திங்கக்கிழமை :: குழிப்பணியாரம், தேங்காய் பர்பி - நெல்லைத்தமிழன் ரெஸிப்பி -

தேங்காய் பர்பி என்பது பாரம்பர்யமான இனிப்பு. நிறைய கடைகளில் இதனைக் கெடுத்துவைத்திருப்பார்கள். இது ரொம்ப சுலபமான இனிப்பு வகை. எனக்குத் தெரிந்த வரையில் அடையார் கிராண்ட் ஸ்வீட்ஸ் & ஸ்னாக்ஸில் பாரம்பர்யமாகச் செய்வதுபோல் தேங்காய்பர்பி கிடைக்கும்.  

இங்கு தேங்காய் துருவல் கடைகளில் ஃப்ரெஷ் ஆகக் கிடைக்கும். கறுப்பு இல்லாமல், வெண்மையாகத் துருவச் சொல்லி வாங்கினேன். என்னிடம், என் ஆபீஸ் நண்பர் வாங்கிவந்திருந்த பால்கோவா (அம்பாசமுத்திரம்) இருந்தது. அதனால் தேங்காய் பர்பி செய்துபார்த்தேன். இது பாரம்பர்ய செய்முறையில் செய்யவில்லை.

என்ன பொருட்கள் வேணும்?

தேங்காய்த் துருவல் 1 கப்

சர்க்கரை 1 கப்

பால் கொஞ்சம் (ஓரிரண்டு டேபிள் ஸ்பூன்கள். இதுவும் அவசியமில்லை)

பால்கோவா – 2 ஸ்பூன் எடுத்துக்கொண்டேன் (இது தேங்காய் பர்பிக்கு அவசியம் இல்லை.  வெறும் கோவா உபயோகப்படுத்தலாம். பால்கோவா உபயோகப்படுத்தினால் சர்க்கரையின் அளவைச் சிறிது குறைத்துக்கொள்ளலாம்)

எப்போதும்போல், ஏலப்பொடியும், முந்திரி கொஞ்சமும் (நான் எதற்குமே எவ்வளவு தேவையோ அதைவிட ரெண்டு மூணு மடங்கு முந்திரி சேர்ப்பேன்).

வேற எதுவும் தேவையில்லை. இல்லை அழகுபடுத்துகிறேன் பேர்வழி என்றால், குங்குமப்பூ சேர்க்கலாம். தேங்காய் பர்பியை வேறு கலரில்தான் நான் பார்க்கணும்னா, மஞ்சள் கலரோ, கேசரி பவுடரோ சேர்ப்பார்கள். நான் இவை எவற்றையும் உபயோகப்படுத்தலை. உங்களையும் படுத்தலை.

எப்படிச் செய்வது?

முதல்ல முந்திரியை சிறியதாக்கி, நெய்யில் வறுத்து வைத்துக்கொள்ளுங்கள்.

ஒரு தட்டில் கொஞ்சம் நெய் விட்டு தடவிக்கொள்ளுங்கள். இதில்தான் கடைசியில் தேங்காய் பர்பியைப் போடப்போகிறோம்.

தேங்காய்த் துருவலை கொஞ்சம் பால் விட்டு நன்றாக மிக்சியில் அரைத்துக்கொள்ளுங்கள். 1-2 ஸ்பூனுக்குமேல் பால் விடக்கூடாது. ரொம்ப வழ வழன்னு வேண்டாம்.  தேங்காய் துருவலை நல்லா அரைத்துக்கொள்ளவில்லை என்றால், பர்பி சாப்பிடும்போது திரி திரியா தேங்காய் அகப்படும்.

வாணலில, அரைத்த தேங்காய் விழுதையும் ஜீனியையும் போட்டுக் கிளறவும். கொஞ்சம் கிளறுவதை நிறுத்தினீங்கனா அடி பிடிக்கும் வாய்ப்பு இருக்கு. சூடு கம்மியா இருக்கணும். இல்லைனா வெள்ளைத் தேங்காய் விரைவில் ஆழ்ந்த பிரௌன் நிறத்துக்குப் போயிடும்.

