பேபி பேபி ஹிரண்யா

பேபி பேபி என்று ஒரு படம்.ஜீ 5 தொலைக்காட்சியில் பார்த்தேன்.  ஏர்போர்ட்டில் யோகி பாபுவின் மச்சானும் ஜெய்யின் மச்சினிச்சியும் ஒருவரை ஒருவர் ஜொள்ளு விடும் ப்ராசஸில் இருவர் கையிலிருக்கும் ஜெய், யோகிபாபுவின் குழந்தைகளும் இடம்மாறி விடுகின்றன.

பிரச்னை என்னவென்றால் இருவரும் காதல்மணம் புரிந்து வீட்டை விட்டு ஓடிப்போன ஜோடி.  ஜெய்யின் அப்பா சத்யராஜுக்கு அவர் நம்பிக்கைக்கு ஆண் குழந்தை வேண்டும்.  யோகி பாபு அப்பா இளவரசுவின் ஜாதக பலனுக்கு அவர் மகனுக்கு பெண்குழந்தை வேண்டும்.  இரு மகன்களுக்கும் அப்படி பிறந்து விட்டதால் மறுபடி சேர அழைக்கும் நிலையில் குழந்தைகள் மாறி விடுகின்றன.

ஆனந்தராஜ், ஸ்ரீமன் ஆகியோர் செமி வில்லனாக வருகின்றனர்.  தத்தம் அப்பாக்களுக்குத் தெரியாமல் குழந்தைகளை மாற்ற நினைக்கும் வேளையில் நடக்கும் குழப்பங்கள்தான் கதை.  முன்பும் இதே மாதிரி கதையை வைத்து படங்கள் வந்திருக்கின்றன.  கிரேசி மோகன் வசனம் என்று நினைவு.  கடைசி வரை காமெடி இருக்கும்.

இதைநகைச்சுவைக் கதை என்று சொன்னாலும் புன்னகைக்கலாம்.  அவ்வளவுதான்.  நடுவில் ஒரு பாடலில் -அது கொஞ்சம் கேட்கும்படி கூட இருக்கிறது - இலேசாக கண்கலங்க வைக்கிறார்கள்.

இன்னொரு படம் ஹிரண்யா.  கன்னடப் படம் என்றாலும் தமிழ்ப்படம் போல புரிந்தது.  இதுவும் குழந்தைப் படம்தான்.  அதாவது படத்தில் முக்கிய கேரக்டர் ஒரு குழந்தை.  சற்றே சுவாரஸ்யமான மர்மக்கதை.  ஆனால் எளிதில் யூகிக்க முடிகிற கதை.

இரக்கம், கருணை இல்லாத கொலைகாரன் ஹீரோ ராணா - ராஜவர்மன். அவனுக்கு அடுத்து கொடுக்கப்படும் அசைன்மென்ட் ஒரு குழந்தையைக் கொல்வது.  குழந்தையின் அப்பா ஒரு சாலை விபத்தில் இறந்திருப்பார்.  

இரக்கமில்லாத அந்த கொலைகாரனுக்கு வழியில் ஒரு கர்ப்பிணிக்கு தவிர்க்க முடியாமல் உதவ நேரிடுகிறது. அதிலிருந்து ஒரு மனமாற்றம் வருகிறது அவனிடம். 

கொல்ல எடுத்துப் போன குழந்தையைக் கொல்லாமல் காப்பாற்றுகிறான். ஆனால் குழந்தைக்கு ஏகப்பட்ட எதிரிகள்!  ஏன் அப்படி என்பதும் யார் வில்லன் என்பதுதான் கதை.  வில்லன் அறிமுகமாகும் முதல் காட்சியிலேயே நான் இவன்தான் வில்லன் என்று சொல்லி விட்டேன்!

டிராகன் பார்க்கும் மனசே வரவில்லை. கண்ணில் பட்ட அந்தப் படத்தின் காட்சிகள் எரிச்சல் தருகிறது.  குடும்பஸ்தனும் ஏனோ பார்க்கத்தோன்றவில்லை!

