அபாயகரமான டீல்

 

சென்ற வாரத் தொடர்ச்சியாக ஒரு விஷயம்...

என் மூட நம்பிக்கைகளில் ஒன்று இது..  அபாய நம்பிக்கை!  அல்லது அபாய பழக்கம்...

ஒரு பரீட்சை எழுத அல்லது ஒரு இன்டர்வியூ என்று செல்கிறேன் என்று வைத்துக் கொள்ளுங்கள்...  அல்லது ஏதோ ஒரு காரியத்தை வெற்றிகரமாக முடிக்கச் செல்கிறேன்..  அது எப்படி முடியும் என்று சந்தேகமும், பயமும் மனதில் இருக்கும் அல்லவா...

அதற்குச் செல்லும்போது இந்த மாதிரியான எண்களைக் கூட்டும்போது இது ஒன்பது வந்தால் நாம் இப்போது செல்லும் காரியம் வெற்றியடைந்து விடும் என்றோ,

இப்போது அடுத்ததே 12 பி பஸ் வந்து விட்டால் நான் போகும் காரியம் வெற்றி அடையும்...

பெரும்பாலும் அது நடக்க வாய்ப்பில்லாத விஷயங்களாகத்தான் இருக்கும்!  

இப்படி எல்லாம் அபாயகரமான டீல் இயற்கையோடு அல்லது கடவுளோடு போடுவேன்.  இது என் நம்பிக்கையை குலைக்கும் விதமாகவும் மாறும்.  இந்தப் பழக்கம் எப்படி வந்ததது என்று தெரியாமல், அதை நிறுத்த நான் பட்ட பாடு...!

=====================================================================================

பாரதியாரின் கையெழுத்தில் பிரசுரத்துக்கு வராத இரண்டு பக்கங்கள்.  நேற்று பாரதியாரின் பிறந்தநாள்.

=================================================================================================================

தாபத்தில் தவிக்கிறதா 

கோபத்தில் குமுறுகிறதா 

பசியில் உறுமுகிறதா 

பக்கத்தில் 

ஆள் இருக்கிறதா 

என்று சோதிக்கிறதா 

புரியவே இல்லை 

ரும்ரும் ரும் என்று 

நடுங்கி நடுங்கி 

புறா 

எதை வலியுறுத்துகிறதென்று 

காக்கைகளை விரட்டிக் 

களவாடித் 

தின்னும் உணவை 

கனவிலும் 

பகிர்ந்து கொள்வதில்லை 

மற்ற புறாக்களோடு 

===========================================================================================

NEWS ROOM

பானுமதி வெங்கடேஸ்வரன்

மாஸ்கோ: 'கிளர்ச்சியாளர்கள் தாக்குதலில் இருந்து தன்னை காப்பாற்றி கொள்ள, தப்பியோடிய சிரியா அதிபர் பஷார் அல் ஆசாத் ரஷ்யாவில் தஞ்சம் புகுந்துள்ளார். ஆசாத் குடும்பத்தின் அரண்மனையை கிளர்ச்சியாளர்கள் கைப்பற்றினர். [9-12-24]

- புதுடில்லி: இந்தியர்களை சட்டவிரோதமாக வெளிநாடுகளுக்கு அழைத்துச் சென்று சைபர் மோசடியில் ஈடுபட வைத்த கும்பலின் தலைவனை 2,500 கி.மீ., தூரம் விரட்டிச் சென்று டில்லி போலீசார் கைது செய்தனர்.  [9-12-24]

- டோக்கியோ: துணி துவைக்கும் இயந்திரம் போல, 15 நமிடங்களில் மனிதர்களை சுத்தப்படுத்தக்கூடிய வாஷிங் மெஷின் உருவாக்கி அசத்தி உள்ளது ஜப்பான் நிறுவனம்.  [9-12-24]

- புதுடில்லி: பீஹார் ரயில் நிலையத்தில் ஒரு வாழைப்பழத்துக்கு இரண்டு குரங்குகள் சண்டையிட்டதால், ரயில் சேவை நடவடிக்கைகள் பாதிக்கப்பட்டன.  [10 -12-24]

- புதுடில்லி:கடந்த 50 ஆண்டுகளில் இல்லாத வகையில் காபியின் விலை அதிகரித்துள்ளது என்ற செய்தி, காலையில் நாளேடுடன் காபியை ருசிப்பவர்களுக்கு, சற்று தலைவலியானது தான்.  [10-12-24]

- லக்னோ: உத்தரபிரதேசத்தில் மகளின் திருமண நேரத்தில் விபத்தில் உயிரிழந்த ராணுவ வீரரின் கடமையை, சக ராணுவ வீரர்கள் நிறைவேற்றி வைத்தார்.  [10-12-24]

- பெங்களூரு: அரசுத்துறை தேர்வுகளில் வினாத்தாள்களை மொழி பெயர்ப்பு செயலிகள் மூலம் மொழி பெயர்த்ததால் அதிகமான பிழைகள் ஏற்படுவதாக மாணவர்கள் குமுறல்.

- ஸ்வீடன் நாட்டைச் சேர்ந்த கரோலின்ஸ்கா மையம் ஓர் ஆராய்ச்சி மேற்கொண்டது. இதில் பொதுவாக இதய நோய்களுக்கு பரிந்துரைக்கப்படும் சில மருந்துகளை ஐந்து ஆண்டுகளுக்கு மேலாக எடுத்துக் கொண்டால் 'டிமென்ஷியா' முதலிய மூளை தொடர்பான நோய்கள் வரலாம் என்று தெரிய வந்துள்ளது.  ஆ.....!

