவங்கப்பட்ட பின்பு தான் அல்வா, லட்டு, மைசூர்பாக், ஜிலேபி தவிர வேறு இனிப்புகளும் இருக்கின்றன என மதுரை மக்கள் ஞானம் பெற்றனர். ஆரியபவன் நோக்கி படையெடுத்தனர்.

பட்டிக் காட்டான் மிட்டாய் கடையை பார்த்தது போன்ற எனும் பழமொழி உண்மையானது! இட்லி, பொங்கல், தோசை என்று இல்லாது ஆலு சப்பாத்தி, கீரை சப்பாத்தி, முள்ளங்கி சப்பாத்தி என சப்பாத்திகளில் பல வகை, பாலிலேயே அரிசியை வேக விட்டு செய்யும் பால் பொங்கல், அரைத்துவிட்ட சாம்பார், பெசரட் & செட் தோசைகள், பாண்டிய நாட்டில் சோளாப்பூரி & சென்னா..

என்று ஆரியபவன் வெரைட்டி வெரைட்டியாக பல உணவுகளை அறிமுகப்படுத்தியது! இதுவரை ஸ்வீட் காரம் காபி எனில் உடுப்பியின் கேசரியும், வெள்ளையப்பமும், ஃபில்டர் காபியும் குடித்துப் பழகிய மதுரை மக்கள் இப்போது பாஸந்தியும், சமோசாவும், மசாலாபாலும் என்று ஆரியபவனுக்கு ஆதரவு தந்து தமிழருவியானார்கள். ஆரியபவன் ஸ்வீட்ஸ், செயின் ஓட்டல்கள்..

என விரிவடைந்து பை நைட் என்று தூங்கா நகரின் இமையை இழுத்துப் பிடித்து நிறுத்தியது! நவரத்தின குருமாவும், மில்க் பரோட்டாவும், பால் பொங்கலும், சாம்பார் வடையும், தயிர் வடையும், ஸ்பெஷல் ரவா எனப்படும் ஆனியனும் மசாலாவும் கலந்த மெகா முருகல் ரவா தோசையும், பெசரட்டும், உப்புமாவும், கேரட் குருமா செட் தோசையும் மதுரை நாவுகளை பல ஆண்டுகளுக்கு..

அடிமைப்படுத்தி வைத்திருந்தன! மதிய சாப்பாடெல்லாம் தெய்வ லெவலில் இருக்கும் 1989இல் ஒரு அன்லிமிடெட் சாப்பாடு ₹20 தான்! நெய்யில் ஆரம்பித்து இறுதியில் பாயாசம் வரை அப்படி அத்தனை மெனுக்கள்! இடையில் இதே உடுப்பி தங்கள் கடையை ஆரியபவனிடம் தந்துவிட்டு தங்கள் கொடியை வாலண்டியராக இறக்கிக் கொண்டனர்! அந்த இடத்தில் ஆரியபவன் தங்களது..

மதிய மீல்ஸ் செக்‌ஷனை ஆரம்பித்து வெகு நாட்கள் வெற்றிக் கொடியை பறக்கவிட்டனர்! மதுரையில் ஆரியபவன் எனும் கோஹினூர் வைரத்தின் பேரொளியிலும் மனோரமா ஓட்டல், பெரியார் பேருந்து நிலையம் அருகில் கே.பி.எஸ், அசோக் பவன், வசந்த பவன், பரசுராம் என தனக்கென்று தனித்துவ உணவு வகைகளை கொண்ட பல சைவக்கடைகள் மினுக்கிட்டன!

உடுப்பி போல ஆரியபவனின் கொடியும் ஓர் நாள் கீழிறிங்கியது.! அவர்கள் இப்போது அந்தத் தொழிலிலேயே இல்லை! மாடர்ன் ரெஸ்டாரெண்ட் மட்டும் இன்னும் பழைய ஜமீனாக வலம் வருகிறது! கோபு அய்யங்கார் கோவிலுக்கு வரும் பக்தர்களிடம் சரணடைய மனோரமாவும் இப்போது கைமாறிவிட்டது! இன்று மதுரையில் சபரிஷ், டெம்பிள் சிட்டி, நடிகர் பரோட்டா சூரியின் அம்மன்..

