வெள்ளி வீடியோ : பிரிவான காதல் நெஞ்சின் சுகமான சோகங்கள்..

படம் காற்றுக்கென்ன வேலி.  கே என் சுப்பு இயக்கத்தில் மோகன், ராதா, கீதா நடித்த படம்.  கீதா இந்தப் படத்தில்தான் அறிமுகம் ஆனதால் அவருக்கு காற்றுக்கென்ன வேலி கீதா என்றே பெயர்.

இந்தப் படத்துக்கு இசை சிவாஜி ராஜா.  அவரைப் பற்றிய எந்த விவரங்களும் திரட்ட முடியவில்லை.  இணையத்தில் அவரைப் பற்றிய விவரமே இல்லை.  

மதுரை ரிசர்வ் லைனில் நள்ளிரவுப்படமாக சைக்கிளில் சென்று, மணலில் அமர்ந்து பார்த்த படம்.  படம் திராபை.

இந்தப் படம் தவிர வேறு சில படங்களுக்கும் அவர் இசை அமைத்திருந்ததாய் நினைவு.  இப்போது ஞாபகம் இல்லை.  தேடினால் இதே பெயரில் இருக்கும் ஒரு தெலுங்கு நடிகர் விவரம்தான் கிடைக்கிறது.

இந்தப் படத்தில் இன்னும் ஒரு நல்ல பாடலும் (கடல் மீதிலே தன் மீனைத் தேடினான்)  ஒரு சுமாரான பாடலும் (ரேகா...   ரேகா...) உண்டு.

இந்தப் பாடலிலும் முதல் சுகம் எஸ் பி பி யின் குரல்.  அப்புறம் அந்த ஆரம்ப இசை கொஞ்சம் ஸ்பெஷல்.  பெண்குரலின் (அது எஸ் ஜானகி அல்ல) ஹம்மிங்.

முதல் சரணம் தொடங்கும் முன் வரும் இசை கேட்கும்போது ஹிந்திப் பாடலான "கபீ கபீ.." பாடல் நினைவுக்கு வரும்.

இனிமையான பாடல்.   வைரமுத்துவின் வரிகளாக இருக்கலாம். 

சின்னச் சின்ன மேகம் என்னைத் தொட்டுப் போகும் 

நினைவுகள் பூவாகும் கண்ணுக்குள் கனவுகள் ஏராளம் 

பிரிவான காதல் நெஞ்சின் சுகமான சோகங்கள் 

மழைக்காலப் பூவின்மீது இருக்கின்ற கீதங்கள் 

கன்னி இளம்பூக்கள் கையெழுத்துக் கேட்கும் 

உள்ளுறங்கும் சோகம் கண்திறந்து பார்க்கும் 

ஞாபகங்கள் கண்ணில் இன்று முத்துக் குளிக்கும் 

நினைவுகள் பூவாகும் கண்ணுக்குள் கனவுகள் ஏராளம் 

அனல் மீது பூக்கும் அந்த கொடிக்கின்று வேரில்லை 

இதயத்தின் சுவரில் உந்தன் பெயரன்றி வேறில்லை 

மேடைகளின் ஓரம் ஜாடை செய்யும் பூவை 

பார்வைகளில் நூறு பந்தி வைக்கும் பாவை 

கோதைமகன் பேரைச் சொன்னால் ராகம் இனிக்கும் 

நினைவுகள் பூவாகும் கண்ணுக்குள் கனவுகள் ஏராளம்