- அமரன் திரைப்படத்தில் கதாநாயகி சாய்பல்லவியின் மொபைல் எண்ணாக காட்டப்பட்ட எண் சென்னையைச் சேர்ந்த பொறியியல் மாணவருக்கு உரியது. திரைப்படத்தில் கதாநாயகியின் எண்ணாக காட்டப்பட்டதிலிருந்து பல மாநிலங்களிலிருந்தும், வெளி நாடுகளிலிருந்தும் அவருக்கு அழைப்புகள் வந்த வண்ணமிருப்பதால் அவரால் நிம்மதியாக படிக்க முடியாமலும், தூங்க முடியாமலும் மன உளைச்சலுக்கு ஆளாகியிருக்கும் அந்த மாணவர் இது குறித்து சம்பந்தப்பட்ட ராஜ் கமல் பிலிம்ஸ் மற்றும் இயக்குனர் ராஜ்குமார் பெரியசாமிக்கு ரூ1.10 கோடி இழப்பீடு கேட்டு வழக்கு தொடர்ந்திருக்கிறார்.  

- திருநெல்வேலி: வித்தியாசமான நடைமுறையாக பெண் போலீஸ் அதிகாரிகள் இரவு ரோந்து பணியில் ஈடுபட, மாநில ரோந்து அதிகாரியாக இரவு ரோந்து பணியை கவனிக்க வேண்டிய உதவி கமிஷனர் செந்தில்குமார் அதைச் செய்ய வேண்டிய நேரத்தில் ஜங்ஷன் பகுதியில் ஒரு தியேட்டரில் புஷ்பா-2 திரைப்படம் பார்த்துக் கொண்டிருந்திருக்கிறார். அவரை வயர்லெஸ் மூலம் தொடர்பு கொள்ள முடியாமல், அவருடைய செல்ஃபோனில் தொடர்பு கொண்ட டி.ஐ.ஜி. மூர்த்தி என்பவரிடம் தான் தச்சநல்லூர் அருகே நிற்பதாக கூறியிருக்கிறார். ஆனால் செந்தில்குமாரின் ஜீப் சினிமா தியேட்டரில் நிற்பதை புகைப்படம் எடுத்து யாரோ டி.ஐ.ஜி.க்கு வாட்ஸாப்பில் அனுப்பியிருக்கின்றனர். இதனால் டி.ஐ.ஜி.யிடம் டோஸ் வாங்கினாராம் செந்தில்குமார். - வெளங்கிடும்.

- அமரன் படத்தில் இடம் பெற்ற மொபைல் ஃபோன் எண் மறைக்கப்பட்டு புது சான்றிதழ் வழங்கப்பட்டுவிட்டது. - சம்பந்தப்பட்ட படத்தயாரிப்பு நிறுவனம் அறிவிப்பு.

- கர்நாடகாவில் நாய்க்கடி அதிகரித்து வருகிறது. ஐந்து ஆண்டுகளில் 8.13 லட்சம் பேர் நாய்க்கடிக்கு ஆளாகி மருத்துவமனையில் சிகிச்சை பெற்றனர்.

- குஜராத்தில் 70,000 ரூபாய்க்கு போலி மருத்துவ டிகிரி விநியோகித்த கும்பல் மற்றும் அந்த டிகிரியை வைத்து கிளினிக் நடத்திய 14 போலி டாக்டர்களை போலீசார் கைது செய்தனர்.

- துபாயில் கூலி வேலை செய்து வரும் தீபக் குமார் என்னும் 24 வயது இளைஞர் பஞ்சாபின் மோகாவைச் சேர்ந்த மன்ப்ரீத் கவுர் என்னும் பெண்ணோடு இன்ஸ்டாகிராம் மூலம் பழக்கமாகி மூன்று வருடங்களாக பழகி வந்திருக்கிறார். நட்பு காதலாகி திருமணம் செய்து கொள்ள முடிவெடுத்தனர். இதற்காக பெண்ணின் பெற்றோரிடம் பேசி சம்மதம் வாங்கினார். டிசம்பர் ஆறாம் தேதி திருமணம் என்று முடிவு செய்யப்பட்டது.  திருமணத்திற்கு 50,000 ரூபாய் பற்றாக்குறை இருப்பதாக கூறி தீபக்கிடம் கேட்டிருக்கின்றனர். அவரும் அந்த தொகையை அனுப்பியிருக்கிறார்.   திருமணம் செய்து கொள்வதற்காக மணமகன் தீபக் தன் உறவினர்கள், நண்பர்கள், ஃபோட்டோ, வீடியோகிராபர்கள் புடை சூழ மோகாவிற்கு வந்திருக்கிறார். அங்கு அவரை வரவேற்க பெண் வீட்டார் ஒருவரும் வரவில்லை. செல்ஃபோனில் அழைத்தபொழுது அது ஸ்விட்ச் ஆஃப் செய்யப்பட்டிருக்கிறது. திருமணம் நடைபெற உள்ள 'ரோஸ் கார்டன் பேலஸ்' என்ற இடத்தைப் பற்றி விசாரித்த பொழுது அப்படி ஒரு இடமே இல்லை என்பது தெரிய வந்திருக்கிறது. தான் ஏமாற்றப்பட்டதை உணர்ந்த தீபக் போலீஸில் புகார் கொடுத்திருக்கிறார். - பாவம் பாவம் தீபக் குமாரன்.

- மும்பை: பருவநிலை மாற்றத்தை தாக்குப்பிடித்து அதிக மகசூல் தரக்கூடிய கோதுமை, நெல் உட்பட எட்டு தானிய ரகங்களை பாபா அணுசக்தி ஆராய்ச்சி மையம் அறிமுகம் செய்துள்ளது. 

