நாங்கள் தரிசனம் செய்த கோயில்கள் - 13 நெல்லைத்தமிழன்

 

 வரலாற்றுச் சிறப்பு மிக்க தாராசுரம் ஐராவதீஸ்வரர் கோயில் 

இடைக்காலச் சோழர்களின் 13ம் தலைமுறை சோழ அரசனாக வீர ராஜேந்திரச் சோழன் பட்டத்திற்கு வந்தான். இவன் கங்கைகொண்ட சோழபுரத்திலிருந்து சோழ சாம்ராஜ்யத்தை அரசாண்டான்  (சோழ கேரள மாளிகை என்பது அரண்மனையின் பெயர்). இவனுக்கு ஒரே மகன் அதிராஜேந்திரன். இந்த வீர ராஜேந்திரனின் இன்னொரு பெயர் கரிகாலன் .

தொக்க சகனில் தொளாயிரத்துத் தொண்ணூற்றின்

மிக்க கரிகால் வயவேந்தன்  பக்கம்

அலைக்கும் புனற்பொன்னி ஆற்றணையை இட்டான்

மலைக்கும் கொடைக்கரத்தான் வந்து

என்ற பழைய செய்யுளின் மூலம், சக ஆண்டான 990 அதாவது கிபி 990 +78-1068ல் கரிகாலன் கல்லணை கட்டினான் என்பது தெரிகிறது. அந்த ஆண்டில் கரிகாலன் என்ற மறுபெயரைக் கொண்ட வீர ராஜேந்திரன் சோழப்பேரரசனாக இருந்தான். எனவே வீர ராஜேந்திரன், தன் குடிகளின் நன்மையைக் கருதி வேளாண்மையை வளப்படுத்த காவிரி ஆற்றின் குறுக்கே அணை கட்டினான் என்பது தெரிகிறது.

ஒரே பெயர், முதலாம், இரண்டாம் என்று தொடர்ந்து வருவதால் வரலாறு மிகுந்த குழப்பத்தை ஏற்படுத்தும்.  அதிலும், அந்தப் பெயருடன் ராஜகேசரி, பரகேசரி என்ற பட்டங்களைச் சேர்த்துவிட்டால் முழுக் குழப்பம்தான். புரியும்படிச் சொல்வதானால்,

ராஜராஜ சோழனுக்குப் பிறகு ராஜேந்திர சோழன் அரசனானான். ராஜேந்திரனுக்கு மூன்று புதல்வர்கள்.  ராஜாதிராஜன், ராஜேந்திரன், வீர ராஜேந்திரன்.  ஒரு அரசன் ஆட்சி செய்துகொண்டிருக்கும்போதே, தகுந்த நேரத்தில் தன் மூத்த மகனைப் பட்டத்து இளவரசாக்கிவிடுவான் என்பது உங்களுக்குத் தெரிந்திருக்கும். அரசன் இறக்கும் வரை அவன் சாம்ராஜ்யத்தின் அதிபதி. இருந்தாலும் அரசனுக்கு முடியாமல் போகும் சமயத்தில் பட்டத்து இளவரசன் அரச அதிகாரங்களை மேற்கொள்ளுவான். கல்வெட்டுகளில் ஆண்டு பொறிக்கும் அதிகாரமும் இளவரசனானால் கிடைக்கும்.  ஆனால், ‘ஆட்சியின் 5ம் ஆண்டு’ என்பதுபோல் இருந்தால், அவன் அரசனான பிறகு வரும் ஐந்தாம் ஆண்டு என்று புரிந்துகொள்ளவேண்டும்.

கங்கை கொண்ட சோழனான இராஜேந்திர சோழன் காலத்திற்குப் பிறகு அவனது மூத்த மகன் ராஜாதிராஜன் அரசனானான்.  (அப்பா அரசனான ஆறு வருடத்தில் இவனுக்கு இளவரசுப் பட்டம்) .  ராஜாதி ராஜன், தான் அரசனான சுமார் ஆறு வருடங்களில் தனது தம்பியான ராஜேந்திரனை இளவரசனாக்குகிறான்.  1054ல் அரசனான ராஜேந்திரன், தன்னுடைய மகனான இராஜேந்திரனை (பாட்டனின் பெயர் கொண்டவன்) தான் ஆட்சிக்கு வந்த சில ஆண்டுகளில் இளவரசனாக்குகிறான். வீரம் கொண்டிருந்த இளவரசன் இராஜேந்திரன், தன்னை தன் தந்தையிடமிருந்து வேறுபடுத்திக் காட்ட ராஜமகேந்திரன் என்ற பெயரைக் கொள்கிறான். சில போர்களில் வென்ற இராஜமகேந்திரன் இளவரசனாக இருக்கும்போதே உயிர் துறந்தான். அதனால் அரசன் ராஜேந்திரன் இறந்த தும், அவனுடைய தம்பி வீர ராஜேந்திரன் 1063ல் அரசனாகிறான்.  (அப்பா…இப்பவே கண்ணைக் கட்டுதே)

