உங்களுக்குப் பிடித்த சரித்திரக் கதை எழுத்தாளர் யார்? எந்த சரித்திரம்?

 

ஜெயகுமார் சந்திரசேகரன்: 

திரை அரங்குகளில் 70 களில் மாட்டினீ ஷோ என்ற பிற்பகல் காட்சிகள் பெண்கள் வருகையால் மட்டுமே நிரம்பி வழிந்தது. தற்போது அவ்வாறு இல்லை. இந்நிலைக்கு காரணம் என்ன?

# தொலைக்காட்சியில் இலவசமாக படங்கள், சீரியல்கள் கிடைப்பதுதான்.‌

தினசரிகள் வாங்கும்/வாசிக்கும் பழக்கம் குறைந்து வருவது ஏன்?

# மேலே தந்துள்ள பதிலைப் பார்க்கவும்.

& தொலைக்காட்சி செய்தி சானல்களில் நாம் பார்க்கும் செய்திகள், வீடியோ துண்டுகள் அரைமணி நேரத்திலேயே பழைய செய்திகள் ஆகிவிடுகின்றன. அப்படி இருக்கும்போது 24 மணி நேர பழைய செய்திகளைப் படிக்க யாருக்கு ஆர்வம் வரப்போகிறது ! 

தனியார் கல்லூரிகள் போய் தனியார் பல்கலைக் கழகங்கள் நிறைந்து விட்டன. இந்நிலை எத்தனை காலம் தாக்குப் பிடிக்கும்?

# அரசின் வருவாய் இலவசங்களிலும் ஊழலிலும் கரையும்வரை எல்லா விபரீதங்களும் சாஸ்வதம்.

தனியார் திறம்பட நிர்வகிக்க வேண்டுமானால் அவர்களை தவறு செய்ய அதிகார மையங்கள் ஊக்குவிக்காமல்   இருக்க வேண்டும்.

& நல்ல தரமான கல்வி, குறைந்த செலவில் கிடைத்தால், தடைகள் இன்றி தாக்குப் பிடிக்கும். 

கில்லர்ஜி, தேவக்கோட்டை  : 

உரிமை என்பதற்கும், அதிகாரம் என்பதற்கும் உள்ள வேறுபாடு என்ன ?

# உரிமை பறிக்கப் பட்டால் போராடிப் பெறவேண்டும். பெற முடியும்.

அதிகாரம் பறிக்கப்பட்டால்,  மீண்டும் பெற வழிகள் இருப்பினும், பெறுவது உறுதியில்லை.‌

நெல்லைத்தமிழன்: 

 1. கல்விக்கண் கொடுத்த நல்லவரான காமராஜையே தோற்கடித்த தமிழக மக்களுக்கு, காசு வாங்கிக்கொண்டு இடைத்தேர்தலில் வாக்களிக்கும் பெரும்பாலான மக்களுக்கு எதுக்கு நல்லது செய்ய எண்ணும் அரசியல்வாதிகள் வரணும்?  ஊழல் செய்பவர்கள் தலைவர்களாக வந்தால் போதாதா?    

# நல்லது செய்யும் அரசியல்வாதிகள் களத்தில் இருப்பதாக நீங்கள் நம்பிக் கொண்டு இந்தக் கேள்வியைக் கேட்டிருப்பது எனக்கு வியப்பை அளிக்கிறது. வரவிருக்கும் சட்டசபை தேர்தலில் " நான் அதிகம் உரிமைத் தொகை தருகிறேன் " என்று ஒவ்வொரு கட்சியும் சொல்லி ஜெயிக்கப் பார்க்கும் விந்தையை நாம் அநேகமாக காணக்கூடும். பக்கத்து மாநிலங்களில் ஆயிரத்தை விட அதிகமாக கொடுப்பதாக வாக்குறுதி கொடுத்து கட்சிகள் ஜெயித்திருக்கிறசெய்தியையுமா பார்க்கிறோம்.

அது போகட்டும் , இந்திப் போராட்டத்தை காங்கிரஸ் சமாளித்த விதம்,  மக்களின் முழு வெறுப்பை சம்பாதித்தது. காமராஜ் தோற்றது அதன் விளைவாகத்தான்.‌

காசு வாங்கினபின் ஓட்டுப் போடாமல் இருப்பது பாவம் என்று பெரும்பாலான மக்கள் நினைக்கிறார்கள். காசு தருபவர்களும் விவரம் தெரியாத அப்பாவி வாக்காளர்களுக்குக் காசு கொடுக்குமுன்,  அவர்கள் குடும்பத்தினர் மீதும் அவர்களின் இஷ்ட தெய்வங்களின் மீதும் சத்தியம் வாங்கிக் கொண்டு அதன் பின்பு தான் காசு தருகிறார்கள். மேலும் ஒரு குறிப்பிட்ட கட்சியின் சின்னத்திற்கு வாக்கு அளிப்பதற்கு ஏழை வாக்காளர்கள் பழகி விடுகிறார்கள். " கட்சி செய்யறது சரி இல்லை தான். ஆனால் நாங்கள் எல்லாம் சூரியனுக்கு தான் ஓட்டு போடுவோம்" : இது நாம் எப்போதும் கேட்கும் பேச்சு.

