சிவாஜி - முன்னும் பின்னும் !

பாலு மகேந்திராவின் ஊமைக்குயில் படத்திற்காக, பெங்களூரில் ஒரு ஸ்டுடியோவில், நடித்துக் கொண்டிருந்தேன். அப்போது, பக்கத்து செட்டில் பிரபல இந்தி நடிகர் திலீப்குமார் இருப்பதாக சொன்னார்கள். விசாரித்ததில், அவர் செட்டில் இல்லை; ஸ்டுடியோவை சுற்றி ஓடிக் கொண்டிருக்கிறார் என்றனர். எடுக்க வேண்டிய காட்சியில், அவர் ரொம்ப களைப்பு அடைந்தவராக இருக்க வேண்டும் என்பதற்காக, தன்னை வருத்திக் கொண்டு, ஓடுகிறார் என்று தெரிந்தது.

இது பற்றி, சிவாஜியிடம் நான் ஒரு முறை பேசிய போது, 'யுசுப்பாய் பெரிய நடிகர். அவர் செய்தது அவருக்கு பொருந்தும். என்னைக் கேட்டால், டயர்டாக காட்சியில் இருக்க வேண்டும் என்றால், டயர்டாக நடிக்க வேண்டும். கொலைகாரனாக வரும் போது, இரண்டு கொலை செய்துட்டா, செட்டுக்கு வர முடியும்...' என்றார்.

- வொய் ஜி மகேந்திரனின் நான் சுவாசிக்கும் சிவாஜி - 16 பிப்ரவரி 2014

தினமலரில் வந்த இந்த தொடரை நான் அவ்வப்போது வாசித்து, சிலவற்றை இங்கும், ஃபேஸ்புக்கிலும் பகிர்ந்திருக்கிறேன்.  YGM பயங்கர சிவாஜி பக்தர்.

முன்னர் அவர் பகிர்ந்திருந்த இந்தத் தகவலைப் படித்தபோது சாதாரணமாக 'அடடே' என்று கடந்து போனேன்.

இப்போது 'சிவாஜி கணேசன்' என்று திரு மோகன் எழுதிய மூன்று புத்தகங்கள் வாங்கிப் படித்துக் கொண்டிருக்கும் நிலையில் அதில் படித்த ஒரு விஷயம் நினைவுக்கு வருகிறது.  

அதாவது ஃபேஸ்புக் மெமரியில் நான் முன்பு பகிர்ந்திருந்த இந்தப் பகுதியை காட்டியது.  படித்ததும், இப்போது நான் படித்த பகுதி நினைவுக்கு வந்தது.

அந்தப் புத்தகத்தில் கீழ்க்கண்ட விவரம் இருக்கிறது.

பாசமலர் கிளைமேக்ஸ் காட்சி ஈடுப்பதற்கு முதல்நாள் சிவாஜி தன் நண்பர்கள் ஒருவரையோ, இருவரையோ அழைத்துக் கொண்டு வீட்டுக்கு வந்தாராம்.

[இப்போது வீட்டின் ஒரு பகுதி ஜப்தி என்று செய்தியில் அடிபட்டுக் கொண்டே இருக்கிறதே..  அதே வீடு.  

'பெற்றவர்கள் பட்ட கடன் பிள்ளைகளை சேருமடி' என்று ஒரு பாடல் உண்டு.  இங்கு பேரன் பட்ட கடன் சிவாஜியைச் சேர்ந்து அவர் பெருமைக்கு களங்கம் விளைவிக்கிறது.  சோகம்தான்.]

இரவு முழுவதும் வீட்டிலேயே பல ஆங்கிலப் படங்கள் விடிய விடிய பார்த்தார்களாம்.  விடிவதற்கு கொஞ்சம் முன்பு அவர் நண்பர் கிளம்பி வீட்டுக்குச் செல்ல, சிவாஜி வீட்டைச் சுற்றி நெடுநேரம் களைத்துப் போகும் அளவு ஜாகிங் செய்தாராம்.  தூங்கவே இல்லையாம். பின்னர் கிளம்பி படப்பிடிப்பு தளத்துக்கு வந்தபோது அவர்  முகத்தைப்;பார்த்தபோது அனைவரும் பயந்து போனார்களாம்.  

அந்த சோகக் காட்சிக்கு இப்படி ஒரு முகம் தேவையென சிவாஜி தன்னை வருத்திக் கொண்டிருக்கிறார் என்று புரிந்து கொண்டார்களாம்.  படப்பிடிப்பு தொடங்கும் முன்பு மிகக் கொஞ்ச நேரம் கண்ணயர்ந்து உடனே பாதித் தூக்கத்தில் முகம் இருக்கும் கோலத்தில் வந்து கலந்து கொண்டாராம்.

காட்சி மிக இயற்கையாக இருந்ததாம்.  கட் சொல்லக் கூட மறந்து இயக்குனர் உட்பட எல்லோரும் கண்கலங்கி பார்த்துக் கொண்டிருந்தார்களாம். 