விடாமுயற்சி பார்க்க ஆரம்பித்த உடனேயே இதை ஏற்கெனவே பார்த்திருக்கிறோமே என்கிற தேஜாவு உணர்வு!  விடாமுயற்சி வெளியாவதற்கு சில மாதங்களுக்குமுன் இந்தப் படத்தின் ஆங்கிலப்படத்தை (Breakdown - 1997ல் வெளியான  படம்) பார்த்திருந்தேன்.  அப்படியே அந்தப் படம்.   அந்த சாலைக் காட்சிகளும், அந்த மாதிரி ஆங்கிலபாணி சாலையோரக் கடைகளும் வர வேண்டும் என்பதற்காகவே அஜர்பைஜான் சென்று எடுத்திருக்கிறார்கள் போல...   ஃபாஸ்ட் ஃபார்வேர்ட் செய்து க்ளைமேக்ஸ் மட்டும் கொஞ்சம் பார்த்தேன்.

=======================================================================================================

நியூஸ் ரூம் 

- திருச்சி மாவட்டம், திண்ணக்குளம் கிராமத்தில் உள்ள திருநெற்குன்றநாதர் கோவிலை, முற்கால சோழர்கள் துவங்கி, பிற்கால சோழர்கள் வரை, 300 ஆண்டுகளுக்கும் மேல் சிறப்பாக பராமரிக்கப்பட்ட தகவல், கல்வெட்டுகளின் வாயிலாக தெரியவந்துள்ளது. இதில், முற்கால சோழ மன்னர்களின் மூன்றாவது மன்னரான முதலாம் பராந்தகன் காலத்தில் இருந்து, இரண்டாம் ராஜராஜன் வரையிலான அனைத்து மன்னர்களும் இக்கோவிலை பராமரிக்க, தானங்கள் அளித்தது குறித்த கல்வெட்டுகள் உள்ளன.

- ராம்நகர்: அங்கன்வாடியில், இரண்டரை வயது ஆண் குழந்தைக்கு சூடு வைத்ததுடன், டயாபரில் மிளகாய் துாள் போட்டு சித்ரவதை செய்த பெண் உதவியாளர் மீது, வழக்குப்பதிவு செய்யப்பட்டுள்ளது.

- சென்னை, பூந்தமல்லி - போரூர் இடையே மெட்ரோ ரயில் சேவை வரும் டிசம்பரில் துவங்கப்படும் என, சென்னை மெட்ரோ ரயில் நிறுவன அதிகாரிகள் தெரிவித்துள்ளனர்.

- ஊர் எல்லைக்கு வந்து ஆற்றில் தண்ணீர் குடித்துவிட்டு, யாருக்கும், எவ்வித தொல்லையும் கொடுக்காமல், கட்டுப்பாட்டுடன் யானைகள் வனத்துக்குள் திரும்பும் நடைமுறையால், கேரள மாநிலம் ஆனக் குளம் கிராமம் அனைவரது கவனத்தையும் ஈர்த்து வருகிறது.

-  திருச்சி : மொபைல் போனில் படம் பார்த்தபடி, அரசு பஸ்சை ஓட்டிய டிரைவர், 'சஸ்பெண்ட்' செய்யப்பட்டார்.

- திண்டுக்கல்:' திண்டுக்கல் பஸ் ஸ்டாண்ட் முன் பிரேக் பிடிக்காமல் ஓடிய அரசு பஸ்சை கல்லை போட்டு நடத்துனர் நிறுத்தினர்.

- புதுடில்லி: இந்தியாவின் பாரம்பரிய பானமான கோலி சோடாவுக்கு, அமெரிக்கா, பிரிட்டன் மற்றும் ஐரோப்பிய, வளைகுடா நாடுகளில் நல்ல வரவேற்பு கிடைத்து வருவதாக, மத்திய வர்த்தக அமைச்சகம் தெரிவித்து உள்ளது.