போன்ற உணவங்கள் இருந்தாலும், அந்த காலத்து உடுப்பி, மாடர்ன் போல அல்லது சுனாமியாய் வந்த ஆரியபவன் போல உயர் தரமான சைவ ஓட்டல்களோ அல்லது விதவிதமான ருசி மிகுந்த சைவ மெனுக்களோ மதுரையில் அருகிவிட்டது! பாரம்பரியம் மிக்க சிறந்த சைவ உணவுகளுக்கு ஒரு நல்ல கடை மதுரையில் தற்போது இல்லை என்பதே நெஞ்சம் கனக்கும் உண்மையாகும்!

{இதே காலகட்டத்தில் மதுரையில் இருந்த வேறு சைவ ஓட்டல்களின் பெயர்கள் இப்பதிவில் விட்டுப் போயிருந்தால் விபரம் அறிந்தவர்கள் கமெண்ட்டில் தெரிவிக்கவும்}

வெங்கடேஷ் ஆறுமுகம் - Face Book -KonguFoods Page .

"எங்க ஊர்யா அது.. எப்படி மறக்க முடியும்?"

===================================================================================================

Face Book ல் படித்த இன்னொரு சுவையான தகவல்...

மேஜை டிராயரைத் திறந்து ஒரு கடிதத்தை எடுத்துக் கொண்டு எனக்கு அருகில் வந்தார் மெளனி. அது அமெரிக்காவிலிருந்து வந்த கடிதம்; அதன் தலைப்பு

நுனிகள் இரண்டையும் விரல்களால் கெட்டியாகப் பிடித்தபடி கடிதத்தை என்னிடம் காட்டி, இதைப்படி என்றார் அவரிடம்

'கடிதத்தை என்னிடம் கொடுங்கள், சார், படிக்க சுலபமாக இருக்கும்', என்றேன்.

அவர் கொடுக்கவில்லை. "இப்படியே படி”, என்றார்.

'கடிதத்தைத் துக்கிக் கொண்டு ஓடிவிட மாட்டேன். இங்கே கொடுங்கள்...... என்று சிரித்தேன்.

அவர் கடிதத்தை தன் கையிலிருந்து விடுவிக்க விரும்பவில்லை: சும்மா இப்படியே படி, வெங்கட்ராம்!”

- அமெரிக்காவிலிருந்து ஆல்பர்ட் ஃபிராங்களின்

எழுதிய கடிதம் அது. தமிழில் தேர்ச்சி பெற்ற அந்த அமெரிக்கர் மெளனியின் சிறு கதைகளின்பால் பெரு மோகம் கொண்டார். மெளனியின் இரண்டு சிறுகதைகளை அவர் ஆங்கிலத்தில் மொழி பெயர்த்தார். 'கருமேகங்களுக்கு இடையில் ஒரு மின்னல்’ என்று மெளனியை அமெரிக்க வாசகர்களுக்கு அறிமுகப்படுத்தினார்; இரண்டு கதைகளும் நியூயார்க்கர் என்னும் அமெரிக்கப் பத்திரிகையில் வெளியாயின. தன்

உத்தியோகத்துக்கு ஒரு வருடம் சம்பளம் இல்லாத லீவ் போட்டு விட்டு, மெளனியின் மற்ற சிறுகதைகள் அனைத்தையும் மொழி பெயர்க்கப் போவதாய் ஆல்பர்ட் ஃப்ராங்ளின் கூறியிருந்தார். இந்தத் தகவல்களை மெளனியும்,

க. நா. சு.வும் என்னிடம் கூறியிருந்தார்கள்.