எந்நாளும் மறக்க முடியாத காட்சிதான் அது.  கண்கலங்காமல் இருக்க முடியாது.

ஆனால், என்ன ஒரு முரண், இல்லை!

============================================================================================

====================================================================================================

நியூஸ் ரூம் 

-  போப் மறைவுக்குப் பின் உலகத்துக்குப் பேரழிவு?  450 ஆண்டுகளுக்கு முந்தைய கணிப்பு. 

-  புதுடில்லி : 'பிரதமர் நரேந்திர மோடியின் பட்டச் சான்றிதழ் தொடர்பான ஆவணங்களை நீதிமன்றத்தில் காட்டுவதற்கு தயாராக உள்ளோம். ஆனால், மற்றவர்களுக்கு காண்பிக்க முடியாது' என, டில்லி உயர் நீதிமன்றத்தில் டில்லி பல்கலை தெரிவித்துள்ளது.

- சென்னை : 'ஜாதியே வேண்டாம் என்று கூறுவதில், தமிழக அரசுக்கு என்ன சிரமம்?' என கேள்வி எழுப்பிய சென்னை உயர் நீதிமன்றம், பள்ளிகள், கல்லுாரிகள், பதிவு செய்யப்பட்ட சங்கங்களில் இடம்பெற்றுள்ள ஜாதி பெயர்கள் நீக்கப்படுமா என்பது குறித்து பதில் தெரிவிக்க, மார்ச் 6ம் தேதி வரை கெடு விதித்து உள்ளது.

-  தர்மபுரி: ''கலெக்டர், எஸ்.பி., யாராக இருந்தாலும் என் பேச்சை கேட்கவில்லை என்றால், அவர்கள் மாவட்டத்தில் இருக்க மாட்டார்கள்,'' என, தி.மு.க.,வின் தர்மபுரி கிழக்கு மாவட்ட பொறுப்பாளர் பேசிய ஆடியோ வைரலாகி வருகிறது. இது, கட்சி தலைமைக்கு தர்மசங்கடத்தை ஏற்படுத்தியுள்ளதாக கட்சி நிர்வாகிகள் தெரிவித்தனர்.

- சென்னை: கனடாவை தொடர்ந்து பிரிட்டனிலும், அடுத்த மாதம் துவக்கப் பள்ளிகளில் காலை உணவு திட்டம் துவங்க உள்ளதாக, தமிழக அரசு பெருமிதம் தெரிவித்துள்ளது.

- சென்னையில் நில அதிர்வு உணரப்பட்டதாக எந்த விபரமும் பதிவாகவில்லை என, தேசிய புவியியல் ஆய்வு நிறுவனம் தெரிவித்துள்ளதெனினும், சென்னை நந்தனத்தில் ஒரு ஐந்து மாடி கட்டடத்தில், பல்வேறு தனியார் நிறுவனங்கள் ள்ள அலுவலகங்களில்நேற்று (28-2-25)  பகல் 12:00 மணிக்கு, அந்த கட்டடம் குலுங்கியதாக தகவல் பரவியது.  அந்த கட்டடத்தில் பணியில் இருந்த அனைவரும் அச்சத்துடன் வெளியேறினர். கட்டடத்துக்கு வெளியிலும், அண்ணா சாலையிலும், பணியாளர்கள் மொத்தமாக கூடியதால், அப்பகுதியில் பரபரப்பு ஏற்பட்டது.

-  கோட்டயம்: கேரளாவில், பள்ளியில் சாக்லேட் சாப்பிட்ட பின் தலைசுற்றல் ஏற்பட்ட 4 வயது சிறுவனின் சிறுநீரை பரிசோதித்த போது, அதில் மன அழுத்த நோய் சிகிச்சைகளுக்கு பயன்படுத்தப்படும், 'பென்ஸோடியாசெபைன்' மருந்து இருந்தது கண்டு பிடிக்கப்பட்டுள்ளது.

- கடந்த பிப்ரவரி மாதம் தான் 1901 ஆம் ஆண்டுக்குப் பிறகு மிக வெப்பமான மாதமாக இருந்துள்ளது.  அதாவது வழக்கமாக இருக்க வேண்டிய வெப்பநிலை 20.7 டிகிரி செல்சியஸ்.  ஆனால் கடந்த பிப்ரவரி பதிவானது 22.4 டிகிரி செல்சியஸ்.  இந்த பிப்ரவரி மாதம் தான் 1901-க்கு பிறகு அதிக வெப்பமும் அதிகள குளிரும் பதிவான மாதமாக உள்ளது.

- நிறுவனங்களை மறு மறுசீரமைத்தல் செலவுகளை குறைத்தல் ஊழியர்களுக்கு பதிலாக செயல் நுண்ணறிவை பயன்படுத்துதல் உள்ளிட்ட காரணங்களுக்காக பணி நீக்க நடவடிக்கைகள் மேற்கொள்ளப்பட்டு வரும் நிலையில், உலக அளவில் பெரும் நிறுவனங்களில் பிப்ரவரியில் சுமார் 16,000 பேர் பணிநீக்கம் செய்யப்பட்டுள்ளதாக ஆய்வில் தெரியவந்துள்ளது.