- பெங்களூரு: மோகன்லால் நடித்த எம்புரான் படத்தின் முதல் காட்சிக்காக பெங்களுருவில் ஒரு கல்லூரி விடுமுறை அறிவித்துள்ளது.

- புதுக்கோட்டை : புதுக்கோட்டை மாவட்டம், ஆலங்குடி சேசு கலை அறிவியல் கல்லுாரி பஸ்சை, அக்கல்லுாரி 3ம் ஆண்டு மாணவர்கள் இருவர் மது போதையில் பஸ்சை அறந்தாங்கி வரை ஓட்டி வந்துள்ளனர்.

-  சென்னை; சென்னையில், சவுக்கு சங்கர் வீட்டை சூறையாடிய கும்பல், வீடு முழுதும் கழிவுநீரையும், மலத்தையும் கொட்டி அசிங்கப்படுத்தி உள்ளனர். இச்சம்பவம் குறித்து, சட்டப்படி நடவடிக்கை எடுக்கப்படும் என, சென்னை போலீசார் தெரிவித்துள்ளனர்.

- சான்பிரான்சிஸ்கோ: அமெரிக்காவில் இருந்து சீனாவிற்கு கிளம்பிய விமானம் நடுவானில் பறந்த போது, பாஸ்போர்ட் கொண்டு வரமறந்தது விமானிக்கு நினைவுக்கு வந்தது. இதனையடுத்து அந்த விமானம் மீண்டும் அமெரிக்காவிலேயே தரையிறக்கப்பட்டது.

===================================================================================================

'எழுதியது இப்படிதான்' என்று எழுத்தாளர்களின் பழக்கவழக்கங்கள் பற்றி திருப்பூர் கிருஷ்ணன் எழுதிய பதிவு இரண்டு பாகம் ஏற்கெனவே  பகிர்ந்து விட்டேனா என்று நினைவில்லை.  ஓம்சக்தி 2024 தீபாவளி மலரில் இடம்பெற்றது.

============================================================================

திருப்பூர் கிருஷ்ணன் பி எஸ் ராமையா 

பி.எஸ். ராமையா பிறந்த நாள்: மார்ச் 24

.........................

*மணிக்கொடி எழுத்தாளர் பி.எஸ். ராமையா!*

*திருப்பூர் கிருஷ்ணன்*

.........................

*நான் திருப்பூரிலிருந்து சென்னைக்கு வந்து சென்னையில் வாழ்க்கை நடத்தத் தொடங்கியிருந்தேன். 1982ஆம் ஆண்டுக்கான சாகித்ய அகாதமி பரிசு பி.எஸ். ராமையாவுக்கு என அறிவிப்பு வந்தது.  அதன்பொருட்டான ஒரு பாராட்டு விழா சென்னை தக்கர்பாபா வித்யாலயத்தில் நடைபெற்றது.

நான் பி.எஸ். ராமையாவை அதுவரை நேரில் பார்த்ததில்லை. அவரை நேரில் பார்க்கும் ஆவலில் அந்தக் கூட்டத்திற்குச் சென்றிருந்தேன்.  பலர் அவரைப் புகழ்ந்து மேடையில் பேசினார்கள். பலர் அவர் கழுத்தில் மாலை அணிவித்து மகிழ்ந்தார்கள். கழுத்தில் மாலைகளோடு ஏற்புரை சொல்ல ஒலிபெருக்கி முன் வந்தார் ராமையா. அவர் கண்களில் கண்ணீர் தளும்பியது.

`வாழ்க்கையில் பொருளீட்டுவதற்குரிய தொழிலாக நான் எழுத்தைத் தேர்ந்தெடுத்து விட்டேன். எத்தனையோ பொருளாதாரச் சங்கடங்களை அனுபவித்திருக்கிறேன்.  ஆனால் இப்போது சாகித்ய அகாதமி பரிசுபெறும் இந்தச் சந்தர்ப்பத்தில் என் மனம் நிறைவில் ஆழ்ந்திருக்கிறது. இந்த மனநிறைவு போதும் எனக்கு. இனிமேல் நான் மேடையேற மாட்டேன்!` என உணர்ச்சிவசப்பட்டுப் பேசினார்.  அன்று அவர் சொன்னது உண்மையே ஆயிற்று. அதன் பின்னர் அவர் மேடையேறவில்லை. குறுகிய காலத்திலேயே காலமாகிவிட்டார். ....