சுருக்கமாகப் புரிந்துகொள்ளவேண்டும் என்றால், கங்கைகொண்ட சோழன் ராஜேந்திர சோழனுடைய ஆட்சிக்குப் பிறகு, அவனுடைய மூன்று மகன்கள் ஒவ்வொருவராக ஆட்சிக்கு வந்து அரசனாகிறார்கள். (இடையில் இரண்டாவது மகனின் மகன் இளவரசனாக்கப்பட்டு ஆட்சிக்கு வராமலேயே இறக்கிறான்).  மூன்று மகன்களில் கடைசியான வீர ராஜேந்திரச் சோழனின் மகன் அதிராஜேந்திரன் 1067ல் இளவரசுப் பட்டம் அடைகிறான்.  இவர்களது பட்டங்களுடன், ஆட்சிப் பெயர்களுடன் கீழே கொடுத்திருக்கிறேன். படித்துக் குழம்பிக்கொள்ளுங்கள்.

முதலாம் ராஜராஜ சோழன்   கிபி 985-1014      (தஞ்சை பெரிய கோயில் எழுப்பியவன்)

முதலாம் இராஜேந்திர சோழன்  கிபி 1012-1044 (கங்கைகொண்ட சோழன்)

இராஜாதிராஜ சோழன்         கிபி 1018-1054   (முதல் மகன்)

இரண்டாம் இராஜேந்திர சோழன்  கிபி 1051-1063   (இரண்டாம் மகன்)

இளவரசன் இராஜமகேந்திர சோழன் கிபி 1055-     (இரண்டாம் இராஜேந்திர சோழன் மகன்)

வீர ராஜேந்திர சோழன்  கிபி 1063-1070   (கங்கைகொண்ட சோழனின் மூன்றாம் மகன்)

அதிராஜேந்திர சோழன்  கிபி 1067-1070

இராஜகேசரி முதலாம் ராஜராஜ  சோழன்

பரகேசரி முதலாம் இராஜேந்திர சோழன்   

இராஜகேசரி இராஜாதிராஜ சோழன்          

பரகேசரி இரண்டாம் இராஜேந்திர சோழன்   

இராஜகேசரி இளவரசன் இராஜமகேந்திர சோழன்  

இராஜகேசரி வீர ராஜேந்திர சோழன்   

பரகேசரி அதிராஜேந்திர சோழன்   

இதில் இராஜகேசரி பட்டம் கொண்ட இராஜமகேந்திர சோழன் அரசனாகவில்லை என்பதால், அடுத்து பட்டத்திற்கு வந்த அவன் சிற்றப்பன் வீர ராஜேந்திர சோழன், இராஜகேசரி பட்டத்தைப் பெற்றுக்கொள்கிறான்.  இந்தப் பட்டங்களும் யார் யாருக்குப் பிறகு அரசாண்டார்கள் என்பதைத் தெரிந்துகொள்ள உதவியது.

இராஜராஜ சோழன் பெரிய பேரரசை உண்டாக்கிவைத்தான். அவன் மகன் ராஜேந்திர சோழன் அதனை விரிவுபடுத்தினான். கங்கை வரை தன் படைத்தலைவரை அனுப்பி பகைவர்களை வென்று கங்கை நீரைச் சுமந்துகொண்டுவரச் செய்து தான் உருவாக்கிய கங்கைகொண்ட சோழபுரம் கோயிலில் திருக்குளத்தில் விடச்செய்தான். அவனுடைய காலத்திற்குப் பிறகு, அவனுடைய மூன்று மகன்களும் ஓய்வின்றி, வடக்கு, தெற்கு, மேற்கில் போர்கள் பல புரிந்து நாட்டைக் கட்டுக்கோப்பாக வைத்திருந்தனர். ராஜேந்திர சோழனின் மூன்று மகன்களும் அவனுடைய வீரத்திற்குக் குறைவில்லாத வீரம் கொண்டிருந்தனர்.

