நான் தரிசனம் செய்த கோயில்கள் – மனைவியுடன் யாத்திரை – பகுதி 09 நெல்லைத்தமிழன்

 

இராயர் கோபுரத்தைக் கண்டபிறகு நாங்கள் அடுத்து இராமானுஜ மண்டபம் என்று அழைக்கப்படும் குடவரைக் கோயிலை அடைந்தோம்.

ராமானுஜ மண்டபம் (முற்றுப்பெறாத மண்டபம்)

இந்த மண்டபம் முதலாம் மஹேந்திரவர்மன் காலத்தையது. இது சிவனுக்காக ஏற்பட்ட கோயில் அல்லது சிவனின் மூன்று உருவங்களுக்கான கோயில். இங்குள்ள கல்வெட்டு, ருத்ரத்தை நெஞ்சினால் ஜெபிக்காதவர்கள் ஆறுமடங்கு பாவம் செய்தவர்கள் என்று சொல்கிறது. பிற்காலத்தில் (14-15ம் நூற்றாண்டில்) இந்த மண்டபத்தை வைணவ சமயத்தைச் சேர்ந்தவர்கள் எடுத்துக்கொண்டு இங்கிருந்த உருவங்களைச் சிதைத்து அதன் மீது வைணவச் சிற்பங்கள் செதுக்கலாம் என்று நினைத்தனர். அதனால் இங்கிருந்த சுவற்றில் இருந்த பல்வேறுபட்ட சிற்பங்கள் முற்றிலும் உளியால் சிதைக்கப்பட்ட நிலையில் உள்ளது. வைணவர்கள் இதனைப் பிற்காலத்தில் ஆக்கிரமித்ததனால் இராமானுஜ மண்டபம் என்று அழைக்கப்பட்டாலும், மஹேந்திரவர்மன் காலத்தில் இது சிவனுக்கான கோயில்.

குன்றின் ஓரத்தில் இருப்பதுதான் இராமானுஜ மண்டபம்.

இந்தக் கோயிலை ஆக்கிரமித்தவர்கள் அதன் முன்பு மண்டபம் போன்று தூண்களை நிறுவியிருக்கிறார்களாம். மகேந்திரவர்மன் காலத்தில் இது இல்லையாம்.

முன்மண்டபத் தூண்களைக் கடந்துவிட்டால் பல்லவர்கால சிங்கத் தூண்களைப் பார்க்கலாம்.

சிதைக்கப்பட்டிருக்கும் சிற்பங்கள். எனக்கு முதல் சிற்பம் கஜலக்ஷ்மி தோற்றத்தைத் தருகிறது. இரண்டாவது சிற்பம் வேலைக் கையில் வைத்துக்கொண்டிருக்கும் துர்கையை நினைவுபடுத்துகிறது.

முதல் படத்தில் உள்ளது  ஜடாமுடியுடன் கூடிய சிவனாக எனக்குத் தோன்றுகிறது.

மண்டபத்தின் பக்கவாட்டுப் பகுதியில் சீராகச் செதுக்கப்பட்டிருக்கும் படிகள்.

மகாபலிபுரம் கலங்கரை விளக்கு 1904ல் ஏற்படுத்தப்பட்ட து. (2001லிருந்து விடுதலைப் புலிகள் பிரச்சனை காரணமாக (அதாவது இலங்கையிலிருந்து வரும் படகுகளுக்கு உபயோகப்படக்கூடாது என்று) இந்தக் கலங்கரை விளக்கம் உபயோகம் தடைபட்டது. அதையொட்டி உள்ள படம் மஹிஷாசுர மர்தினி கோயில்

மஹிஷாசுரமர்தினி கோயில்/மண்டபம்

இது ஒரு முக்கியமான குடவரைக்கோயில். இது துர்கையின் பிறப்பான மஹிஷாசுரமர்தினிக்காக அமைந்த கோயில்.  இதில் நடுவில் உள்ள சிறிய சன்னிதி, பின்னணியில் சிவனும் பார்வதியும் இருக்கும் சிற்பம் செதுக்கப்பட்டுள்ளது. அதன் முன்பு தரையில் சிவலிங்கம் இருந்திருக்க வேண்டும். தற்போது லிங்கம் இருந்ததற்கான ஓட்டை மாத்திரமே தெரிகிறது.

நடுவில் இருக்கும் சிவன் சன்னிதி (chamber) பின்புறச் சுவற்றில் சிவன், பார்வதி மற்றும் சிவகணங்கள். சிவன்/பார்வதி காலடியில் எருது (நந்திகேஸ்வரர்?).

 சிவனின் சன்னிதிக்கு இருபுறமும் உள்ள மாடங்களில் தெய்வ உருவங்கள் இல்லை. ஆனால் துவாரபாலகர்கள் மாத்திரம் இருக்கிறார்கள்.

இந்த மண்டபத்தின் வடக்குப் பகுதியில் துர்கைக்கும் மஹிஷாசுரனுக்கும் நடந்த யுத்தம் சித்தரிக்கப்பட்டுள்ளது. போர்முனையில் இருப்பதால் எட்டு கரங்களிலும் ஆயுதங்களைத் தாங்கி துர்கை இருக்கிறாள்.