*பி.எஸ். ராமையாமேல் பெருமதிப்பும் பேரன்பும் கொண்டிருந்தவர் எழுத்தாளர் சி.சு. செல்லப்பா. பின்னாளில் `பி. எஸ். ராமையாவின் சிறுகதைப் பாணி` என்ற தலைப்பில் செல்லப்பா ஒரு நூலே எழுதினார்.

ராமையாவின் மரணம் செல்லப்பாவைப் பெரிதும் பாதித்தது. மெல்ல மெல்லத்தான் அந்தத் துயரிலிருந்து அவர் மீண்டார். ராமையாவின் எழுத்தை யாராவது ஒரு வார்த்தை குறைத்துச் சொன்னால் கூட அவருக்குப் பொறுக்காது.

ராமையா சிறந்த எழுத்தாளர் என்பதில் சந்தேகமில்லைதான். அவரின் மணிமணியான சிறுகதைகள், `தேரோட்டி மகன்` என்ற கர்ணனைப் பற்றிய வரலாற்று நாடகம் இவையெல்லாம் தற்கால இலக்கியத்தில் தடம் பதித்த படைப்புகள்.

ஆனால் இப்படியெல்லாம் எழுதிய ராமையாவே பத்திரிகைத் தேவைக்காகவும் நிறைய எழுதியிருக்கிறார்.

சி.சு. செல்லப்பாவோடு நெருங்கிப் பழகியவன் நான். செல்லப்பாவின் பேரன்பைப் பெற்ற பாக்கியசாலியும் கூட.

ஒருமுறை நான் செல்லப்பாவைச் சந்திக்கப் போனபோது எங்கள் பேச்சு தற்செயலாக ராமையா இலக்கியத்தைப் பற்றித் திரும்பியது. ராமையாவின் எல்லாப் படைப்புக்களையும் தொகுத்து முழுமையான நூலாக வெளியிட வேண்டும் என்றார் செல்லப்பா.

ராமையாவுக்குப் பெருமை சேர்க்காதவையும், பத்திரிகைத் தேவைக்காக அவர் எழுதியவையுமான படைப்புக்களை நீக்கிவிட்டு மற்றவற்றை மட்டுமே தொகுக்க வேண்டும் என்பது என் கட்சி.

என் கருத்தைக் கேட்ட செல்லப்பாவுக்குக் கோபம் வந்துவிட்டது. அவர் சுவரைப் பார்க்கத் திரும்பி உட்கார்ந்துவிட்டார்!

`ஏன் இப்படி உட்கார்ந்திருக்கிறீர்கள்?` எனச் சிரித்தவாறே கேட்டேன். `ராமையா படைப்புகளைப் பற்றிக் குறை சொல்பவர்களிடம் எனக்குப் பேச்சுவார்த்தை கிடையாது!` என்றார்.

சற்றுநேரம் கழித்து மறுபடி என் பக்கம் திரும்பி உட்கார்ந்து பேசத் தொடங்கினார். `என்ன இப்போது பேசத் தொடங்கி விட்டீர்கள்?` என்றேன். `என்னால் உன்னோடு பேசாமல் இருக்க முடியாதே!` என்றார் தழதழப்புடன்.

செல்லப்பாவைப் போன்ற அன்பு மயமான மனிதர்கள் அபூர்வம். ராமையா மேல் கொண்ட அவரின் அன்பு ராமையாவைக் குறைசொல்வதை அனுமதிக்கவில்லை. அதேநேரம் என்மேல் அவர் கொண்ட அன்பு அவரின் கோபத்தை அனுமதிக்கவில்லை. ....