கொஞ்சம் இறுக ஆரம்பிக்கும்போது, பால்கோவாவும் சேர்த்துக் கிளறி, வாணலியில் ஒட்டாமல் கொஞ்சம் சுருண்டு வரும்போது ஏலப்பொடி சேர்த்துக் கொஞ்சம் கிளறவும். பிறகு இதனை நெய் தடவிய தட்டில் அழுத்தாமல் பரத்திவைக்கவும். மேலே கொஞ்சமாக முந்திரித் துண்டங்களைத் தூவி, ஆறிய பின்பு, நமக்குத் தேவையானபடி சதுரமாகவோ டைமன்ட் ஷேப்பிலோ வில்லைகளைப் போடலாம்.

பால்கோவாவும் சேர்ப்பதால், தேங்காய்பர்பி கொஞ்சம் சாஃப்டா இருக்கும்.

நான் செய்திருப்பதில் அளவுக்கு அதிகமாக முந்திரிப் பருப்புகளைச் சேர்த்துள்ளேன். அவ்வளவு போடவேண்டாம். எனக்கு மிகவும் பிடித்திருந்தது. நல்ல வேளையாக என் ஹஸ்பண்ட் இங்கு வந்தபோது 4 துண்டங்கள் மீதி இருந்தன. அவளுக்கும் ஒன்றைக் கொடுத்து, வசிஷ்டர் வாயால் ‘பிரம்ம ரிஷி’ பட்டம் வாங்கியாகிவிட்டது.

பாரம்பர்ய முறை என்ன?  தேங்காய் துருவலும் சர்க்கரையும் மட்டும்தான்.  மிகக் கொஞ்சமாக முந்திரித் துண்டங்கள் (சிறிய சைஸ்) சேர்ப்பார்கள். வேறு ஒன்றும் கிடையாது.

நான் சொல்லியிருக்கும் முறையில் செய்துபார்த்துவிட்டுச் சொல்லுங்கள்.

அன்புடன்

நெல்லைத்தமிழன்

===============================================================

குழிப்பணியாரம்

‘நான் சென்னை சென்றிருந்தபோது வீட்டில் நான் ஸ்டிக் ஆப்பக்கடாயைப் பார்த்தேன். உடனே, இங்கு கேரளத்தவர்கள் செய்வதுபோல் அப்பம் செய்யலாமே என்று தோன்றிவிட்டது. அங்கிருந்து எடுத்துக்கொண்டுவந்துவிட்டேன். அதற்கு அப்புறம் செய்யும் சந்தர்ப்பமே அமையவில்லை. எனக்கும் ஆப்பக்கடாயை எப்படி உபயோகப்படுத்துவது என்றும் தெரியவில்லை. இந்தத் தடவை என் ஹஸ்பண்ட் இங்கு வந்திருந்தபோது, ஊருக்கும் கிளம்பும் நாள், தோசை மாவை வைத்து குழிப்பணியாரம் செய்யேன் என்றேன். இட்லி/தோசை மாவு பாக்கெட்டில் முக்காலுக்கும் மேல் இருந்தது. அதை வைத்து அவள் செய்தாள். என் வேலை படம் பிடிக்கவேண்டியது.

நீங்கள் எல்லாரும் செய்துபார்த்திருக்கக்கூடும்.. ரொம்ப சுலபமான செய்முறை. ஆனால் மிக ருசியாக இருந்தது.

தோசைமாவின் ருசியைக் கூட்ட,  பச்சை மிளகாய், வெங்காயம், கொஞ்சம் இஞ்சி, கொத்தமல்லித் தழை, கொஞ்சம் கருவேப்பிலைத் தழைகள் எடுத்துக்கோங்க. அவற்றை பொடிப்பொடியாக திருத்திக்கொள்ளுங்கள். 

