நல்ல விஷயங்கள் நாலுக்கும் மேல... மற்றும் நான் படிச்ச கதை

 நடக்குமோ..  நடக்காதோ...   செய்தி இனியது!

80 Wash நிறுவனம் உலர் நீராவி மற்றும் அயன் இல்லாத கதிர்கள் கொண்ட ஐஎஸ்பி ஸ்டீம் தொழில்நுட்பம் மூலம் அரை கோப்பை தண்ணீரில் சலவைத்தூள் இல்லாத துணி துவைக்கும் நுட்பத்திற்கு காப்புரிமை பெற்றுள்ளது. இந்த ஸ்டார்ட் அப்பின் மிஷின்கள் முன்னோட்ட அடிப்படையில் சோதனை செய்யப்பட்டு வருகின்றன.  

நன்றி JKC ஸார்.

====================================================================================================

சென்னை:  தமிழக அரசு வழங்கிய 25 லட்சம் ரூபாய் ஊக்கத்தொகையை தான் படித்த 4 கல்லூரிகளுக்கு நன்கொடையாக வழங்கினார் சந்திரயான் 3 திட்ட இயக்குனர் விஞ்ஞானி வீர முத்துவேல்.

==================================================================================================

=============================================================================================

மாணவர்களுக்கு தன்னம்பிக்கையை விதைக்கும் அரசு பள்ளி தலைமையாசிரியை...

===========================================================================================

உதவும் கருணை கரங்கள் அறக்கட்டளை.  ஸ்ரீ காஞ்சி மகாபெரியவர் ஜீவாத்ம கைங்கரியம் 

இந்த அமைப்பினர் கும்பகோணத்திலும் சுற்றியுள்ள பகுதிகளிலும் ஆதரவற்றோர் மனநலம் பாதிக்கப்பட்டோர்களைத் தேடிச் சென்று நித்தமும் கஞ்சி மற்றும் அன்னதானம் வழங்குகின்றனர்..

தஞ்சை, திருவாரூர், நாகை, மயிலாடுதுறை மற்றும் அரியலூர் மாவட்டங்களில் ஆதரவற்ற சடலங்களுக்கு காவல் துறையினர் முன்னிலையில் இறுதிச் சடங்குகளைச் செய்து வருகின்றனர்..

கண் தானம், உடல் உறுப்பு தானம் செய்யப்பட்டவர்களது  இறுதி காரியங்களுக்கு Cooler Box மற்றும் வாகனத்தை எவ்வித கட்டணமும் இன்றி வழங்குகின்றனர்..

அவசர நிலையில் குருதிக் கொடையும் வழங்குகின்றனர்..

கோடை காலத்தில் ஏழைக் குழந்தைகளுக்கும்  மாணவர்களுக்கும்  காலணிகளை தானமாக  வழங்கி வருகின்றனர்..

ஸ்ரீ காஞ்சி மகாபெரியவர் ஜீவாத்ம கைங்கரியத்தினை திரு S. வெங்கடேசன் என்பவர் நடத்தி வருகின்றார்..  இவர் கும்பகோணத்தில் சுற்றுலா (Tourist Taxi) வழிகாட்டியாக வருகின்றார்..  இவரது சிற்றுந்தில் அன்பின் நெல்லைத் தமிழன் அவர்களுடன் நான் பயணித்திருக்கின்றேன்.. ஆயினும் வெங்கடேசன் அவர்களைப் படம் பிடித்துக் கொள்ளத் தவறி விட்டேன்..

மக்கள் சேவகரான வெங்கடேசன்  கௌரவ டாக்டர்  விருது பெற்றிருக்கின்றார்..

மேலும் விவரங்களுக்கு :-

உதவும் கருணை கரங்கள் அறக்கட்டளை.

பதிவு எண் : 109/2019

ஸ்ரீ காஞ்சி மகாபெரியவர் ஜீவாத்ம கைங்கரியம் 

4/ மாரியம்மன் கோயில் தெரு, மேலக்காவிரி, கும்பகோணம்..

தொலைபேசி எண்கள்:

95974 99003, 99942 01996.

- துரை செல்வராஜூ -

==============================================================================================

சமூக வலைதளங்களை சிலர் நல்ல விஷயங்களுக்கு பயன்படுத்துகிறார்கள்.

சிறுமி தேவிகா தனது பள்ளிக்கு பஸ் ஏற 2 கிலோமீட்டர் தூரம் நடந்து சென்றபடி இருந்திருக்கிறார்.