--- அந்த அமெரிக்கர் எழுதிய கடிதத்தைத்தான் என் கண்களுக்கு முன்னால் காட்டிப் படிக்கும்படி சொன்னார் மெளனி. அவருடைய ஒரு கதையை மீண்டும் படித்ததாகவும், அது இந்தியத் தத்துவத்தை நுட்பமாகவும், அழகாகவும் பிரதிபலிப்பதாயும் ஃப்ராங்களின் பாராட்டி எழுதியிருந்தார். நானும் பிரகாஷூம் படித்தானதும், கடிதத்தை ஜாக்கிரதையாக மேஜை டிராயரில் வைத்து விட்டு மெளனி உட்கார்ந்தார்.

எம்.வி.வெங்கட்ராம்

நன்றி: அழியாச்சுடர்கள்

பெருமையான விஷயம்யா..

==============================================================================================

இன்றைய நிலையில் தக்காளி கிலோ 80 ரூபாய்க்கு இறங்கி விட்டது. கடந்த இரண்டு மாதங்களில் தக்காளி விற்று கோடீஸ்வரர்கள் ஆனவர்கள் பற்றியெல்லாம் படித்தோம். அந்த ஸ்டேஜில் வெளியிட்டிருக்க இருக்க வேண்டிய துணுக்கு இது! இது பார்த்ததில் ரசித்தது!

என்னமா ஐடியா பண்ணியிருக்கு பயபுள்ள...

======================================================================================================

ஒரு அராபிய இரவு...

பேசாம துபாய்க்கே திரும்பிப் போயிடலாம் போல...

=============================================================================

நியூஸ் ரூம் - பானுமதி வெங்கடேஸ்வரன்

- எளிதில் கிடைக்கும் போலி பாஸ்போர்ட் கள், எப்படி தடுப்பது என்று புரியாத அதிகாரிகள். 

- கடந்த ஐந்து ஆண்டுகளில் குறைந்த பட்ச இருப்புத் தொகையை பராமரிக்காதது, கூடுதல் ஏ.டி.எம்.பரிவர்த்தனைகளை மேற்கொண்டது மற்றும் குறுஞ்செய்தி சேவைகள் வழங்கப்பட்டது ஆகியவற்றுக்காக வசூலித்த வகையில் ரூ.35,000 கோடி வங்கிகள் எட்டியுள்ளன.

- பொதுமக்கள், தொலைத்த, திருடு போன போன்கள் குறித்து www.sancharsathi.com என்னும் இணைய தளத்தில்I I M.E.I என்ற எண்ணை உள்ளீடு செய்து புகார் அளிக்கலாம். பின்னர் 14422 என்ற எண்ணிற்கு குறுஞ்செய்தி அனுப்பினால் அந்த ஃபோன் பயன்பாட்டில் உள்ளதா? டவர் போன்ற விவரங்கள் அனுப்பப்படுமாம். அதைக் கொண்டு சைபர் கிரைம் உதவியோடு மீட்கலாமாம். வீட்டில் ஒரே ஒரு ஃபோன் தான் உள்ளது என்பவர்கள் என்ன செய்வார்கள்?

- சென்னை விரைவு ரயில்களில் 30 சவரன் நகை கொள்ளை.

- எவரெஸ்ட் சிகரத்தில் வெளிநாட்டவர் ஏற்றுவதற்காக கட்டணத்தை ரூ.12 லட்சமாக உயர்த்த நேபாள அரசு முடிவு செய்துள்ளது.

- உயர் மதிப்பு கொண்ட இரண்டாயிரம் ரூபாய் நோட்டுகள் திரும்ப பெறப்பட்டதில் வங்கிகளுக்கு வாடிக்கையாளர்களை விட, வணிக நிறுவனங்களிடமிருந்தே அதிகம் பெறப்பட்டது தெரிய வந்துள்ளது. - அதுதானே சாத்தியம்

- பெங்களூரின் பிரசித்தி பெற்ற ராமேஸ்வரம் கஃபே என்னும் ஹோட்டலின் எல்லா கிளைகளிலும் தினமும் அனைத்து ஊழியர்களும் தேசிய கீதம் பாடிய பிறகே வியாபாரம் துவங்குகிறதாம். ஜெய் ஹிந்த்! வாழ்க வளமுடன்!

==============================================================