நாங்கள் தரிசனம் செய்த கோயில்கள் - 09 நெல்லைத்தமிழன்

 

 வரலாற்றுச் சிறப்பு மிக்க தாராசுரம் ஐராவதீஸ்வரர் கோயில்

முதலாம் பராந்தகச் சோழன் பல போர்களில் வெற்றிபெற்ற போதும் ஒரு சில முக்கியப் போர்களில் தோல்வியும் அடைந்தான். அதில் ஒன்று ஈழ அரசுக்கு எதிராகப் படையனுப்பி, ஈழத்தில் சோழர் படைத்தலைவன் மாண்டதால் பெற்ற தோல்வி.

அதைவிடப் பெரும் தோல்வி, பட்டத்து இளவரசன் தலைமையில் சென்ற படை தக்கோலத்தில் இராட்டிரகூடர்களிடம் தோல்வியுற்றது.  இதில் கங்க மன்னன் இரண்டாம் பூதுகன் சாமர்த்தியமாகச் செயல்பட்டு, தன் படைத்தலைவனிடம், சோழ இளவரசனைச் சுற்றியுள்ள படைகளைப் பிரிக்கும்படியான திட்ட த்தைத் தந்து தகுந்த இடைவெளியை உருவாக்கி, நேரடியாகச் சென்று யானை மீதிருந்து போரிட்ட இராஜாதித்தன் மீது சரமாரியாக அம்பினால் தாக்கியது. (அல்லது ஒரு அம்பினால் இராஜாதித்தனை வீழ்த்தியது). நெஞ்சில் நேரடியாக அம்பு தாக்கி அங்கேயே மரணமடைந்தான் இராஜாதித்தன். அதுவே சோழர் படையை நிலைகுலையச் செய்து, முதல் தோல்வியைப் பெறச்செய்தது. தக்கோலப் போரே சோழ சாம்ராஜ்யத்தைச் சுருங்கச் செய்தது.

இணையத்திலிருந்து சில படங்களை இங்கு கொடுப்பது சரியாக இருக்கும் என்று நினைக்கிறேன்.

திருநாவலூர் சிவன் கோயில். இங்கு பல கல்வெட்டுகள் இராஜாதித்தன் மற்றும் அவன் படைத்தலைவர்கள் அளித்த மானியம் பற்றி உள்ளன.

அங்கிருக்கும் கல்வெட்டுகளில் சில

நீங்கள் கண்டுபிடித்ததை விட இன்னும் பல்வேறு செய்திகள் இருக்கின்றன என்று சொல்கிறதோ ஐராவதீஸ்வரர் கோயில் விமானம்?

பல கோயில்களில் கல்வெட்டுகள் பல உதிர்ந்துகொண்டுவருகின்றன. அவைகளை ஏற்கனவே படியெடுத்திருக்கிறார்களா என்று தெரியவில்லை. அதுவம் தவிர கல்வெட்டுகள் மீது பெயிண்ட் அடித்துவிடுகிறார்கள், கோயிலைப் புதுப்பிக்கிறார்களாம். சிற்பங்கள் மீதுகூட பெயிண்ட் அடிக்கப்பட்டிருக்கின்றன. இவைகளைப் பார்க்கும்போது வருத்தம் மேலிடுகிறது. ஏற்கனவே கண்ணுக்கு முன்னால் இருக்கும் கல்வெட்டுகளைப் படியெடுத்திருப்பார்கள் என்று நம்புவோம். வரலாற்று ஆசிரியர்களே என்ன சொல்கிறார்கள் என்றால், இதுவரை கண்டுபிடிக்கப்பட்டு படிக்கப்பட்ட கல்வெட்டுகளின் படி இவற்றை யூகித்து எழுதியிருக்கிறோம். இந்த வரலாறு முற்றிலும் முழுமையானது அல்ல. நாளை புதிய கல்வெட்டுகள், பட்டயங்கள் தென்படும்போது வரலாற்றுச் செய்திகள் மாறுபடலாம் என்று குறிப்பிடுகின்றனர். கல்வெட்டுகளின் முக்கியத்துவம் தெரிந்திருக்கும் என்று நினைக்கிறேன்.

அழகிய சிற்பங்களுடன்/வேலைப்பாடுகளுடன் கூடிய தூண்கள் விதானத்தைத் தாங்கிக்கொண்டிருக்கின்றன.