- லக்கி பாஸ்கர் படத்தில் துல்கர் சல்மான் நடுத்தர குடும்பத்தை சேர்ந்தவராக நடித்திருப்பார். பின்னர் கார், வீடு என சொகுசான மனிதராக மாறி இருப்பார். ஆந்திர மாநிலம் விசாகப்பட்டினம் மஹாராணிபேட்டையில் உள்ள ஒரு பள்ளி விடுதியில் ஏராளமான மாணவர்கள் தங்கி உள்ளனர். அவர்களில் சரண் தேஜா, ரகு, கார்த்திக், கிரண்குமார் ஆகிய 4 பேர் பிரபல நடிகர் துல்கர் சல்மானின் நடிப்பில் வெளியான லக்கி பாஸ்கர் படத்தை பார்த்துள்ளனர்.அவரின் கதாபாத்திரம் 4 பேரையும் வெகுவாக ஈர்க்க, அவரை போல வசதிகளுடன் வாழ எண்ணி உள்ளனர். நாங்களும், கார், வீடு உள்ளிட்டவற்றை வாங்கி வருகிறோம் என்று நண்பர்களிடம் கூறிவிட்டு விடுதியில் இருந்து தப்பிச் சென்றிருக்கின்றனர்.

============================================================================================

குடிசை படத்திற்குப் பின்னர் அடுத்தடுத்த படங்கள்…

எனக்குத் தொடர்ந்து படங்கள் இயக்க ஆர்வம் இல்லை. சினிமா போதும் என்று நினைத்தேன். திரையுலகிலிருந்து விலகிக்கொள்கிறேன் என்று பத்திரிகையில் விளம்பரம் கொடுத்தேன். இருந்தும், கம்யூனிஸ்ட்டுகள் சிலர் என்னை வற்புறுத்தி, ஒரு படம் இயக்கச் சொன்னார்கள். டி.செல்வராஜ் எழுதிய ‘தேநீர்’ நாவலை அடிப்படையாகக் கொண்ட படம். அது ஒரு கசப்பான அனுபவம். படத்திலிருந்து வெளியேறி விட்டேன்.

பின்னர், தராசு ஷ்யாம் அந்தப் படத்தை முடித்து, ‘ஊமை ஜனங்கள்’ எனும் பெயரில் பெரிய அளவில் விளம்பரங்களுடன் வெளியிட்டார். இப்படிச் செய்வது ரசிகர்களைத் திசைதிருப்புவது போலாகிவிடும் என்று அவரிடம் சொன்னேன். அவர் கேட்கவில்லை. கடைசியில் படம் படு தோல்வி.

அதன் பிறகு நான்கு ஆண்டுகள் இடைவெளிக்குப் பின்னர் ‘ரெண்டும் ரெண்டும் அஞ்சு’(1988) படத்தை இயக்கினேன். அதுவெற்றிப்படம். அதிலும் ஒரு சிக்கல். படம் நன்றாக ஓடிக்கொண்டிருக்கும்போதே போட்ட பணம் வந்துவிட்டது என்று ஒருகட்டத்தில் விளம்பரத்தை நிறுத்தி விட்டார். அது படத்துக்குப் பின்னடைவாகிவிட்டது. அம்பிகா கதாநாயகியாக நடித்த கடைசிப் படம் அது.

என் படங்களுக்குக்கிடையில் நான்கைந்து வருடங்கள் இடைவெளி இருக்கும். இடைப்பட்ட காலங்களில் மீண்டும் பத்திரிகைகளில் வேலை பார்த்தேன். ‘பாரதி’, ’பாண்டவர் பூமி’ போன்றபடங்களைத் த்யாரித்த் ’மீடியா ட்ரீம்ஸ்’ நிறுவனத்தில் கூடவேலைபார்த்திருக்கிறேன். சொற்ப சம்பளம். ‘சர்வைவல்’ என்று ஒன்று இருக்கிறதே! ‘ரெண்டும் ரெண்டும் அஞ்சு’ படம் இயக்கி, மூன்று வருடங்களுக்குப் பிறகு ‘உச்சி வெயில்’ எடுத்தேன். விமர்சனரீதியாக நல்ல வரவேற்பைப் பெற்ற படம். அதுவும் தகவல் ஒலிபரப்புத் துறையால் பாதுகாக்கப்படுகிறது.

மீடியா ட்ரீம்ஸில் எம்.டி. சி.இ.ஓ.வாக இருந்த ராஜா வைத்தியநாதன் எனக்கு நல்ல நண்பர். தற்போதைய தலைமைச் செயலாளர் கிரிஜா வைத்தியநாதனின் கணவர். அவர் தான், பின்னாட்களில் ‘நண்பா நண்பா’(2002) படத்தைத் தயாரித்தார். என் வாழ்க்கையில் எந்தப் பிரச்சினையும் இல்லாமல் நான் இயக்கிய ஒரே படம். நான் நினைத்ததை என்னால் எடுக்க முடிந்தது. முழு ஒத்துழைப்பு கொடுத்தார் ராஜா வைத்தியநாதன்.

அதன் பின்னர் 2006-ல் சத்யராஜ், ரோஜா நடித்த ’குருஷேத்திரம்’ படம் இயக்கினேன். அந்தப் படத்தின்போதும் பல பிரச்சினைகளை, மிரட்டல்களைச் சந்திக்க நேர்ந்தது. அதுவும் தோல்விப் படம்தான். அந்தப் படத்தில் வடிவேலுவின் நகைச்சுவைக் காட்சிகளையும் இணைத்துவிட்டார் தயாரிப்பாளர்.

முதலில் வடிவேலுவுக்கு என்னைத் தெரியவில்லை. பின்னர்தான் ‘நண்பா நண்பா படத்தில் சந்திரசேகருக்கு தேசிய விருது வாங்கிக் கொடுத்தவர்’ என்று யாரோ சொன்ன பின்னர், என்னிடம் வந்து ”சந்திரசேகருக்கே அவார்டு வாங்கிக் குடுத்திருக்கீங்க. எனக்கு ஒண்ணு வாங்கிக் குடுங்கண்ணே” என்றார். நடிகர் விவேக் என் படத்தில் நடிக்க வேண்டும் என்று ஆசைப்பட்டார். அவரது நண்பர் ஒருவர் படத்தைத் தயாரிப்பதாகச் சொல்லி, கடைசியில் அதுவும் நடக்காமல்போனது. இப்படிப் பல அனுபவங்கள்.

‘புத்திரன்’ படத்தில்

‘புத்திரன்’ படம் எப்படி உருவானது?