திருவனந்தபுரம்:

தற்போதைய நவீன காலத்தில் செல்போன் உள்ளிட்ட எலக்ட்ரானிக் பொருட்களின் பயன்பாடு தவிர்க்க முடியாத ஒன்றாக மாறிவிட்டது. அதிலும் சிறிய குழந்தைகள் கூட செல்போனை சர்வ சாதாரணமாக பயன்படுத்துவதை காண முடிகிறது.

செல்போன் பயன்படுத்துவோர் பேஸ்புக், டுவிட்டர், யூடியூப் உள்ளிட்ட சமூக வலைதளங்களில் கணக்கு வைத்திருக்கின்றனர். அவ்வாறு கணக்கு வைத்திருப்பவர்கள் அதிக லைக்குகளை வாங்குவதற்காக வித்தியாசமான வீடியோக்கள் மற்றும் புகைப்படங்களை பதிவிடுவதை வாடிக்கையாக கொண்டிருக்கிறார்கள்.

அதே சமூக வலைதளங்களை சிலர் நல்ல விஷயங்களுக்கும் பயன்படுத்துகிறார்கள். அதாவது மருத்துவ சிகிச்சைகளுக்கு பணம் இல்லாமல் தவிப்பவர்கள், படிக்க வசதியில்லாமல் தவிக்கும் குழந்தைகள் உள்ளிட்ட தகவல்களையும் வெளியிடுகிறார்கள்.

இதன்மூலம் கஷ்டப்படக்கூடிய நபர்கள், பணம் உள்ளிட்ட பல்வேறு உதவிகளை பெற முடிகிறது. அதேபோன்ற ஒரு செயலில் கேரளாவை சேர்ந்த பள்ளி மாணவி ஒருவர் செயல்பட்டுள்ளார்.

புற்றுநோய் பாதித்து அவதிப்பட்டு வரும் தனது பக்கத்து வீட்டை சேர்ந்த பெண் ஒருவரின் மருத்துவ செலவுக்கு நிதி திரட்டுவதற்காகவே அவர் யூடியூப்பில் கணக்கு தொடங்கியிருக்கிறார். அதன்மூலம் அவருக்கு கிடைத்த 3 லட்சம் ரூபாயை அந்த பெண்ணின் சிகிச்சைக்கு கொடுத்திருக்கிறார்.

கேரள மாநிலம் திருச்சூர் பகுதியை சேர்ந்தவர் ராஜன். பான் ஷாப் நடத்தி வருகிறார். இவரது மகள் தேவிகா. 7-ம் வகுப்பு படித்து வருகிறார். ராஜனின் சொற்ப வருமானத்திலேயே அவரது குடும்பம் இயங்கி வருகிறது. இதனால் தனது மகளுக்கு சைக்கிள் கூட வாங்க வழியில்லாமல் இருந்திருக்கிறார்.

இதன் காரணமாக சிறுமி தேவிகா தனது பள்ளிக்கு பஸ் ஏற 2 கிலோமீட்டர் தூரம் நடந்து சென்றபடி இருந்திருக்கிறார். இதனால் சைக்கிள் வாங்குவது சிறுமியின் கனவாக இருந்துள்ளது. சிறுமியின் பக்கத்து வீட்டில் வசித்து வருபவர் பிரேமா. அவர் புற்றுநோயால் அவதிப்பட்டு வருகிறார்.

அந்த பெண்ணின் குடும்பமும் மிகவும் கஷ்டப்பட்ட குடும்பம். இதனால் அந்த பெண்ணுக்கு சிகிச்சை பெறக்கூட போதிய பணம் இல்லை. இதனையறிந்த சிறுமி தேவிகா, அந்த பெண்ணுக்கு உதவுவதற்காக யூடியூப்பில் "தேவுஸ் வேர்ல்ட்" என்ற பெயரில் கணக்கை தொடங்கினார். அதில் தனது கனவு மற்றும் தனது வீட்டின் அருகே சிகிச்சைக்கு பணம் இல்லாமல் தவிக்கும் பெண் பற்றிய தகவல்களை பதிவிட்டார்.

மேலும் சிறுமி தேவிகா தனக்கு அதிர்ஷ்ட குலுக்கலில் கிடைத்த சைக்கிளை விற்று, அதில் கிடைத்த பணத்தை புற்றுநோய் பாதித்த பெண்ணின் சிகிச்சைக்கு வழங்கினார். சிறுமி தேவிகாவின் இந்த செயலை திருச்சூர் மாவட்ட கலெக்டர் கிருஷ்ண தேஜா அறிந்தார்.

அவர் சிறுமியை நேரில் வரவழைத்து பாராட்டினார். மேலும் சிறுமியின் செயல்பாடு குறித்து கலெக்டர் தனது பேஸ்புக் பக்கத்தில் பதிவிட்டார்.