*ராமையாவின் முக அமைப்பு வித்தியாசமானது. கன்னங்கள் ஒட்டியும் முகம் சற்று நீண்டும் இருக்கும். கண்களில் ஒரு தனித்த கவர்ச்சியும் பார்வையில் ஒளியும் இருக்கும்.

அவரைப் பார்த்தால் அவர் தோற்றமே இவர் ஏதோ பெருமைக்குரிய ஒரு மனிதர்தான் என்று எண்ண வைக்கும்.

சி.சு. செல்லப்பா பிறந்த அதே வத்தலக்குண்டு கிராமத்தைச் சேர்ந்தவர்தான் ராமையாவும். இளமைக் காலத்திலேயே வறுமை அவருடன் கைகோத்துக் கொண்டுவிட்டது.

அந்தக் காலத்தில் நிலவிய வாரச் சாப்பாட்டு முறைப்படி வாரச் சாப்பாடு சாப்பிட்டும் உபகாரச் சம்பளம் பெற்றும்தான் பள்ளிப் படிப்பை முடித்தார் ராமையா.

பின்னர் திருச்சியில் புடவைக் கடை ஒன்றில் எடுபிடி வேலைகள் செய்தார். கடலூரிலும் அதுபோல் சிலபல பணிகள். சென்னைக்கு வந்து ஆர்ய பவன் போன்ற உணவகங்களில் உணவு பரிமாறும் பணி புரிந்தார்.

இவற்றின் காரணமாக அவர் வாழ்க்கை பலவித அனுபவங்கள் நிறைந்ததாக மாறியது.

மகாத்மாவின் கொள்கைகளால் ஈர்க்கப்பட்ட எழுத்தாளர்கள் தமிழில் பலர். அவர்களில் ராமையாவும் ஒருவர். தனிநபர் சத்தியாக்கிரகத்தில் பங்குகொண்டு சிறை சென்றார்.

சிறையில் அவருக்கு ஏ.என். சிவராமன், வ.ரா., சங்கு சுப்பிரமணியன் போன்ற இலக்கிய உலகப் பிரமுகர்களின் நட்பு கிடைத்தது.

சிறையிலிருந்து விடுதலை ஆனபின் காந்தியின் நிர்மாணத் திட்டங்களில் சேர்ந்து கதர் விற்கத் தொடங்கினார். தூத்துக்குடி, ராஜபாளையம், திருநெல்வேலி போன்ற பல ஊர்களில் தொண்டர்படை முகாம்கள் அமைத்தார்.

மெல்ல மெல்ல அவரது எழுத்தார்வம் அதிகமாயிற்று. ஆனந்த விகடன் சிறுகதைப் போட்டிக்கு அவர் அனுப்பிய `மலரும் மணமும்` என்ற சிறுகதை ஊக்கப் பரிசு பெற்றது.

பிறகு மணிக்கொடி இதழில் தொடர்ந்து எழுதலானார். மணிக்கொடி காலம் என்ற தலைப்பில் இவர் எழுதிய நூல்தான் இவருக்கு சாகித்ய அகாதமி விருது பெற்றுத் தந்தது.

மணிக்கொடி எழுத்தாளரே மணிக்கொடி பற்றி எழுதிய அற்புதமான இலக்கிய வரலாற்று நூல் அது. 300க்கும் மேற்பட்ட சிறுகதைகள், மூன்று நாவல்கள், ஆறு நாடகங்கள் என இவரின் இலக்கியப் பங்களிப்பு கணிசமானது.

திரைத்துறையில் ஆர்வம் ஏற்படவே அதிலும் கவனம் செலுத்தலானார். `குபேர குசேலா` என்ற திரைப்படத்தை ஆர்.எஸ். மணியுடன் இணைந்து தயாரித்தார். பற்பல திரைப்படங்களில் கதை வசனப் பணிகளில் பங்கேற்றார்.

