நான் தரிசனம் செய்த கோயில்கள் – நெல்லைத்தமிழன் ஐந்து துவாரகைகள் யாத்திரை – பகுதி 38

 

சென்றவாரம் விருந்தாவனத்திலிருந்து புறப்பட்டு குருக்ஷேத்திரம் வந்தது வரை எழுதியிருந்தேன்.  குருக்ஷேத்திரத்தில் நாங்கள் தங்கியிருந்த அறை நன்றாகவே இருந்தது. இரவு குருக்ஷேத்திரத்தில் தூங்கிவிட்டு காலையில் 6 மணிக்கு அருகிலிருந்த பிரம்மசரோவர் என்று அழைக்கப்படும் பிரம்மாண்டமான ஏரியில்   குளிக்கச் சென்றோம்.

நாங்கள் தங்கியிருந்த இடம்

இரவு உணவு.  தங்கியிருந்த அறை

பிரம்மசரோவர் ஏரி. 

இது பிரம்மாவினால் உண்டாக்கப்பட்டதாம். இந்த இடத்திலிருந்துதான் பூமிப்பந்தை உருவாக்கினார் என்பது ஐதீகம். மஹாபாரத யுத்தத்தின்போது இங்குதான் துரியோதன் கடைசியில் ஒளிந்துகொண்டான் என்றும், பிறகு வீமனால் அறைகூவல் விடப்பட்டு கடைசியில் மடிந்தான் என்று சொல்கின்றனர். மகாபாரத யுத்தத்தில் வெற்றிபெற்ற பிறகு யுதிஷ்டிரர், இந்த ஏரியின் நடுவே பெரிய கோபுரத்தை உண்டாக்கினாராம். இந்த ஏரியையும் அதன் பெருமையையும் 11ம் நூற்றாண்டில் அல் பெரூனி என்ற வரலாற்று ஆசிரியர் குறிப்பிட்டிருக்கிறாராம்.

சரோவர்க்குச் செல்லும் அழகிய பாதை

நடைப்பயிற்சிக்கு உகந்த இடம்.

கண்ணுக்கெட்டிய தூரம் வரை ஏரி. (நெல்லையில் பெருங்குளம் என்று ஒரு ஊர் உண்டு. அங்குள்ள ஏரி/பெருங்குளம் அவ்வளவு பெரியது. இது ஒரு திவ்யதேசமும் கூட)

நல்லா நடந்துவிட்டு மாலை நேரத்தில் பெஞ்சில் அமர்ந்து ஓய்வெடுக்கலாம் (ஏரியைப் பார்த்து பெஞ்சை வைக்கவில்லையே).  பெஞ்சைப் பார்த்தும் எனக்கு அதிரடி அதிரா நினைவு வந்தது.

ஏரியின் கரைகளில் மஹாபாரதக் காட்சிகள் பலவும் சிற்பங்களாக (டெராகோட்டா) இருந்தன.

ஒவ்வொரு சிற்பத்தின் கீழும் அது மஹாபாரதத்தில் எந்த நிகழ்வைக் குறிக்கிறது என்பதை ஹிந்தியிலும் ஆங்கிலத்திலும் எழுதியிருந்தனர்.

ஏரியைச் சுற்றிலும் நீளமாக நடைபாதை இருந்தது. குளித்துவிட்டு அறைக்குச் சென்று உடை மாற்றிக்கொண்டு, ஏரியில் சில பல புகைப்படங்கள் எடுத்துக்கொண்டு அங்கிருந்து சிறிது தொலைவு நடந்து திருப்பதி பாலாஜி கோவிலுக்குச் சென்றேன். இது திருமலை திருப்பதி தேவஸ்தானத்தால் ஆங்காங்கே அமைக்கப்படும் வெங்கடேசப் பெருமாள் கோவில்.

பிரம்மசரோவரிலிருந்து தங்கியிருந்த இடத்துக்கு நடந்துசெல்லும் வழியில் பார்த்த அழகிய கிருஷ்ணர் சிற்பம்.  குருக்ஷேத்திரம் என்பது மஹாபாரத யுத்தம் நடைபெற்ற பூமி என்பதையும், அங்கு லக்ஷக்கணக்கான வீரர்கள், பாண்டவர்கள், கௌரவர்கள் மற்றும் ஸ்ரீகிருஷ்ணன் யுத்தம் செய்த பூமி என்பதையும் நினைத்தாலே பிரமிப்பாக இருக்கும்.

உள்ளே திருப்பதி பாலாஜி, அங்கிருப்பதைவிட பிரம்மாண்டமாகத் தெரிந்தார். தரிசனத்திற்குப் பிறகு தங்குமிடத்திற்குத் திரும்பவும் நடந்து சென்றேன்.  காலை பத்து மணிக்கு சாம்பார், ரசம், கறியமுது, கூட்டு, வடை, பாயசம் என்று நல்ல விருந்து. இதற்குப் பிறகு நாங்கள் குருக்ஷேத்திரத்தில் இரண்டு இடங்களைப் பார்க்கப்போகிறோம். முதலாவது அர்ஜுனனுக்குக் கண்ணன் கீதை உபதேசித்த இடம் என்று சொல்லப்படுவது. இரண்டாவது பீஷ்மர் மஹாபாரத யுத்தத்தில் பத்தாம் நாள் வீழ்ந்துபட்ட இடம். இந்த இரண்டையும் அடுத்த வாரம் காண்போமா?

 (தொடரும்)