அதன்பிறகே சிறுமியின் செயல் வெளியுலகுக்கு தெரியவந்தது. இதையடுத்து பலரும் சிறுமிக்கு பண உதவி செய்தனர். மேலும் பலர் சிறுமிக்கு சைக்கிளும் வாங்கிக் கொடுத்தனர். மொத்தம் சிறுமிக்கு 12 சைக்கிள்கள் கிடைத்துள்ளன. அவை அனைத்தையும் விற்றார்.

நிதியுதவி மற்றும் சைக்கிள்களை விற்று கிடைத்த பணம் என மொத்தம் ரூ.3 லட்சம் நிதியை சிறுமி திரட்டியிருக்கிறார். அவற்றை புற்றுநோயால் பாதித்து அவதிபட்ட பெண்ணுக்கு சிகிச்சைக்காக வழங்கியிருக்கிறார்.

தனது ஆசையைப்பற்றி சிந்திக்காமல், பரிசாக கிடைத்த சைக்கிள்களையும் விற்று, அதில் கிடைத்த பணத்தை புற்றுநோய் பாதித்த பெண்ணுக்கு வழங்கிய மாணவி தேவிகாவை பலரும் பாராட்டி வருகிறார்கள்.

நன்றி: மாலை மலர்

============ ==========

 

நான் படிச்ச கதை (JKC)

 கதை : காசி

கதையாசிரியர் பாதசாரி

 ஆசிரியர் பற்றிய குறிப்பு

பாதசாரி என்பது புனை பெயர். இயற்பெயர் நா விஸ்வநாதன். கோயம்புத்தூரில் வசிக்கிறார்.

இன்றைய விமரிசனத்திற்கு உள்ளாகும் காசி என்ற இக்குறுங்கதை எஸ்ரா மற்றும் பலரால் சிறந்த சிறுகதையாக தேர்ந்தெடுக்கப்பட்டுள்ளது. நான் கதை முழுதும் தரவில்லை. சுருக்கம் போலும் இங்கு எழுதவில்லை. கதையின் சுட்டிகள் கடைசியாக தரப்பட்டிருக்கின்றன. கதையைப் பலரும் யூடியூபிலும் பேசி வெளியிட்டுள்ளனர். பவா செல்லதுரை உட்பட. 

அறிவுப்பசி தீர்க்க ஆராய்ச்சி செய்து மடிந்த ‘ஆயிஷா’ கதையை மறந்திருக்க மாட்டீர்கள்.  அதே போன்று தன்னைத் தானே அறிய முற்படும் ஒரு இளைஞனின் கதை தான் ‘காசி’ என்ற கதை. கதை என்று சொல்வதை விட ஒரு மனோதத்துவ ஆராய்ச்சி, ஒரு டயரிக் குறிப்பு எனலாம். “சாவை எடுத்து அளந்து பார்த்தவன் காசி.”

காசியின் கதை குணா என்ற அவனுடைய நண்பன் சொல்வது போல் எழுதப்பட்டுள்ளது. 

காசியின் வாழ்க்கையை மூன்று பருவங்களாக பிரிக்கலாம். குணாவுக்கு  காசியுடன் நட்பு என்பது கடந்த 10 ஆண்டுகளாகத்தான். காசியின் தற்போதைய வயது 29. அதற்கு முன் நடந்த விசயங்களை பிறர் சொல்ல அறிந்ததாகக் கூறுகிறார்..

//காலேஜ் பருவத்தில்தான் காசி எனக்கு நட்பானான். ‘ஹிப்பாக்ரசி’யை அம்பலப்படுத்தி மனிதர்களை, எங்களை, பரிகசித்துக்கொண்டு கில்லாடிகளாக உணர்ந்து குதூகலித்துத் திரிந்த எங்கள் நட்பு புத்தகங்கள் மூலம் பலப்பட்டது. வித்தியாசமானவர்களாக மாற்றி மாற்றி மெச்சிக் கொண்டு நடந்தோம்.//

//காசியின் அப்பா, காசிக்கு ஒரு வயதாகியிருக்கும் போது மனைவியை இழந்தார். காசிக்கு நான்கு வயது மூத்த ஒரு அக்கா உண்டு. வேறு உடன்பிறப்பு இல்லை. காசியின் அப்பா இரண்டாவதாகத் திருமணம் செய்து கொள்ளவில்லை. குழந்தைகள் இரண்டோடு, காசியின் பெரியப்பா – தன் அண்ணன் – குடும்பத்தோடு ஒட்டிக் கொண்டு விட்டார். மில் வேலை. சாந்தமான குணம்.//