- எர்ணாகுளம்,: கேரளாவில், 77 வயதான பிரபல சிறுநீரகவியல் டாக்டர் துாக்கிட்டு தற்கொலை செய்தார்.

-  சிட்னி: ஆஸ்திரேலியாவில் ரீசஸ் நோயினால் பாதிப்பிற்கு உள்ளான 2 மில்லியனுக்கும் மேற்பட்ட பச்சிளம் குழந்தைகளை, தனது ரத்த தானம் வாயிலாக காப்பற்றிய ஜேம்ஸ் ஹாரிசன் 88 வயதில் உடலநல்குறைவால் காலமானார்.

-  சென்னை: நடிகர் சிவாஜி கணேசன் இல்லத்தை ஜப்தி செய்ய சென்னை ஐகோர்ட் உத்தரவிட்டுள்ளது.  

===========================================================================================

நின்று துடிக்கும் இதயம் :

ஒற்றையடிப் பாதையில்

ஒருவருமில்லாத சாலையில்

வளைந்து திரும்புகையில்

ஓரத்திலிருந்து ஒளிந்து பார்க்கும்

ஒற்றை யானையின்

கண்கள்

நிறுத்துகிறது

ஒருகணம்

நெஞ்சின் துடிப்பை...

========================================================================================

இன்றைக்கு நாற்பத்தி நான்கு ஆண்டுகளுக்கு முன்னால், 

ஆயிரத்துத் தொள்ளாயிரத்து எண்பத்தி ஒன்றாம் ஆண்டு...

அந்த வாரப்பத்திரிகையில் அந்தத் தொடர்கதை வந்து கொண்டிருந்தது.

எழுதியவர் ஒரு பிரபல எழுத்தாளர்தான்.  அவர்தான் பாதி கதைக்கு நடுவே இப்படி கேட்டிருக்கிறார்.

வாசகர்கள் அபிப்ராயப்படி நிஜமாக கதையை மாற்றி எழுதுவாரா, இல்லை, மெஜாரிட்டி இதுதான் வந்தது ( யார் பத்திரிகை ஆபீசுக்கு வந்து எண்ணிக் கொண்டிருக்கப் போகிறார்கள்?!) என்று சொல்லி கதை அதன் போக்கில் போகுமா, தெரியாது.  விளம்பர யுக்தி!  வாசகர்கள்தான் இதற்கு எந்த அளவு ரெஸ்பாண்ட் செய்திருப்பார்களோ..  

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

ஜானகிராமனின் வாசகர்கள் நிறைய இருக்கலாம். ஆனால் இலக்கியம் என்பது மனதை மயக்கும்  மொழி நடையிலோ, விவரணை அடுக்கலிலோ இல்லை. இலக்கியம் என்பது மனித விசாரத்தைச் சொல்லுவது. வாழ்வின் கோலங்களை ஆத்ம விசாரணையுடன் அணுகுவது. பிறள் உறவுகளைப் பற்றி ஜானகிராமனைப் போல் ஜெயகாந்தனும் வெகு சில கதைகளில் எழுதினாலும் அதில் மனித விசாரம் ஊடும் பாவுமாக ஓடும். இது ஜானகிராமனிடம் அறவே இல்லை. 

ஜெயகாந்தனின் சிறுகதைகள், நாவல்களில் இந்த விசாரம் இடையறாது ஓடிக்கொண்டே இருக்கிறது. ஜானகிராமனிடம் இந்த அம்சத்தைத் தேடித் தேடித்தான் சலிக்க வேண்டும். முள்முடி, பாயாசம், சிலிர்ப்பு போன்ற சிறுகதைகளில் வடிவ நேர்த்தி, அவரது மனதை மயக்கும் நடை இவை எல்லாம் இருக்கின்றன. எந்தச் சிறுகதையிலும், நாவலிலும் ஆத்ம விசாரம் இல்லை. அதனால்தான் ஜானகிராமனை வெறும் எழுத்தாளர் என்றும், ஜெயகாந்தனே இலக்கியகர்த்தா என்றும் சொல்கிறேன்.

-வண்ணநிலவன் அவர்களின் முகநூல் பதிவு.

=============================================================================================

இந்தப் படம் யாரால்  வரையப்பட்டது என்பதிலோ, எந்தக் கதைக்காக வரையப்பட்டது என்பதிலோ யாருக்கும் சந்தேகம் இருக்காது.

ஆனால்,

இதை எடுத்துப் பகிரும் எனக்கே இருக்கும் சந்தேகம் என்னவென்றால் இது முதலா, இரண்டாவதா என்பதே..  

ஏனெனில் வேறொரு ஒரு (அப்புசாமி) தொடர்கதைக்குப் பின்பக்கத்தில் இந்தப் படம் மட்டும் கிடைத்தது.  வருடம் அநேகமாக 1981.

--------------------------------------------------------------------------------------------------------------------------------------------------------------------------

பொக்கிஷம்  : -

ஜெ...  பாணியில் ராமு ஓவியம்!