"திங்க"க்கிழமை : டிகிரி காபி - துரை செல்வராஜூ ரெஸிப்பி

 டிகிரி காபி

*** *** *** ***

தஞ்சாவூர், கும்பகோணத்தில் அந்தக் கால வீடுகளில் டிகிரி காபி போடப்பட்டது எப்படி!?

டிகிரி என்பது காஃபிக்கு அல்ல.. காஃபியுடன் கலக்கப்படுகின்ற பாலுக்கு!.. 

டிகிரி பால் என்பது தண்ணீர் கலக்கப்படாத பால் என்பது அந்தக் காலத்தில் மக்களின் நம்பிக்கை..

இன்று அப்படியெல்லாம் இல்லை.. எத்தனையோ வகையான பால்!..

கறந்த பாலில் தண்ணீர் கலக்காமல் வீட்டில் தயாரிக்கப்பட்ட காஃபியே டிகிரி காஃபி எனப்பட்டது..

அக்காலத்தில் தரமான காபிக் கொட்டையை வாங்கி வீட்டிலேயே  பதமாக வறுத்து கையால் சுழற்றுகின்ற இயந்திரத்தின் மூலம் அரைத்து வைத்துக் கொள்வர்...

அக்ரஹாரத்தில் வசதி உடையோர் வீடுகளில்  காபிக் கொட்டை அரைப்பதற்கான இயந்திரம் கண்டிப்பாக இருக்கும்.. 

மெல்ல மெல்ல வசதியுடைய அனைவரது வீடுகளுக்கும் பரவி ஏதோ ஒரு சூழ்நிலையில் வழக்கொழிந்து போனது..

அந்த காலத்தில் தஞ்சை பேருந்து நிலையம் அருகில் மங்களாம்பிகா,

ரயிலடி ஆரியபவன், ஆனந்த பவன், ராஜ வீதியில் காஃபி பேலஸ்..

கும்பகோணத்தில் லக்ஷ்மி காபி கிளப் வெங்கட ரமணா ஹோட்டல் - மயிலாடுதுறையில் காளியாகுடி ஹோட்டல் என்பவை  பிரசித்தம்.. 

தஞ்சை நகரின் ராஜ வீதிகள் மற்றும் பல பகுதிளில் காபிக் கொட்டையை வறுத்து அரைத்துக் கொடுப்பதற்காகவே கடைகள் இருந்தன.. 

இன்றும் தஞ்சையில் கீழராஜ வீதி, ஐயங்கடைத் தெரு, ரயிலடி - இங்கெல்லாம் ஒரு சில கடைகள் உள்ளன..

காஃபி தயாரிப்பதற்கென பிரத்யேக பித்தளைப் பாத்திரம் Coffee Filter.. அதன் கொள்கலனில் வீட்டில் அரைத்தெடுத்த காஃபித் தூளை நிரப்பி அதனுள் கொதி நீரை அலுங்காமல் குலுங்காமல் ஊற்றுவர்.. அதுவே ஒரு தனிக்கலை..

ஐந்து நிமிடங்கள் கழித்து பார்க்கும் போது (Filter) பில்டரில் வெந்நீர் குறைந்திருக்க  மீண்டும் வெந்நீர் ஊற்றி நிரப்புவர்..

இதையடுத்து, அந்தக் காலத்து வழக்கப்படி அதிகாலையில் கொல்லைப் புற தொழுவத்தில் - லச்சுமி, லக்ஷணா, கமலா விமலா எனும் பசுக்களிடம் கறக்கப்பட்ட பால் இளஞ்சூட்டுடன் அடுக்களைக்கு வரும்...

சில வீடுகளில் கறந்த பாலை  சற்றே சூடாக்குவதும்  உண்டு..

இந்நேரத்தில் டிகாஷன் தயாராகி இருக்கும்..

பளபளப்பாகத் துலக்கப்பட்டிருக்கின்ற  பித்தளை டவரா - டம்ளரில் தேவையான அளவுக்குச் சர்க்கரை போட்டு, தேவைக்கேற்ப டிகாஷனை ஊற்றி, அதன் மீது இளஞ்சூடான பாலை ஊற்றி ஒரு ஆற்று ஆற்றி நுரைத்ததும்  - ஆகா அதுவல்லவோ சொர்க்கம்!..

அன்றைக்கு கல்யாண வீடுகளில் பரிமாறப்படுவதும்

மறுநாள் வெட்கத்துடன் புது மணப்பெண் கணவனுக்கு வெள்ளிக் குவளையில் கொடுப்பதும்  - இப்படியான காஃபியைத் தான்!..

காஃபியில் சிக்கரி  கலக்கப்படும்போது சற்றே கசப்புச் சுவை ஏற்படும். இந்த சுவைக்கே பலரும் வசப்பட்டனர்.. 

காஃபித் தூளுடன் சிக்கரி கலப்பதுதான் குடும்ப ரகசியம்..

இன்றைய சூழலில் தஞ்சாவூர் நகருக்குள்ளும் பிரதான சாலைகள் பலவற்றில் கும்பகோணம் டிகிரி காபி என பற்பல கடைகள்.. ஒரே மாதிரியாகக் கிடைப்பதில்லை..

காஃபியை அளவுடன் அருந்தி வளமுடன் வாழ்ந்தவர்கள் பலர்..

நிரந்தர சுவை என்பது அவரவர்க்கே தெரிந்திருக்கும்..

கறக்கப்பட்ட பாலே கண்ணில் படாத போது டிகிரியாவது காப்பியாவது!..

இருந்தாலும் - வாழ்க காஃபி!..

= = = = = = =