//அவன் அம்மா இறந்து ஆறாவது மாதமோ, வெய்யிலில் கற்றாழை அடர்ந்து சூழ்ந்த ஒரு வறட்டு இட்டேறி வழியே பாட்டியின் இடுப்பில் கதறிக் கொண்டு வருகிறான் காசி. அவனது பெரியப்பா வீட்டு வாசலில் கொண்டு வந்து இறக்கிவிட்டுத் திரும்பிப் பார்க்காமல் போகிறாள் ஒரு வெள்ளைச்சீலைக் கிழவி. அது காசியின் அம்மாவைப் பெற்ற அம்மா. மாமன்மாரின் பகல் தூக்கத்தைக் கலைத்து குழந்தை அழுதால் யாரால் சகிக்க முடியும்.//

//அவனுடைய பள்ளி வாழ்க்கையைப் பற்றி அதிகம் அவன் சொன்னதில்லை. நான்காம் வகுப்பு படிக்கும்போது காதலில் தோல்வி என்றும், ஹைஸ்கூலில் பிரேயரின்போது காலையில், கனிகள் அல்லது ஐசக் நியூட்டன் பற்றி கட்டுரை படித்து ஸ்கூலையே அறுப்பான் என்றும் ஏதோ சொல்லியிருக்கிறான். எஸ்.எஸ்.எல்.சியில் மிக அதிக மார்க்குகள் வாங்கினான் என்பது எனக்குத் தெரிந்தது.//

//76-இல் காலேஜ் விட்டு வெளியே வந்தான். இரண்டு பேப்பர்கள் ஃபெயில். அப்புறம் அதை எழுதவே இல்லை. //

இப்படியாக முதல் இரண்டு பருவங்களை விவரிக்கிறான் குணா. பின்னர் வரும் 10 வருடங்கள் கதையை குணா சொல்வதாக கதை அமைகிறது.

கதையின் துவக்கம்:

//போன வருஷம் இதே மாதத்தில் காசி தற்கொலை செய்துகொண்டு பிழைத்து -விட்டான். கல்யாணம் செய்துகொண்ட நான்காவது மாதம், சவர பிளேடால் கழுத்தை ஆழ அறுத்துக் கொண்டான். உறைந்த ரத்தப் படுக்கை மீது நினைவிழந்து கிடந்தவனை கதவை உடைத்துப் புகுந்து எடுத்து ஜி.எச்.சில் அட்மிட் செய்தார்கள்.

ஊரில் நான்கு பேர் ‘மறைலூஸ்’ என்று கருதும் காசியைப் பற்றி எனக்கு அப்படி நினைக்க முடியவில்லை. எல்லோரையும் போல, தனக்கும் இந்த நான்கு பேருக்கும் இடையிலான ‘ஷாக்’ அப்ஸார்பரை’ பழுது பார்த்து சரியாக வைத்துக் கொள்ளாமல், இவர்கள் உறவென்று மெச்சுகிற பாதையின் குண்டு குழிகளில் அடிபட்டுக் கொண்டிருக்கிறான் என்றுதான் சொல்லத் தோன்றுகிறது.

நேற்று காசியிடமிருந்து கடிதம், ‘காசுதான் சுதந்திரம் காசுதான் சுதந்திரம் காசுதான் சுதந்திரம்’ என்று ஸ்ரீராமஜெயம் மாதிரி இன்லேண்டு முழுக்க எழுதியிருக்கிறான். //

இப்படி துவங்கும் கதை காலம் இடம்  என்று சீரில்லாமல் எப்படியோ எங்கெங்கோ  செல்கிறது.

சுருக்கமாக காசியின் இந்தப் பத்து வருடக் கதையை  இப்படி சொல்லலாம்.

ஒழுக்கச்சிதைவு.:

கல்லூரியில் படிக்கும் காலத்தில் எல்லா இளைஞர்கள் போலவும் புரட்சியாளனாக தோற்றமளிக்க விரும்பினான் காசி. சிகரெட், குடி பழக்கங்களை பற்றுகிறான்.

அறிவு ஜீவி:

இலக்கியத்தில் பற்று. நிறைய புத்தகங்கள் வாங்குகிறான். படிக்கிறான். தத்துவப் புத்தகங்கள் அதிகம். கவிதைகளில் ஈடுபாடு, எழுதுதல்.