2.  சிவாஜி நடிப்பை ஆஹா ஓஹோ என்று பலரும் புகழ்கிறார்கள், ஆனால் அவர் அரசாங்கத்தால் அங்கீகரிக்கப்படவில்லையே.  எம்ஜியாரை சிறந்த நடிகர் என்று பாரத அரசு சிறப்பித்திருக்கிறது. அப்படியென்றால் நடிப்புக்கு அளவுகோல் என்ன?  

# அரசு அளிக்கும் பட்டங்களும் கௌரவங்களும் ஆட்சியில் இருக்கும் கட்சி, தன் சுயநலத்தை உபதேசித்து அளிப்பது மட்டுமே.‌ எங்காவது எப்போதாவது அந்த மாதிரியான கௌரவங்களில் ஒரு நியாயமான அடிப்படை காணப்படும். அது ஒரு விதிவிலக்கே தவிர பொது விதி அல்ல. 

சிவாஜி கணேசன் ஒரு மிகச்சிறந்த நடிகர். ஆனாலும் அவர் சிறந்த நடிப்பைக் காட்டி நடித்த படங்கள் மிகச் சில மட்டுமே. பெரும்பாலான படங்களில் அவர் செய்தது மிகையான நடிப்பு - அது விரும்பப்படுகிறது , அதுதான் எதிர்பார்க்கப்படுகிறது என்பதன் காரணமாக இருக்கலாம் . அவருடைய நடிப்புத் திறமையைப் பற்றி மட்டுமே நாம் அறிவோம். பரிசுகளும் பட்டங்களும் வாங்க வேறு தகுதிகளும் தேவைப்படும்.

நடிப்புக்கு அளவுகோல் என்ன ? என் அபிப்பிராயத்தில் ஒரு 20 வருடம் சென்றபின் ஒரு படத்தைப் பார்த்து "அட இதையா நாம் விரும்பி பார்த்தோம்" என்று நாம் எண்ணாமல் இருப்பதுதான் சிறந்த அளவுகோல்.

3.  ஒரு காலத்தில் உருகி உருகிப் பார்த்த (ரசித்த) நடிகைகளை மனம் அம்போ என்று விட்டுவிட்டு உடனே வேறு நடிகைக்கு தாவுவதன் காரணம் என்ன?  

# அழகு & / or  கவர்ச்சி தவிர வேறு இல்லை.

& பார்ப்பவர்களுக்கு வயது கூடுவது உணரப்படுவதில்லை; பார்க்கப்படுபவர்களுக்கு வயது கூடுவது கண்கூடாகத் தெரிகிறது! (நெ த இப்போ எந்த நடிகைக்குத் தாவியிருக்கிறார் என்று இரகசியமாக தெரிவிக்கவும்!) 

4. எழுத்தாளர்களால், ஒரு நேரத்தில், எழுதியது போதும் என்று இருக்க இயலுமா?  

# இனி எழுத ஒன்றும் இல்லை எனவே இனி எழுதுவதாக இல்லை என்று எனக்குத் தெரிந்தவரை ஜெயகாந்தன் அவருக்கு முன்னே சாமர் செட் மாம் அறிவித்திருக்கிறார்கள். கானன் டாயில் கூட ஷெர்லக் ஹோம்ஸ் கதைகளை எழுதுவதை நிறுத்தி அதன்பின் ரசிகர்கள் வற்புறுத்தல் காரணமாக பெரும் பணம் பெற்றுக் கொண்டு எழுதினார் என்று செய்தி சொல்லுகிறது.

5. உங்களுக்குப் பிடித்த சரித்திரக் கதை எழுத்தாளர் யார்? எந்த சரித்திரம்?