இதனை தோசைமாவுடன் சேர்த்துக் கலந்துகொள்ளுங்கள். அதோட கொஞ்சம் மைதாமாவும் சேர்த்துக்கோங்க. இதுல தேவைனா, கொஞ்சம் கேரட்டைச் சீவிப் போடலாம். குடமிளகாயையும் பொடியாகத் திருத்திப்போடலாம். பார்க்க வண்ணமயமா இருக்கும். ஆனால் அன்று இந்த இரண்டையும் போடவில்லை.  இதோட கடுகு திருவமாறி சேர்க்கவும். உப்பு சரிபார்த்துக்கோங்க.

கடாயின் குழிகளில் எண்ணெய் தடவி (ஊற்றி இல்லை) அடுப்பில் வைங்க. கொஞ்சம் சூடானதும், அதில் ஸ்பூனால் மாவை விடுங்கள். கொஞ்ச நேரத்துல பணியாரத்தைத் திருப்பிப்போடுங்கள் (கம்பிமத்தாப்பு கம்பியாலயோ அல்லது சிறிய மரக் குச்சியை வைத்தோ). நல்ல பொன்னிறமா இருக்கும். இரண்டு பக்கமும் வெந்ததும் எடுத்துத் தட்டுல வச்சிருங்க.

இதுக்கு தொட்டுக்க எனக்கு எதுவுமே தேவையிருக்கவில்லை. மிளகாய் காரத்தோட ரொம்ப நல்லா இருந்தது. தேவைனா, வெங்காயச் சட்னி செய்துகொள்ளலாம்.

நான் ‘குழிப்பணியாரம்’, அடையாறு கிராண்ட் ஸ்வீட் & ஸ்னேக்ஸ் கடையில்தான் செய்வதைப் பார்த்திருக்கிறேன். டிரெடிஷனல் குழிப்பணியார கடாயில் செய்வார்கள். எண்ணெயை ஒவ்வொரு குழிக்குள்ளும் ஊற்றி, மாவை மிதக்கவிட்டு, நன்கு பொரிந்துவந்தவுடன் திருப்பிப் போட்டு, பிளேட்டில் கொடுப்பார்கள். அந்த எண்ணெய் அளவைப் பார்த்தபின்பு, ‘குழிப்பணியாரம்’ என்றாலே எனக்கு அலர்ஜி. (இனிப்பைத் தேடி ஓடும் கட்டெறும்பு நான். ஆனால் எண்ணெய் அதிகமாகச் சேர்ந்த எந்த ஐட்டமும் எனக்குப் பிடிக்காது. அதுவும் கையில் தொடும்போது என் விரலில் எண்ணெய் படிந்தால் அந்த ஐட்டத்தை நான் சாப்பிடமாட்டேன். எல்லாம் ஹெல்த் பயம்தான்)  நான் ஸ்டிக் கடாயைப் பார்த்ததனால்தான் நான் வாங்கிவந்தேன். இதில் எண்ணெய் மிகவும் குறைவு (இல்லைனே சொல்லிடலாம்). குழிப்பணியாரமும் யம்மி, ஹெல்த்துக்கும் நல்லது.

செய்துபார்த்துவிட்டுச் சொல்லுங்கள். இல்லை, இது சர்வசாதாரணமானது என்று நினைத்தால், நீங்கள் செய்யும்போது சொல்லுங்கள், நான் வந்து சாப்பிடுகிறேன்.

அடுத்து இந்தக் கடாயைவைத்து, கேரளத்தவர்கள் செய்யும் ‘உன்னியப்பம்’ செய்து பதிவு அனுப்புகிறேன் (நல்லா வந்தால்).

அன்புடன்

நெல்லைத்தமிழன்

==============================================================================

தமிழ்மணம்.