இந்த மண்டபத்தின் தெற்குப் பகுதிச் சுவற்றில் மஹாவிஷ்ணு, அனந்தசயனத் திருக்கோலம் செதுக்கப்பட்டுள்ளது. ஒரு கையில் தாமரையுடன் இருக்கிறார். இவரின் மேற்புறத்தில் திருப்பாதங்கள் பகுதியிலிருந்து மது கைடப அரக்கர்கள் கோபத்துடன் பொருத வருவதுபோல இருக்கிறது. ஆதிசேஷன் அவர்களைப் பார்த்துச் சீறுவது போல வடிக்கப்பட்டிருக்கிறது. இதனைப் பார்க்கும்போது எனக்கு திருமெய்யம் குடவரைக் கோயிலில் இருந்த விஷ்ணு சிற்பம் நினைவுக்கு வந்தது. ,

திருமெய்யம் அனந்தசயனப் பெருமாள்

கடற்கரைப் பகுதியின் தோற்றம்

ஓலைக்கண்ணீஸ்வரர் கோயில்/பழைய கலங்கரை விளக்கம்

இதுதான் பழைய கலங்கரை விளக்கம். இது சிவபெருமானுக்குரிய கோயில். இதன் மேல் பகுதியில்தான் விளக்கை எரித்தார்கள் பழையகாலத்தில். இது மஹிஷாசுரமர்தினி குகைக் கோயிலுக்கு அருகில் பெரிய பாறை மீது அமைந்துள்ளது. இது 8ம் நூற்றாண்டில் அமைக்கப்பட்டிருக்கிறது.

ஓலைக்கண்ணீஸ்வரா கோவிலை எவ்வளவு உயரத்தில் கட்டியிருக்கிறார்கள் பாருங்கள்.

உலைக்கண் ஈஸ்வரர் (நெற்றிக்கண்) என்ற பெயர் மருவி ஓலைக்கணீஸ்வரர் கோயிலாக ஆகிவிட்டது. இதில் சிவலிங்கம் இருந்ததாம். 18ம் நூற்றாண்டுவரை வணங்கப்பட்டுவந்த கோயில் இது.  பிறகு சிவலிங்கத்தை யாரோ அகற்றிவிட்டார்களாம்.

மேலே ஏறிச்சென்றால், கோயில் வெளிப்புறச் சுவற்றில் நிறைய சிற்பங்கள். ஆனால் ஒடுக்கமான பகுதி

சிற்பங்கள் பிரம்மாண்டமாக இருந்தாலும் அவை நுணுக்கமாக இழைக்கப்படவில்லை.

பழைய கலங்கரைவிளக்கத்திலிருந்து புதிய கலங்கரைவிளக்கின் தோற்றம்

இன்னொரு புறத்தின் தோற்றம். காடுகளாக தற்போது இருக்கிறது. எப்போது கட்டிடங்கள் வருமோ?

சிவன், சிவகணங்கள் தோற்றங்கள் அழகாகவே இருக்கின்றன.

மேல் ஏறுவதற்குக் குறுகலான படிகள். பாதுகாப்பிற்காக கம்பிவலைத் தடுப்பு போட்டிருக்கிறார்கள்.

அங்கிருந்து பார்த்தபோது இன்னொரு பாறையில் வெட்டப்பட்டிருந்தது. ஏதேனும் சிற்பத்திற்கான வேலையை ஆரம்பித்திருப்பார்களோ?

காலை வேளையில் சென்றிருந்தாலும், கூட்டம் மெதுவாக வர ஆரம்பித்திருந்தது. அது சரி.. வெயில் ஏறிவிட்டால் அப்புறம் எங்கே இந்த இடங்களுக்குச் செல்ல முடியும்?

தலசயனப் பெருமாள் கோவிலின் பின்புறமுள்ள குன்றில் இருந்த பல்வேறு புடைப்புச் சிற்பங்கள், கோவில்கள் போன்றவற்றைப் பார்த்த பிறகு கீழிறங்கி, அருகிலுள்ள ஐந்து ரதக் கோவில்கள் என்றழைக்கப்படும் இடத்திற்குச் செல்ல நினைத்தோம். குன்றுகளின் பல்வேறு இடங்களுக்கு ஏறி வந்த களைப்பில், மனைவி ஐந்து ரதம் எவ்வளவு தூரத்தில் இருக்கிறது என்று கேட்டாள். கேள்வியின் அர்த்தத்தைப் புரிந்துகொண்டு, அங்கிருந்த ஆட்டோக்காரிடம் ஐந்து ரதம் பார்க்கணும், அங்கு 20 நிமிடங்களாகும், பிறகு எங்களை கோவில் முன்புறத்தில் இறக்கிவிடணும் என்று பேசிக்கொண்டு ஆட்டோவில் ஐந்து ரதத்திற்குச் சென்றோம். ஆட்டோகாரரோ, நீங்க மெதுவா இந்த இடத்தைப் பார்த்துவிட்டு என்னைக் கூப்பிடுங்கள் (போன் நம்பர் கொடுத்தார்), நான் வந்து உங்களை கோவில் முன்பு டிராப் பண்ணுகிறேன் என்றார்.

ஐந்து ரதங்கள் அமைந்திருந்த பகுதி அருகில்தான் இருந்தது.  அங்கு என்ன கண்டோம் என்பதை அடுத்த வாரம் காண்போமா?

 (தொடரும்)