காதல்:

காசி நான்கு பெண்களை காதலித்திருக்கிறான். முதலில் தெலுங்கு கற்றுக்கொள்கிறேன் என்று தெலுங்கு வாத்தியாருடைய பெண்ணைக் காதலிக்கிறான். அடுத்து PUC படிக்கும்போது அடுத்த தெருவில் இருந்த பெட்டிக்கடைக்காரரின் பெண்ணைக் காதலிக்கிறான். காதல் மயக்கத்தில் கவிதை எல்லாம் எழுதுகிறான். அடுத்து ஒரு வேலையில்லா பட்டதாரிப் பெண்ணைக் காதலிக்கிறான். அவள் வேலை கிடைத்து பொள்ளாச்சி போய்விட்டாள்..

//இன்னொரு காதல் இரண்டு வீட்டிலும் அம்பலமாகிவிட்டது. காசியின் பிடிவாதத்தால் காசியின் அப்பா பெண் கேட்டுப் போனார். வேலை ஏதும் பார்க்கட்டும். யோசிக்கலாம் என்று சொல்லி அனுப்பினார்கள்…. சூதுவாது தெரியாத பெண். ஒரு போலீஸ்காரருக்கு மனைவியாகிப் போனாள்.//

இதற்கு மேலும் ஒரு கல்லூரி பேராசிரியையை ஒரு தலையாக காதலித்திருக்கிறான். கடிதங்கள் எழுதியிருக்கிறான். அடி வாங்காதது தான் மிச்சம்.

வேலை:

எப்படியாவது ஒரு வேலை வேண்டும் என்று ஒரு டைம் கீப்பர் வேலையில் சேர்ந்தான். முடியவில்லை. பூப்பந்து விளையாட்டில் சிறந்தவன் என்பதன் அடிப்படையில் விளையாட்டுக் கோட்டாவில் NTC மில்லில் வேலை. பின்னர் கொஞ்ச நாட்கள்

//ரேடியோ நிலையத்தில் தினம் போய்க் குலாவினான். ‘நாளொரு தகவல்’, ‘உங்கள் கவனத்திற்கு’ என்று கண்டதை எழுதிக் காசு வாங்கினான். மாதம் 75,100 என்று வருவதை டீ, சிகரெட், கள்ளென்று செலவழித்துச் சுற்றினான்.//

சில நண்பர்களின் தயவால் மார்க்கெட்டிங் மேனேஜர் என்று தற்போது ஊர் ஊராக சுற்றுகிறான். கதையின் ஆரம்பத்தில் மெடிக்கல் ஷாப் வைத்திருப்பதாக கூறுகிறான்.

//”இல்லடா குணா… எனக்கு வந்து ஜாப் ஒத்து வரலைடா… எந்த ஜாப்புமே ஒத்து வராது. என்னாலே கடிகார மிரட்டலை சகிக்க முடியலே. தினம் தினம் தினம் ஒரே நேரத்திலே அத அதச் செய்யறது, செயற்கையா ‘டாண்’ணு ஒரே நேரத்துக்கு எந்திரிக்கறது, செயற்கையா தினமும் ஒரே நேரத்தைப் புடிச்சிட்டு வெளிக்கு உட்கார்றது, ‘கன்’ டயத்துக்கு குளியல்… கட்டுப்பாடான தினம் தினம் தினம் தினம்கள் எனக்கு சலிக்குதுடா… வெறுத்து, குமட்டி…. இதுக்கு மேலே பொறுப்புன்னா பயம் வேறே… அதிகாரி உருட்டல்… ஓவர் டைம்… அப்பா!//

கல்யாணம்:

 //….ஒரு ஜின்னிங் பாக்டரியில் பஞ்சு பிரிக்கப் போகும், உறவுக்காரப் பெண்ணை கல்யாணத்திற்குக் கேட்டு அப்பாவை வாதித்தான்….அப்பாவும் யாரையோ பார்த்து கேட்டுவிட்டார். ‘பெண் கேட்க என்ன தைரியம்’ என்று அப்பன் குடிகாரன் தூதுவரை ஏசி அனுப்பினானாம்.//

குணாவின் முயற்சியால் ஒரு பணக்கார வீட்டுப் பெண்ணை மணம் முடிக்கிறான். ஏற்கனவே கல்யாணம் ஆகி விவாகரத்து பெற்ற பெண்.

