வெள்ளி வீடியோ 171215 : கார்குழல் தடவி கனியிதழ் பருகி...

     சில வாரங்களுக்கு முன் தேங்காய் நடிப்பில் ஒரு பாடல் பார்த்தோம்.  இந்தப் பாடலின்  காட்சியிலும் தேங்காய் உண்டு!

      நாளை மார்கழி ஒன்று.  ஏஞ்சல் அவங்க ஊர் பனி பற்றி ஒரு பதிவு போட்டிருந்தார்.

     எஸ் பி பியின் இந்தப் பாடல் எனக்கு மிகமிகப் பிடித்த பாடல்களில் ஒன்று.   வாலியின் வரிகளில் எம் எஸ் வி இசையில் 1976 ஆம் ஆண்டு வெளியான 'முத்தான முத்தல்லவோ' படப்பாடல்.

     முதல் சரணம் முடிந்து பல்லவி பாடும்போது எஸ் பி பி குரலில் செய்யும் சேஷ்டை கிஷோர் சில பாடல்களில் ஹிந்தியில் செய்திருப்பது.

வானத்தில் ஆயிரம் தாரகைப் பூக்கள் 

வேடிக்கைப் பார்க்கையிலே 

கானத்தில் நாங்கள் கலந்திருந்தோம்

இனி வேறென்ன வாழ்க்கையிலே 

இனி வேறென்ன வாழ்க்கையிலே 

கோமகள் என்னும் பூமகள் 

நெஞ்சில் சாய்ந்துவர 

தாமரைப்பொய்கை 

போலொரு வைகைப் 

பாய்ந்து வர 

தேவலோகமும் 

தெய்வகீதமும் 

ராஜயோகமும் 

சேர்ந்து வந்ததோ...

     "ஆசை நாடகம் ஆடிப்பார்க்கவும் ஓசை கேட்குமோ பேசக்கூடுமோ" என்கிற வரிகளையும், "தேவலோகமும் தெய்வகீதமும் ராஜயோகமும் சேர்ந்து வந்ததோ"  என்னும் வரிகளையும் எஸ்பிபி பாடும் வசீகரம் இருக்கிறதே..     நான் அடிக்கடி கேட்டு ரசிக்கக் காரணமான இடங்கள்.  

     கடைசி சரணத்தை முடித்துவிட்டு நேரடியாக பல்லவிக்கு வராமல் மீண்டும் 'கார்குழல் தடவி கனியிதழ் பருகி என்று பாடலை முடிக்கும் இடமும் ரசிக்கத்தக்கது.

     காட்சியில் எனக்குப் பிடிக்காத ஜெய்கணேஷ்.  அவருடன்  தேங்காய் சீனிவாசன்.    இசை அமைப்பாளராம்!  தயவு செய்து காட்சியைப் பார்க்காமல் பாடலை மட்டும் கேட்கவும். 

     முன்பு 'எஸ் பி பி தனிப்பாடல்கள்' என்று நான் வைத்திருந்த கேஸட்டில் ''இசைபாடி...''  என்று எஸ்பிபி முடித்தவுடன்  கமல் குரலில்  "சின்ன இதழ்கள்.... செம்பவளக்கன்னங்கள்..  சிவந்த மேனி...  செதுக்காத பொற்சிலை... ஆ....  வண்ணவிழி மலராதோ... வாய்திறந்து பேசாதோ...  பள்ளிகொள்ள விடமாட்டேன்...  என்னுயிரே எழுந்தென்னைப் பார்...  பார்... பார்..."  அலற, எஸ் பி பி குரலில் "கண்ணே நான் பாட கற்சிலையும் எழுந்தாடும்..." என்று ஒலிக்கத் தொடங்கும்!  இந்தப் பாடல் முடிந்ததும் அந்த நினைவில் மனதில் அந்த வரிகள் ஒலிக்கத் தொடங்கி விடுகின்றன!

தமிழ்மணம்.