# நான் சரித்திர கதைகள் அதிகம் படித்ததில்லை. சாண்டில்யன்,  அகிலன், பாலகுமாரன், நா. பார்த்த சாரதி ஆகியோர் எழுதிய சரித்திர கதைகள் எனக்குப் பிடிக்கவில்லை. அது போக மீதம் இருந்தது கல்கியின் "பார்த்திபன் கனவு"  "சிவகாமியின் சபதம்"  மற்றும் "பொன்னியின் செல்வன்". இவற்றில் பார்த்திபன் கனவு கொஞ்சம் சுமாராக இருந்ததாக நான் நினைக்கிறேன்.  மற்ற இரண்டும் எனக்குப் பிடித்த சரித்திர நாவல்கள். கல்கி எழுதுவது சரித்திர நாவல் அல்ல என்று கட்சிகட்டிக் கொண்டு சண்டை போட்டவர்களைப் பற்றி நினைவு இருக்கிறது.‌

& பதின்ம வயதுகளில் சாண்டில்யன் எழுதிய சில கதைகளைப் படித்திருக்கின்றேன். ரசித்ததும் உண்டு. 

வேலை பார்க்க சென்னை வந்தபின்தான் கல்கியின் பொன்னியின் செல்வன் படித்தேன். மிகவும் ரசித்தேன். 

தற்காலத்தில், காலச்சக்கரம் நரசிம்மா எழுதிய சில சரித்திர நாவல்கள்  படித்திருக்கிறேன். நிறைய தகவல்களுடன், சுவாரசியமாக எழுதுகிறார். 

கே. சக்ரபாணி சென்னை 28: 

1. சில இடங்களில் நான்கைந்து  பேர்கள்  இருக்கும்  இடத்தில்  ஒருவருக்கு கொட்டாவி  வந்தால்  மற்றவர்களுக்கும்  தானாக  கொட்டாவி வரும் கவனித்திருக்கிறீர்களா?  

# " கொட்டாவியும் குமரிப்பெண்ணும் தனியே போக மாட்டார்கள் " என்று பழமொழி சொல்லக் கேட்டிருக்கிறேன்.

& எண்ண அலைகள் பயணிக்கின்றன (Thought waves travel) என்பதற்கு இது ஒரு  சிறந்த உதாரணம். ஒரே அலைவரிசையில் இணைகின்றவர்கள்தான் ஓரிடத்தில் ஒன்றாக சேரும், உரையாடும் வாய்ப்பு பெறுகிறார்கள். ஒருவரின் மூளை, அவருக்கு 'இரத்தத்தில் ஆக்ஸிஜன் குறைவு ஏற்படுவதுபோல உள்ளது; உடனே கொட்டாவி விடு'   என்று கட்டளை பிறப்பிக்கும். உடனே உடல் அதை செயல்படுத்தும். அவருடைய மூளையின் எண்ண அலை, சுற்றியுள்ளவர்களின் மூளைகளில் எதிரொலிக்கும். உடனே சுற்றியுள்ளவர்களின் மூளைகளும் அந்த எண்ணத்தை பிரதிபலித்து, அவர்களின் உடலும் கொட்டாவி விட தூண்டப்படுகின்றன. அதனால்தான் ஒருவர் கொட்டாவி விட்டால், மற்றவர்களும் கொட்டாவி  விடுகிறார்கள். 

2. சிலபேர்  காப்பி குடிக்கறீங்களா என்றும்  சில பேர் காப்பி  சாப்பிடுறீங்களா  என்றும்  கேட்பார்கள்.  காப்பி குடிப்பது தானே  சாப்பிடுவது என்பது எப்படி வந்தது? 

# சரி விகித உணவு என்று அறியப்படும் பால் கலந்திருக்கிற காப்பி சாப்பிடப்பட வேண்டிய பொருள்தான் என்று நினைத்து விட்டார்கள் போலும் !

& காபி குடிப்பது / சாப்பிடுவது என்பதைக் கூட ஓரளவுக்குப் புரிந்துகொண்டுவிடலாம். ஆனால் சிலர் சிகரெட் குடிக்கிறார்களே - அவர்களிடம் நாம் சிகரெட் சாப்பிடுங்க என்று உபசாரம் செய்யமுடியுமா?  

= = = = = = = =

KGG பக்கம். 

பாண்டிச்சேரி பயணத்து படங்கள் மேலும் சில. 

Palms up! 

Rifle like fence 

Flower tree. 

coconut trees and fence 

Fielding 

Fielding 

Bowling 

= = = = = = = = =

"தலைப்பிற்கு படம்"  

'தெய்வீகம்'  தலைப்பிற்கு படங்கள் அனுப்ப, இன்னும் ஆறு நாட்கள்தான் மீதி உள்ளன. 

தெய்வீகம் ஆக இருக்கிறது என்று நீங்கள் நினைக்கும் காட்சியை, உங்கள் மொபைல் காமிரா அல்லது கைக் காமிரா மூலம் படம் எடுத்து, 

engalblog@gmail.com மின்னஞ்சல் முகவரிக்கோ 

or 

9902281582 whatsapp number க்கோ அனுப்பவும். 

படங்கள் அனுப்ப இறுதி தேதி : 18.3.2025. 

= = = = = = = = = = =