//மூன்று பெண்களில் நடுப்பெண். ‘ஆணாக’ சுதந்திரம் பெற்று வளர்ந்த பெண். கல்லுமில்லை, புல்லுமில்லை ‘இம்பொட்டண்ட்’ என்று தாலியைக் கழற்றி வீசிவிட்டு வந்துவிட்டவள்.//

//காசி கல்யாணம் முடித்து ஒரு மாதம்கூட கூடி வாழவில்லை…. ‘வீட்டு மாப்பிள்ளையா அங்கயே இருக்கணுமாம். நடுத்தரக் குடும்பங்கள் வாழற எங்க லைனுக்கு அவளால் வந்து குடும்பம் பண்ண முடியாதாம். பணக்காரங்களக் கண்டா பொறாமைப்படற லொக்காலிடியாம் எங்களது. அப்பாவையும் ‘மாமனார்’ வீட்டுலையே வந்து இருக்கறதானா இருக்கலாங்கறார்’ //

//என்னால முடியலே. மறுபடியும் பழைய கோளாறு மனசிலே கிளம்பிருச்சுடா குணா. அப்பாகிட்டே வந்துட்டேன். அப்பா மனம் விட்டுப் போச்சு. ‘இந்தப் புத்தகமெல்லாம் படிக்காம, இதப் பிரிஞ்சு என்னாலே இருக்க முடியாதுப்பா… என்னாலே அந்த வீட்லே சமாளிக்க முடியாதுப்பா… அவங்க கெளரவத்துக்கு ஈடுகட்டிப் போக முடியாதுப்பா… எனக்கு பயமா இருக்குது… அங்கிருந்தா நான் தற்கொலை பண்ணக்குவேன்பா’ ன்னு கதறினேன்டா. ‘//

//இருமனமொப்பிய திருமண விலக்கு (Mutual Divorce) கிடைத்து விட்டதாகச் சொன்னான். முதல் முறை விலக்கு பெற்றது போலவே தனது அதே ‘குடும்ப வக்கீல்’ மூலமாகத்தான் தன் பெண்ணுக்கு இம்முறையும் அதைச் செய்ய வேண்டும் என மாஜி மாமனார் பிடிவாதம் பிடித்து இழுத்ததில் கொஞ்சம் கால தாமதமாகிக் கிடைத்தது என்றான்.//

சாமியார்களின் அறிமுகம்:

 //ஒரு சாமியாருடன் தீவிரப் பழக்கமாயிருந்தது எனக்கு. …இங்கிலீஷ் சாமியார் அவர்….சாமியிடம் காசியை அழைத்துப் போனேன். எல்லாவற்றையும் சொன்னான். பத்து வயதுப் பையனிடம்கூட மனதைக் கழற்றிக் கையில் தந்துவிட்டு, ‘பாத்துட்டு மறக்காம தாடா’ என்ற போகிற தன்மையில் காசி இருப்பதை சாமியாரின் மூளை புரிந்து கொண்டுவிட்டது.

‘நாலுபேர் மாதிரி லைப்பிலே செட்டில் ஆகணுங்கற ஆசையே அத்துப் போச்சு சாமி இவனுக்கு’

‘கடவுள் நம்பிக்கை உண்டா?’

காசியே பதில் சொன்னான். “இல்லே சாமி… ஆனா ‘கடவுள்’னு ஒருத்தர் இருந்துட்டாக்கூட பரவால்லேன்னு படுது சாமி!”

‘நல்லாப் பேசறீங்களே; இதுக்கு முன்னாடி யாராவது சாமியார்கிட்டே போயிருக்கீங்களா?”

”போயிருக்கேன் சாமி. சகஜ சைதன்யா கிட்டே போனேன். தியானம் கத்துக்கப் போனேன். மந்திரம் தந்தார்.//

//..குருநாதர்கிட்டே உன்னப் பத்திக் கேட்டேன். இன்னும் பத்து வருஷத்துக்கு உனக்கு சோதனைகள் பாக்கின்னார். மொதல்லே உடம்போட நீ இருந்து பழகணும்” என்று முகத்துக்கு நேராக காசியிடம் சொன்ன சாமி, அவனை ஆசிரமத்திற்குள் அழைத்து வர வேண்டாமென்று என்னிடம் ரகசியமாகச் சொல்லிவிட்டார்.//

//திருப்பதி போய் வந்தானாம்….அப்படியே போய்விட்டு, திருவண்ணாமலை வந்த போது ராம்சூரத் குமார் என்றொரு யோகியைச் சந்தித்ததாகச் சொன்னான். ‘நீ கதவைத் தட்டும் விதம் சகிக்கக் கூடியதாக இல்லை’ என்பதையே கோபம் தணிந்த கடைசியிலும் தனக்கான ஒரே ஆசிச் செய்தியாக அவர் வழங்கி அனுப்பியதையும் அதில் பூரண அர்த்தமிருப்பதாகவும் சொன்னான்.//

மனக்குழப்பங்கள்:

//”தூங்கின திருப்தியே இருக்கிறதில்லே. ஓயாம கனவுகள். பகல்லே யோசனை யோசனைகள்… எனக்குள்ளே நான் ஓயாம நடமாடிட்டு இருக்கற மாதிரி… சில சமயம் எனக்குள்ளே இருக்கற ‘நான்’ தான் நிஜம் – இந்த வெளியிலே ‘நான்’ சூட்சுமம்னு பயமா தோணுதடா…”//

//காபிக் கரண்டியாலே வாழ்க்கையை அளந்து பார்த்ததா எலியட் சொல்லுவான். எதை எடுத்து அளக்கன்னே எனக்கு முடிவுக்கு வர முடியலே…”//

//காபியா, டீயா என்று கேட்கும்போது வெடுக்கென்று ஒரு விருப்பத்தைச் சொல்ல முடியாதவன் காசி. ஆனால் சாவை எடுத்து அளந்து பார்த்திருக்கிறான்.//

//எனக்கு வேலைக்குப் போக பயமாயிருக்குடா… ‘ஃபியர் ஆஃப் ரெஸ்பான்ஸிபிலிட்டி அண்ட்ஃப்ரீடம்’ டா.//

//ஒரு பைத்தியக்காரனுக்கும் எனக்கும் என்ன சின்ன வித்தியாசமென்றால் நான் பைத்தியமில்லை அவ்வளவுதான்.//

//ஒரு முட்டாள் மனநல வைத்தியன் நானூறு ரூபாய் காசுக்காக நான்கு தரம் ‘ஷாக்’ ட்ரீட்மெண்ட் செய்துவிட்டான். கறிவேப்பிலை கருகும் வாசனை தலைக்குள்ளிருந்து வினாடிதோறும் அடிப்பதாக மனப் பிரமையில்(?) பரிதவித்துப் போனானாம் காசி. நிறைய மாத்திரைகள்… மனம் அடங்கவில்லை. ஷணப்பித்தன் – ஷணச்சித்தன் என்றானான் காசி.//

//ஜி.எச்.சில் இரண்டு வாரங்கள் இருந்தான் காசி. அதி தீவிர சிகிச்சைப் பிரிவில் முதல் வாரம். கழுத்தில் ஒரு சின்ன ஆபரேசன். கால்மாட்டில் கேஸ் நோட்டீஸ்.

Personality disorder, Affection seeking phenomenon, Advised psycho therapy.//

தற்கொலை முயற்சிகள்:

பெண் கிடைக்காத விரக்தியில்// …தவித்துக் கொண்டே இருந்தவன் ஒரு மாலையில் தேங்காய் பர்பியைக் கடித்துக் கொண்டே இரண்டு பாட்டில்கள் டிக்-20ஐக் காலி செய்தான். விஷயம் தெரிய, பெரியம்மா அவசர அவசரமாக நாய்ப்பீயைக் கரைத்து வாயில் ஊற்றி விட்டாள். மீண்டும் வேறொரு மனநல டாக்டர். மாத்திரைகள்.//

கல்யாணம் ஆனபின் மனைவியுடன் குடும்பம் நடத்த முடியாமல் போனபோது

 //மீண்டும் தூக்க மாத்திரைகள் விழுங்கிவிட்டான். ஆத்மார்த்தமான தற்கொலை முயற்சி. கடிதம் வேறு எழுதி வைத்துவிட்டு கட்டிலேறினான். கதவைத் தாளிட்டிருந்தான். நம்பிக்கையோடு கண் மூடினான். அடுத்த நாள் காலையில் கண் விழித்துவிட்டது.//

இக்கதையின் ஆரம்பத்தில் குறிப்பிட்டபடி

 //போன வருஷம் இதே மாதத்தில் காசி தற்கொலை செய்து கொண்டு பிழைத்து -விட்டான். கல்யாணம் செய்துகொண்ட நான்காவது மாதம், சவர பிளேடால் கழுத்தை ஆழ அறுத்துக் கொண்டான். உறைந்த ரத்தப் படுக்கை மீது நினைவிழந்து கிடந்தவனை கதவை உடைத்துப் புகுந்து எடுத்து ஜி.எச்.சில் அட்மிட் செய்தார்கள்.//

இவ்வாறு காசியின் 10 வருட வாழ்க்கை குறிப்பை மனோதத்துவ ரீதியாக ஆராய்ச்சி செய்கிறார் ஆசிரியர். கதையின் முடிவு என்று ஒன்று தனியே இல்லை.

ஒன்னுமே புரியலை. கதையில் இருந்து பிட் பிட்டாக சில வரிகளை தலைப்பு கொடுத்து கொட்டி விட்டால் போதுமா? நடந்தது என்ன? என்ற கேள்விகள் தோன்றலாம்.