குழந்தைத் தொழிலாளர்கள், குழந்தைகள் மீதான வன்முறை ஆகியவற்றை ஆவணப்படுத்தும் படம் எடுக்க நினைத்திருந்தேன். ஒய்.ஜி.மகேந்திரன் நகைச்சுவை நடிகர் என்றே அறியப்படுவதில் அவரது மனைவிக்கும் மகளுக்கும் வருத்தம். அவரை அந்தப் படத்தில் பிரதான வேடத்தில் நடிக்க வைத்தேன். அவரும் சங்கீதாவும்தான் தெரிந்த நடிகர்கள். மற்ற அனைவரும் புதுமுகங்கள். அந்தப் படத்தை இயக்குவதிலும் பல்வேறு சிரமங்களை அனுபவித்தேன்.

ஒய்.ஜி.மகேந்திரனின் மும்பை நண்பர் ஒருவர் படத்தைத் தயாரிக்க முன்வந்தார். அவ்வப்போது தயாரிப்புச் செலவுக்குப் பணம் அனுப்பினார். 12 நாட்களில் படப்பிடிப்பை முடித்துவிட்டேன். ஆனால், அதன் பிறகு குடும்பத்தில் பிரச்சினை என்று சொல்லிப் பணம் அனுப்புவதை அவர் நிறுத்திக்கொண்டார். படத்துக்கு மூன்று விருதுகள் கிடைத்திருப்பதில் மகிழ்ச்சி!

மாற்று சினிமா முயற்சிகளுக்கு இப்போது எந்த அளவுக்கு வரவேற்பு இருக்கிறது?

அதுபோன்ற படங்களைத் தயாரிக்க எந்தத் தயாரிப்பாளரும் முன்வருவதில்லை. “நான் பத்து ரூபாய் போட்டால் பதினைந்து ரூபாய் கிடைக்கும். டெல்லியிலிருந்து அவார்டு வாங்கி வைத்துவிட்டால் எனக்கு என்ன கிடைக்கும்?” என்று கேட்ட தயாரிப்பாளர்களை எனக்குத் தெரியும். “ஐந்து வரியில் கதை சொல்ல முடியுமா?” என்று கேட்பார்கள். ஏனென்றால் அவர்களுக்கு அதைத் தவிர வேறு வேலைகள் நிறைய இருக்கின்றன பாருங்கள்!

புதிய தலைமுறை இயக்குநர்கள் பற்றிச் சொல்லுங்கள்…

இயக்குநர்கள் எங்கே இருக்கிறார்கள்? பெரிய நடிகர்களின் கால்ஷீட் கிடைத்தால் போதும் என்று இருக்கிறார்கள். சினிமா என்பது இயக்குநரின் ஊடகம். நடிகன் என்பவன் ஒரு ‘பப்பெட்’. ஒரு பொம்மை. அவ்வளவுதான்!

இதுபோன்ற படங்களுக்கு அரசு வேறு எந்த மாதிரியான ஆதரவைத் தர முடியும்?

இதுபோன்ற மாற்று முயற்சிகளுக்கு விருதுகள் வழங்குவது வரவேற்கத்தக்கது. இதைத் தாண்டி இன்னும் சில விஷயங்களை அரசு செய்ய முடியும். உதாரணத்துக்கு, மாற்று சினிமா, கலைப் படங்களைத் திரையிடுவதற்கென்றே கொல்கத்தாவில் அரசு சார்பில் ‘ரவீந்திர சதன்’ எனும் மினி திரையரங்குகள் உருவாக்கப்பட்டிருக்கின்றன200 அல்லது 300 இருக்கைகள் இருக்கும். இலவசமாகப் பாருங்கள் என்று சொன்னால், அந்தப் படங்களுக்கு மதிப்பு இருக்காது என்று குறைந்தபட்சக் கட்டணம் வசூலிக்கப்படுகிறது. வங்க மொழிப் படங்கள் மட்டுமல்லாமல் பிற மொழிப் படங்களும் திரையிடப்படுகின்றன. அதுபோன்ற முயற்சியைத் தமிழக அரசும் மேற்கொள்ளலாம். கல்லூரி, பள்ளி மாணவர்கள் என்று அனைத்துத் தரப்பினரிடமும் மேம்பட்ட சினிமா ரசனையை உருவாக்க முடியும்!

பேட்டி முடிந்தபோது தேநீர், பலகாரத்துடன் வந்த அவரது மனைவியை அறிமுகப்படுத்தினார். “என் மனைவி. அவர் போட்டிருந்த நகைகளையெல்லாம் ‘புத்திரன்’ படத்துக்காக விற்று விட்டேன்” என்றார் புன்னகை மாறாத முகத்துடன்.

-இயக்குநர் ஜெயபாரதி பதில்

நன்றி: இந்து தமிழ் திசை

====================================================================================

என்னுடைய மகன் நந்தன் மற்ற குழந்தைகளைப் போல கிடையாது. பள்ளியிலிருந்து வந்த உடனே பாராளுமன்றத்தில் நடந்த உரைகளை எல்லாம் கேட்பான். அதைப் பார்க்கும்போது எனக்கு ஆச்சரியமாக இருக்கும். 12 வயதிலேயே நந்தன் மூலதனம் என்ற புத்தகத்தை எடுத்து வாசிப்பான். ஒருநாள் கையில் புத்தகங்களை எடுத்துக்கொண்டு அவனாகவே சி.பி.எம் அலுவலகத்திற்குச் சென்றுவிட்டான்.

நந்தன் குறித்து சொன்னது:

.மேலும், அங்கிருப்பவர்கள் இவன் காரில் வருவதை பார்த்து விடக்கூடாது என்பதற்காக காரை வேறு ஒரு இடத்தில் பார்க்க செய்ய சொல்லி அலுவலகத்திற்கு சென்று விட்டான். அவர்கள் இவனை யார்? எங்கிருந்து வருகிறார்? என்றெல்லாம் கேட்கவில்லை. முதலில் அவர்கள் கேட்டது சாப்டியா? என்று தான் கேட்டார்கள். இதுதான் கம்யூனிஸ்ட் கட்சியினுடைய சிறப்பே. சாப்பிட்ட பின்பு தான் நந்தன் கட்சியின் செயலாளர்களை சந்தித்து பேசினான் .