`மணிமேகலை, மதனகாமராஜன், பக்த நாரதர், மகாத்மா உதங்கர், மல்லியம் மங்களம்` என அடுத்தடுத்து அவர் பங்களிப்பாற்றிய திரைப்படங்கள் வெளிவந்து நல்ல வரவேற்பையும் பெற்றன.

அதே காலகட்டத்திலேயே ஆனந்தவிகடன், நான் பணிபுரிந்த தினமணிகதிர், குமுதம் போன்ற இதழ்களிலும் தொடர்ந்து சிறுகதைகள் எழுதினார்.

இவர் எழுதிய `பிரசிடெண்ட் பஞ்சாட்சரம், போலீஸ்காரன மகள்` ஆகிய இரண்டு படைப்புக்களும் நாடகங்களாகவும் திரைப்படங்களாகவும் பெருவெற்றி பெற்றன. நிறையத் திரைப்படங்களுக்குக் கதை வசனம் எழுதினார்.

எழுபத்தெட்டு ஆண்டுகளே வாழ்ந்த அவர் இறுதியில் தொண்டைப் புற்றுநோய் ஏற்பட்டு மரணமடைந்தார்.

ராமையா நல்லவற்றையே எழுதினார். நல்லவர்களோடு மட்டுமே அணிசேர்ந்தார். சமூகத்தையோ தனிமனிதனையோ கெடுக்கக் கூடிய சிந்தனைகளை அவர் எழுத்தில் பார்க்கவே முடியாது.

அவர் எழுத்து குறித்த தன் கோட்பாடு என்ன என்பதை `எழுத்து` என்ற இலக்கிய இதழுக்கு வழங்கிய பேட்டியில் பின்வருமாறு கூறுகிறார்:

`எழுத்தாளர்களுக்கு நான் சொல்ல விரும்புவது இதுதான். வாழ்க்கையில் துன்பம் இருக்கிறது. துயரம் இருக்கிறது. அதேபோல் தீமை, புன்மை, கயமை ஆகிய தன்மைகளும் இருக்கின்றன. இவை எல்லாவற்றிலும் அழகு இருப்பதாக எழுதிவிட முடியும் திறமையுள்ள ஓர் எழுத்தாளனால்.

ஆனால் தீமையும் புன்னைமயும் கயமையும் எவ்வளவு அழகு படுத்தப்பட்டாலும் இலக்கியச் சரக்கு ஆகாது. அந்தத் தன்மைகளைச் சிறப்புப் படுத்திக் காட்டும் எழுத்து அப்போதைக்கு இலக்கியத்தரம் உள்ளதான ஒரு மயக்கத்தை எழுப்புமேயன்றி நிலைத்து நிற்கவே நிற்காது.

இது நம் நாட்டில் மட்டுமல்ல, உலகம் முழுவதும் உள்ள எந்த நாட்டிலும் நூற்றாண்டுகளைத் தாண்டி நிற்கும் இலக்கியங்களைப் பார்ததால் விளங்கிவிடும்.

அசிங்கத்தை அழகுபடுத்திக் காட்டுவது ஒரு அரிய திறமைதான். ஆனால் அறிவாளிகள் அதை மதிப்பதில்லை. வருங்காலத் தலைமுறைகள் அதை மதிக்கவே மதிக்காது. இதை நினைவில் வைத்துக் கொண்டு எழுதவேண்டும் என்பது நான் சொல்ல விரும்பும் செய்தி.

வாசகர்களுக்கு: சாப்பிடுகிறவன் சுவைத் தகுதி அளவுக்குத் தான் சமையல் அமையும் என்று ஒரு தமிழ்ப் பழமொழி உண்டு. உங்களுக்குக் கிடைக்கும் இலக்கியத்தின் தரம் உங்கள் சுவைத்தகுதி அளவுக்குத்தான் இருக்கும். `....

பி.எஸ். ராமையாமேல் சி.சு.செல்லப்பா போலவே தீபம் நா. பார்த்தசாரதி, வல்லிக்கண்ணன், சிட்டி, சிவபாதசுந்தரம், தி. ஜானகிராமன் போன்றோரெல்லாம் கூட அளவற்ற மதிப்பும் அன்பும் வைத்திருந்தார்கள்.

