"திங்க"க்கிழமை : சிக்கி - நெல்லைத்தமிழன்

 

 002- திங்கக்கிழமை .பதிவு – சிக்கி - நெல்லைத்தமிழன்

 

இது என்னப்பா புதுப் பெயராக இருக்கிறது என்று யோசிக்காதீர்கள்.  நான் டயட் ஆரம்பித்த பிறகு, எப்போவாவது சாப்பிட வேர்க்கடலை வாங்கிவைத்திருப்பேன். வெறும் வேர்க்கடலை. பிறகு இந்த ஊரில் காங்கிரஸ் என்று சொல்லப்படும் மசாலாக் கடலையை வாங்கிவைக்க ஆரம்பித்தேன் (இது நம்ம ஊர் மசாலாக் கடலை கிடையாது. வேர்க்கடலையை எண்ணெய் விட்டு வறுத்து….இருப்பா..செய்முறையைச் சொல்லாதே… அதனை இன்னொரு திங்கப் பதிவுக்கு வைத்துக்கொள் என்று மனது சொல்வதால் இத்தோடு நிறுத்துகிறேன்) இன்னொரு ஐட்டம் உலர் திராட்சை. இரண்டையும் மிக அதிக அளவில் ஸ்டாக் வைத்திருப்பேன். 

இன்றைக்கு (7 ஜனவரி) திடுமென்று, நாமே கடலை உருண்டை செய்தால் என்ன? என்று தோன்றியது. அதற்காக வறுத்த கடலையில் தோலை நேற்று இரவு உரித்துவைத்திருந்தேன்.  இன்றைக்கு சமையல் அறைக்குள் நுழையும்போது, வெல்லத்துக்குப் பதிலாக ஜீனிப்பாகில் செய்தால் என்ன என்று தோன்றியது. 

தேவையான பொருட்கள்

தோலெடுத்து வறுத்த வேர்க்கடலை 1 கப்

ஜீனி ¾ கப்

¼ கப் தண்ணீர்

ஏலக்காய் பொடி 

செய்முறை

நான் நேற்று தோலெடுத்து வைத்திருந்த வேர்க்கடலை, இங்குள்ள கடும் குளிரால் கொஞ்சம் சவுக் சவுக் என்று ஆகிவிட்டதுபோலத் தோன்றியதால் முதலில் கடாயில் அதனைத் திரும்பவும் நன்கு சூடுபடுத்திக்கொண்டேன்.  (கிளறணும். இல்லைனா அடி பிடித்து கீழே உள்ள வேர்க்கடலை கறுத்துவிடும்) 

பிறகு ஒரு கடாயில் ஜீனியைப்போட்டு, தண்ணிரும் சேர்த்து அடுப்பை சிம்மில் வைத்து நன்கு கிளறணும். இல்லைனா, ஜீனி அடியில் தங்கி பாகு சரியாக வராது என்பது உங்களுக்குத் தெரிந்திருக்கும். ஒரு தடவை மைசூர்பாக் செய்யும் அவசரத்தில் அடுப்பை மீடியத்தில் வைத்து ஜீனியுடன் தண்ணிர் சேர்த்து, கிளறாமல் படம் எடுக்கும் அவசரத்தில் இருந்ததால் ஜீனிப்பாகில் கரையாத சர்க்கரையும் இருந்த தைப் பிறகு தெரிந்துகொண்டேன். 

நல்ல இரண்டு கம்பிப்பதம் வந்ததும்,  (அதாவது பாகின் ஒரு துளியைத் தண்ணிரில் விட்டுப் பார்த்தால் உடனே கெட்டியாகிவிடும்), அதில் ஏலக்காய் பௌடர் மற்றும் வேர்க்கடலையைச் சேர்த்துக் கிளறி தட்டில் கொட்டிவிட வேண்டியது தான். வெல்லப் பாகில் செய்தால் விரும்பிய ஷேப்பில் வெட்டிக்கொள்ளலாம். ஆனால் ஜீனிப்பாகில் செய்தால் அது வேர்க்கடலை வேர்க்கடலையாக உதிர்ந்துவிடும். இந்த ஜீனி வேர்க்கடலை எனக்கு ரொம்பவே பிடிக்கும்.

செய்து முடித்த பிறகு இதன் பெயர் என்ன என்பது எனக்குத் தெரியவில்லை. மனைவியோ இதுதான் ‘சிக்கி’ என்றாள். ஆனால் என் நினைவில் சிக்கி என்பது, நன்கு உடைத்த வேர்க்கடலையில் வெல்லப்பாகு சேர்த்துச் செய்வது. அதனைச் சிறிய சிறிய சதுரக் கேக் போன்று வெட்டி வைத்திருப்பார்கள். நம் ரெடி ரெக்கனர் கீதா ரங்கன் அக்காவிற்குப் போன் செய்து இதன் பெயர் என்ன என்று கேட்டதற்கு அவரும் ‘சிக்கி’ என்றே சொன்னார். அதனால் பெயரில் தவறு இருந்தால் கீதா ரங்கனைத்தான் நீங்கள் கேட்கவேண்டும். நான் பொறுப்பில்லை. ருசிக்கு நான் பொறுப்பு.

செய்த சிக்கி பெருமாளுக்குக் கண்டருளப்பண்ணினேன்.

இது என்ன இவ்வளவு சுலபமான ஒண்ணை திங்கப் பதிவுக்கு எழுதியிருக்கிறாயே என்று யார் கேட்டாலும், கீதா சாம்பசிவம் மேடம் மாத்திரம் கேட்கமாட்டார்கள். ஏனென்றால் அவர் வெந்நீர் எப்படிப் போடுவது என்று ஒரு தடவை பதிவு போட்டவரல்லவா?