அப்போது அவர்கள் தந்தையின் பெயரை கேட்டு இருக்கிறார்கள். அதற்கு நந்தன் மணிரத்தினத்தின் உண்மையான பெயரான கோபால ரத்தினம் சுப்பிரமணியம் என்ற பெயரை கூறியிருக்கிறான். என் பெயரையும் சேர்த்து கூறிய பிறகுதான் அவன் மணிரத்தினம்- சுகாசினியின் மகன் என்று பலருமே அடையாளம் கண்டு கொண்டார்கள். அதற்கு பிறகு தான் அவன் சிபிஎம் கட்சியின் உறுப்பினராக மாறினான் என்று கூறியிருக்கிறார் நடிகை சுகாசினி.

நன்றி: Behind Talkies

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

=========================================================================================================

*எழுதியது இப்படித்தான்!*

*திருப்பூர் கிருஷ்ணன்*

......................

உண்மையிலேயே எப்படித்தான் இத்தனை நன்றாகவும் இவ்வளவு அதிகமாகவும் எழுதிக் குவித்தார்களோ என்று காலஞ்சென்ற பிரபல எழுத்தாளர்கள் பலரைப் பற்றி வாசகர்கள் எண்ணியெண்ணி வியக்கிறார்கள். 

அந்தக் கடின உழைப்பு ஒருநாளில் வந்ததல்ல. பல்லாண்டுகள் நாள்தோறும் தொடர்ந்து எழுதியதால்தான் அத்தனை படைப்புகளை அவர்களால் படைத்து வாசகர்களை பிரமிக்க வைக்க முடிந்தது. 

இன்று கணிப்பொறி வசதி இருக்கிறது. எழுதித் தள்ளலாம். எழுதியவற்றை முன்பின்னாக மாற்றி வரிசைப்படுத்தலாம். பாதுகாத்து வைத்துக் கொள்ளலாம். எளிதாய்ப் பிரதி எடுக்கலாம். 

முன்னர் கையெழுத்தில் எழுதிய எழுத்தாளர்களுக்கு இந்த வசதி எல்லாம் கிடையாது. ஆனாலும் இன்று எழுதுபவர்கள் வியக்கிற அளவு, அன்று எழுதியவர்கள் எழுதிக் குவித்தார்கள். தரமாக எழுதியதோடு அதிகமாகவும் எழுதினார்கள். 

தீபம் நா. பார்த்தசாரதி தம் ஐம்பத்து நான்கு வயது ஆயுளுக்குள் எழுபத்தைந்துக்கும் மேற்பட்ட பெரிய பெரிய படைப்புகளை எழுதித் தற்காலத் தமிழிலக்கியத்தை அணி செய்தார். 

அவர் எதையும் ஒரு தடவைக்குமேல் மாற்றி எழுதியது கிடையாது. காலை நான்கு மணிக்கெல்லாம் எழுந்து விடுவார். 

பல் துலக்கிக் காப்பி குடித்துவிட்டு, கணக்குப் பிள்ளை மேசைமுன் அமர்ந்து அந்த மேசையில் காகிதத்தை வைத்துக் கொண்டு பேனாவால் எழுதத் தொடங்கினால் சுமார் மூன்று மூன்றரை மணிநேரம் அவரது அன்றைய எழுத்துப் பணி நடக்கும். 

ஒரு சிறுகதையோ, தொடர்கதையின் ஓர் அத்தியாயமோ முழுவதுமாக எழுதி முடித்துவிட்டுத்தான் இடத்தை விட்டு எழுவார். நாள்தோறும் எழுதியவர் அவர்.

பிறகு தன் நாய் சீசருடன் நடைப் பயிற்சிக்குச் செல்வார். (குமுதம் நிருபர் பால்யூ, நா.பா.வின் நாயைப் பற்றிக் குமுதத்தில் துணுக்கு வெளியிட்டார்.) 

நடைப்பயிற்சி முடிந்து திரும்பிவந்த பிறகு, தான் அன்று எழுதியதை மீண்டும் ஒருமுறை படித்துப் பார்ப்பார். 

ஏதாவது சிறிய திருத்தங்கள் இருக்குமானால் அந்த இடத்தில் மட்டும் அம்புக் குறி போட்டோ பிளேடால் சுரண்டி எழுத்துகளை எடுத்துவிட்டோ திருத்தத்தைச் சேர்த்து விடுவார். பெரும்பாலும்  திருத்தங்களே இருக்காது. 

தன் எழுத்தை அவர் கையாள்கிற முறை, ஏதோ வானத்திலிருந்து வந்த பவித்திரமான பிரசாதத்தை பக்தியோடு கையாள்வது மாதிரி இருக்கும். அவர் எழுத்தின்மேல் அவருக்கு அத்தனை மதிப்பு, நம்பிக்கை. எடிட்டிங் என்ற பெயரில் தன் எழுத்தில் யாரும் கைவைப்பதை அவர் ஒருபோதும் அனுமதித்ததில்லை.                                                                                                                                                                             சம்பந்தப்பட்ட பத்திரிகை அலுவலகத்திற்குத் தொடர்புகொண்டு, `படைப்பு தயாராக இருக்கிறது, பணியாள் மூலம் பெற்றுக் கொள்ளலாம்` என்று தொலைபேசியில் தகவல் சொன்னார் என்றால், அன்றைய எழுத்துப் பணி அதோடு நிறைவு பெற்றுவிட்டது என்று பொருள். இப்படி ஒவ்வொரு நாளும் எழுதியவர் அவர்.  