உன்னதமான பல எழுத்தாளர்களுக்கு சாகித்ய அகாதமி பரிசு கிட்டாமலேயே போய்விடுகிறது. ஆனால் பி.எஸ். ராமையா என்ற உயர்ந்த படைப்பாளிக்கு சாகித்ய அகாதமி பரிசு கிடைத்ததற்கு, அந்தக் காலகட்டத்தில் பரிசைத் தீர்மானிக்கும் உயர்நிலைக் குழுவில் தீபம் நா.பார்த்தசாரதி இருந்தார் என்பதும் ஒரு காரணம்.

பரிசுகளும் விருதுகளும் ஓர் எழுத்தாளருக்குப் பெருமை சேர்க்கலாம். சிறந்த எழுத்தாளருக்குப் பரிசுகள் தரப்பட வேண்டும் என்பதில் மாற்றுக் கருத்தில்லை.

அத்தகைய பரிசுகள் அவர் தொடர்ந்து எழுத ஊக்கம் கொடுக்கக் கூடும். பொதுமக்களின் கவனம் சமகாலத்தில் அந்த எழுத்தாளரின் எழுத்துக்கள் மேல் திரும்புவதற்கு அவர் பெறும் விருதுகள் காரணமாக அமையக் கூடும்.

ஆனால் ஓர் எழுத்து காலத்தை வென்று நிற்பதென்பது அதன் தரத்தினால் தானே அன்றி அந்த எழுத்தாளர் பெற்ற விருதுகளால் அல்ல.

பி.எஸ். ராமையாவின் பற்பல சிறுகதைகளும் நாடகங்களும் கட்டாயம் காலத்தை வென்று நிற்கும். இதைவிட பி.எஸ். ராமையாவுக்குப் பெரிய பெருமை வேறில்லை.

(அல்லயன்ஸ் பதிப்பகம் வெளியிட்டுள்ள பி.எஸ். ராமையாவின் சந்தைப் பேட்டை நாவலுக்கு எழுதிய அணிந்துரை. மீள் பதிவு.)

........................

==========================================================================================

பழங்கணக்கு...   

வரவு செலவு எழுதிக்கொண்டிருந்த நேரம்...  98-99 ம் வருட மளிகை விலை நிலவரமும் வீட்டின் உத்தேச தேவைப்பட்டியலும்.

எங்கள் வீட்டில் இன்றளவும் இதே அளவில்தான் சாம்பார்ப்பொடி அரைக்கிறோம்.  வெள்ளம் சேர்த்தி கிடையாது.  அதை இதனுடன் சேர்த்து அரைப்பேன் என்று நினைக்க மாட்டீர்கள் என்று நம்புகிறேன்!  பொருள்கள் வாங்கி அரைக்கும்போது முன்னர் எப்போது அரைத்தோம் என்பதும் குறிப்பது வழக்கம்!

பெரியவனின் பள்ளிக்கட்டணமும், பள்ளியில் அவனை ஸ்பெஷலாகப் பார்த்துக்கொள்ளும் ஆயாவுக்கு ஃபீஸும்!  மீனா என்பது பாத்திரங்கள் தேய்க்கும் பெண்மணி.  இன்றளவிலும் குடும்ப நண்பர்.  வெண்ணெய் அரை கிலோ 75.00  அந்த வருடம் யாருக்கு சஷ்டியப்த பூர்த்தி வந்தது என்று நினைவில்லை.  ஏன் பெயரில்லாமல் குறித்திருக்க்கிறேன் என்றும் தெரியவில்லை.  சாதாரணமாக பெயரையும் சேர்த்தே எழுதுவது வழக்கம்.

==================================================================================

FaceBook ல் 'ரெற்றோ கவிதைகள்' என்ற பக்கத்துக்காக நான் எழுதியது...

===================================================================================

பொக்கிஷம் :