கங்கைகொண்ட சோழன் என்று அழைக்கப்படும் ராஜேந்திர சோழன்,  தன் மகளான அம்மங்கா தேவியை, வேங்கி நாட்டு மன்னன் இராஜராஜ நரேந்திரனுக்குக் கொடுத்து உறவு ஏற்படுத்திக்-கொண்டதைச் சென்ற வாரம் கண்டிருந்தோம்.  அதனால் கீழைச் சாளுக்கிய நாடு எப்போதுமே சோழ தேசத்துடன் உறவால் பிணைக்கப்பட்டிருந்த து.  மேலைச் சாளுக்கிய நாட்டிற்கு, எப்போதுமே கீழைச் சாளுக்கிய நாடும் தங்களுடன் சேர்ந்து முன் காலத்தில் இருந்துபோல் அகண்ட சாளுக்கிய நாடாக இருக்கவேண்டும் என்பது தீராத ஆசை. இந்த சமயத்தில் (1062) கீழைச்சாளுக்கிய மன்ன ன் இராஜராஜ நரேந்திரன் (ராஜேந்திர சோழனின் மருமகன்) மறைந்துவிடுகிறான். இதனை உபயோகப்படுத்தி,  மேலைச்சாளுக்கிய மன்ன னான ஆகவமல்லன், தன் படைத் தலைவனைப் பெரும் படையோடு கீழைச் சாளுக்கிய தேசத்தைக் கைப்பற்ற அனுப்புகிறான். வீர ராஜேந்திரன், தங்களுடன் நெருங்கிய உறவைக் கொண்டுள்ள கீழைச் சாளுக்கிய அரசைக் காக்குபொருட்டு படையைத் தலைமை தாங்கிச் சென்று சாளுக்கியப் படையைத் தோற்கடித்தான், படைத்தலைவனையும் கொன்றான்.  இதன் பிறகும் சாளுக்கிய மன்ன ன் ஆகவமல்லன் நேரிடையாக கிருஷ்ணா துங்கபத்திரா நதிக்கரையில் சோழ மன்னுடன் போர் புரிந்தான். அந்தப் போரிலும் வீரராஜேந்திரன் வெற்றிபெற்றான்.  இதுபோல மொத்தம் ஐந்து முறை மேலைச் சாளுக்கிய மன்னனுடன் சோழ மன்ன ன் வீரராஜேந்திரன் போர் புரிந்து வெற்றிபெற்றான்.  அவனுடைய 7 வருட ஆட்சியில், ஐந்து முறை சாளுக்கிய அரனிடம் மாத்திரமே போர் புரிந்திருக்கிறான். இது தவிர பாண்டிய மற்றும் ஈழ நாட்டுப் போர்கள்.  தான் அரசனான ஐந்தாம் வருடம் தன் மகனான அதிராஜேந்திர சோழனுக்கு இளவரசுப்பட்டம் கட்டினான். (இவையெல்லாம் இளவரசன் அல்லது அரசனாகும்போது வைத்துக்கொள்ளும் பெயர்கள்).

வரலாறு குழப்புகிறது அல்லவா?  அதனால், எவ்வாறு சாளுக்கிய சோழர்கள் பட்டத்திற்கு வந்தார்கள் என்பதை அடுத்த வாரம் வைத்துக்கொள்வோமா? அதுவரை அகண்ட சோழ நாட்டுப் படத்தைப் பார்த்துவைத்துக்கொள்ளுங்கள்.

கோவிலில் இருக்கும் சிற்பங்களை முன்பு புகைப்படங்கள் எடுத்திருக்கின்றனர். அவற்றையும் அந்த அலுவலகத்தில் கண்டேன்.

இந்த மாதிரி, சிற்பங்களைப் படமெடுத்து அவற்றை ஆவணப்படுத்தினால் பிற்காலத்தில் அவை காணாமலோ சிதைவுறவோ ஆகாமல் இருக்கும் நன்மை உண்டு. 

வட்டெழுத்தா அல்லது அதற்கும் முந்தைய காலகட்டத்துக் கல்வெட்டா?

கல்வெட்டுக்களைப் பார்த்தாலே இது இராஜராஜ சோழன் காலத்திற்கும் முந்தைய கல்வெட்டு என்று தெரிந்துவிடுமே… இதைத்தான் ஐராவதீஸ்வரர் கோயிலில் பார்த்தேன்.

தூண் எவ்வளவு உயரமானது. அதில் ஒரு அடிக்கும் குறைவான சதுரப் பகுதியில் கையளவைவிடக் குறைவான பிள்ளையாரைச் செதுக்கியிருக்கிறார்கள். எப்படிப்பட்ட  திறமை, கற்பனைவளம்.

அபிராமி அம்மன் (பார்வதி) சந்நிதி – ஐராவதீஸ்வரர் கோயில்

அபிராமி அன்னையின் அருள் பெறுவோம்

இதுவரை நாம் வரலாற்றில் பார்த்திருப்பது, கங்கைகொண்ட சோழனின் மூன்று மகன்களும் ஒருவர் பின் ஒருவராக சோழ நாட்டை அரசாண்டனர். மூன்றாவது மகனான அதிராஜேந்திர சோழன் 1067ல் இளவரசனாக்கப்பட்டான்.  முன்பே சொல்லியிருக்கிறேன், ராஜேந்திர சோழனின் மகள் கீழைச் சாளுக்கிய அரசன் இராஜராஜ நரேந்திரன் மனைவியானாள். அந்த கீழைச் சாளுக்கிய அரசன் 1962ல் இறந்துவிடுகிறான். அதற்குப் பின்னான ஐந்து போர்களில், வீர ராஜேந்திர சோழன் (மூன்றாவது மகன்) மேலைச் சாளுக்கியர்களை, அதிலும் கடைசி இரண்டு போர்களில் சாளுக்கிய அரசனான ஆகவமல்லனை முற்றிலும் தோற்கடித்து கீழைச் சாளுக்கியத்துக்கு அரணாக நின்றான் என்று. மிகுதியை அடுத்த வாரம் பார்ப்போம். அப்போது எப்படி சோழ தேசம், சாளுக்கிய சோழர்கள் கைக்குச் சென்றது என்று தெரியும்.

(தொடரும்) 

= = = = = = = = = = =