ஆனால் எழுத்தாளர் சுஜாதாவின் போக்கு வித்தியாசமானது.  நான் நா.பா., சுஜாதா இருவரிடமும் பணியாற்றியிருக்கிறேன். சுஜாதா தன் எழுத்தை எடிட் செய்ய வேண்டிய தேவையிருந்தால் எந்தச் சிணுக்கத்தையும் வெளிப்படுத்த மாட்டார்.

`நீங்க தான் எடிட்டர், நீங்கதான் எடிட் பண்ணணும். எழுதினவனே எடிட் பண்றது சிரமம். நீங்க என்னை விட நல்லா எடிட் பண்ணுவீங்க!` என்று தன் எழுத்தை எடிட் செய்ய முழு உரிமை கொடுப்பார் அவர்.  

நா.பா.வின் கையெழுத்து முத்துமுத்தாய் அச்சுக் கோத்தது போல் இருக்கும். தமது பொன்விலங்கு நாவலில் கதாநாயகியான மோகினியின் கையெழுத்தைப் பற்றி, `தேர்ந்து பழகின கை பூத்தொடுத்தது மாதிரியான கையெழுத்து` என்று நா.பா. வர்ணிப்பாரே? அந்த வர்ணனை அப்படியே அவர் கையெழுத்துக்கும் பொருந்தும். 

தம்மைச் சார்ந்தவர்களின் கையெழுத்தும் திருத்தமாக இருக்க வேண்டும் என்று நா.பா. எதிர்பார்ப்பார். தீபம் சார்பாக அதில் பணிபுரிபவர் எந்த எழுத்தாளருக்குக் கடிதம் எழுதினாலும், அந்தக் கையெழுத்தே தீபத்தின்மேல் ஒரு மரியாதையைத் தோற்றுவிக்க வேண்டும் என நா.பா. எண்ணுவதுண்டு.

தீபம் அலுவலகத்தில் புதிதாகப் பணியில் சேர்ந்த ஒரு துணையாசிரியரின் கையெழுத்து மிகவும் சுமார். அவர் ச என்ற எழுத்தை எழுதினால் அதைச் சரியாக எழுதாமல் சற்றே வளைத்து விடுவார்.   அது `க`வைப் போல் தோற்றமளிக்கும். 

சகரத்திற்கும் ககரத்திற்கும் வித்தியாசம் காண முடியாத கையெழுத்து அவருடையது. 

சொல்லிச் சொல்லிப் பார்த்தார் நா.பா. அவர் தம் கையெழுத்தைத் திருத்திக் கொள்வதாக இல்லை. ஒருநாள் நா.பா.வுக்குக் கடும் கோபம். `என்னய்யா இவ்வளவு சொல்கிறேன்? தொடர்ந்து இப்படியே எழுதுகிறீர்களே? உங்களுக்குச் `சா - வே வராதா?` என்றார்! 

பிறகுதான் அவர் சொன்ன வாக்கியத்தின் விபரீத அர்த்தம் அவருக்குப் புரிய அவர் திகைத்தார். அவரால் கண்டிக்கப் பட்டவர் உள்பட அனைவரும் சிரித்து மகிழ்ந்தோம். 

நா.பா. கையெழுத்தைப் போலவே அழகான கையெழுத்து வல்லிக்கண்ணன், தி.க.சி. இருவருக்கும் உண்டு. அவர்கள் தங்கள் அழகிய கையெழுத்தால் நாள்தோறும் குறைந்தது பத்து கடிதமாவது எழுதிக் கொண்டிருந்தார்கள்.

அவர்களின் பாராட்டுக் கடிதங்களைப் பெற்ற இளம் எழுத்தாளர்கள் அடைந்த மகிழ்ச்சியும் உற்சாகமும் கொஞ்ச நஞ்சமல்ல. 

நா.பா. கையெழுத்துக்கு நேர் எதிரானது பிரபல எழுத்தாளரும் பத்திரிகையாளருமான துமிலன் கையெழுத்து. தினமணிகதிரின் முன்னாள் ஆசிரியர் அவர். 

ஒருமுறை அவர் எழுதிய கட்டுரையில் ஒரு வார்த்தை புரியாததால் அது என்ன என்று அவரிடமே கேட்டேன். 

`நான் எழுதிய பிறகு அது என்ன என்று எனக்கே புரியவில்லை, உங்களுக்கு என் கையெழுத்து பரிச்சயம் என்பதால் உங்களிடம் அந்த வார்த்தை என்ன என்று கேட்டுக்கொள்ளலாம் என்றல்லவா நினைத்தேன்?` என்றார் அவர்!

ஜெயகாந்தன் ஒரு படைப்பை முழுமையாக முதல் முறையிலேயே எழுதிவிட மாட்டார். பத்திரிகைக்குப்  படைப்பை அனுப்பி , அதன் அச்சுக் கோக்கப்பட்ட முதல் பிரதியைக் கேட்டு வாங்குவார். 

பிறகு, படைப்பின் இரு பக்கங்களிலும் ஆங்காங்கே வார்த்தைகளை எழுதி எழுதிச்  சேர்ப்பார். அவர் படைப்பின் இறுதி வடிவம் வருவதற்குள் இதுபோல் பலமுறை அவர் வார்த்தைகளைச் சேர்த்துக் கொடுப்பார். 

அவரின் முதல் பிரதி ஐந்து பக்கங்கள் இருந்தால், நிறைவுப் பிரதி சுமார் எட்டுப் பக்கங்களாக வளர்ந்து மாறியிருக்கும். அவர்  படைப்பு புதிய பிரகாசத்தோடு ஒளிவீசும். 

ஒருவர் தாம் எழுதியதை எப்படியெல்லாம் மெருகேற்றி உயர்த்த முடியும் என்பதை ஜெயகாந்தனிடமிருந்து கற்றுக் கொள்ள வேண்டும்.  