ஜன்னல்கள் (சாளரங்கள் என்று எழுது என்று மனது சொல்கிறது) அமைக்கப்பட்டு வெளிச்சம் வருவதற்கு ஏற்பாடுகள் செய்யப்பட்டிருந்தன (கற்களில்).

வெளிப் பிராகார மண்டபத்தில் அழகிய தூண்கள்

கோயிலின் வெளிப் பிராகாரத்தில் இந்த மாதிரி சிறு சன்னிதிகள் போன்று அமைந்திருந்தன. அவற்றில் சிவலிங்கங்களும் பலிபீடங்களும் இருந்தன. கோயில் கட்டப்பட்ட காலத்தின் என்ன என்ன இருந்தன என்பதை யாரே அறிவர்?

இரண்டாவது தூணில் உள்ள நாட்டியச் சிற்பம் எனக்கு பார்வதி, சிவனிடம் நடனமாடித் தோற்றதை நினைவுபடுத்தியது.

இந்தத் தூண்களில் பட்டைகளுடன் கூடிய செதுக்கல்களைக் கவனித்தீர்களா? வெறும்ன கல்லின் மீது சிறு சிறு சிற்பங்களுடன் விட்டிருக்கலாம். ஆனால் வித்தியாசம் காண்பிப்பதற்காக பிரகார மண்டபத்தில் இத்தகைய அலங்காரத் தூண்களை அமைத்திருக்கிறார்கள்.

எத்தனையோ சிவலிங்கங்கள். அனேகமாக இந்தப் பகுதியில் தொல்லியல்துறையால் கண்டுபிடிக்கப்பட்டிருக்கவேண்டும். அனைத்தையும் அருகருகே வைத்திருக்கிறார்கள்.

பல இடங்களில் (தனியாருக்குச் சொந்தமான வயல்வெளிகள். அவை எப்படி தனியாருக்குச் சொந்தமாயின? கோயில் நிலங்களாகத்தான் இருந்திருக்கவேண்டும்) கிடைத்த சிலைகளை அப்படியே மியூசியத்துக்கோ (சரபோஜி மன்னர் அருங்காட்சியகம்) அல்லது இந்த மாதிரி கோயில்களிலோ வைத்துவிடுகிறார்கள். தொல்லியல் துறைக்கு, பழைய சிலைகளை அழியாமல் பாதுகாக்கும் வாய்ப்பு. தனியாருக்கோ, தன் நிலங்களில் அகழ்வாராய்ச்சி செய்து தங்களுக்குப் பிரச்சனை வரக்கூடாது என்ற நிலை.

நான் சோழ நாட்டுப் பகுதிகளில் பயணிக்கும்போது பல வயல்வெளிகளில் மண்டபங்களைக் கண்டிருக்கிறேன். அதுபோல தஞ்சையில் ஒரு மண்டபம்/கோயில் போன்ற அமைப்பை, வீட்டாக்கி வைத்திருப்பதையும் பார்த்திருக்கிறேன். யாரும் ஆட்சேபணை எழுப்பவில்லை என்றால் மெதுவாக கட்டிடம் உதிரும், அங்கு புதிய கட்டிடம் உருவாகி பட்டா வாங்கப்பட்டுவிடும் என்று தோன்றுகிறது.

வரலாற்று ஆர்வலர்கள், சோழ வரலாற்றை எடுத்துக்கொண்டு, அந்த அந்தப் பேரர சர்கள் சம்பந்தப்பட்ட நிகழ்வுகள் நடந்த இடங்களுக்குச் சென்று மிஞ்சியுள்ள வரலாற்றைப் பாதுகாக்க உதவ வேண்டும். அவற்றை சுற்றுலாத் தலங்களாக ஆக்கவேண்டும். அப்போதுதான் அவற்றைப் பத்திரமாக அடுத்த தலைமுறைக்கும் கொண்டுபோக முடியும்.

சரி… அடுத்த வாரம் தமிழர் வரலாற்றைக் கொஞ்சம் பார்க்கலாம்.  தமிழர்கள் பெரும் நாகரீகம் மிக்கவர்கள், பாரதீயர்கள் நாகரீகத்தின் தொட்டிலாக இருந்தவர்கள் என்றெல்லாம் சொல்கிறோமே.. அதில் உண்மை இருக்கிறதா? இல்லை வெற்றுப் பெருமையா என்பதைப் பார்ப்போம்.

 (தொடரும்)