எனக்கு தோன்றியது இவ்வாறு.

காசியை ஒரு முரண்பட்ட பாத்திரமாக சிருஷ்டித்திருக்கிறார் ஆசிரியர். காசி கூறுவது ஒன்று செய்வது ஒன்று.

* பைத்தியத்திற்கும் எனக்கும் என்ன வித்தியாசம் என்றால் நான் பைத்தியம் இல்லை. இவ்வாறு கூறுபவன் பைத்தியத்திற்கு ஷாக் சிகிச்சை நான்கு முறை எடுத்துக் கொள்கிறான்.

* கடவுள் நம்பிக்கை இல்லை என்று கூறுபவன் திருப்பதிக்கு சென்று மொட்டை போடுகிறான்.

* 100கி.மீ தூரத்தில் உள்ள ஊருக்கு டிக்கெட் எடுப்பான். ஆனால் பத்து கிமி யில் இறங்கி ஊர் திரும்புவான்.

* சாதாரண முடிவெடுக்க பயப்படுபவன் தற்கொலை முயற்சி செய்ய  பயப்படவில்லை . . அதுவும் நான்கு முயற்சிகள்.

இப்படி பல முரண்பாடுகள்.

ஆகவே  ஆசிரியர், ஆசிரியரின் நண்பர்கள் பலரின் குணாதிசயங்கள், மற்றும் சந்திப்புகள் இவற்றை ஒன்று சேர்த்து  காசி என்ற கற்பனைப் பாத்திரத்தை உருவாக்கி சிறுகதை இலக்கணத்தில் அடங்காத ‘புதுக்கதை’ யாக எழுதியிருக்கிறார் என்பதே என் அனுமானம்.

கதையின் சுட்டிகள்.

அழியாச் சுடர்கள்

காசி-பாதசாரி சிறுகதைகள்.காம் 

கதையைப் படிக்க பொறுமை வேண்டும். அரைத்த மாவையே திரும்பத் திரும்ப அரைப்பது போல் தோன்றும். காலம், இடம் சட்டு சட்டென்று மாறி வரும். ஒரே இருப்பில் படிக்க முடியாது. 

இக்கதையை இருவர் விரிவாக ஆராய்ந்து விமரிசனக் கட்டுரைகள் எழுதியிருக்கிறார்கள். சுட்டிகள் கீழே. 

வல்லினத்திலும், சொல்வனத்திலும் கதை பற்றிய விமரிசனங்கள் வெளியாகி உள்ளன. 

வல்லினம் சுட்டி - விமர்சனம்

சொல்வனம் சுட்டி - விமர்சனம்

கடைசியாக ஒரு ஜோக்.

 ‘கடவுள் நம்பிக்கை உண்டா?’

காசியே பதில் சொன்னான். ” இல்லே சாமி… ஆனா ‘கடவுள்’னு ஒருத்தர் இருந்துட்டாக்கூட பரவால்லேன்னு படுது சாமி!”

இந்த பதிலை ஒரு நடிகரும் சொன்னார் என்று படித்திருக்கலாம். அவர்தான் காசி என்று கூறலாமா?

ஜோக் 2.

ஒருவன் மனநோய் மருத்துவரிடம் “ஒருத்தனுக்கு பைத்தியம் குணம் ஆகி விட்டது என்பதை எப்படி தெரிந்து கொள்வீர்கள்” என்று கேட்டான்.

அவர் “ பல வழிகள் இருக்கின்றன. உதாரணமாக ஒரு பக்கெட்டில் தண்ணீர் வைத்து விட்டு அதற்கு பக்கத்தில் ஒரு ஸ்பூனையும், மக்கையும் வைத்து விட்டு அவனைக் கூப்பிட்டு பக்கெட்டை காலி பண்ண சொல்வோம். தண்ணீரை ஸ்பூனால் எடுத்து ஊற்றிக் கொண்டிருந்தால்  அவனுக்கு குணமாகவில்லை என்று முடிவு செய்வோம்.” 

“அது சரி நீங்களானால் என்ன செய்வீர்கள்?” என்று கேட்டார்.

கேள்வி கேட்டவர் “மக்கால் தண்ணீரை மொண்டு ஊற்றுவேன்” என்றாராம்.

மருத்துவர் “இதைத் தான் நாங்கள் செமி என்று கூறுவது.” என்றாராம்

“ஏன் அப்படி?” என்று கேட்டானாம்

“முழுதும் குணமடைந்தவன் பக்கெட்டை கவிழ்த்து விட்டு சென்று விடுவான்” என்றாராம் மருத்துவர்.