ஜெயகாந்தன் தம் சிறுகதைகளின் நிறைவுப் பகுதியை ஒரு வேகத்தில் முதலிலேயே எழுதிவிட்டு, பிறகு சிறுகதையின் தொடக்கப் பகுதிகளை எழுதுவதுண்டு என்று சொல்லியிருக்கிறார். 

 என் இனிய நண்பரும் கொல்லிப்பாவை என்ற சிற்றிதழின் ஆசிரியரும் தினமணி முன்னாள் துணையாசிரியருமான கவிஞர் ராஜமார்த்தாண்டன் ஒருமுறை ஜெயகாந்தனைப் பேட்டி கண்டார். 

அந்தப் பேட்டியில் `சிறுகதை என்பது உரைநடையால் ஆக்கப்படும் கவிதை` என்று சொன்னார் ஜெயகாந்தன். அந்தக் கூற்று அவர் சிறுகதைகளுக்கு முற்றிலும் பொருந்தும். அவர் சிறுகதைகள் ஒவ்வொன்றுமே உரைநடைக் கவிதைகள் தான்.

லா.ச.ராமாமிருதம் தன் படைப்புகளையெல்லாம் ஒருமுறை அல்ல, பலமுறை, சிலநேரம் பத்துப் பதினோரு முறைகூட மாற்றியும் திருத்தியும் எழுதுவதுண்டு என்று சொல்லியிருக்கிறார். அவர் ஒரே முறையில் எழுதிய படைப்பு என்று எதுவுமில்லை. 

பூரணத்துவத்தை நேசிப்பவர் அவர். அதனால்தானோ என்னவோ அவர் படைப்புகள் மின்னல் கீற்றாக ஆங்காங்கே பளிச் பளிச் என ஒளிவீசும் தத்துவ தரிசனங்களோடு படிப்பவர்களைப்  பரவசத்தில் ஆழ்த்தும். 

தி. ஜானகிராமன் எழுதுவது ஒரே ஒருமுறைதான். அதுவே முழுமையான நிறைவுப் பிரதிபோல இருக்கும். தினமணிகதிரில் அவர் எழுதிய `செம்பருத்தி` தொடர்கதை, `அபூர்வ மனிதர்கள்` கட்டுரைத் தொடர் எல்லாமே கதிர் அலுவலகத்தில் வந்து அமர்ந்து அங்கேயே எழுதிக் கொடுத்ததுதான். 

எழுதியபிறகு எடிட் செய்ய வேண்டாமா என்று கேட்பேன் நான். தன் தலையைத் தொட்டுக் காட்டி, சிந்திக்கிற போதே எடிட் செய்து கொண்டுவிட்டேன் எனச் சொல்லிப் புன்முறுவல் பூப்பார் அவர். 

மேலே மின்விசிறியின் ஒலி, சுற்றிலும் பணியாளர்கள் பேசுகிற  ஒலி, பலரின் நடமாட்டம், மிஷின் சப்தம் எதுவும் அவரை பாதிக்காது. அத்தனைக்கும் நடுவில் உட்கார்ந்துதான் தன் அபூர்வ இலக்கியத்தைப் படைத்தார் அவர். 

சுற்றிலும் உள்ள சப்தங்கள் உங்களை பாதிக்காதா என்றால், நாம் மன ஒருமைப்பாட்டோடு ஒரு செயலைச் செய்யத் தொடங்கினால் எந்த சப்தமும் நம் காதிலேயே விழாது என்பார் நகைத்துக் கொண்டே. 

பொதுவாக தொடர்கதை எழுத்தாளர்கள் அந்தந்த வார அத்தியாயத்தை அந்தந்த வாரம்தான் எழுதி அனுப்புவார்கள். ஆனால் ராஜம் கிருஷ்ணன், ர.சு. நல்லபெருமாள் இருவரும் இந்தப் போக்கிற்கு விதிவிலக்கு. 

அவர்களிடம் தொடர்கதை கேட்டால் கொஞ்சம் கால அவகாசம் எடுத்துக் கொண்டு முழுக் கதையையும் முழுமையாக எழுதி அனுப்பி விடுவார்கள். 

பத்திரிகைகளுக்கு அது மிகவும் வசதி. முன்கூட்டியே அத்தியாயங்களை கோபுலு, மாருதி, மணியம்செல்வன் போன்ற ஓவியர்களுக்கு அனுப்பி ஓவியம் வாங்கி வைத்துக் கொள்ள முடியும். பத்திரிகையாளர்களின் கடைசி நேரப் பரபரப்பு கொஞ்சம் குறையும். 

ராஜம் கிருஷ்ணன் தனது `மண்ணகத்துப் பூந்துளிகள், பாதையில் பதிந்த அடிகள்` போன்ற தொடர்களை நான் தினமணிகதிரில் பணிபுரிந்தபோதுதான் எழுதினார். தினமணியில் என்னுடன் பணிபுரிந்த நண்பர் சிகாமணி, ராஜம் கிருஷ்ணனின் கள ஆய்வுகளுக்கு உடன் சென்று உதவியிருக்கிறார். 

ர.சு. நல்லபெருமாளின் `தூங்கும் எரிமலைகள்` என்ற முற்பட்ட சமூகத்தினரின் பிரச்னைகளைப் பேசும் சமூகத் தொடர்கதை, `மருக்கொழுந்து மங்கை` என்ற சரித்திரத் தொடர்கதை இரண்டுமே நான் தினமணிகதிரில் பணிபுரிந்த காலத்தில் தொடராக வந்து பெரும்புகழ் பெற்றன.  

பி.வி.ஆர். வாராவாரம் தொடர் அத்தியாயத்தை எழுதி அனுப்புகிறவர். முழு வெள்ளைத் தாளில் எழுதாமல் அதன் பாதிக் காகிதத்தில் எழுதி, அந்தப் பாதித் தாள்களைப் பக்க எண் போட்டு குண்டூசியால் இணைத்து அனுப்புவார். 

ஏன் பாதிக் காகிதத்தில் எழுதுகிறீர்கள் என அவரைக் கேட்டேன். 

`நான் காலையில் எழுந்ததும் அத்தியாயத்தை எழுதி விட்டு நடைப் பயிற்சிக்குப் போவேன். பின் திரும்பி வந்து நான் எழுதியதைப் படித்துப் பார்த்துத் திருத்துவேன். அதிகத் திருத்தங்கள் இருக்கும் பக்கத்தை மட்டும் பிரதியெடுத்து முன்னுள்ளதை நீக்கிவிட்டு புதுப் பிரதியை இணைப்பேன். 

முழுக் காகிதத்தில் எழுதினால் முழுக் காகிதத்தையும் அல்லவா பிரதியெடுக்க வேண்டும்? என் மறு உழைப்பின் அளவைக் குறைத்துக் கொள்ளவே இந்த ஏற்பாடு!` என்றார் அவர்!

மிகச் சில எழுத்தாளர்கள் சொல்லி எழுதியவர்கள். நூற்றுப் பதினேழு நாவல்களை எழுதிய வை.மு. கோதைநாயகி தன் தொடக்க  கால நாவல்களைப் பட்டம்மாள் என்ற தன் தோழியிடம் சொல்லி அவர் மூலம்தான் எழுதச் செய்தார்.

காரணம் அப்போது வை.மு. கோதைநாயகிக்குத் தமிழ் எழுதப் படிக்கத் தெரியாது! பேச மட்டும்தான் தெரியும். தன் எழுத்து பிரபலமாகவே பின்னர் தன் கணவர் உதவியுடன் எழுதப் படிக்கக் கற்றுக் கொண்டார் அவர்.

சொல்லி எழுதியவர்களில் மிக முக்கியமான எழுத்தாளர் கவியரசு கண்ணதாசன். இலக்கணக் கட்டோடு கூடிய மரபுக் கவிதைகளைக் கூட அவர் கடகடவெனச் சொல்லி எழுதச் செய்தார் என்றால் அவரின் ஆற்றல் வியக்க வைக்கிறது. 

தினமணிகதிரில் சாவி ஆசிரியராக  இருந்தபோது அவர் எழுதிய அர்த்தமுள்ள இந்துமதம் என்ற  புகழ்பெற்ற  தொடர்,  தன் உதவியாளரிடம் அவர் சொல்லி எழுதியதுதான். 

இப்போது சொல்லி எழுதும் செயலி வந்துவிட்டது. அதைக் கணிப்பொறியில் பதிவிறக்கம் செய்து வைத்துக் கொண்டால் நாம் சொல்லச் சொல்ல, நாம் சொல்வதை அது எழுதிக் கொடுத்துவிடுகிறது. 

சொல்லி எழுதும் எழுத்துப் பரம்பரைக்கு வியாசர்தான் முன்னோடி. அவர் சொல்லிச் சொல்லி விநாயகர் எழுதியதுதானே மகாபாரதம்?

எழுத்தாளர்கள் பத்திரிகையின் பக்க நெருக்கடிகளைப் புரிந்து கொள்ளாமல் சிரமம் தருவதும் உண்டு. முப்பது பக்கங்களுக்கும் குறைவாக மாதந்தோறும் வெளிவரும் ஒரு சிற்றிதழுக்கு ஓர் எழுத்தாளர் குறுநாவல் ஒன்றை அனுப்பி விட்டார். 

அந்தச் சிற்றிதழில் பக்கங்கள் மிகவும் குறைவு என்பதால் குறுநாவலை வெளியிட வாய்ப்பே இல்லை. 

அதன் ஆசிரியர், பக்க அளவு மிக அதிகமாக உள்ளதால் குறுநாவலை வெளியிட இயலவில்லை என்ற குறிப்போடு எழுத்தாளருக்கு அந்தப் படைப்பைத் திரும்ப அனுப்பினார். 

இதுவல்ல செய்தி. இதன் பிறகு வருவதுதான் செய்தி. அந்த எழுத்தாளரிடமிருந்து உடனே ஒரு கடிதம் வந்தது. அதில் அவர் எழுதியிருந்தது இதுதான்: 

`என் குறுநாவலை வெளியிட இயலவில்லை என்று திரும்ப அனுப்பி விட்டீர்கள். நன்றி. உடனே என்  சந்தாத் தொகையையும் திரும்ப அனுப்ப வேண்டுகிறேன்!`

எழுத்தாளர் சிட்டி பி.ஜி. சுந்தரராஜன் குறும்புப் பேச்சுக்குப் புகழ்பெற்றவர். அவர் வணிக ரீதியாக வெற்றி பெற்ற ஒரு பிரபல பத்திரிகை ஆசிரியரைச் சந்தித்தார். 

அந்தப் பத்திரிகை ஆசிரியர் `எங்களுக்கென்று ஒரு பாணி இருக்கிறது. அந்தப் பாணியில் அமைந்த சிறுகதைகளைத் தான் நாங்கள் வெளியிடுவோம்!` என்று பெருமிதத்துடன் தெரிவித்துக் கொண்டார். 

அதற்கு சிட்டி சொன்ன பதில் இலக்கிய உலகில் புகழ்பெற்றது. சிட்டி என்ன சொன்னார் தெரியுமா?

`நல்லது. உங்கள் பாணிக் கதைகளையே தொடர்ந்து வெளியிடுங்கள். ஆனால் அவ்வப்போது நல்ல கதைகளையும் வெளியிடுங்களேன்!`

 எழுத்து மட்டுமல்ல, எழுத்துலகமும் சுவாரஸ்யமானது தான்! 

(நன்றி: ஓம் சக்தி தீபாவளி மலர் 2024)

===============================================================================================================​

பொக்கிஷம்  :

ஆங்காங்கே முகநூலில், இணையத்தில் பார்த்த சிலபல மதன் ஜோக்ஸை இந்த வாரம் வெளியிடுகிறேன்.  ரிப்பீட்ஸ் இருக்கலாம்.  ஆனாலும் ரசிக்கலாம்!